Mʉ̃ra tosida Calgaryde Albertade (Canadá). Mʉ̃ wikabʉeda mʉ̃ yibarirãra yi idubʉsida maʉ̃ kʼarea daira wãsi mʉ̃ zezonainʉ akʉza mʉ̃ payoraidu, ãya daira mejãcha kãgabasi, mama ũdusi mʉ̃ara aduʼa bʼaita akʉza sobia bʼaita, mʉ̃a maʉ̃ ewari kĩrãbebʉrʉdera sobiabʉ.

 Mʉ̃ 7 poaga babʉrʉde mʉ̃ bebʉra jipa awuara besi. Mʉ̃ yibarirãra jẽda yi edasida, daira wãsi San Luisʼeda Missouri (Estados Unidos). Mʉ̃a kʼawuasi mʉ̃ zezera jipa ẽbẽra kayirua baseabasita. Bari jaradaita, mʉ̃ ewari aba mʉ̃ kolegiode deda urude, mʉ̃ zezeba kʼawuasi mʉ̃ra warraraba posidata, maʉ̃ kʼarea iya mʉ̃ra deda audre po jidasi. Mʉ̃a warrarata po ẽ basi baera mʉ̃ poda kʼarea, mamaʉ̃ba yẽta mʉ̃ra yõmia ba jʉ̃drʉsi.

 Mʉ̃ zeze mejãcha kĩrʉbadaba abarika mʉ̃ papasida kĩrʉ jʉ̃drʉsi, iyiʉ̃me mejãcha kĩrʉbasi akʉza bedʼeakapanasi. Maʉ̃ kʼarea mʉ̃ 11 poaga babʉrʉde chirua kayirua bʉratʉmata akʉza ituata do jʉ̃drʉsi. Ewari berabari wãne mʉ̃ra mejãcha yõmia ba wãsi akʉza deda ba bari ẽ basi. Mʉ̃ kolegio jõsidera audre ẽbẽra kayirua ba zesi.

 Mʉ̃ 18 poagabaside wãsi Infantería de Marina de Estados Unidosʼeda mʉ̃ra yõmiabasi, mamina mama kʼawuasi ẽbẽrarã sãwũã bea kʼawuaita 5 poaga berabarida tẽã gorogororane eda badata idubʉsi Psicología estudiaita. Mʉ̃a maʉ̃ra estudiasi FBI de trajaita, nãã estudia jʉ̃drʉsi Estados Unidosde maʉ̃are Canadáde.

 Mʉ̃ unibersidaeda jʉ̃ẽside audre sopʉasi, mʉ̃a ũdusi baera ẽbẽrarãra ãyitrʉ kãgabasita, mʉ̃a kʼawuasi ẽbẽrarãbara bedʼea zromara taʉbi ẽãta akʉza ẽbẽrarãbara nekʼãrẽ biata zebi ẽãta.

 Mʉ̃a ũduside mʉ̃ bebʉra kʼãrẽ ẽ kĩrãkʼa, audre chirua kayirua bʉratʉmata do jʉ̃drʉsi akʉza ituata, adewara krĩchabasi platata audre jʉrʉita akʉza wẽrãrabawara kʼãĩta. Mʉ̃ra piestaza wãbasi akʉza wẽrãrabawara ãba kʼãĩbasi. Mʉ̃ra gorogororane edabasi baera, krĩchabasi kʼãrẽ berabari ẽãta, maʉ̃ba audre yõmia ba wãsi. Mʉ̃a ũdubaside ẽbẽra abaʉba pobʉta, mʉ̃ra jari yi ẽbẽra pobʉme yõbasi yi ẽbẽra zʉbʉriabʉ kʼarebaita, mʉ̃ra jipa yõmiabasi.

 Ewari aba mʉ̃ta mʉ̃ neũdukʼawuaʉ̃me deda chirua kayirua bʉratʉmata mejãcha do jʉ̃drʉsida, maʉ̃ne daiba erpanasi maʉ̃ chirua kayirua bʉratʉmara ʉ̃kʉrʉta nẽdoita, maʉ̃ne mʉ̃ neũdukʼawuaba widisi Daizeze bʉ ĩjãbʉ kʼawuaita, mʉ̃a jarasi: «Ẽbẽrarãta Daizezeba zʉbʉria obʉbʉrʉ mʉ̃a kʼawuakĩrã ẽ iyi ʉ̃rʉra». Maʉ̃ nrʉema Jeowa ʉ̃rʉ Kʼawuabipanʉrã mʉ̃me trajabʉba mʉ̃aʼa widisi: «¿Bʉmara Daizezeba zʉbʉriabibʉka ẽbẽrarãra naʉ̃ drʉadera?». Mʉ̃a nãã maʉ̃ bedʼeata widibarisida baera, audre kʼawuakĩrãbasi maʉ̃ ʉ̃rʉ, maʉ̃ne mʉ̃ra Daizeze Bedʼeata akʉ jʉ̃drʉsi jedeko 6 bayeda akʉza Daizeze Bedʼeadeba panʉbasi mʉ̃a bedʼea widibadara.

 Mʉ̃ yuwẽrã badaʉ̃mebara kãga ẽ basi mʉ̃a kʼawuabʉ ʉ̃rʉ jaramarẽãra. Ewari aba mʉ̃a jarasi iyaʼa Jeowa ʉ̃rʉ Kʼawuabipanʉrãta trʉ̃sita deda Daizeze Bedʼeata jaradiamarẽã, mʉ̃ trajodeba zebʉrʉde mʉ̃a iyira ũdu ze ẽ basi dedara, maʉ̃ kʼarea ãĩ wã kʼãrãpe mejãcha jẽgasi. Daizezeʼa widisi karebamarẽã, maʉ̃nebʉrʉ zokʼasi Jeowa trʉ̃ta (Salmo 83:18).

 Ewari ũme berabarida tẽã mʉ̃ra Daizeze Bedʼeata akʉ jʉ̃drʉsi juwa jidapanʉra Jeowa ʉ̃rʉ Kʼawuabipanʉrãʼʉ̃me, ãyi wãside ãya mʉ̃a dia amaesi libro Usted puede vivir para siempre en el paraíso en la tierra. Mʉ̃a maʉ̃ra diamasi ewari abaʉde jõma ma akʉsi. Mʉ̃a kʼawuadata Jeowa ʉ̃rʉ akʉza Jesu ʉ̃rʉ mʉ̃ soidu jʉ̃ẽsi, mama kʼawuasi Jeowabara so borekea akʉbʉta akʉza iyisida zʉbʉriabʉta wuabemara zʉbʉriabʉ ũdubʉrʉdera (Isaías 63:9). Audre mʉ̃ soidu jʉ̃ẽnara kʼawuaside Jeowaba mʉ̃ra kãgabʉta akʉza yi warra diaside mʉ̃ bari beimarẽã (1 Juan 4:10). Jeowabara mʉ̃aʼa ũdubisi mejãcha jʉ̃ãbʉta iya jẽda krĩchamarẽã kãgabasi baera mawũã bei ẽ bʼaita (2 Pedro 3:9). Mʉ̃a sentisi Jeowabara kãgabasita iyi kʼawa bamarẽã (Juan 6:44).

 Semana aba berabariside ãba yi jʉrebarieda wã jʉ̃drʉsi, mʉ̃a bʉdata drazoabasi baera, areteta jʉ̃basi baera, wuabemara ẽbẽrarãra perabasi maʉ̃ kʼarea, mamina Jeowa ʉ̃rʉ Kʼawuabipanʉrãbara mʉ̃ra edasida yi mebẽrã kĩrãkʼa, ũdubisida wãrĩnu kristianoara kĩrãkʼa. Mʉ̃ra aduʼa sentisi mʉ̃ zezona deda akʉza mʉ̃ payora deda nãã bada kĩrãkʼa, maʉ̃ ewarira mʉ̃ita yibiabasi.

 Mʉ̃a Daizeze Bedʼea akʉda audre ẽãne mʉ̃ bebʉra jipa awuara besi, mʉ̃a tʉsi mʉ̃ budara, mʉ̃ara idubʉsi wẽrãrabawara mia erkʼãĩkʉa badara akʉza ituasi idubʉsi, adewara chirua kayirua bʉratʉmasi wua do ẽ basi (1 Corintios 6:9, 10; 11:14). Mʉ̃a kãgabasi Jeowara mʉ̃me sobia bamarẽã, maʉ̃ kʼarea mʉ̃a kʼawuaside mʉ̃a nekʼãrẽ obadara nemitiata jipa awuara osi, mʉ̃a krĩchasi: «Mʉ̃a naʉ̃ra wuara oẽ». Mʉ̃a nãã krĩchabadara awuarabaibarabasi akʉza mʉ̃ sãwũã badasida. Mʉ̃ara nebiata ũdu jʉ̃drʉsi obasi baera Jeowaba kãgabʉta, mʉ̃ra buru kʼoesi 29 julio 1989de (Daizeze Bedʼea akʉ jʉ̃drʉda tẽã jedeko 6 babʉrʉde buru kʼoesi mʉ̃ra).

 Daizeze Bedʼeabara kʼarebasi mʉ̃ bebʉ jipa awuara babita. Nããrãra mʉ̃a kĩrʉbʉdadera mʉ̃abida abarika kĩrʉ panʉbasi, mamina atiara mʉ̃ra zarea obʉ wuabemarabawara aduʼa bʼaita (Romanos 12:18). Mʉ̃a naʉ̃ra mʉ̃yidobaʉbara oẽ bakasi, mʉ̃a naʉ̃ra jõma osi Jeowa kʼarebadeba, iyi bedʼeata, iyi jaure zareata mejãcha zarea barabʉ baera kʼarebaseabʉ awuru ẽbẽrarã awuara babita (Gálatas 5:22, 23; Hebreos 4:12).

 Mʉ̃ chirua kayirua bʉratʉma doi kaude, yõmia bʼai kaude akʉza yuwẽrãrabawara aba kʼãĩ kaude, zarea obʉ Jeowaba kãgabʉde bʼaita akʉza mʉ̃ bebʉ iyaʼa diaita, awururata kʼarebabʉ Jeowata ũdukʼawuamarẽã. Mʉ̃ buru kʼoeda audre ẽãne, wãsi awuru pʉwʉrʉeda Daizeze Bedʼea ʉ̃rʉ jaradiade, Daizeze Bedʼea jaradiaita nesidabʉmae. Mʉ̃ra atiara sobiabʉ kʼãwũã Daizeze Bedʼeata jaradiabʉ baera ẽbẽrarã akʉza sãwũã ãyi bebʉra awuarabʉta, adewara mʉ̃ra sobiabʉ mʉ̃ papata Jeowa ʉ̃rʉ Kʼawuabipanʉrã ba zesi baera, mʉ̃a nãã badata idubʉsi baera.

 1999de mʉ̃ra jʉ̃ẽsi eskuela eda pʉwʉrʉ El Salvadorde idi ewade maʉ̃ eskuela trʉ̃gapanʉ Escuela para Evangelizadores del Reino, mama mʉ̃aʼa biʼia jaradiasida sãwũã jaradia kʼawuaibarata deza deza akʉza kongregasione, maʉ̃ poaga iyabaʉde mʉ̃ra juwa jidasi mʉ̃ kima Eugeniaʉ̃me akʉza atiara ãbaʉba Daizeze Bedʼeata jaradiapanʉ Guatemalade.

 Atia mʉ̃ra sopʉabʉ ẽ awuarabʉrʉ mʉ̃ra jipa sobiabʉ akʉza mʉ̃ bebʉra kʼawuabʉ kʼareabʉta. Mʉ̃a Daizeze Bedʼeata jarabʉta ojʉ̃drʉsi baera mejãcha kʼarebasi wua yõmia ba ẽ baita akʉza wẽrãra awuara awuara erkʼãĩ ẽ bʼaita, adewara maʉ̃ oẽba mʉ̃ra aduʼabʉ, kãgata ũdubʉ akʉza biabʉ.