DAUBA BʼAIDUA
¿Kʼãrẽ biata jʉ̃ãpanʉ 2023dera? | ¿Kʼãrẽta jarabʉ Daizeze Bedʼeabara maʉ̃ ʉ̃rʉ
Jõmaʉ̃ba jʉ̃ãpanʉ naʉ̃ 2023de nebiata zemarẽã. ¿Kʼãrẽ nebiata jʉ̃ãibara?
Daizeze Bedʼeabara nebiata jʉ̃ãbibʉ
Daizeze Bedʼeabara jarabʉ bedʼea zromara atiaedabʉrʉ ũdupanʉta akʉza aranʉbai maʉ̃ra ara oita. Daizeze Bedʼeaba jarabʉ: «Nããra nekʼãrẽ bʉdapeadara bʉsida dayirãba kʼawuadamarẽã, […] Daizeze Bedʼeaba so zarea diabʉdeba nebiata jʉ̃ãnamarẽã» (Romanos 15:4).
Daizeze Bedʼeaba kʼãrẽ jarabʉ audre kʼawuaita akʉra artikulota «La esperanza real de un mañana mejor».
¿Nebia jʉ̃ãibara idira sãwũã kʼarebabʉ?
Daizeze Bedʼeaba jarabʉ jʉ̃ã bʼaira «nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ» (Hebreos 6:19). Bedʼea zroma ũdubʉmina nebia jʉ̃ãbʉba kʼarebabʉ zarea bʼaita, bia krĩchaita akʉza jʉrʉita ewari jõmaʉ̃nẽ sobia bʼaita. Bari jaradaita:
Kʼawuara sãwũã yumakẽrã aba Daizeze Bedʼeade nebia jʉ̃ã bʼai ʉ̃rʉ jarabʉba kʼarebasita. Akʉra bideo Kãga ẽ basi mʉ̃ sãwũabadara.
Akʉra sãwũã Daizeze Bedʼeade nebia jʉ̃ã bʼai ʉ̃rʉ jarabʉba kʼarebaseabʉta dayirã mebẽrãnebema beibʉrʉde. Akʉra bideo Sopʉabʉ daya kãgabʉ beibʉrʉdera.
Bʉa nebia jʉ̃ãbʉra audre zarea ĩjãbara
Ẽbẽrarã mejãchaʉba jʉ̃ãpanʉ nekʼãrẽ biata berarimarẽã, mamina ãya wãrĩnu ĩjã ẽ maʉ̃ berabariseabʉra. Mamina maʉ̃ awuara Daizeze Bedʼeaba jarabʉra wãrĩnu. Maʉ̃ra zebʉ baera Daizeze a wãrĩnuaradeba, Daizezera sewa nebʉra oka baera (Tito 1:2). Daizezebʉrʉ aripe berabaribiseabʉ iya jaradara, zarea barabʉ baera (Salmo 135:5, 6).
Daibida kãgabʉ Daizeze Bedʼeade nebiabʉta ũdukʼawuamarẽã. Bʉa Daizeze Bedʼea ʉ̃rʉ ĩjãbʉra audre wari wãni «ewariza Daizeze Bedʼeata jʉra kʼawua» akʉpanʉbʉrʉ (Hechos 17:11). Bʉyi dabʉba akʉseabʉ daibawaraʉba Daizeze Bedʼea akʉ jʉ̃drʉbʉrʉde. Nebiata jʉ̃ãbara naʉ̃ 2023de.
a Daizeze trʉ̃ra Jeowa (Salmo 83:18).