Yõinera mejãcha plata gastapanʉ.

•   «Yõbʉdadera gastapanʉ 2,2 biyones dolarede jãpe wabida yõnʉmʉne» (The Washington Post, 13 febrero, 2024de).

 Mamina kʼãrẽãba pagaibarara, mawũã bari plata ẽ. Bari jaraita krĩchara Ucraniane yõbarabʉta.

•   Gorogororata. Jarapanʉ 500 mil gorogorora beisidata, mawũã ẽ bʉrʉ posita yõ nʉmaside. Ucraniane yõ jʉ̃drʉdara poaga ũme ba.

•   Ẽbẽrarãta. Naciones Unidaba jarabʉ 28 mil beisidata akʉza po ʉ̃tʉzesita adewara nokʼo abaʉba ONU nebemaba jarasi: «Naʉ̃ yõne ẽbẽrarã mejãcha beiwãnera wãrĩnu baira mejãcha paganʉmʉ». a

 Ẽbẽrarã mejãcha zʉbʉrianʉmʉ yõ kʼarea akʉza bedʼea zroma naʉ̃ drʉade nʉmʉba.

•   114 miyon. Mainʉba ẽbẽrarã desplazapanʉta yõ kʼarea akʉza mejãcha bedʼea zroma ũdupanʉ kʼarea septiembre 2023deba.

•   783 miyon. Mainʉba ẽbẽrarã jarrabade berabaribʉta. «Jarrabara ũdupanʉ mejãchanʉmʉ baera bedʼea zromata mamina 70% ẽbẽrarã jarrabade berabaribʉ naʉ̃ drʉade yõ kʼarea akʉza mejãcha zʉbʉriata nʉmʉ baera» (Programa Mundial de Alimentos).

 ¿Ewari abaʉde wua neẽ baika yõra? ¿Neneẽã baira bari dayi krĩchade bʉka? ¿Naʉ̃ drʉade kʼareba mejãchabʉra zokʼadaika jarraba jõbidaita akʉza nekʼãrẽ nẽẽbe kʼarebaita? ¿Kʼãrẽta jarabʉ Daizeze Bedʼeabara?

 Daizeze Bedʼeade jarabʉ kabayotabʉta akʉza iyi ʉ̃tʉ jirabʉta ũdubita yõta akʉza mejãcha baibasita zʉbʉriata naʉ̃ drʉade.

•   «Maʉ̃ne ʉ̃tʉ zesi awuru kabayota, purea bʉrʉ kĩrãkʼachuta. Iyi ʉ̃rʉ baribʉa diasida naʉ̃ drʉade aduʼabʉta jãrĩmarẽã mawũã ẽbẽrarã ãyirai yi beadamarẽã, akʉza espada zromata diasida» (Apocalipsis 6:4).

 Maʉ̃ kabayo akʉza yi bari jirabʉ awuara, bʉ wabida ũme, maʉ̃rabara jarakĩrãbʉ jarrabata akʉza idi mejãcha bei wãta kaya kʼarea mawũã ẽ bʉrʉ awuru bedʼea zromaba (Apocalipsis 6:5-8). Naʉ̃ propesia ʉ̃rʉ audre kʼawuakĩrãbʉbʉrʉ akʉza kʼãrẽa kʼawuapanʉta naʉ̃ra wãrĩnu idi berabarinʉmʉta akʉra artikulo: “¿Qué representan los jinetes del Apocalipsis?”.

 Aranʉ, kʼareba naʉ̃ drʉadebʉra wuara zokʼada ẽ bayi yõ kʼarea, mamina ẽbẽrarãba oẽ bai maʉ̃ra. Daizeze Bedʼeaba jarabʉ awuarabʉrʉ:

•   Daizezeba «naʉ̃ drʉa jõmaʉ̃nẽ jõbiyi yõra (Salmo 46:9).

•   Daizezeba jẽda ara oyi bedʼea zroma yõ kʼarea ũduzebʉdara. «Jõma jõbiyi daʉbara akʉza beira wuara neẽbayi, so zʉbʉriaira adewara zʉbʉria bedʼeaira neẽbayi, pʉa nãã ũdubadara neẽbayi» (Apocalipsis 21:4).

•   Daizezeba kʼarebayi jõmaʉ̃ta aduʼa panamarẽã. «Mʉ̃ pʉwʉrʉdera neneẽãpanañi akʉza enaʉ̃panañi kʼaiba neida odaira neẽbayi adewara aduʼapanañi» (Isaías 32:18).

 Propesiara Daizeze Bedʼeade jarabʉbarayõ ʉ̃rʉ akʉza idi bedʼea zroma ũdupanʉ ʉ̃rʉ ũdubibʉ aranʉbai aduʼa panaita.

 ¿Kʼãrẽta oi Daizezebara aduʼapanamarẽã? Iyi Nokʼodeba kʼarebayi, maʉ̃ Nokʼora ʉ̃tʉbʉ (Mateo 6:10). Kʼawuaita kʼãrẽta maʉ̃ Nokʼora akʉza kʼãrẽta oita maʉ̃ba bʉ kʼarea, akʉra naʉ̃ bideo wĩka kĩruta ¿Kʼãrẽ Daizeze Nokʼora?