Jʉ̃ãpanʉ ẽbẽrarã 5.000 millones bʉraba akʉmarẽã Copa Mundial de la FIFA, maʉ̃ra odayi 20 noviembredeba 18 diciembre eda 2022de. Mejãchaʉba krĩchapanʉ ẽbẽrarã kʼãwũã jemebʉba oseabʉta ãba bʼaita.

•   «Kʼãwũã jemeneiba naʉ̃ drʉata awuara babiseabʉ, ẽbẽrarãta bia krĩchabiseabʉ akʉza ãba babiseabʉ» (Nelson Mandela, Áfricade nokʼo badaba).

•   «Balon jemeneiba erbabibʉ jʉ̃ã bʼaita akʉza ãba zebibʉ sobiade, kãgade akʉza awuarabʉmina» (Gianni Infantino, FIFA nokʼo). a

 ¿Wãrĩnu kʼãwũã balon jemebʉba akʉza nekʼãrẽ awuara jemenebʉba oseabʉ ẽbẽrarã ãba bʼaita? ¿Bʉka wãrĩnu aduʼa bʼaita akʉza ãba bʼaita?

 Naʉ̃ poagade kʼãwũã balon mejãcha jemenebʉba, obʉrʉ bedʼea zroma ũduita ẽbẽrarãi, obʉrʉ politikorai bedʼeakaita, bedʼea zroma ũduita ẽbẽrarã yara sãwũãbʉdeba akʉza ẽbẽrarãba plata kʼãrẽaba erbʉ ʉ̃rʉ.

 Mawũãsidu ẽbẽrarãbara akʉkĩrã balon jemenebʉra ãyi ewari bia berabarita. Mamina maʉ̃ba oẽ ẽbẽrarãra ewari jõmaʉ̃nẽ ãba bamarẽã. Awuarabʉrʉ ũdubibʉ ẽbẽrarãra awuara krĩchapanʉta akʉza awuara opanʉta. Daizeze Bedʼeabara maʉ̃ra yi jaramabasi, adewara jarasi naʉ̃ ewari jõbodoarebʉdera maʉ̃ta berabarita (2 Timoteo 3:1-5).

 Daizeze Bedʼeabara jarabʉ wãrĩnu ẽbẽrarã naʉ̃ drʉadera ãba baseabʉta, maʉ̃ra ãba bʼaita naʉ drʉade Daizeze Nokʼo juwa edre (Lucas 4:43; Mateo 6:10).

 Jesuba Daizeze Nokʼo zokʼabʉrʉdera oyi ẽbẽrarã aduʼa bʼaita. Daizeze Bedʼeabara jarabʉ:

•   «Maʉ̃ ewaridera yi aripe obʉra bia pãwãrañi akʉza neneẽã bayi badumae» (Salmo 72:7).

•   «Iyara kʼarebai baera kʼãrẽ neẽãbʉ iyaʼa kʼareba widibʉra [. . .] Ẽdrʉbiyi bedʼea zromaneba akʉza kayiruadeba (Salmo 72:12, 14).

 Idi ewade Jesuba jaradiadaba ẽbẽrarãra mejãcha ãba zebisi 239 pʉwʉrʉ awuara awuarakade, adewara kʼarebabʉrʉ ẽbẽrarã yiya jʉrada ẽ marẽã. Audre kʼawuaita maʉ̃ ʉ̃rʉ akʉra artikulora «Rompamos el ciclo del odio».