¿Kʼãrẽta jarabʉ Daizeze Bedʼeabara yiko mejãcha neẽ ʉ̃rʉra?
Nokʼorabara jarapanʉ «Jarraba neẽ baita», mawũã okĩrãpanʉ naʉ̃ drʉ jõmaʉ̃nẽ, mawũã yi audre bedʼea zroma taʉbidaita. a ¿Ewari abaʉde ẽbẽrarã wua jarrababa zʉbʉria ẽ baika? ¿Kʼaseabʉ Daizeze Bedʼeabara?
Daizeze Bedʼeabara jarasi Jarraba bʼaita
Daizeze Bedʼeabara jarasi dayirã ewaridera jarrabara mejãchanʉmaita, naʉ̃ba ũdubibʉ dayirãra «ewari jõbodoare panʉta» (2 Timoteo 3:1). Daizezeba dayirã jarrababa zʉbʉriabi ẽ mina, iya dayirã nãã yi jaramabasi (Santiago 1:13). Akʉdaya propesia ũme Daizeze Bedʼeade edabʉta.
«Bayi jarrabata... awuru drʉade» (Mateo 24:7). Naʉ̃ propesiabara jarasi jarrabara drʉa mejãchaʉde bʼaita. Ẽbẽrarã yiko drʉade sãwũã wã kʼawuapanʉraba jarasida ẽbẽrarã mejãcha zarea opanʉmina naʉ̃ drʉade jarraba bʉ taʉbita, aripe oaʉda ẽ yiko mejãcha neẽ baera, adewara ẽbẽrarã kayabʉ jarrababa b. Naʉ̃ drʉa jõmaʉ̃nẽ ẽbẽra mejãchaʉba yiko ãya nesidapanʉta erpanʉ ẽ, maʉ̃ kʼarea ʉ̃kʉrʉra beipanʉ.
«Ũdusi kabayo paimata. Iyi ʉ̃rʉ baribʉbara juwade erbasi balanzata» (Apocalipsis 6:5). Naʉ̃ propesiadera jarabʉ bʉta kabayo paimata akʉza yibaribarita, naʉ̃ba jarakĩrãbʉ ewari jõbodoarera jarraba mejãcha bʼaita c. Balanzaba jarakĩrãbʉ yikora wiña bai baera pesaibarata mawũã ẽbẽrarã jõmaʉ̃ba yikota erbamarẽã. Yi ẽbẽra kabayo ʉ̃rʉ baribʉeda, iya ũrĩsi nemi jĩgʉa ẽbẽraʼa jarabʉta yikora mejãcha bale bʼaita adewara yikora aduabida ẽ marẽã (Apocalipsis 6:6). Naʉ̃ra idi ewade aripe berabarinʉmʉ, ẽbẽrarã mejãchaʉba yiko biata edabeda ẽ baera.
¿Wuara neẽ baika jarrabara?
Ẽbẽrarã yiko sãwũã wã kʼawuapanʉba jarapanʉ drʉabara yiko mejãcha diaseabʉta, mawũã ẽbẽrarã jõmaʉ̃ba yikota erpanamarẽã, mawũãbʉmina, ¿kʼãrẽa yiko mejãcha neẽ? akʉza ¿kʼãrẽta oi Daizezebara naʉ̃ bedʼea zroma ara oita?
Bedʼea zroma: Nokʼorabara jõbi aʉda ẽ naʉ̃ drʉade ẽbẽrarã jarrababa zʉbʉriabʉra akʉza obeda ẽ ẽbẽra jõmaʉ̃ba yiko erbamarẽãra.
Ara oita: Naʉ̃ drʉadebema nokʼora wuara neẽbayi, maʉ̃ barira bayi nokʼo audre yibiata, Daizeze Nokʼota (Daniel 2:44; Mateo 6:10). Idi ewadera ẽbẽrarã nekʼãrẽ neẽãbʉbara yiko edabe ẽ, mamina Daizeze Nokʼoba zokʼa jʉ̃drʉbʉrʉdera yikora jõmaʉ̃ita bayi. Daizeze Bedʼeaba jarabʉ Jesu ʉ̃rʉ: «Iyara kʼarebai baera kʼãrẽ neẽãbʉ iyaʼa kʼareba widibʉra akʉza kʼaiba kʼarebai neẽãbʉra... Bayi mejãcha netata naʉ̃ drʉade, katuma ʉ̃rʉra audre bayi» (Salmo 72:12, 16).
Bedʼea zroma: Yõ kʼarea adewara plata mejãcha neẽ baera ẽbẽraita mejãcha zareabʉ yiko ãya nesidabʉ edaita.
Ara oita: «[Jeowaba] naʉ̃ drʉa jõmaʉ̃nẽ jõbiyi yõra naʉ̃ egorodera akʉza bʉetayi enedrʉmara, wãrĩnu bʉgʉzʉabiyi miazura, gorogorora karru yõbarita babʉedayi» (Salmo 46:9). d Daizezebara jõbiyi põgara akʉza ẽbẽrarã maʉ̃ zokʼabʉra, Daizezeba mawũã obʉrʉde ẽbẽrarãitara zare ẽ bayi yiko ũduita. Daizeze Bedʼeaba jarabʉ: «yi aripe obʉra bia pãwãrañi akʉza neneẽã bayi badumae» (Salmo 72:7).
Bedʼea zroma: Jʉ̃wʉrʉaba, mejãcha kue zebʉba akʉza drʉade neida berabaribʉba neuta beabʉ akʉza pakata.
Ara oita: Daizezebara iduaribi ẽ bayi naʉ̃ta berabari ẽ marẽã, awuarabʉrʉ iyara oyi naʉ̃ drʉara bia bamarẽã, mawũã yiko mejãcha bamarẽã. Daizeze Bedʼeaba jarabʉ: «[Jeowaba] taʉbibʉ nãgʉra akʉza pusa marasasida... Drʉa ibʉawabʉra baniaba jue oũbabiyi mama wariyi charata akʉza drʉa ibʉawabʉmaera mejãcha bayi baniata... Jarrababa zʉbʉriabʉrata mama babiyi… Ãyara drʉade neupanʉ akʉza ubata upanʉ, naʉ̃ra mejãcha zaʉbʉ» (Salmo 107:29, 35-37).
Bedʼea zroma: Ẽbẽra nezrʉgamiaraba akʉza nekʼãrẽ iyita erbakĩrãbʉrabara yiko idu diabida ẽ ẽbẽrarãba nesidabʉa.
Ara oita: Daizeze Nokʼobara jõma jõbiyi ẽbẽra nezrʉgamiarãra (Salmo 37:10, 11; Isaías 61:8). «Daizezebara kʼarebabʉ yi zʉbʉriabʉrãra akʉza panta diabʉ yi jarrapanʉara» (Salmo 146:7).
Bedʼea zroma: Poagaza yiko mejãcha aduabʉ.
Ara oita: Daizeze Nokʼoba zokʼa jʉ̃drʉbʉrʉdera yikora adua ẽ bayi, ẽbẽra aba abakaʉba erpanai baera yiko ãya nesidabʉta. Jesu nama egorodebasidera iduaribi ẽ basi yiko aduamarẽã. Bari jaraita ewari aba iya nekobisi ẽbẽrarã 5.000 bʉta, tẽã iyi kʼaidupanʉra jarasi: «Yi adubadata jʉrepeidua mawũã adua ẽ marẽã» (Juan 6:5-13).
Daizeze Nokʼoba jõbiyi jõma jarrababa zʉbʉriabibʉra, maʉ̃ kʼarea ẽbẽrarã jõmaʉ̃ba yikoarata erpanañi (Isaías 25:6). Kʼawuaita Daizeze Nokʼoba sõbede mawũã oita akʉra artikulo «¿Daizeze Nokʼobara sõbede zokʼa jʉ̃drʉi naʉ̃ Drʉara?».
a La Agenda para el Desarrollo Sostenible 2030, adoptada por todos los Miembros de las Naciones Unidas en 2015.
b Naʉ̃rabara jarasi la Organización de las Naciones Unidas para la Agricultura y la Alimentación, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Audre kʼawuaita Apocalipsis libroba kabayo kimare bʉ ʉ̃rʉ jarabʉta akʉra «¿Qué representan los jinetes del Apocalipsis?».
d Daizeze trʉ̃ra Jeowa (Salmo 83:18). Akʉra artikulo «¿Bʉitara kʼaiba Jeowara?».
Puede que también le interese
ENSEÑANZAS IMPORTANTES DE LA BIBLIA
¿K’ãrẽ Daizeze Nok’ora?
Jõmaʉ̃ mae Jesura Daizeze Bed’ea jaradiabasi, audre bed’eabasi Daizeze Nok’o ʉ̃rʉ baldu bed’eaira. Poaga mejãchaba, iyi k’aidubemara yiwid’ipanʉta Daizeze Nok’o zemarẽã.
