JARAKAITA JESÚS BEIDA JẼDA KĨRÃBEITA
Jesúsbara kʼarebayi nekʼãrẽ neẽãberarã
Jesús naʉ̃ drʉadebaside iya kãga ũdubisi ẽbẽrarã, maʉ̃ne iya kʼarebabasi ẽbẽrarã nekʼãrẽ neẽãberata (Mat. 9:36). Adewara iya iyi bebʉ diasi ẽbẽra jõmaʉ̃ kʼarea (Mat. 20:28; Juan 15:13). Aranʉ bʼai Jesúsʼra zeyi akʉza ẽbẽrarã kʼarebaita akʉza kãga ũdubita, iya Daizeze Nokʼota zokʼai baera wuara ne ẽ bayi ẽbẽrarã nekʼãrẽ waebʉrãra.
Daizeze Bedʼeaba bedʼea kĩrãwãreãta jarabʉ Jesúsba kʼãrẽta oita jarabʉrʉde:
«Iyita arare bedʼeamarẽã kʼaiba kʼarebai neẽare pʉwʉrʉde, kʼarebamarẽã kʼãrẽ neẽãbʉ wũãwũãrata, jõbimarẽã awʉrʉ zʉbʉria obʉra» (Sal. 72:4).
¿Sãwũã biga diabʉta ũdubiseapanʉ Jesúsba oda kʼarea akʉza ʉ̃na oi kʼarea? Iya Lucas 22:19de jarasi iyi beidata jẽda kĩrãbedamarẽã. Jeowa ʉ̃rʉ Kʼawuabipanʉrãba naʉ̃ poagade maʉ̃ta odayi. Jesús beidata jẽda kĩrãbedayi, maʉ̃ kʼarea daiba kãgapanʉ daibawara ãba zemarẽã domingo 24 marzode 2024, Jesús bedia jẽda kĩrãbedaita.