Julio poaga 2022de ũdusida jʉwʉrʉa naʉ̃ drʉade berabarikata:

•   «Chinaba jarasi jʉra kʼawuapanamarẽã pʉwʉrʉra 70 panʉra mejãcha jʉ̃wʉrʉanʉmʉ baera» (25 Julio, 2022de, CNN Wire Service).

•   «Europadera jʉ̃wʉrʉa kʼarea mejãcha pʉreabasi oide» (17 Julio, 2022de, The Guardian).

•   Domingode Estados Unidosde ũdusida jʉ̃wʉrʉa mawũã berabarikata pʉwʉrʉ mejãchaʉmae (24 Julio, 2022de, The New York Times).

 Drʉade kʼãwũã berabarinʉmʉbara, ¿kʼãrẽta jarakĩrãbʉ? ¿Ẽbẽrarã naʉ̃ drʉade ba ẽ baika? ¿Kʼãrẽta jarabʉ Daizeze Bedʼeabara maʉ̃ ʉ̃rʉ?

 Mawũã, Daizeze Bedʼeaba jarasi kʼãwũã jʉ̃wʉrʉa berabarinʉmʉ kĩrãkʼa idi ewade nekʼãrẽ mejãcha berabarinʉmaita. Bari jaraita Jesuba jarasi: «Ũdudayi nekʼãrẽ dayi daʉperabʉta akʉza» «ũdudayi daya ũdukata» (Lucas 21:11). Ʉ̃kʉrʉrʉ ẽbẽrarã krĩchabipanʉ kʼãwũã mejãcha jʉ̃wʉrʉabʉba ẽbẽrarãba mãrĩta naʉ̃ drʉara.

 Mawũã ẽ, Daizezeba osi baera naʉ̃ drʉade ẽbẽrarãta ewari jõmaʉ̃nẽ panamarẽã (Salmo 115:16; Eclesiastés 1:4). Daizezebara iduaribi ẽ bayi ẽbẽraba naʉ̃ drʉa ãrĩmarẽã, awuarabʉrʉ makenañi yi ẽbẽra naʉ̃ drʉa ãrĩbʉra (Apocalipsis 11:18).

 Akʉdaya propesia ũme ũdubibʉta Jeowaba kʼãrẽta oita krĩchabʉta:

•   «Drʉa ibʉawabʉta akʉza egoro kʼãrẽ dia ẽãta maʉ̃rãra sobiabayi adewara koribi drʉa ibʉawabʉra sobiabayi akʉza neponorata ʉ̃tʉ zeyi azapran kĩrãkʼa» (Isaías 35:1). Daizezebara iduaribi ẽ bayi naʉ̃ drʉa jõma ibʉawa bamarẽã awuarabʉrʉ yi ãrĩbʉta ara oyi.

•   «Bʉa akʉbʉ drʉara akʉza egoro bia babibʉ ne uita» (Salmo 65:9). Daizeze kʼarebadeba naʉ̃ drʉara jõma ẽjũã kĩrãwãreã babiyi.

 Bʉa audre kʼawuakĩrãbʉbʉrʉ naʉ̃ drʉade kʼãwũã jʉ̃wʉrʉanʉmʉba Daizeze Bedʼeata aripe berabarinʉmʉta akʉra artikulo «¿Qué dice la Biblia sobre el cambio climático y nuestro futuro?».

 Audre kʼawuakĩrãbʉbʉrʉ sãwũã Daizeze Bedʼeaba naʉ̃ drʉa ara oita jarabʉ ʉ̃rʉ akʉra artikulo «¿Quién salvará el planeta?».