Diapeda lunes 10 octubre 2022de rusoraba ʉ̃kʉrʉ pʉwʉrʉra Ucraniane batasida misilba. Maʉ̃ra berabarisi ewari ũme nãã, bombaba ãrĩsidade puente Crimea Rusiaʉ̃me ãba zebibʉta. Maʉ̃ berabari naweda ʉ̃kʉrʉ politikoraba jarakʉanasi jʉra kʼawuapanaibarata Armagedón kʼarea.

•   «Kennedyba Estados Unidos zokʼabadadeba yẽta akʉza bedʼea zroma erbaside Cubaʉ̃me misil kʼarea, krĩchadakabasi Armagedón kʼawabara bʼaita idira. [...] Mʉ̃a krĩchabʉ bomba nuklearta zokʼadara Armagedónʼra zeita» (Joe Biden, nokʼo Estados Unidosdebema, 6 octubre 2022de).

•   «Mʉ̃a kʼawuabʉ naʉ̃ra Armagedónta; naʉ̃ra bedʼea zroma jõmaʉ̃raita naʉ̃ drʉade» (naʉ̃ta jarasi Volodímir Zelenski nokʼo Ucranianebemaba iyaʼa widisidade kʼãrẽta berabarita zokʼadara bomba nuklearta; BBC News, 8 octubre 2022de).

 ¿Wãrĩnu zeika Armagedónʼra ẽbẽrarãba zokʼadara bomba nuklearta? ¿Kʼãrẽta jarabʉ Daizeze Bedʼeabara maʉ̃ ʉ̃rʉ?

 Mawũã ẽ. «Armagedón» bedʼeara jʉ̃zaba ũduseapanʉ Daizeze Bedʼeadera Apocalipsis 16:16de. Mõbe jara ẽ Armagedónʼra zeita pʉwʉrʉrata ãyirai yõnai kʼarea, awuarabʉrʉ zeita yõbʉrʉde Daizezeta jõma nokʼora naʉ̃ drʉadebemarabawara (Apocalipsis 16:14). Armagedónʼra Daizezeba zokʼayi nokʼora udabemara jõma makenaita (Daniel 2:44).

 Audre kʼawuaita naʉ̃ drʉara kʼãrẽta berabarita Armagedón zebʉrʉde akʉra artikulo «¿Qué es el Armagedón?»

 Mawũã ẽ. Ʉ̃ra zeide nokʼorabara zokʼaseapanañi bomba nuklearʼra, mamina Daizezebara naʉ̃ drʉara ãrĩbi ẽ bayi. Daizeze Bedʼeaba jarabʉ:

•   «Naʉ̃ drʉara ewari jõmaʉ̃nẽbʉ» (Eclesiastés 1:4).

•   «Ẽbẽra biaratrʉ duanañi maʉ̃ drʉadera akʉza ewari jõmaʉ̃nẽbayi maʉ̃ ʉ̃rʉra» (Salmo 37:29).

 Propesiara Daizeze Bedʼeaba jarabʉba akʉza idi kʼãrẽ berabarinʉmʉba dayirã ũdubibʉ aranʉbai jipa awuara beita naʉ̃ drʉade akʉza ẽbẽrarãta (Mateo 24:3-7; 2 Timoteo 3:1-5). Kʼawuara ʉ̃ra zeide kʼãrẽta berabarita Daizeze bedʼea bari kʼawuabʉde daibawara.