¿SÃWŨÃ ZOKʼAPANɄ PLATA SOIDUBA DIABɄRA?
Ãba yi jʉreita internetʼneba
26 JUNIONE, 2020DE
Naʉ̃ drʉa jõmaʉ̃nẽ nokʼorabara jarapanʉ ẽbẽrarã ãba yi jʉre beda ẽãta. Jeowa ʉ̃rʉ Kʼawuabipanʉrãbara ũrĩkĩrapanʉ nokʼora bedʼeara ãba yi jʉrepanʉ idubʉ ẽã, maʉ̃ kʼarea kongregasionbara zokʼapanʉ Zoomta internetʼneba ãba yi jʉredaita.
Zõrãrã Burubia ãba yi jʉre panʉrabara Zoom yibariʼa pagapanʉ dayirã ãba yi jʉrepanʉta mesera tʉ ẽ marẽã, naʉ̃ra yibia ʉ̃kʉrʉ kongregasionba paga beda ẽ baera 76 mil Zoom yibariba widibʉta ãba yi jʉrebʉde tʉ ẽ marẽã, naʉ̃ra kongregasionbara zokʼabasi awuru aplikasionta naʉ̃rabara iduaribi ẽ basi ẽbẽra mejãchaʉta ãba yi jʉredamarẽã internetʼneba. Kongregasion, organizasion Zoom pagadata zokʼabʉbara jaraseabʉ kʼaita eda zeseabʉta akʉza kʼaita eda wãbe ẽãta. Adewara ẽbẽra mejãchaʉta eda wãseabʉ atiara 170 drʉade eda 65mil kongregasionbara zokʼapanʉ Zoomta organizasionba pagadata.
Kongregasion Kairagi Indonesiadebemabara zokʼabasi aplikasion bari diapanʉta mamina atiara zokʼapanʉ organizasionba Zoom pagabʉta, mebẽã Hadi Santosoba jarabʉ: «Mebẽrã internet zokʼabe ẽ bʉbara jõma akʉseabʉ dayirã ãba yi jʉrepanʉra, baldua jẽda eda zeita nesida ẽ baera».
Zõrãrã Léster Jijón, Kongregasion Guayacanes Oeste, Guayaquil, Ecuadordebemaba jarasi: «Organizasionba paga ẽ basibʉrʉ Zoomta, dai kongregasionbara paga beda ẽ bakaʉsi mebẽrãra plata mejãcha neẽ baera, mamina atiara organizasionba mawũã pagasi baera dayirã jõmaʉ̃ta ãba yi jʉrebaseabʉ akʉza jaraseapanʉ wuabemarabida eda zedamarẽã».
Zõrãrã Johnson Mwanza, kongregasion Ngwerere Norte, Lusaka, Zambiadebemaba, iyaʼa mebẽrãba jara ũrĩbisida: «Jeowa organizasionba Zoom paganʉmʉba, mebẽrã kʼawa sentibibu akʉza Jeowabara dayirã akʉ kʼãrãpe akʉza iyi kãgata ũdubinʉmʉta».
Organizasionba naʉ̃ Zoom pagaira jidasida ẽbẽraba soiduba plata diabʉta, mebẽrã naʉ̃ drʉade zʉbʉriabʉrʉde kʼarebabaridebemata. Naʉ̃ platara mebẽrãba diapanʉ internetʼne donate.pr418.com. Mejãchade biga maraba platara soiduba diapanʉ baera akʉza naʉ̃ra zokʼapanʉ mebẽrãra naʉ̃ drʉa jõmaʉ̃nẽ zʉbʉrianʉmʉ kʼarebaita (2 Corintios 8:14).