Lucas 23:1-56
23 Mobebʉrʉ jõma piradrʉdʼape Jesús edesidʼa nokʼo Pilatoma.
2 Mobe ji mawũãsidʼa: Naʉ̃ daibara ũdusidʼa zhãrãta nokʼorã bawara kĩrũbiga bʼʉta. Jara bʼʉa rey César plata diabadara diadʼa ẽbaita, jara bʼʉa izhira zhãrã Ẽdrʉbita Reyta.
3 Mawũãnaĩ Pilatobara widʼi mawũãsia: ¿Bʉra Rey judíorãneka?
Mawũãĩ izhara panaʉ̃ mawũãsia: Ara bʉzha jarabʉrʉa.
4 Mawũãĩ Pilatobara sacerdoterã nokʼorãta kʼobʼea, zhãrã kʼobʼea mawũãsia: Mʉma ũmakĩrã naʉ̃ bedʼea ne ẽã.
5 Mawũãĩ ãzhara wuaabʉrʉ mawũãsidʼa: Zhãrãta nokʼorã bawara kĩrũbiga bʼʉta miã ũrãgʼa bʼʉa Judea drua jõma, Galilea druadʼeba erujʉ̃drʉdʼata naĩnu ba.
Jesús ededʼapeadʼa Herode kĩrãbita
6 Mawũã Galilea jarabʉdata Pilatoba ũrĩĩ widʼisia Galileadʼebema kʼawuaita.
7 Jarabʉdaba mamabemata kʼawuape rey Herodeba kʼawua oita bʼʉdʼeba edebigasia Herodema. Maʉ̃ ewadera maʉ̃sidʼa bʼasia Jerusalénne.
8 Aramaʉ̃ne Herodeba Jesús ũdubʉrʉdʼera kʼãbãẽã sobiasia ũdu krĩña bʼʉta ewari dããrã basi baera. Izhi ʉ̃rʉ̃bemata ne bio ũrĩ bʼasi baera ũdu krĩñasia ũdudʼakʼata obʉrʉta.
9 Mawũẽ ne bio widʼisia, mawũãmina Jesúsbara panaʉ̃ ẽbasia.
10 Maʉ̃nerã sacerdoterã nokʼorãta, ũrãgʼa Moisédʼe jarabadata kʼopanasia biodʼe ji kʼobʼeta.
11 Mobebʉrʉ Herodebara soldaorã izhidʼe bawarauba kʼãrẽ ẽãne edabʉdata ãzhima sewakʼau bʼʉdʼeba reyba jʉ̃bari kĩrãkʼa wua kĩrãwãrẽãta jʉ̃bisidʼa, mobe wakusa edebisidʼa Pilatoma.
12 Maʉ̃ ewadera Pilato Herode ũme ibiadʼe bʼasidʼa naara zhi jurata pananata.
Jaradʼapeadʼa Jesús beabimarẽã
(Mateo 27:15-26; Marcos 15:6-15; Juan 18:39—19:16)
13 Mobebʉrʉ Pilatobara ãba trʉ̃kuasia sacerdoterã nokʼorãta, zhãrã nokʼorãta, zhãrã bawara.
14 Mobe mawũãsia: Marãbara ũmakĩrã naʉ̃ mʉma wesidʼa zhãrãta nokʼorã bawara kĩrũbiga bʼʉ baera, mawũãmina mʉã mazhi kĩrãbita widʼibʉrʉba mʉma naʉ̃ bedʼea ne ẽã marãba maʉ̃ne ji kʼobʼedʼera.
15 Miã Herodema bedʼea ne ẽãba wakusa zokʼasia mʉma. Mawũẽ izhi beadʼaidʼebema o ẽbasia naʉ̃bara.
16 Mawũẽ mʉãrã ẽnetaya ubigape.
17 Pilatobara cárceldʼe bʼeta abʼa ẽdrʉbi bʼasia Egiptodʼeba ẽzoadʼata krĩcha fiesta obada ewade.
18 Maʉ̃ne kʼabanabara jõmaʉ̃ba nemi jĩgua mawũãsidʼa: ¡Kʼãʉ̃ beabirua, mobe daiitara ẽnadua Barrabáta!
19 Maʉ̃ Barrabára cárceldʼe bʼʉsidʼa pʉwʉrʉdʼe zhãrãta nokʼorã bawara kĩrũbigadʼa kʼarea, miã beadʼa kʼarea.
20 Pilato wakusa bedʼeasia Jesús ẽna krĩñaba.
21 Mawũãmina ãzhara wakusa nemi jĩgua mawũãsidʼa: ¡Cruzdʼe kʼachibirua! ¡Cruzdʼe kʼachibirua!
22 Pilato bedʼeama ũbeata mawũãsia: ¿Kʼãrẽ bia ẽãta osi naʉ̃bara? Mʉma naʉ̃bara izhi beadʼaidʼebema o ẽbasia. Mawũẽ mʉãrã ubigape ẽnetaya.
23 Mawũãĩ ãzhara wuaabʉrʉ nemi jĩgua jarasidʼa cruzdʼe kʼachibimarẽã. Sacerdoterã nokʼorã bawara ãzhi mawũã nemi jĩgua bʼiabʉdaba aribʼaesia.
24 Aramaʉ̃ne Pilatobara aribʼaesia ãzha widʼi bʼera.
25 Mobe zhãrãta nokʼorã bawara kĩrũbigadʼa kʼarea, miã beadʼa kʼarea, Barrabá cárceldʼe bʼʉdʼapeadʼata ẽnetasia ãzha widʼidʼapeadʼata. Mobe Jesús chãbʼarisia ãzha krĩñane.
Cruzdʼe kʼachi beudʼa Jesús
(Mateo 27:32-56; Marcos 15:21-41; Juan 19:17-30)
26 Edebʉdadʼera Simón Cirene pʉwʉrʉdʼebemata jidasidʼa meã bʼadʼata taita, mobe cruzta ataubisidʼa edemarẽã Jesús kʼaidʼu.
27 Maʉ̃nerã kʼabanata pʉwʉrʉdʼebemata kʼaidʼu kuataidʼera wũẽrãrã ʉ̃kʉrʉ sopua jẽgasidʼa izhi kʼarea.
28 Maʉ̃ne Jesúsbara ãzhi akʉpe mawũãsia: Wũẽrãrã Jerusalénnebema, jẽgarãũdua mʉ kʼarea, awuarabʉrʉ jẽgaudua mazhi kʼarea, mazhi warrarã kʼarea.
29 Ewarita zeya, maʉ̃nerã mawũãnaña: Sobiadʼaidʼe bʼʉa todʼakʼara, bʼiogʼoadʼakʼara, wũãwũã ju dawuadʼakʼara.
30 Maʉ̃nerã kʼatuma nʉmeã mawũãnaña: Dai ʉ̃rʉ̃ bʼaedua. Eya zake nʉmeã mawũãnaña: Dai ãnatʉrua.
31 Mʉ bedʼea ne ẽãba bakuru onoã kĩrãkʼa kʼoabaidʼe bʼʉ ẽãta kʼãwũã beabidʼaira, ¿bedʼea bara bʼeba bakuru põ kĩriakʼa kʼoabasuta bʼera audre odʼai ẽka?
32 Jesús bawara dewara ũme edesidʼa bia ẽã omiãrãta beadʼaita.
33 Aramaʉ̃ne Buru Bʼʉwʉrʉ abadaidʼu jũẽkuape Jesús mama cruzdʼe kʼachisidʼa. Bia ẽã omiãrãsidʼa kʼachisidʼa abʼa juwua araare, abʼa juwua ãkʼaare.
34 Maʉ̃nerã Jesúsbara mawũãsia: Zeze, bedʼea ne ẽã bʼʉkuadua ãzhara kʼawuadʼa ẽbaera kʼãrẽ obʼeta.
Maʉ̃nerã soldaorãbara izhi wuara ãzhirãĩnu drasidʼa sãwũã dradʼaidʼebemata odʼape.
35 Zhãrãbara Jesús akʉ duanasia, nokʼorãbidʼa ãzhima sewakʼau bʼʉdʼeba mawũãsidʼa: Awʉrʉrã kʼarebakuasia. Mawũẽ izhikusa ẽdrʉibara naʉ̃ta zhãrã Ẽdrʉbita Daizezeba jʉrʉdʼabʉrʉ.
36 Soldaorãbidʼa ãzhima sewakʼau bʼʉdʼeba orradʼape ne oregueata diabʉdata,
37 mawũãsidʼa: Bʉta judíorã Reybʉrʉ bʉzhikusa ẽdrʉrua.
38 Kʼãrẽã beadʼaita izhi ʉ̃rʉ̃ bʼʉ jirabʼasia, maʉ̃ta griego bedʼeadʼe, latin bedʼeadʼe, hebreo bedʼeadʼe mawũã bʼasia: NAɄ̃ REY JUDÍORÃNEÃ.
39 Bia ẽã omiãrãta kʼachi jirapanʉbara abʼaʉba Jesús ijura jara mawũãsia: Bʉta zhãrã Ẽdrʉbibʉrʉ bʉzhikusa ẽdrʉrua, ẽdrʉbigarua daisidʼa.
40 Mawũãĩ dewarabemaba panaʉ̃ kẽã mawũãsia: ¿Bʉsidʼa abʼarika beuidʼe bʉara wawia ẽka Daizezera?
41 Dazhira wãrãnebai bia zuburia barabʼʉa, kʼãwũã barabʼʉa dazha bia ẽãta odʼapeadʼadʼeba. Maʉ̃ne naʉ̃bara bia ẽãrã o ẽbasia.
42 Mawũãpe Jesúa mawũãsia: Mʉrã budebarua bʉta Rey babʉrʉdʼera.
43 Mawũãĩ Jesúsbara mawũãsia: Mʉã wãrĩnu bʉaa jaraya, idʼi bʉra mʉ ũme kʼobʼaya ʉ̃tre.
44 Ʉ̃matipauba drua jõma pãrĩgusia a las tres bayeedʼa.
45 Aramaʉ̃ne ʉ̃madaura pãrĩgusia, Daizeze dedʼa wua eubʼari jirabʼʉra kʼõã totosia ẽsadra.
46 Maʉ̃nerã Jesúsbara nemi jĩgua mawũãsia: Zeze, mʉãrã bʉ juwuadʼe chãbʼariya mʉ jawurera.
Mawũãpe beusia.
47 Soldaorã nokʼoba maʉ̃ta ũdui Daizeze ibia jara mawũãsia: Wãrãne ũmakĩrã naʉ̃ bia basia.
48 Kʼabanata mama kʼobʼebara jõmaʉ̃ba mawũã berabʼaribʉrʉta ũdudʼai, jẽrũya wãsidʼa sopuaba trũã neãchi.
49 Mawũãmina jõma Jesúsba ũdukʼaubara, wũẽrãrã Galilea druadʼeba izhi kʼaidʼu zekuadʼabara wawarauba akʉ duanasia mawũã dogʼora.
Jesús wuagʼadʼapeadʼa
(Mateo 27:57-61; Marcos 15:42-47; Juan 19:38-42)
50 José abadata bʼasia Arimatea pʉwʉrʉdʼebemata, maʉ̃ pʉwʉrʉra Judea druadʼebema. Nokʼorã wagʼaurãnebemata maʉ̃ biata bʼasia.
51 Maʉ̃bidʼa jʉ̃ã bʼasia Daizezeta Nokʼodʼebemata. Mawũẽ krĩcha abʼarika ẽbasia mawũã obʉdara jarirãba.
52 Mawũẽ Pilatoma wãpe widʼisia Jesús kʼakuata.
53 Aramaʉ̃ne cruzdʼebara ãĩ edape burasia burubʼaba, mobe edʼa tabʼʉsia peñata zobʼea kʼorubidʼa maẽ, mamarã beuwãrã wadʼi bʼʉdʼa ẽbasia miõta.
54 Maʉ̃ ewadera aribʼae jirpanʉta nrũẽma sábadodʼe ẽnaʉ̃bada basia.
55 Wũẽrãrã Jesús kʼaidʼu Galileadʼeba zedʼapeadʼasidʼa kʼaidʼu zebʉdaba ũdusidʼa beuwãrã wuagʼaidʼebema nʉmʉ maẽ Jesús kʼakua tabʼʉbʉdata.
56 Mobe jẽrũya dedʼaa wãnape kerata osidʼa beuwãrã kʼakua chiratʉdʼaita. Nrũẽma ẽnaʉ̃bada ewade ẽnaʉ̃sidʼa Daizezeba jara bʼʉ kĩrãkʼa.
