1. ¿Siglo nããrabemanera kʼairaba daucha erbasi Jeowa pʉwʉrʉra?

 JEOWABA iyi pʉwʉrʉdebemara nekʼãrẽ omarẽã jarabʉrʉdera kãgabʉ jõma daucha odamarẽã (1 Cor. 14:33). Jeowabara kãgabʉ naʉ̃ drʉa jõmaʉ̃mae Daizeze bedʼeata jaradiadamarẽã (Mat. 24:14). Maʉ̃ kʼarea iya jidasi yi warra Jesuba maʉ̃ trajo oita. Jesubara maʉ̃ trajora jipade biʼia obʉ. Bari jaraita siglo nããrabemanera kongregasion owãnamae basi zõrãrãta, maʉ̃ra zõrãrãba kʼarebabasi maʉ̃ kongregasionta bia bamarẽã akʉza jõma daucha erpanamarẽã (Hech. 14:23). Jerusalénʼnera panasi apostolerata akʉza zõrãrã mamabemarata, maʉ̃rabara jidapanasi kongregasione kʼãrẽta oibarata, mawũã mebẽrã maʉ̃ kongregasionebemaraba maʉ̃ daucha odamarẽã (Hech. 15:2; 16:4). Mebẽrãba zõrãrãba jarabʉta ũrĩpanasi baera naʉ̃ba kʼarebasi kongregasionʼra audre eaba wãmarẽã akʉza ãya ĩjãbʉsida audre zarea erpanamarẽã (Hech. 16:5).

2. ¿1919deba, Jeowabara kʼairaneba kʼarebabʉ akʉza yiko jauredebemata diabʉ?

² Jeowabara idi ewadebida biʼia zokʼa erbʉ iyi pʉwʉrʉra. Bari jaradaita 1919deba Jeowa kʼarebadeba Jesuba jidasi ʉ̃kʉrʉ mebẽrãta, naʉ̃raba yiko jauredebemata dayirãba nesidabʉ ewaride diadamarẽã a (Luc. 12:42). Dayirãba ũduseapanʉ Jeowaba kʼarebabʉta naʉ̃ra mebẽrãba maʉ̃ta biʼia odamarẽã (Is. 60:22; 65:​13, 14).

3, 4. (1) ¿Kʼãrẽ nebiata ũduseapanʉ dayirãta daucha zokʼa erpanʉbʉrʉ? Yizata jara ũrĩbira. (2) ¿Kʼãrẽta akʉdai naʉ̃ artikulode?

³ Jeowa pʉwʉrʉta kʼãwũã daucha ba ẽ basibʉrʉ obeda ẽ bakasi Jesuba dayirã kʼãrẽ omarẽã zokʼabʉta (Mat. 28:​19, 20). Bari jaradaita, idi ewade dayirã jarada ẽ basibʉrʉ sama jaradia wãibarata mawũãra jõmaʉ̃ba ãya kãgamae jaradiaseabakasi,  mamina mawũã osidabʉrʉ ʉ̃kʉrʉ drʉamae audre jaradiakasida, mamina ʉ̃kʉrʉmaera mia kʼãrẽsida jaradiada ẽ bakasi. Bʉabida awuru nebiata ũdu zebʉrʉ baibara kʼãwũã bia zokʼapanʉ baera.

⁴ Jesuba Jeowa pʉwʉrʉ nãã bia zokʼa erbada kĩrãkʼa idi ewadebida abarika obʉ. Naʉ̃ artikulode akʉdayi Jesuba kʼãrẽta osita akʉza Jeowa organizasionbida sãwũã iyide kĩrãkʼa obʉta adewara akʉdayi sãwũã ũdubiseapanʉta Jeowa organizasion ʉ̃rʉ ĩjãbʉta.

DAYIRÃ ORGANIZASIONBARA JESUDE KĨRÃKʼA OBɄ

5. ¿Sãwũã ũdubipanʉ Jesude kĩrãkʼa opanʉta? (Juan 8:28).

⁵ Jesuba yi Zezedeba kʼawuasi kʼãrẽta oita akʉza kʼãrẽta jaraita. Idi ewade dayirã organizasionbara abarika obʉ Jesude kĩrãkʼa. Daizeze Bedʼeata zokʼapanʉ dayirãʼa biʼia kʼawuabita kʼãrẽta bigata akʉza kʼãrẽta biga ẽãta (akʉra Juan 8:28; 2 Tim. 3:​16, 17). Dayirãʼa badua kĩrãbebipanʉ Daizeze Bedʼeara akʉibarata akʉza mama akʉbʉta daucha oũdubibarata, dayirãba maʉ̃ ũrãgʼata ũrĩbʉrʉdera, ¿kʼãrẽ nebiata ũdupanʉ?

6. ¿Kʼãrẽ nebiata ũduseapanʉ Daizeze Bedʼeata akʉpanʉbʉrʉ?

⁶ Dayirãba Daizeze Bedʼea akʉbʉrʉde, dayirã kartarata zokʼapanʉbʉrʉ naʉ̃neba nebia mejãcha ũduseapanʉ. Bari jaraita, dayirãba ũdubʉrʉde Jeowa organizasionba nekʼãrẽ omarẽã jarabʉra Daizeze Bedʼeaba jarabʉde bʉta, naʉ̃ba kʼarebayi dayirãba Jeowa organizasion ʉ̃rʉ audre ĩjã wãmarẽã (Rom. 12:2).

7. ¿Jesubara kʼãrẽ ʉ̃rʉ jaradiasi akʉza idi ewade Jeowa organizasionba sãwũã iyide kĩrãkʼa obʉ?

⁷ Jesubara jaradiasi «bedʼea bia Daizeze Nokʼo ʉ̃rʉ» (Luc. 4:​43, 44). Adewara iyi kʼaidubemara jarasi Daizeze Nokʼo ʉ̃rʉ jaradia wãnamarẽã (Luc. 9:​1, 2; 10:​8, 9). Idi ewade Jeowa organizasionbida abarika obʉ, jaradiapanʉ Daizeze Nokʼo ʉ̃rʉ, krĩcha ẽã ãyi samabʉta akʉza ãya kʼãrẽ oibara erbʉta.

8. ¿Kʼãrẽ nebiata erpanʉ dayirãbara?

⁸ Dayirãbara nebiata erpanʉ, Daizeze Nokʼo ʉ̃rʉ jaradiaita wuabema ẽbẽrarã. Maʉ̃ oira jõmaʉ̃ba obeda ẽ, bari jaradaita Jesu nama egorode basidera iyara iduaribi ẽ basi angel kayiruaraba iyi ʉ̃rʉ jara ũrĩbidamarẽãra (Luc. 4:41). Idi ewadebida abarika opanʉ, badu ẽbẽraba Daizeze Nokʼo ʉ̃rʉ jaradia jʉ̃drʉtotobe ẽ. Maʉ̃ ẽbẽraba Daizeze Bedʼea ʉ̃rʉ jaradiaira iyira Jeowaba kãgabʉde baibara, maʉ̃ kʼarea Daizeze Nokʼo ʉ̃rʉ jaradiaira dayirãitara nebia zroma kĩrãkʼa baibara akʉza dayirãba jaradiakĩrã jaradiaibara dayirã wãmae. Abarika Jesude kĩrãkʼa dayirãbida zarea okĩrãpanʉ badu ẽbẽrarã jaradiaita Daizeze Nokʼo ʉ̃rʉ (Mat. 13:​3, 23; 1 Cor. 3:6).

9. ¿Jeowa organizasionbara sãwũã ũdukʼawuabibʉ wuabemara Daizeze trʉ̃ra?

⁹ Jesuba jaradiasi Daizeze trʉ̃ta ẽbẽrarã. Yi Zezeʼa yiwidʼiside Jesuba jarasi: «Mʉ̃a ũdukʼawuabisi bʉ trʉ̃ra» (Juan 17:26). Idi ewade Jeowa organizasionbida abarika obʉ, ãyara zarea opanʉ Daizeze trʉ̃ ʉ̃rʉ kʼawuabita wuabemara, maʉ̃itara ãyara zokʼapanʉ Daizeze Bedʼea kapũrĩa bedʼeadebʉta yi trʉ̃ Traducción del Nuevo Mundo, naweda Daizeze Bedʼea bʉsidadera Daizeze trʉ̃ra bʉepanasi iyi wãibaramae. Idi ewadebida dayirãba Daizeze Bedʼea zokʼabʉbara Daizeze trʉ̃ra mama jarabʉ kĩrãkʼa iyi wãibaramae bʉebʉ kʼãrẽ. Traducción del Nuevo Mundo, naʉ̃ Daizeze Bedʼeara bedʼea 270 audre bʉde tradusi zebʉda, ʉ̃kʉrʉ bedʼeadera jõmabʉ, ʉ̃kʉrʉ bedʼeadera wiña tradusibʉ. Naʉ̃ Daizeze Bedʼeade bʉa akʉra yi apendise A4 akʉza A5ta, ũduyi sãwũã akʉza kʼãrẽa mawũã bʉesidata Daizeze trʉ̃ra. Kapũrĩa bedʼeade bʉa jʉrʉseabʉ Biblia de estudio, nama ũduyi apendise C, mama eda audre bia jara ũrĩbibʉ kʼãrẽa  Daizeze trʉ̃ra Escritura Griegas Cristianasnera 237 bayeda eda bʉesidata.

10. ¿Kʼãrẽta kʼawuapanʉ ẽbẽra wẽrã Myanmardebemaba jaradadeba?

¹⁰ Idi ewade dayirãbara abarika opanʉ Jesude kĩrãkʼa, zarea obʉde wuabemara Daizeze trʉ̃ ʉ̃rʉ jaradiaita. Ẽbẽra wẽrã Myanmardebema 67 poaga bʉba Daizeze trʉ̃ saʉ̃ta kʼawuabʉrʉde mejãcha jẽgasi. Iya jarabʉ: «Marabara mʉ̃aʼa jaradiasida nekʼãrẽ mʉ̃ita jipade audre yibiata». Naʉ̃ nebʉraba ũdubibʉ Daizeze trʉ̃ ʉ̃rʉ jaradiaira jipade yibiata, naʉ̃ba kʼarebabʉ baera ẽbẽrarã bebʉta awuarabamarẽã.

DAIZEZE ORGANIZASION Ʉ̃RɄ ĨJÃBɄTA IDUBɄRÃRA

11. ¿Sãwũã ũdubipanʉ zõrãrãbara biʼia akʉpanʉta ãyaʼa kʼãrẽ jaradiapanʉra?

¹¹ Jeowa organizasionba zõrãrã jaradiabʉ kʼãrẽta oibarata. Bari jaraita, ãyaʼa jaradiabʉ ãba yi jʉrebʉrʉde sãwũã jaradiaibarata akʉza yiwidʼibʉrʉde sãwũã oibarata. Mamina bari maʉ̃ awa jaradiada ẽ, ãyaʼa jaradiapanʉ sãwũã biʼia akʉibarata Jeowa obeja zakerasida. ¿Sãwũã ũdubipanʉ zõrãrãbara biʼia akʉpanʉta ãyaʼa kʼãrẽ jaradiapanʉra? Maʉ̃ra opanʉ ãyaʼa nekʼãrẽ omarẽã jarabʉta biʼia akʉbʉde akʉza mama jarabʉde oũdubibʉrʉde. Zõrãrãba Jeowa organizasionba jaradiabʉde opanʉbʉrʉ, mebẽrãba ũdudayi Jeowaba ãyaʼa kãga ũdubibʉta akʉza ãyira bia akʉ erbʉta.

12. (1) ¿Kʼãrẽa oibara zõrãrãba omarẽã jarabʉra? (Hebreos 13:​7, 17). (2) ¿Kʼãrẽa akʉibara zõrãrãba nebia erbʉta?

¹² Zõrãrãba dayirãʼa nekʼãrẽ omarẽã jarabʉdadera dayirãbara oibara ãya omarẽã jarabʉra, dayirãba maʉ̃ta opanʉbʉrʉ ãyitara audre zare ẽ bayi ãyi trajo bia oita. Daizeze Bedʼeaba jarabʉ dayirãbara ũrĩbarata yi nãã panʉra bedʼeara (akʉra Hebreos 13:​7, 17). Mamina dayirãitara ãyi bedʼea ũrĩra edaʉde zarea baseabʉ, ¿kʼãrẽa? Ãyira dayirã kĩrãkʼa kayirua omia baera. Dayirãba zõrãrãba kʼãrẽ aña obʉta akʉpanʉbʉrʉ akʉza ãya nebia obʉta akʉ ẽ bʉrʉ Jeowa nejʉrara kĩrãkʼa krĩchaseapanʉ, ¿sãwũẽra? Jeowa nejʉrarabara kãgapanʉ dayirãba ĩjã ẽ marẽã Jeowaba iyi organizasioneba dayirãʼa jaradiabʉta. Maʉ̃ba dayirãba zõrãrã ʉ̃rʉ aña krĩchapanʉbʉrʉ aña krĩchaseapanʉ Jeowa organizasion ʉ̃rʉ akʉza Jeowa organizasion ʉ̃rʉ ĩjãbʉta aduaseapanʉ. ¿Kʼãrẽta oseapanʉ kʼawuaita akʉza ĩjã ẽ baita dayirã nejʉraraba sewida jarabʉta?

WUABEMARABA JARABɄ KʼAREA IDUBɄRÃRA JEOWA ORGANIZASION Ʉ̃RɄ ĨJÃBɄTA

13. ¿Daizeze nejʉraraba sãwũã ũdubikĩrãbʉ Daizeze organizasionʼra zeri ẽãta?

¹³ Jeowa nejʉrarabara jarapanʉ Jeowa organizasionba nekʼãrẽ bia dayirãʼa jaradiabʉra yibia ẽãta. Bari jaradaita, Daizeze Bedʼeaba jarabʉ dayirã Jeowaba kãgabʉde bʼaira neneẽã erbaibarata dayirã kakuata, dayirãba nekʼãrẽ obʉra bia obaibarata akʉza Jeowaba kãgabʉde yiwidʼibarata, maʉ̃ kʼarea mebẽã abaʉba kayirua oda tẽã iyita jẽda krĩcha ẽ bʉrʉ Jeowa pʉwʉrʉdeba ãĩ wãibara (1 Cor. 5:​11-13; 6:​9, 10). Dayirãbara Daizeze Bedʼeaba jarabʉde opanʉ, mamina Daizeze nejʉrarabara jarapanʉ dayirãbara kãga ẽãta ẽbẽrarãta akʉza dayirãbara jʉrata ẽbẽrarã dayirã kĩrãkʼa panʉ ẽãta.

14. ¿Kʼaiba sewidata jarabʉ Jeowa organizasion ʉ̃rʉ?

¹⁴ Kʼawuaibara kʼaita Jeowa organizasion nejʉrata. Diaruba sewa nebʉrʉta jarabʉ Jeowa organizasion ʉ̃rʉ, iyira «sewa nebʉrʉ omia zeze» (Juan 8:44; Gén. 3:​1-5). Dayirãra maʉ̃ kʼarea, kʼãrẽa kĩrãmigaira neẽ, Diaruba awururata zokʼabʉ baera Jeowa organizasion ʉ̃rʉ sewida jaraita, maʉ̃ kĩrãkʼa berabarisi siglo nããrabemane.

15. ¿Kʼãrẽta osida religion nokʼoraba Jesuta akʉza iyi kʼaidubemarata?

 ¹⁵ Jesura Daizeze warrabasimina, kayirua okabasimina akʉza miõba okata obasimina Diaruba zokʼasi ʉ̃kʉrʉ ẽbẽrarãta Jesu ʉ̃rʉ sewa nebʉrʉta jaradamarẽã. Bari jaraita, Jesuba ẽbẽra abaʉdeba angel kayirua ãĩ bʉebʉrʉdera, religion nokʼora Jesu ewaridebemaraba jarapanasi, Jesubara maʉ̃ra mawũã obasita Diaru jauredeba (Mar. 3:22). Jesu nokʼora kĩrãbita edesidadera religion nokʼoraba jarasida Jesura Daizeze ʉ̃rʉ imitia bedʼeabʉta akʉza wuabema ẽbẽrarãbida jarasida jaradamarẽã Jesuta beadamarẽã (Mat. 27:20). Tẽã Jesu kʼaidubemaraba Daizeze Nokʼo ʉ̃rʉ jaradia wãsidade yi maʉ̃ bedʼea ũrĩkĩrã ẽãbara sewidata jarasida ãyi ʉ̃rʉ wuabema ẽbẽrarã judiora ẽã, mawũã naʉ̃rata Jesu kʼaidubemara ʉ̃rʉ panamarẽã (Hech. 14:​2, 19). Hechos 14:2 ʉ̃rʉ, La Atalaya 1 Diciembre 1998debemaba naʉ̃ta jara ũrĩbisi: «Diaruare panʉrabara kristianoraba Daizeze Nokʼo ʉ̃rʉ jaradiabʉra ũrĩkĩrãna ẽ basi akʉza maʉ̃ awuara ãyara sewa nebʉrʉta jarasida naʉ̃ra kristianora ʉ̃rʉ, mawũã wuabemaraba ãya jarabʉta ũrĩkĩrã ẽ marẽã akʉza jʉradamarẽã».

16. Jeowa organizasion ʉ̃rʉ sewidata jaradara, ¿kʼãrẽta kĩrãbedaibara?

¹⁶ Diarubara idibasidu sewa nebʉrʉta jarabʉ akʉza iyara ẽbẽrarã «naʉ̃ drʉa jõmaʉ̃nẽbemata sewa erbʉ» (Apoc. 12:9). Bʉa ũrĩra Jeowa organizasion ʉ̃rʉ akʉza Jeowa pʉwʉrʉdebema nãã edepanʉra ʉ̃rʉ imitia bedʼeabarabʉta, kĩrãbera siglo nããrabemanebida Jeowa nejʉrarabara sewa nebʉrʉta jarasidata Jesu ʉ̃rʉ akʉza iyi kʼaidupanʉra ʉ̃rʉ. Jesuba jarasi ẽbẽrarãbara jʉradaibasita Daizeze odepanʉrãra akʉza ãyi ʉ̃rʉ sewidata jaradaibasita, maʉ̃ra idi ewade aripe berabarinʉmʉ (Mat. 5:​11, 12). Dayirãba biʼia kʼawuapanʉbʉrʉ sewidara Diarudeba  zebʉta akʉza sewida jarabʉdade kʼãrẽ oita kʼawuapanʉbʉrʉ, Jeowa organizasion ʉ̃rʉ sewida jarabʉdade maʉ̃ʼa yi edebida ẽ bayi, ¿kʼãrẽta oseabʉ bʉ maʉ̃ʼa yi edebi ẽ baita?

17. ¿Kʼãrẽta odaibara ĩjã ẽ baita sewa nebʉrʉ jarapanʉta? (2 Timoteo 1:13 akʉza akʉra naʉ̃ rekuadrota « Kʼãrẽta oseabʉ sewa nebʉrʉ ĩjã ẽ baita»).

¹⁷ Ĩjãraidua wuabemaraba sewa nebʉrʉ jarabʉta. Pabloba jara ũrĩbisi kʼãrẽta oibarata dayirãʼa sewa nebʉrʉ jarabʉdade. Iya Timoteoʼa jarasi wuabemara jaramarẽã awururaba sewa nebʉrʉ jarabʉta ĩjãna ẽ marẽã (1 Tim. 1:​3, 4; 4:7). Krĩchadaya naʉ̃ ʉ̃rʉ, wũãwũã zakebara nei egorode tabʉta ũdura jiraeda kʼãrãpe iyi yeda bʉeseabʉ mamina yi zroma chubara oẽ bayi maʉ̃ra, ¿kʼãrẽa? Kʼawuabʉ baera maʉ̃ nekʼãrẽ sama tabasita akʉza maʉ̃bara iyira kayabiseabʉta, maʉ̃ kĩrãkʼa dayirãbara sewa nebʉrʉ jarapanʉra ĩjãna ẽ, kʼawuapanʉ baera maʉ̃ sewidara Diarudeba zebʉta, awuarabʉrʉ ĩjãpanʉ Daizeze Bedʼeaba jarabʉtrʉ (akʉra 2 Timoteo 1:13).

18. ¿Sãwũã ũdubiseapanʉ Jeowa organizasion ʉ̃rʉ ĩjãpanʉta?

¹⁸ Naʉ̃ artikulode ũdubʉda bedʼea ũbea sãwũã Jeowa organizasionba Jesude kĩrãkʼa oũdubibʉta, mamina bari maʉ̃ratrʉ ũbeabʉ ẽ, bʉa Daizeze Bedʼea ʉ̃rʉ kʼawuabʉrʉde ũduseabʉ sãwũã nekʼãrẽ awurudeba Jeowa organizasionba ũdubibʉta Jesude kĩrãkʼa obʉta adewara kʼarebara awuru mebẽrã kongregasionebemarabida audre ĩjãnamarẽã Jeowa organizasion ʉ̃rʉ. Jeowa organizasion ʉ̃rʉ ĩjãbʉta ũdubira iyiare kʼẽrẽpabʉdeba akʉza iyi organizasion kʼawa bʉdeba (Sal. 37:28). Ewari jõmaʉ̃nẽ biga diapanʉ Jeowaʼa iyi pʉwʉrʉde babibʉ baera.