1, 2. ¿Kʼãrẽ bedʼea zromata ũduseapanʉ Jeowa odepanʉrabara?

 DAYIRÃBA bedʼea zroma atiaʉde ũdubʉba awuara babiseabʉ dayirã bebʉta. Bari jaraita, mebẽã Luisʼa a jarasida iyira kanserba baribʉta, medikoba jarasi iyira dããra ba ẽ bʼaita. Monikara yi kimaʉ̃mera ewariza trajapanasi Jeowaita, ewari aba Monikaba kʼawuasi yi kimara zõrãrã kongregasionebemabasimina, poaga dããrabadeba kayirua ozebʉrʉbasita. Oliviara dobabʉ, iyira iyi dedaʉba wãibarabasi nãgʉ zromata zeibasi baera, iyi mamaʉ̃ba jẽda zebʉrʉdera iyi dera neẽbasi, nãgʉba jõma ãrĩsi baera. Naʉ̃ra mebẽrã bebʉra atiaʉde awuara besi, ¿bʉabida ũdubarika bedʼea zroma bʉ bebʉ atiaʉde awuara babidata?

² Dayirã Daizeze ode kʼẽrẽpapanʉrabida ẽbẽrarã naʉ̃ drʉadebema kĩrãkʼa ũdupanʉ iyabaʉ bedʼea zromarata, adewara dayirãra pẽwãpanʉ akʉza jʉrade Daizeze odepanʉ baera. Jeowaba dayirã maʉ̃ra bedʼea zromaneba jipa ẽdrʉbi ẽ mina iyara jarabʉ kʼarebaita (Is. 41:10). Iyi kʼarebadeba dayirãra sobiapanaseabʉ akʉza nekʼãrẽ bia jida kʼawuaseapanʉ, adewara iyiare kʼẽrẽpapanaseabʉ bedʼea zroma mejãcha ũdupanʉmina. Naʉ̃ artikulode kʼawuadayi Jeowaba sãwũã nekʼãrẽ kimareneba kʼarebabʉta dayirãba bedʼea zroma ũdubʉrʉde, adewara kʼawuadayi  dayirãba kʼãrẽta oibarata Jeowaba kʼareba diabʉdeba nebia ũduita.

JEOWABA KʼAREBAYI BɄRA

3. ¿Dayirãba bedʼea zroma ũdubʉrʉdera kʼãrẽta oita zarea baseabʉ?

³ Yi bedʼea zromata. Dayirãba bedʼea zroma ũdubʉrʉdera zarea baseabʉ biʼia krĩchaita mawũã nekʼãrẽ ʉ̃rʉ bia jida kʼawuaita, ¿kʼãrẽa? Maʉ̃nera mejãcha sopʉa bʼai baera, dayirãra maʉ̃ bedʼea zroma kʼarea aukʼara krĩcha zroma onʉmaseabʉ, adewara maʉ̃ kʼarea yi kʼãrẽsi oisi kʼawua ẽ bayi akʉza yi sama wãisi kʼawua ẽ bayi. Akʉdaya mebẽrã wẽrãra ũme sãwũã sentisidata ãya bedʼea zroma ũduda tẽã. Oliviaba jarabʉ: «Nãgʉ zroma berabarida tẽã mʉ̃ de neẽ besidera, yi kʼãrẽ oisida kʼawua ẽ basi». Monikaba kʼawuaside yi kimaba iyi sãwũã odata, naʉ̃ta jarasi: «Mʉ̃ra maʉ̃nera mejãcha sopʉasi, dayima kucho zakeba subʉda kĩrãkʼa sentisi, adewara zarebasi nekʼãrẽ dedabema oisida». Dayirã bedʼea zroma kʼarea krĩcha zroma obʉdera, ¿sãwũã kʼarebaita jarabʉ Jeowabara?

4. Filipenses 4:​6, 7​ba jarabʉdebara, ¿kʼãrẽta oita jarabʉ Jeowabara?

⁴ Jeowaba sãwũã kʼarebaita. Iyara jarabʉ dayirãʼa diaita Daizeze neneẽãta (akʉra Filipenses 4:​6, 7). Dayirãta Jeowaʉ̃me neũdukʼawua biabʉrʉ aduʼapanañi akʉza neneẽã, naʉ̃ neneẽãra jõmaʉ̃ra krĩchaira ʉ̃tabʉ, naʉ̃ra jipade yibia. ¿Bʉra kʼãwũã berabaribarika? ¿Bʉ Daizezeʼa mejãcha yiwidʼida tẽã aduʼa sentibarika? Bʉra mawũã sentibari Jeowaba kʼarebasi baera aduʼa sentimarẽã.

5. ¿Jeowaba dayirã aduʼa babibʉba sãwũã kʼarebabʉ dayirã sota akʉza dayirã krĩchata?

⁵ Daizeze Bedʼeaba jarabʉ aduʼa bʼaiba kʼarebabʉta dayirã mejãcha krĩcha zroma oẽ baita akʉza dayirã sosida aduʼa erbaita. Daizeze Bedʼeaba zokʼabʉ bedʼea wuagaita, maʉ̃ bedʼeara zokʼapanasi jaraita gorogororaba pʉwʉrʉ sãwũã akʉbʉta. Gorogororaba pʉwʉrʉ aba akʉbʉdera yi ẽbẽrarã naʉ̃ pʉwʉrʉdebemara aduʼa kʼãĩpanasi, kʼawuapanasi baera gorogororaba akʉita ãyira. Abarika Jeowaba dayirã so wuagabʉba kʼarebabʉ dayirã aduʼa sentita (Sal. 4:8). Abarika Ana kĩrãkʼa dayirã bedʼea zromasida mesera ara oẽmina aduʼa sentiseapanʉ (1 Sam. 1:​16-18). Dayirãta aduʼa sentipanʉbʉrʉ, naʉ̃ba kʼarebayi nekʼãrẽ jidai nãã bia krĩchaita mawũã biʼia jidaita.

6. ¿Kʼãrẽta odaibara Jeowaba dayirã aduʼa babimarẽã? (Akʉra potota).

⁶ Dayirãba kʼãrẽta oibarata. Dayirãba  bedʼea zroma ũdubʉrʉdera Jeowa kʼarebata jʉrʉibara, abarika ẽbẽrarãba gorogorora kʼareba jʉrʉbʉ kĩrãkʼa, ¿sãwũã oseapanʉ maʉ̃ra? Jeowaʼa widiseapanʉ aduʼa bʼaita diamarẽã (Luc. 11:9; 1 Tes. 5:17). Luisba yi kima Anaʉ̃meba jara ũrĩbipanʉ ãyi sãwũã sentisidata kʼawuasidade Luisʼra dããra ba ẽ baita, iya jarabʉ: «Dayi kʼãwũã berabaribʉrʉdera jipade zare nekʼãrẽ ʉ̃rʉ biʼia jida kʼawuaira, daira aduʼa sentipanasi yiwidʼipanasi baera». Luisʼra yi kimaʉ̃mera soiduba yiwidʼisida akʉza yiwidʼida ʉ̃rʉ yiwidʼisida, ãya Jeowaʼa widisida ãyi krĩchata akʉza ãyi sota aduʼa babimarẽã, adewara buru biata diamarẽã nekʼãrẽ biʼia jidaita. Mawũã ãya sentisida Jeowaba sãwũã kʼarebasita. Abarika bʉabida bedʼea zromata ũdubʉbʉrʉ soiduba yiwidʼira akʉza akʉra Jeowaba sãwũã kʼarebabʉta bʉ so aduʼa bʼaita akʉza bʉ krĩchasi aduʼa bʼaita (Rom. 12:12).

JEOWABA ZAREA BABIYI BɄRA

7. ¿Dayirãba bedʼea zroma ũdubʉrʉdera sãwũã sentiseapanʉ?

⁷ Yi bedʼea zromata. Dayirãba bedʼea zroma ũdubʉrʉdera, nãã sãwũã sentibada kĩrãkʼa mawũã ẽ bʉrʉ, nãã krĩchabada kĩrãkʼa ba ẽ bayi akʉza edaʉde sobia sentiseapanʉ, mamina atiaʉde sopʉa totoseabʉ. Ana Luis kimaba jarabʉ yi kima beida tẽãra, iyira mawũã sentisita. Iya jarabʉ: «Mʉ̃ra mejãcha sopʉa sentibasi akʉza doba sentibasi. Edaʉde mejãcha kĩrʉbasi iyita beisi baera». Akʉza Anara sopʉa sentibasi oibarabasi baera nekʼãrẽ Luisba obadata. ¿Dayirã aukʼara sopʉa sentibʉrʉdera sãwũã kʼarebabʉ Jeowabara?

8. Isaías 33:6​ba jarabʉdebara, ¿kʼãrẽta oita jarabʉ Jeowabara?

⁸ Jeowaba sãwũã kʼarebaita. Jeowaba jarabʉ kʼarebaita dayirã zareapanaita (akʉra Isaías 33:6). Nãgʉ zroma zebʉrʉdera jãba zromara bʉrʉwa bʉrʉwanʉma kʼawa, maʉ̃ kʼarea jãba zromarabara nei erbʉ, mawũã bʉrʉwa bʉrʉwa ẽ baita, mamina maʉ̃ nekʼãrẽbara audre kʼarebaseabʉ yi jãbata abibʉrʉ. Abarika maʉ̃ kĩrãkʼa dayirãba bedʼea zroma ũdubʉrʉdera Jeowaba kʼarebayi zarea bʼaita, mamina audre kʼarebayi dayirãba nekʼãrẽ opanʉbʉrʉ iyi kʼawa bʼaita.

9. ¿Dayirã kartaraba sãwũã kʼarebaseabʉ zarea bʼaita? (Akʉra potota).

⁹ Dayirãba kʼãrẽta oibarata. Bʉa bedʼea zroma ũdubʉrʉde, krĩcha zroma obʉbʉrʉ bʉ sãwũã sentibʉ kʼarea, zarea ora yiwidʼita, ãba yi jʉrebarima wãita  akʉza jaradia wãita, adewara kĩrãbera Jeowabara jʉ̃ã ẽãta bʉa oseabʉde wueta omarẽã (naʉ̃ testoʉ̃me akʉra Lucas 21:​1-4). Adewara Daizeze Bedʼeata bʉyidobaʉba akʉra, mõbe maʉ̃ ʉ̃rʉ krĩchara ¿kʼãrẽa yibia maʉ̃ oira? Jeowaba iyi organizasioneba nekʼãrẽ mejãcha dia zebʉrʉ dayirã sopʉa sentibʉde maʉ̃neba aduʼa sentimarẽã, maʉ̃ba bʉa Daizeze Bedʼea estudiabʉrʉdera zokʼaseabʉ JW Library^® akʉza Índice de las publicaciones Watch Tower, mawũã ẽ bʉrʉ Guía de estudio para los testigos de Jehová. Monikaba jarabʉ iyi aukʼara sopʉa sentibasidera kʼareba jʉrʉbasita dayirã kartarane. Iya jʉrʉsi kartarane bedʼeabʉta kĩrʉi ʉ̃rʉ, kʼẽrẽpa bʼai ʉ̃rʉ akʉza ãĩ bʼai ʉ̃rʉ. Iyara maʉ̃ ʉ̃rʉ lesi aduʼa sentiyeda. Iya jarabʉ: «Mʉ̃a Daizeze Bedʼea mʉ̃yidobaʉba estudiasidera mejãcha krĩcha zroma obasi, mamina mʉ̃a audre estudia wãne aduʼa sentisi akʉza sentisi Jeowaba mʉ̃ sãwũã bʉrabʉrʉ kĩrãkʼabasita. Mʉ̃a Daizeze Bedʼea akʉbʉeda ũdusi Jeowaba mʉ̃ kʼarebanʉmʉta akʉza iyara kʼawuabʉta mʉ̃ sãwũã sentibʉra». Bʉ sopʉa sentibʉdera Jeowaba kʼarebayi bʉ aduʼa sentiyeda (Sal. 119:​143, 144).

JEOWABA BɄRA KʼAREBAYI BAE Ẽ BAITA

10. Dayirã neida berabaribʉrʉdera, ¿sãwũã sentiseabʉ?

¹⁰ Yi bedʼea zromata. Edaʉde dayirã neida berabaribʉrʉdera aukʼara sentiseabʉ, mawũã ẽ bʉrʉ zarea neẽbʉ kĩrãkʼa sentiseabʉ. Bari jaraita, ẽbẽra aba wẽbabʉta pobʉrʉdera iyira maʉ̃ tẽãra nʉ̃kadrʉ wãbida bia wã ẽ. Abarika dayirã neida berabaribʉrʉdera nãã bada kĩrãkʼa iyaba ba ẽ bayi ¿kʼãrẽa? Zarea baseabʉ baera dayirãba nãã obada jẽda oita, mawũã ẽ bʉrʉ dayirãba nãã okĩrãbadata sobiade oẽ bayi. Dayirãra Elías sentibada kĩrãkʼa sentiseabʉ, iyira mejãcha sopʉabasi baera badua kʼãĩkĩrãbasi (1 Rey. 19:​5-7). ¿Kʼãrẽta oita jarabʉ Jeowaba dayirã zarea neẽ sentibʉrʉde?

11. ¿Adewara Jeowaba sãwũã kʼarebabʉ dayirãra? (Salmo 94:18).

¹¹ Jeowaba sãwũã kʼarebaita. Iyara jarabʉ iyira dayirã kʼawa bʼaita mawũã kʼarebaita (akʉra Salmo 94:18). Abarika ẽbẽra jĩrʉ pobʉrʉde bia wãita kʼareba nesidabʉ kĩrãkʼa, dayirãbida kʼarebata nesida Jeowa ode kʼẽrẽpa takeraita. Maʉ̃ta berabaribʉrʉdera Jeowabara naʉ̃ta oita jarabʉ: «Mʉ̃ra Jeowa,  bʉ Zeze, mʉ̃ara jidabʉ bʉ juwarata, mʉ̃ yi jarabʉra perarãra mʉ̃a kʼarebayi» (Is. 41:13). Davidba ũdusi Jeowaba iyi sãwũã kʼarebasita, iyi nejʉraraba iyi pẽwãsidade iya naʉ̃ta jarasi Jeowa ʉ̃rʉ: «Bʉ juwaraba kʼarebabʉ mʉ̃ra» (Sal. 18:35). ¿Mamina Jeowaba sãwũã kʼarebasi iyira?

12. Dayirã zarea neẽ sentibʉrʉdera, ¿Jeowaba kʼairata zokʼai dayirã kʼarebaita?

¹² Jeowaba dayirãra kʼarebabʉ awururaneba, bari jaraita David sopʉabasidera iyi neũdukʼawua Jonatánba akʉ jʉ̃ẽsi, iyaʼa so zarea diaita akʉza bedʼea biata jara ũrĩbita (1 Sam. 23:​16, 17). Abarika osi Jeowaba Elíasʼʉ̃me, Eliseota zokʼa bʉesi Elíasta kʼarebamarẽã (1 Rey. 19:​16, 21; 2 Rey. 2:2). Idi ewade Jeowaba zokʼabʉ dayirã mebẽrãta, mebẽrã kongregasionebemata akʉza zõrãrãta dayirã kʼarebaita. Mamina dayirã sopʉabʉdera edaʉde doba bakĩrãbʉ, yãrãʉ̃me bedʼea ẽ baita. Mawũã berabaribʉrʉdera, ¿kʼãrẽta oseapanʉ Jeowaba dayirãta kʼarebamarẽã?

13. ¿Kʼãrẽta oibara Jeowaba dayirã kʼarebamarẽã? (Akʉra potota).

¹³ Dayirãba kʼãrẽta oibarata. Zarea oibara wuabemaraneba jĩga wã ẽ baita. Dayirã jĩga wãbʉrʉdera aukʼara krĩchabʉ dayi sãwũã berabarinʉmʉ ʉ̃rʉ akʉza mawũã krĩchaiba nekʼãrẽ jidaibarata aña jidabiseabʉ (Prov. 18:1). Dayirã sopʉabʉdera edaʉde nesidabʉ doba bʼaita, mamina dobabʉta ewari bio berabarira, mawũãra ũdu ẽ bayi Jeowaba bʉ sãwũã kʼarebakĩrãbʉta. Bʉ mejãcha sopʉabʉmina idu yi kʼarebabira bʉ mebẽrã, mebẽrã kongregasionebemara akʉza zõrãrã, ãyira Jeowaba bʉaʼa nebia diada (Prov. 17:17; Is. 32:​1, 2).

JEOWABA SO ZAREA DIAYI

14. ¿Kʼãrẽba pera sentibiseabʉ dayirãra?

¹⁴ Yi bedʼea zromata. Edaʉde dayirãra mejãcha pera sentiseabʉ. Daizeze Bedʼeade jara ũrĩbibʉ sãwũã Jeowa odepanʉrãra ãyi nejʉraraba pẽwãbʉ kʼarea mejãcha pera sentisidata (Sal. 18:4; 55:​1, 5). Abarika dayirãsi pẽwãseapanʉ kolegiode, trajode, dayirã mebẽrãba mawũã ẽ bʉrʉ nokʼoraba, mawũã ẽ bʉrʉ kayabʉba bebʉde baseabʉ. Mawũãbʉrʉdera dayirã wũãwũã zake kĩrãkʼa sentiseabʉ kʼaiba kʼarebai neẽ kĩrãkʼa. ¿Sãwũã kʼarebabʉ Jeowaba dayirã mawũã sentibʉdera?

15. Salmo 94:19​ba jarabʉdebara, ¿kʼãrẽta oi Jeowaba dayirãbari?

 ¹⁵ Jeowaba sãwũã kʼarebaita. Iya so zarea diabʉ dayirã akʉza aduʼa sentibibʉ (akʉra Salmo 94:19). Maʉ̃ biʼia ũrĩta krĩchadaya naʉ̃ ʉ̃rʉ, wũãwũã zake aba nãgʉ zroma zebʉrʉ kʼarea mejãcha pera sentibʉta, maʉ̃ne yi zezeta zepe juwade jiraeda kʼãrãpe bʉrabʉ, mawũã iyi pera ẽ marẽã. Nãgʉra waidide taʉ ẽ mina, naʉ̃ wũãwũã zakera aduʼa sentibʉ yi zezeba juwade jiraedabʉ baera. Dayirãba bedʼea zroma ũdubʉrʉdebida nesidapanʉ naʉ̃ zezeba oda kĩrãkʼa Jeowaba dayirãta kʼarebamarẽã. Maʉ̃ bedʼea zroma berabariyeda. ¿Kʼãrẽta oibara dayirãbara Jeowaba so zarea diamarẽãra?

16. ¿Kʼãrẽta oibara Jeowaba so zarea diamarẽã? (Akʉra potota).

¹⁶ Dayirãba kʼãrẽta oibarata. Badua yiwidʼira akʉza Daizeze Bedʼeata ewariza akʉra (Sal. 77:​1, 12-14). Bʉa naʉ̃ta badua obʉbʉrʉ bʉa bedʼea zroma ũdubʉrʉdera krĩchayi Jeowaba bʉ sãwũã kʼarebai ʉ̃rʉ, iyaʼa jarada bʉ sãwũã sentibʉta akʉza Daizeze Bedʼeade akʉra iya sãwũã so zarea diabʉta bʉaʼa (Sal. 119:28). Bʉa jʉrʉseabʉ saʉ̃ra testoraba kʼarebaseabʉta bʉ pera sentibʉrʉde, adewara so zarea ũduseabʉ Job, Salmos akʉza Proverbios librora lebʉrʉde, mawũã ẽ bʉrʉ akʉra Jesuba bedʼea jaradata Mateo 6de. Bʉ Jeowa yiwidʼibʉrʉde akʉza iyi Bedʼea akʉbʉrʉde so zarea ũduyi.

17. ¿Kʼãrẽ ʉ̃rʉ ĩjãseapanʉ?

¹⁷ Ĩjãseapanʉ dayirãba bedʼea zroma ũdubʉrʉdera Jeowaba kʼarebaita, iyara dayirãra doba amae ẽ bayi (Sal. 23:4; 94:14). Jeowaba jarabʉ iya dayirãra kʼarebaita, zarea babita, biʼia akʉita akʉza so zarea diaita. Isaías 26:3​ba naʉ̃ta jarabʉ Jeowa ʉ̃rʉ: «Biʼia akʉya bʉ kʼareba jʉrʉpanʉrãra, wãrĩnu neneẽã babiya bʉara nrʉemaza, bʉta ĩjãpanʉ baera». Maʉ̃ kʼarea ĩjãra Jeowa ʉ̃rʉ akʉza iyi kʼarebata jʉrʉra, bʉa maʉ̃ta obʉbʉrʉ zareabayi bedʼea zroma zebʉrʉde.