BABILONIA badamae nekʼãrẽ kikibari estudiabʉraba mejãcha ũdusida ladriyo wiamata maʉ̃ba pʉwʉrʉ parãita zokʼadapeadata. Nekʼãrẽ kikibari estudiabʉba Robert Koldeweyba jarabʉ «maʉ̃ ladriyora pʉwʉrʉ ãĩ opanasita egoro mejãchabʉmae».

Ʉ̃kʉrʉ libroraba jarabʉ ʉ̃kʉrʉ nokʼora Babilonianebemaraba zokʼabasita maʉ̃ra ­ladriyora obarimaera nekʼãrẽ kayirua oita. Paul-Alain Beaulieu, nejaradiabari Asiriología Universidad Torontodebemaba jarabʉ: «Ʉ̃kʉrʉ Babilonianebemaraba jarapanʉ maʉ̃ ladriyo opananamaera ẽbẽrarãsida babʉepanasita, nokʼoba jarabʉta ũrĩna ẽ basibʉrʉ akʉza nekʼãrẽ oma wawia ũdubi ẽ basibʉrʉ». Libro abaʉba nokʼo Nabucodonosor ʉ̃rʉ bedʼeabʉba naʉ̃ta jarabʉ: «Beara akʉza babʉera […] ẽbẽra neobarimae […] nãã zʉbʉriabira, mõbe beara tʉbʉde».

Naʉ̃ba kĩrãbebibʉ Daizeze Bedʼea lepanʉraba kãrẽta jarabʉta Daniel yi zroma 3de. Naʉ̃ nebʉraba jarabʉdebara nokʼo Nabucodonosorbara parãita jarasi Durade nekʼãrẽ oma zroma orodebemata, maʉ̃ra basi Babilonia ãĩ. Kʉ̃rara ũbea Israeldebemata, Sadracba, Mesacba akʉza Abednegoba ĩjãna ẽ basi nekʼãrẽ oma nãã sãkokode kʉbeita, Nabucodonosorʼra maʉ̃ kʼarea mejãcha kĩrʉsi mõbe iya zokʼasi 7 audre jʉ̃wʉrʉ odamarẽã maʉ̃ tʉbʉta, mawũã eda bʉeita maʉ̃ra kʉ̃rarata. Angel mejãcha zarea barabʉba ãyita ẽdrʉbisi maʉ̃neba (Dan. 3:​1-6, 19-28).

Maʉ̃ra ladriyo Babiloniane ũdudapeadaba ũdubibʉ Daizeze Bedʼeaba jarabʉra aripebʉta. Maʉ̃ra ladriyode ʉ̃kʉrʉde eda bʉbʉ nokʼo ʉ̃rʉ ibia bedʼeadamarẽã. Maʉ̃ranebema abaʉba jarabʉ: «Nabucodonosorʼra, nokʼo Babilonianebemata. […] De mʉ̃ chumaera mʉ̃a parãnata. […] Jõma mʉ̃neba zebʉrʉba ewari jõmaʉ̃nẽ zokʼadamarẽã». Maʉ̃ bedʼeara abarika jarabʉ Daniel 4:30​ba jarabʉ kĩrãkʼa, naʉ̃ testode Nabucodonosorba jarasi: «¿Naʉ̃ Babilonia pʉwʉrʉ zromara, mʉ̃a osi yi zroma bamarẽã, mʉ̃ zareadeba, mʉ̃a zokʼabʉ baera, mʉ̃ta audre yi zromata ũdudamarẽã?».