JÕMAɄ̃BA kʼawuapanʉ Jesura beasidata ẽbẽra kayiruara ẽzadra (Mat. 27:35-38). Mamina ʉ̃kʉrʉ ẽbẽrarãba ĩjãna ẽ Daizeze Bedʼeaba naʉ̃ ʉ̃rʉ jarabʉra wãrĩnuta. Daizeze Bedʼeaba jara baera Jesu kakuara bia ara oda kʼãrãpe jousidata (Mar. 15:42-46).

Ariel Sabarʼra karta Smithsonian nebʉbariba, jara ũrĩbisi naʉ̃ ʉ̃rʉ: «Yi audre ẽbẽra kayiruara bakurude beapanasi akʉza ʉ̃kʉrʉ ẽbẽrarã naʉ̃ ʉ̃rʉ mejãcha kʼawuapanʉbara ĩjãna ẽ basi naʉ̃ra ẽbẽrarã jouira». Romanorabara kãgabasi naʉ̃ra ẽbẽra kayiruarãra mejãcha peradamarẽã ãya oda kʼarea, maʉ̃ba ãyi maʉ̃ bakurude beabʉrʉdera aribia amaepanasi nedʉwʉrʉraba makodamarẽã. Tẽã sobea badu ẽbẽra balbʉebadama bʉepanasi. Maʉ̃ kʼarea ʉ̃kʉrʉ ẽbẽra Ebangelio ʉ̃rʉ kʼawuapanʉraba jarapanʉ Daizeze Bedʼeade Jesu jouda ʉ̃rʉ jarabʉra sewidata.

Mamina nekʼãrẽ kikibari estudiabʉba awuara ũdubibʉ. Poaga 1968de ũdusida yumakẽrã siglo nããrabemane beadapeada bʉwʉrʉrata. Naʉ̃ra bʉwʉrʉrãra ũdusida mebẽrã judeadebema joubadamae, Jerusalén kʼawa. Maʉ̃ bʉwʉrʉra kaja zakede edabasi. Mõbe maʉ̃ bʉwʉrʉrane basi jĩrʉ ãbidarra bʉwʉrʉta, mama ũdusida naʉ̃ jĩrʉ ãbidarrara klabo 11.5 sentimetrobʉba kachisidata bakuruma. Maʉ̃ jĩrʉ ãbidarra yibari trʉ̃ra Jehohanán basi. Sabarba jarabʉ: «Naʉ̃ba kʼarebasita kʼawuaita Daizeze Bedʼeaba Jesu jouda ʉ̃rʉ jarabʉra wãrĩnuta. Adewara ũdubibʉ Jesu ewaridera romanorabara iduaribibasita, ʉ̃kʉrʉ ẽbẽrarã yi bakurude beadapeadara wuabemara ẽbẽra kĩrãkʼa joudamarẽã».

Maʉ̃ ũdudadeba, ʉ̃kʉrʉ ẽbẽraba awuara krĩchapanʉ Jesu kakua sãwũã kachi jirabasi ʉ̃rʉ bakuruma. Mamina maʉ̃neba kʼawuapanʉ ʉ̃kʉrʉ ẽbẽra kayiruara beadapeadara jousidata, mawũã jõmaʉ̃ta sobea badu ẽbẽra balbʉedama bʉeda ẽ basita. Dayirãba akʉtadadeba kʼawuapanʉ Daizeze Bedʼeaba Jesu ẽbẽra joubadamae jousida abʉra wãrĩnuta.

Jeowaba yi jaramabasi Jesura joudaibasita yumakẽrã plata mejãcha erbʉ joubadamae, iya jarabʉra jõma aripe berabaribʉ, maʉ̃ba mia abaʉba obe ẽ iya jarabʉra aripe berabari ẽ marẽã (Is. 53:9; 55:11).