Mawũã berabaribʉrʉdera, kongregasionbara bia krĩchapanʉ akʉza bia akʉpanʉ kima nããbema sãwũã idubʉdara, adewara iyi akʉza jẽda juwa jidada ʉ̃rʉra bia krĩchapanʉ. Naʉ̃ bia ũrĩnaita, akʉdaya kaseasita Jesuba yi juwa jidapanʉta yi idubʉi ʉ̃rʉ akʉza tẽã awurume juwa jidai ʉ̃rʉ.

Mateo 19:9ba jara ũrĩbibʉ yi juwa jidapanʉrãra kʼãrẽ berabaribʉrʉde yi idubʉdaibarata, jarabʉ: «Yumakẽrãba yi kimata idʉbʉra (awuru erkʼãĩbʉrʉ kʼarea) akʉza awurume juwa jidara, maʉ̃ra ãĩbadogo». Jesuba jaradadeba kʼawuapanʉ: 1) Awuruta erkʼãĩra Daizeze Bedʼeaba jarabʉ kĩrãkʼa yi juwa jidapanʉra yi idubʉseapanʉ 2) Yumakẽrãba yi kima wẽrãta idʉbʉra yi kima ãĩba ẽãta, yumakẽrãta awuru yuwẽrãʉ̃me juwa jidabʉbʉrʉ iyita ãĩbabʉ. *

Yumakẽrã abaʉta krĩña ãĩbasibʉrʉ awuru wẽrãʉ̃me yi kima idubʉya, ¿jẽda juwa jidaseabʉka? Mawũã berabaribʉrʉdera yi kima wẽrãba kʼawua krĩchayi iya kĩrãduaita yi kimaba kʼãrẽ odara, mawũã ẽ bʉrʉ jipa yi idubʉita. Yi kima wẽrãba jipa idubʉya ara, ãyi ũmena wãnaibara notariaeda mawũã jipa yi idubʉdaita, maʉ̃ tẽã ãyi aba abaka jẽda juwa jidaseapanʉ.

Mamina edaʉde yi kima wẽrãbara yi kimaba odara jẽda kĩraduakĩrãbʉ, mawũã ãba panaita. Mamina yumakẽrãba yi kimata jipa idubʉkĩrãbʉbʉrʉ maʉ̃ kʼarea iyi doba notaria wã kʼãrãpe idubʉra, ¿kʼãrẽta sãwũã berabari? Yuwẽrãba kĩrãdua kĩrãbʉ baera yi kimaba odata, yumakẽrãra jẽda juwa jidabe ẽ Daizeze Bedʼeaba jarabʉ kĩrãkʼara. Mawũãsidu Daizeze Bedʼeaba zokʼabʉta ũrĩ ẽ bʉrʉ akʉza jẽda juwa jidara, iyira jẽda ãĩbabʉ kĩrãkʼabʉ, mawũã berabaribʉrʉdera zõrãrã kongregasionebemara ãba yi jʉrepanʉ yi nemitia odaʉ̃me bedʼeaita mawũã kʼawua odaita (1 Cor. 5:1, 2; 6:9, 10).

Yumakẽrã abaʉta juwa jidara Daizeze Bedʼeaba zokʼabʉ ẽãne, ¿kongregasionbara sãwũã akʉpanʉ iyi kima yiwidita akʉza nããbema kimabadara? ¿Naʉ̃ yumakẽrãra juwa jida ẽ basi baera Daizeze Bedʼeaba zokʼabʉde, Daizezebara bia akʉbʉka? ¿Yumakẽrã juwa jidada tẽãra yi kimabadabara wabida basidu krĩchaseabʉka yi kimabada jẽda erbaita mawũã ẽ bʉrʉ jipa idubʉita? ¿Naʉ̃ yumakẽrã juwa jidadara akʉpanʉika ãĩbanʉmʉ kĩrãkʼa?

Nawedara kongregasionbara krĩchapanasi yumakẽrãta awuru wẽrãʉ̃me juwa jidadara naʉ̃ra ewari jõmaʉ̃nẽ ãĩbabʉ kĩrãkʼapanasita, yi kima nããbema bei ẽ nara, awurume juwa jida ẽ nara, mawũã ẽ bʉrʉ iyisida ãĩba ẽ nara. Jesubara jarasi yumakẽrã abaʉba yi kima idubʉya, iyi doba notaria wã kʼãrãpe jipa idubʉra akʉza awurume juwa jidara Daizeze Bedʼeaba jarabʉ ẽãne, iyira ãĩbabʉ kĩrãkʼabʉta, maʉ̃ne jõbʉta yi kima nããbemaʉ̃me juwa jidadara.

 Yumakẽrãta doba wãra notariaidu yi kima jipa idubʉita akʉza awurume juwa jidara, yuwẽrãbara kʼãrẽa krĩchaita ne ẽ, yi kimabada jẽda kĩrãduaita mawũã ẽ bʉrʉ idubʉita. Mawuẽrã yi kayirua oẽ badara aduʼa baseabʉ, wua maʉ̃ ʉ̃rʉ krĩcha ẽ.Adewara yuwẽrã kayirua oẽ badata juwa jida ẽ mina, bei ẽ mina, mawũã ẽ bʉrʉ ãĩbabʉmina, kongregasionbara bia akʉibara yumakẽrã awurume juwa jidadara. *

Yiza nããra jaradadera yumakẽrãra ãĩbasi, maʉ̃ba yi idubʉsida. ¿Kʼãrẽta berabari yumakẽrãta ãĩba ẽãta notariaidu wãra jaraita yi kima jipa idubʉita akʉza jẽda awurume juwa jidara? akʉza ¿Kʼãrẽta berabari yumakẽrãta yi kimabadaʉ̃me yi idubʉda tẽãbʉrʉ ãĩbasibʉrʉ, mõbe iyita jẽda juwa jidara awurume, adewara yi kimabadaba iya kayirua odata kĩrãduakĩrãbasibʉrʉ? Kʼãwũã berabaribʉrʉdera yumakẽrã iyi kima yiwidiʉ̃mera ãĩbapanʉ kĩrãkʼabʉ akʉza iyi kima nããbemabadaʉ̃mera jipa yi idubʉpanʉ. La Atalaya 15 febrero 1980debemaba pagina 30de jara ũrĩbisi, «yumakẽrãra awurume juwa jidasi baera iyi kima yiwidira idubʉ ẽ baita iyi kimabadaʉ̃me jẽda zeya. Yumakẽrã iyi kima nããbemaʉ̃me juwa jidabadara jipa jõbʉ, yumakẽrãta notariaidu jʉ̃ẽsi baera, ãĩbasi baera, adewara awuru yuwẽrãʉ̃me jẽda juwa jidasi baera».

Naʉ̃ krĩcha yiwidibʉbara jarakĩrãkʉ ẽ juwa jidabʉde kʼẽrẽpa bʼaira, nesida ẽãta akʉza jarakĩrãkʉ ẽ juwa jidabʉdebema aba ãĩbara, maʉ̃ra kayirua ẽãta. Yumakẽrã aba notariaidu wãra jaraita yi kima jipa idubʉita akʉza awurume juwa jidaira, Daizeze Bedʼeaba mawũã zokʼabʉ ẽãne zõrãrã kongregasionebemataa ãba yi jʉrebʉ yi kayirua odaʉ̃me bedʼeaita, iyira ãĩbasi baera. (Mawũãra iyi kima yiwidita Daizeze odebʉbʉrʉ zõrãrã kongregasionnebema iyiʉ̃me bedʼeaibara, iyisida aĩbasi baera). Naʉ̃ yumakẽrãta awuru yuwẽrãʉ̃me kʼẽrẽpa juwa jidasimina, ãya obadara Daizeze Bedʼeaba zokʼabʉde ba ẽ basi. Kaʉ̃ yumakẽrãba kongregasione pribilegio erbaira jʉ̃ãibara ewari mejãcha berabarita. Mebẽrã kongregasionebemaba iyi ʉ̃rʉ jẽda bia krĩchayieda adewara krĩchadaibara sãwũãbʉta iyi kimabadata akʉza wũãwũãra yumakẽrãba idubʉ amaenata (Mal. 2:14-16).

Kʼawuatabeda yumakẽrã abaʉba idubʉra iyi kimata akʉza awurume juwa jidara Daizeze Bedʼeaba zokʼabʉ ẽãne, tẽã bedʼea ũduyi. Jeowaitara juwa jidabʉrarã kʼẽrẽpa panaibara, maʉ̃ kʼarea yibia Jeowa odepanʉrãra Jeowa kĩrãkʼa krĩchaita (Ecl. 5:4, 5; Heb. 13:4).