1, 2. (1) ¿Pablobara kʼãrẽa jarasi kãga ũdubira audre yibiata? (2) ¿Kʼãrẽ bedʼearata panʉnai?

 PABLO bedʼeaside kãga ʉ̃rʉ, ĩjãi ʉ̃rʉ akʉza nebia jʉ̃ãi ʉ̃rʉ, iyara jarasi naʉ̃ranebema yi audre yibiara kãga ũdubita (1 Cor. 13:13). ¿Kʼãrẽa Pablobara mawũã jarasi? Ʉ̃ra zeidera dayirãbara nesida ẽ baera ĩjãita Jeowaba nebia weya abʉ ʉ̃rʉ akʉza jʉ̃ãna ẽ bayi maʉ̃ra wãrĩnu berabarita, mainʉ bʼaira yi berabarimabasi baera, mamina dayirãbara ewari jõmaʉ̃nẽ nesidadayi kãga ũdubita Jeowaʼa akʉza ẽbẽrarã. Dayirãba ãyaʼa kãga ũdubibʉra ewari jõmaʉ̃nẽ wari wãñi.

² Dayirãba ewari jõmaʉ̃nẽ kãga ũdubita nesidadai baera panʉnañi bedʼea ũbea. Aba, ¿kʼãrẽa dayirãi yiya kãga ũdubibara? Ũmeta, ¿sãwũã dayirãi yiya kãgabʉta ũdubipanʉ? Yi ũbeata, ¿kʼãrẽta odaibara dayirãi yiya kãgabʉta audre zarea babita?

3. ¿Kʼãrẽa dayirãi yiya kãgabʉta ũdubibara?

³ ¿Kʼãrẽa yibia dayirãi yiya kãgaira? Dayirãi yiya kãga ũdubibʉba, ũdubibʉ dayirãra kristianoarata. Jesuba iyi kʼaidubemara jarasi: «Mawũãtrʉ jõmaʉ̃ba kʼawuadayi marara mʉ̃ kʼaidubemarata, mayirainʉ yiya kãgapanʉbʉrʉ» (Juan 13:35). Adewara dayirãi yiya kãga ũdubibʉba  kʼarebabʉ ãba panaita. Pabloba naʉ̃ kãga ʉ̃rʉ kʼãwũã jarasi: «Maʉ̃bʉrʉ jipa biʼia ãba babibʉ baera» (Col. 3:14). Mamina dayirãbara akʉza kãga ũdubibara naʉ̃ kʼarea, apostol Juanba naʉ̃ta bʉsi: «Yi Daizeze kãgabʉbara yi mebẽãsida kãgaibara» (1 Juan 4:21). Dayirãba dayirãi yiya kãgabʉta ũdubibʉrʉdera ũdubipanʉ Daizezesida kãgapanʉta.

4, 5. Yizadeba jara ũrĩbira kʼãrẽa dayirãba Jeowa kãga ũdubira, kãga ũdubibara wuabemara.

⁴ ¿Kʼãrẽa jaraseapanʉ dayirãba mebẽrã kãga ũdubibʉba ũdubibʉta Jeowasida kãgapanʉta? Naʉ̃ ʉ̃rʉ biʼia ũrĩnaita krĩchadaya naʉ̃ yiza ʉ̃rʉ. Medikoraba dayi so sãwũãbʉ kʼawuaira akʉpanʉ dayi juwata, dayi juwa kʼãrẽaba dun dun kirakirabariba, kʼawuabibʉ sãwũãbʉta dayi sora.

⁵ Medikobara dayirã so sãwũãbʉra kʼawuabʉ dayirã juwa akʉbʉrʉde. Abarika dayirãba Jeowa kʼãrẽaba kãgabʉra kʼawuaseapanʉ mebẽrã kʼãrẽaba kãga ũdubibʉdeba. Dayirãba mebẽrã kãga ũdubibʉta mejãcha ũdubibʉ ẽ bʉrʉ, maʉ̃ba ũdubiseabʉ daya Jeowa kãgabʉsida zareabʉ ẽãta, mamina dayirãba mebẽrã ewariza ũdubipanʉbʉrʉ ãyi kãgabʉta, naʉ̃ba ũdubibʉ dayirãba Daizeze kãgabʉsida zarea erpanʉta.

6. ¿Kʼãrẽa krĩcha zroma oibara bʉa mebẽrã kãga ũdubibʉta mejãcha ũdubi ẽ bʉrʉ? (1 Juan 4:​7-9, 11).

⁶ ¿Dayirãba mebẽrã kãga ũdubi ẽ bʉrʉ krĩcha oseapanʉka maʉ̃ kʼarea? Mawũã, maʉ̃ba ũdubibʉ baera dayirãra Daizeze kʼawabʉ ẽãta. Apostol Juanba ũdubisi kʼãrẽa yibiata mebẽrã kãga ũdubira, iya jarasi: «Yi mebẽã kãga ẽãra iya ũdubʉta, Daizezearara kãga ẽ ũdu ẽ baera» (1 Juan 4:20). ¿Kʼãrẽta kʼawuapanʉ? Jeowaba dayirãta biʼia akʉmarẽãra, dayirãbara kãga ũdubibarata mebẽrãʼa (akʉra 1 Juan 4:​7-9, 11).

7, 8. ¿Sãwũã yiya kãga ũdubiseapanʉ?

⁷ Daizeze Bedʼeaba jarada ʉ̃rʉ jarabʉ mayirai yiya kãgaidua (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Kãgara nebia dayirã sodebʉ akʉza mia abaʉ ẽbẽraba ũdu ẽ dayirã sode kʼãrẽtabʉra, mawũẽra ¿dayirãbara sãwũã ũdubiseabʉ dayirã kãgara wuabemarãra? Dayirãba kʼãrẽ jarabʉdeba akʉza kʼãrẽ obʉdeba.

⁸ Dayirãba mebẽrã kãga ũdubira ne kĩrã biodeba ũdubiseabʉ. Akʉdaya ʉ̃kʉrʉ yizarata: «Mayirai wãrĩnuta jaraibara» (Zac. 8:16). «Zhiya adu-a bʼeaudua» (Mar. 9:50). «Yiya wawia ũdubira» (Rom. 12:10). «Zhiya bia edaudua» (Rom. 15:7). «Kĩrãduaidua bʉ ʉ̃rʉ nemitiata osidamina» (Col. 3:13). «Yiya kʼareba atʉidua zʉgʉara» (Gál. 6:2). «Mayirai so zarea diaidua» (1 Tes. 4:18). «Mayirai kʼarebaidua» (1 Tes. 5:11). «Yiya yiwidʼidua» (Sant. 5:16).

9. ¿Wuabemara so zarea diaira kʼãrẽa jarakĩrãbʉ kãga ũdubibʉta? (Akʉra potota).

⁹ Bedʼeadayi bedʼea parrapo nããbemane bedʼeada ʉ̃rʉ. Akʉdayi Pabloba ũrãgʼa diadata: «Maʉ̃ kʼarea mayirai so zarea diaidua». ¿Wuabemara so zarea diaibara sãwũã ũdubibʉ kãgata? Libro abaʉba jarabʉ Pabloba jarada ʉ̃rʉ, bedʼea so zarea diaibara jarakĩrãbʉ ẽbẽra bedʼea zroma berabarinʉmʉne iyi kʼawa bʼaita ũrĩta akʉza kʼarebaita. Dayi  mebẽã bedʼea zroma ũdunʉmʉne so zarea diabʉdeba kʼarebabʉ dayi mebẽã Jeowaʉ̃me kʼẽrẽpa bamarẽã. Ewari jʉrʉpanʉne dayi mebẽã so zarea diaita ũdubipanʉ kãgata (2 Cor. 7:​6, 7, 13).

10. ¿Kʼãrẽne abarikabʉ so zʉbʉria akʉita akʉza so zarea diaita?

¹⁰ So zarea diaita akʉza so zʉbʉria akʉira abarikabʉ kĩrãkʼabʉ, ¿kʼãrẽa mawũã jarapanʉ? Ẽbẽra so zʉbʉria akʉbʉbara wuabema zʉbʉrianʉmʉ ũdui kʼarebakĩrãbʉ so zarea bamarẽã. Nããra so zʉbʉria akʉpanʉ, maʉ̃are so zarea diapanʉ. Pabloba jarabʉ Jeowaba sãwũã zʉbʉria akʉbʉba so zarea diabʉta. Pabloba jarabʉ Jeowa ʉ̃rʉ naʉ̃ta: «Zeze dayirã kãga akʉbʉa akʉza Daizeze dayirã so zarea diabaria» (2 Cor. 1:3). Pabloba bedʼea zokʼaside «kãga akʉbʉa» zokʼasi ũdubita ẽbẽra wuabemara so zʉbʉria akʉbʉta. Pabloba jaraside «Zeze dayirã kãga akʉbʉa» jarakĩrãbasi Jeowaba dayirã mejãchade so zʉbʉria akʉbʉta, maʉ̃ so zʉbʉriaba dayirã bedʼea zroma erpanʉne kʼarebabʉ so zarea diaita (2 Cor. 1:4). Bania do dabʉdebema kʉrãzakiruba daya dobʉrʉde kʉrãzabibari kĩrãkʼa, dayirã zʉbʉriabʉrʉde Jeowaba aduʼa sentibiseabʉ, ¿sãwũã dayirãba Jeowade kĩrãkʼa so zʉbʉria akʉpe akʉza so zarea diaseabʉ? ¿Sãwũã oseabʉ? Nããra, dayirã sode kʼawuaibara nebia oita, mawũã wuabemara so zarea daita, ¿saʉ̃ra maʉ̃ra nebiara?

11. Colosenses 3:12 akʉza 1 Pedro 3:8​ba jarabʉdebara, ¿kʼãrẽ nebiata erbaibara wuabemara so zarea diaita?

¹¹ ¿Kʼãrẽba kʼarebai ewariza mebẽrã kãga ũdubita akʉza so zarea diaita? (akʉra Colosenses 3:12; 1 Pedro 3:8). ¿Sãwũã kʼarebai naʉ̃ra nebiaraba? Mebẽrã so zʉbʉria akʉbʉdade wãrĩnu krĩchadayi ãyi ʉ̃rʉ, mawũã soiduba so zarea diakĩrãnañi ãyi zʉbʉrianʉmʉne. Jesuba jarada kĩrãkʼa dayi sode kʼãrẽ erbʉta maʉ̃ta bedʼeabʉ, ẽbẽra biabara iyi sode kʼãrẽ bia erbʉta maʉ̃ta diabʉ (Mat. 12:​34, 35). Mebẽrã so zarea diabʉdade ũdubipanʉ wãrĩnu kãgata.

12. (1) ¿Kʼãrẽa jʉra kʼawuapanaibara? (2) ¿Kʼãrẽta widibara?

¹² Dayirã jõmaʉ̃ba yiya kãgabʉta ũdubikĩrãpanʉ (1 Juan 4:7). Mawũãsidu kĩrãbedaibara Jesuba jarasita mejãchaʉba yãrã kãgada ẽ baita (Mat. 24:12). Jesuba maʉ̃ba jarakĩrãkʉa ẽ basi iyi kʼaidubemara mejãchaʉba yiya kãga ũdubida ẽ baibasita, awuarabʉrʉ jarakĩrãbasi jʉra kʼawuapanamarẽã naʉ̃ drʉadera bʉ baera ẽbẽrarã yiya kãga ũdubi ẽãta, maʉ̃ kʼarea dayirãba krĩchaibara naʉ̃ta ¿kʼãrẽba kʼarebai mʉ̃a kʼawuaita mebẽrã kãga ũdubibʉra zareabʉta?

13. ¿Kʼãrẽba kʼarebai kʼawuaita dayirãba mebẽrã kãga ũdubibʉra zareabʉ kʼawuaita?

¹³ Dayirãba kãga ũdubibʉ zarea erbʉ kʼawuaira, krĩchaibara daya bedʼea zroma erbʉde kʼãrẽta obʉta (2 Cor. 8:8). Pedroba maʉ̃ ʉ̃rʉ naʉ̃ta jarasi: «Mayirai mejãcha yi kãgapanaidua akʉza kãgabara jõma kĩrãduabʉ kayirua opanʉra» (1 Ped. 4:8). Mawũẽra mebẽrãba kayirua obʉba akʉza dayirã ʉ̃rʉ kayirua obʉba, kʼarebaseabʉ kʼawuaita daya ãya kãga ũdubibʉra zareabʉ kʼawuaita.

14. 1 Pedro 4:8​ba jarabʉdebara, ¿kʼãrẽta kãgata ũdubidaibara? Yizata ũdubira

¹⁴ Bia kʼawuadadrʉ Pedroba jarada  ʉ̃rʉ, yi wikakiru 8de iya jarasi, kʼãrẽ kãgata ũdubibarata, jarasi mejãcha yiya kãgapanaibarata. Yi bersikulode tẽã jara ũrĩbibʉ daya kãgata mejãcha ũdubibʉbʉrʉ naʉ̃ba kʼarebaita mebẽrãba kayirua obʉrʉde kĩrãduaita. Pedroba jarasi mejãcha kãga ũdubibarata, naʉ̃ bedʼea biʼia ũrĩta krĩchadaya naʉ̃ yiza ʉ̃rʉ. Krĩchara mesa aba dauchabʉ ẽãta akʉza maʉ̃ daucha zobe zobekachuta, naʉ̃bara zobea abapai erbʉ ẽ, awuarabʉrʉ bio erbʉ akʉza maʉ̃ daucha dauchabʉ ẽ. Mawũẽra bʉa naʉ̃ mitia mẽrãira wuata jira edayi, mõbe maʉ̃ wuara ewarayi mawũã maʉ̃ mitia anaita. Mamina maʉ̃ wuabara bari zobea abapai ana ẽ bayi, awuarabʉrʉ zobea jõma anañi. Abarika dayirãba kãgata mejãcha erbʉbʉrʉ mebẽrãba kayirua obʉrʉdera bari ãya kayirua aba obʉrʉtrʉ kĩrãdua ẽ bayi, awuarabʉrʉ ãya kayirua mejãcha obʉrʉsida kĩrãduayi.

15. Dayirãba mebẽrã kãgabʉta mejãcha zareabʉbʉrʉ, ¿kʼãrẽta odayi? (Colosenses 3:13).

¹⁵ Mebẽrãba dayirã ʉ̃rʉ kayirua obʉrʉdera nesidadayi dayirã kãgata mejãcha  zarea erpanaita, mawũã kĩrãduaita ãya kayirua odata, naʉ̃ra edaʉde zareabʉmina (akʉra Colosenses 3:13). Dayirãba wuabemaba kayirua obʉrʉta kĩrãduapanʉbʉrʉ, ũdubidayi dayirãba kãga erbʉra mejãcha zareabʉta akʉza Jeowaba bia akʉyi. Adewara, ¿kʼãrẽba kʼarebaseabʉ wuabemaraba kayirua obʉrʉde mawũã ẽ bʉrʉ dayirãʼa kĩrʉbibʉrʉde kĩrãduaita?

16, 17. ¿Kʼãrẽba kʼarebai kĩrãduaita mebẽrãba kayirua odata? Yizata jara ũrĩbira (akʉra potota).

¹⁶ Akʉra mebẽrãba kʼãrẽ nebia erbʉtrʉ, akʉrãra ãya kʼãrẽ kayirua obʉta. Krĩchara naʉ̃ yizata, krĩchara bʉ ãba yi jʉrebʉta mebẽrãbawara, bʉra ãyibawara sobiabʉ, bia berabaribʉ bʉa. Mamina ãba yi jʉre berabarida tẽã potota sakapanʉ ũbea, bʉa maʉ̃ potora akʉbʉrʉde ũduyi abaʉde mebẽã aba ipida ẽ basita, ¿kʼãrẽta oi bʉa maʉ̃ne? Maʉ̃ potora bʉa borra bʉeyi ¿kʼãrẽa? Erbʉ baera awuru potota mara jõma ipida ʉ̃tʉ zebʉta.

¹⁷ Mamina yi poto bia kedadara dayirãbara wuagapanʉ tẽã maʉ̃ poto akʉbʉrʉde kĩrãbeita mebẽrãbawara sãwũã bia berabaridata. Abarika berabaribʉ mebẽrãʉ̃me, dayirãbara ãyibawara bia berabarida ewarira kĩrãbepanʉ, mamina ãya dayirãta kĩrʉbibʉrʉdera maʉ̃  ewarira ãĩ bʉebʉ daya poto mitia kedada borra bʉebʉ kĩrãkʼa (Prov. 19:11; Efes. 4:32). Mawũẽra mebẽrãba kayirua odara dayirãbara kĩrãduaseapanʉ, kĩrãbepanʉ baera maʉ̃ mebẽãʉ̃me kʼãrẽ ewaride audre bia berabaridata.

18. ¿Naʉ̃ artikulodera kʼãrẽta kʼawuasida kãga ʉ̃rʉ?

¹⁸ ¿Kʼãrẽa yiya kãgapanʉta ũdubidaibara? Dayirãba kʼawuasida mebẽrã kãga ũdubibʉrʉdera ũdubipanʉta Jeowasida kãgapanʉta. ¿Sãwũã dayirãi yiya kãgapanʉta ũdubiseapanʉ? Dayirãba kãgata ũdubipanʉ mebẽrã so zarea diabʉde akʉza ãyaʼa audre so zarea diaseapanʉ ãyita so borekea akʉpanʉbʉrʉ, ¿kʼãrẽta oseapanʉ dayirãi yiya kãgabʉta zarea erpanaita? Maʉ̃itara zarea odaibara mebẽrãba kayirua obʉta kĩrãduaita.

19. ¿Kʼãrẽa jipade yibia dayirãi yiya kãga ũdubita?

¹⁹ ¿Kʼãrẽa yibia dayirãi yiya kãgabʉ ũdubita? Pedroba jara ũrĩbisi kʼãrẽa, iya jarabʉ: «Mamina nekʼãrẽ jõma jõita arakʼaitaba. Maʉ̃ kʼarea [ . . . ] mayirai mejãcha yi kãgapanaidua» (1 Ped. 4:​7, 8). Naʉ̃ ewari jõi audre arakʼaita babʉrʉdera, ¿kʼãrẽta berabari? Jesuba naʉ̃ta jarasi: «Adewara pʉwʉrʉ jõmaʉ̃nẽbemaba marara jʉradaya mʉ̃ kʼarea» (Mat. 24:9). Ãya mawũã jʉrabʉ awuantaira, dayirãra mebẽrãʉ̃me ãbapanaibara, mawũã opanʉbʉrʉ Diarubara ãyideba jĩga babi ẽ bayi, dayirãra kãgaba «jipa biʼia ãba babibʉ baera» (Col. 3:14; Filip. 2:​1, 2).