1. ¿Jeowabara sãwũã so zarea diasi iyi kʼaidupanʉra nããbemarãra?

 DAIZEZE Bedʼeaba jarabʉ ẽbẽrarã ʉ̃kʉrʉ mejãchade zarea ĩjãbasita Daizeze ʉ̃rʉ, mawũãsidu ãyira edaʉde zarea neẽ kĩrãkʼabasi. Bari jaraita, Davidʼra edaʉde krĩchabasi iyira bʉta katuma kĩrãkʼa zarea, mamina edaʉde iyira mejãcha perabasi (Sal. 30:7). Sansónʼra Daizeze jaure zareaba kʼarebabasidera mejãchade zareabarabasi, mamina iya jarasi iyita Daizeze jaure zareaba kʼareba ẽ bʉrʉ iyira bʼaita wuabema ẽbẽra kĩrãkʼa (Juec. 14:​5, 6; 16:17). Naʉ̃ra yumakẽrãrãra zareabarapanasi Jeowaba zarea diabasi baera.

2. ¿Kʼãrẽa Pabloba zarea neẽbʉidu zarea erbʉ asi? (2 Corintios 12:​9, 10).

² Apostol Pablobida kʼawuasi Jeowa zareata nesidabasita (akʉra 2 Corintios 12:​9, 10). Dayirã kĩrãkʼa Pablosida kayasi (Gál. 4:​13, 14). Edaʉde yõbasi nekʼãrẽ aripe oita (Rom. 7:​18, 19). Edaʉde krĩcha zroma obasi (2 Cor. 1:​8, 9). Mawũãmina Pablo zarea neẽ basidera zareabarabasi, ¿sãwũã? Jeowaba zarea diasi Pablo zarea bamarẽã.

3. ¿Kʼãrẽ bedʼeata panʉnai naʉ̃ artikulodera?

³ Jeowaba jarabʉ dayirãsida zareabara babita (1 Ped. 5:10). Mamina jʉ̃ãbe ẽ maʉ̃ zarea jidaira dayirãba nekʼãrẽ oẽãne. Bari jaraita, dayita yikoba zarea diamarẽãra, maʉ̃ta jidape koibara, abarika Jeowaba dayirã zarea diakĩrãbʉ, mamina maʉ̃ jidaira dayirãba nekʼãrẽ oibara.  ¿Kʼãrẽta dia zebʉrʉ Jeowaba dayirã maʉ̃ zarea diaita? akʉza ¿kʼãrẽta oibara dayirãba maʉ̃neba zarea erbaita? Maʉ̃ kʼawuadaita akʉdaya yiza ũbea Jeowaba sãwũã zarea diasita: Propeta Jonás, María Jesu papa akʉza apostol Pablo akʉza kʼawuadayi Jeowaba sãwũã zarea dia zebʉrʉta iyi kʼaidubemara idibemasida.

4. ¿Sãwũã jidaseabʉ Jeowa zareara?

⁴ Dayirãbara so zarea ũduseabʉ naʉ̃neba, nããra yiwidʼibʉdeba, ¿Jeowaba sãwũã panʉbʉ? Diabʉ zarea zroma dayideba zebʉ ẽãta (2 Cor. 4:7). Akʉza zarea baseabʉ iyi Bedʼea akʉpanʉne akʉza maʉ̃ ʉ̃rʉ krĩchapanʉne (Sal. 86:11). Daizeze Bedʼeade jarabʉba maʉ̃ba zarea diabʉ dayirã (Heb. 4:12). Yiwidʼiba akʉza Daizeze Bedʼea akʉiba zarea diayi awuantaita akʉza sobia bʼaita, adewara dayaʼa omarẽã jarabʉda oita. Akʉra sãwũã Jeowaba zarea diasita propeta Jonásta.

5. ¿Kʼãrẽa propeta Jonásʼra zarea nesidabasi?

⁵ Jonásʼra zowaĩnĩgʉa nesidabasi, perabasi baera iyira Jeowaba zokʼadama wãita, maʉ̃ kʼarea iyira jãpe wãsi, maʉ̃neba Jonásʼra bera beisi akʉzade zʉbʉriabisi iyi kʼawapananata. Iyi jãbadeba doi balbʉesidadera beda zromaba misi, maʉ̃ba iyira mejãchade perasibaibara maʉ̃ bitedabʉ baera, iyara krĩchakabasibaibara iyi mawũã berabarira, ¿sãwũã krĩchasibaibara iyira? ¿Mama beita krĩchasika? ¿Jeowaba iyira wua kãga ẽãta krĩchasika? Jonásʼra mejãchade krĩcha osibaibara.

6. Jonás 2:​1, 2, 7​ba jarabʉdebara, ¿kʼãrẽba zarea diasi Jonásʼra beda biteda basidera?

⁶ ¿Kʼãrẽta osi Jonásbara zarea jidaita maʉ̃ beda zroma bitedabaside? Nããra yiwidʼisi (akʉra Jonás 2:​1, 2, 7). Jeowaba jarada iya ũrĩ ẽ basimina jẽda krĩchasi akʉza ĩjãsi Jeowaba iyi bedʼea ũrĩta akʉza jẽda kʼarebaita, adewara Jonásbara krĩchasi Daizeze Bedʼeaba jarabʉ ʉ̃rʉ, ¿kʼãrẽa mawũã jarapanʉ? Jonás kapitulo 2de ũdubibʉ Jonás yiwidʼidata, mama eda iya jarasi bedʼea bio Salmosnebemata (bari jaraita, Jonás 2:​2, 5ta naʉ̃ testoʉ̃me akʉra Salmo 69:1; 86:7). Jonásba naʉ̃ testora biʼia kʼawuabasibaibara, maʉ̃ba iya maʉ̃ testo ʉ̃rʉ krĩchaside iya ĩjãsi Jeowaba iyi kʼarebaita. Jeowaba kʼarebasi Jonásʼra maʉ̃are Jeowaba jarabʉrʉta oya awabasi (Jon. 2:10–3:4).

7, 8. Mebẽã Taiwánʼnebemaba bedʼea zroma ũdusidera, ¿kʼãrẽba zarea diasi?

⁷ Jonás yizadeba kʼarebaseabʉ dayirã bedʼea zromara ũdubʉrʉde. Bari jaraita, mebẽã Zhiming, b Taiwánʼnebemata mejãcha kaya zromaba baribʉ, adewara yi mebẽrãba jipa kãgade ẽ iyita Jeowa ode baera, iya zarea ũdubʉ Daizezeʼa yiwidʼibʉdeba akʉza Daizeze Bedʼea estudiabʉdeba. Iya jarabʉ: «Mejãchade krĩcha obʉ maʉ̃ba edaʉde Daizeze Bedʼea akʉkĩrã ẽ bari». ¿Iya kʼãrẽta obʉ mapae ẽ baita? Iya jarabʉ: «Nããra yiwidʼibʉ, mʉ̃ audikular jʉ̃ kʼãrãpe ũrĩbʉ trãbira jw.org debemata, edaʉde nemi eidu trãbʉ, maʉ̃ba krĩcha aduʼa babibʉ, maʉ̃are Daizeze Bedʼea akʉbʉ».

 ⁸ Zhiming iyidobaʉba Daizeze Bedʼea akʉbʉba kʼarebasi zarea erbaita iyi bedʼea zroma awuantaita. Bari jaraita, iyi operadapeada tẽã junea, enpermeraba jarasi wa eda bʉeita iyita wa waiba neẽ baera. Iyi operadai nrʉemaena Zhimingbara akʉsi nebʉra mebẽã wẽrã iyi kĩrãkʼa operadapeadata, maʉ̃ra iyira audre wa neẽbasi. Maʉ̃ mebẽã wẽrãbara ĩjã ẽ basi wa iyi kẽgʉde eda bʉedamarẽãra, maʉ̃ nebʉraba Zhimingba zarea jidasi.

9. Bʉta bedʼea zroma kʼarea krĩcha zroma obʉbʉrʉ, ¿kʼãrẽta oseabʉ? (Akʉra potota).

⁹ Edaʉde mejãchade krĩcha zroma onʉmʉba yi sãwũã yiwidʼisi kʼawua ẽ Jeowaʼa akʉza dayi estudiabʉrʉde yi sãwũã estudiaisi kʼawua ẽ. Kĩrãbera Jeowaba biʼia kʼawuabʉta bʉ sãwũã berabarinʉmʉra. Bʉ mejãcha drazoa yiwidʼi ẽ mina ĩjãra Jeowaba kʼawuabʉta bʉa kʼãrẽ nesidabʉra akʉza mõbe maʉ̃ta diaita (Efes. 3:20). Bʉ kakua pʉaba Daizeze Bedʼeata leita zarebʉrʉ, ũrĩra yi grawamata akʉzade kartara Daizeze Bedʼeadebema grawamata. Audre yibiabayi ũrĩta trãbira jw.org debemata, mawũã ẽ bʉrʉ akʉita bideorata. Jeowabara dayirã zarea diakĩrãbʉ, ¿sãwũã obʉ maʉ̃ta? Dayirãba Daizezeʼa yiwidʼibʉrʉdera iya panʉbʉ Daizeze Bedʼeadeba, mawũã ẽ bʉrʉ kartara Daizeze Bedʼeadebemaneba.

10. ¿Sãwũã so zarea diapanʉ dayirã mebẽrã kongregasionebemaraba?

¹⁰ Jeowaba zokʼaseabʉ mebẽrã kongregasionebemata dayi zarea diaita, maʉ̃ra mebẽrãba zarea diaseabʉ daya bedʼea zroma ũdubʉrʉde, mawũã ẽ bʉrʉ dayaʼa jarabʉdade nekʼãrẽ omarẽã (Col. 4:​10, 11). Neũdukʼawua biata nesidapanʉ dayi bedʼea zroma ũdubʉrʉde (Prov. 17:17). Dayirã mebẽrãba kʼarebaseabʉ dayirãba nekʼãrẽ nesidabʉde, so zarea diaseabʉ akʉza kʼarebapanʉ Jeowa kʼawapanaita. Krĩchara sãwũã María  Jesu papaba zarea jidasita wuabemaraneba.

11. ¿Maríabara kʼãrẽa zarea nesidabasi?

¹¹ Maríara zowaĩnĩgʉata nesidabasi. Kĩrãbera María kʼãrẽaba krĩcha obasita iyaʼa angel Gabrielba bedʼea jaraside, iyira mia kʼãĩchua ẽ basi, mamina biogoibasi. Iyira wũãwũã neẽbasi baera kʼawua ẽ basi sãwũã dapʉẽita, mamina iya dapʉẽibasi Dayirã ẽdrʉbibari bʼaita, mia erkʼãĩkabasi baera sãwũã jaraibasi José iyi kima baiʼara wũãwũã baraita (Luc. 1:​26-33).

12. Lucas 1:​39-45 bayeda jarabʉdebara, ¿Maríabara sãwũã ũdusi zarea iya nesidabadara?

¹² ¿Maríabara sama ũdusi zareara iya jaradapeada oita? Bari jaraita, jʉrʉsi kʼareba wuabemaraneta, widisi Gabrielʼa jaradiamarẽã iya sãwũã oita (Luc. 1:34). Dããra ẽãne wãsi Judáʼeda Elizabet akʉde maʉ̃ra yi mebẽrãbasi, Maríara mama bia wãsi. Mawũẽ Jeowaba kʼarebasi Elizabetdeba bedʼeamarẽã propesia aba maʉ̃ wũãwũã ʉ̃rʉ bedʼeabʉta (akʉra Lucas 1:​39-45). Maríaba jarasi Jeowara mejãcha zarea barabʉta (Luc. 1:​46-51). Jeowaba zarea diasi María Gabrieldeba akʉza Elizabetdeba.

13. ¿Kʼãrẽta berabarisi mebẽãba kʼareba widiside mebẽrã kongregasionebemara?

¹³ Zarea ũduseabʉ mebẽrã kongregasionebemaneba. Dasuri mebẽã Boliviadebemaba, maʉ̃ zareata nesidabasi, yi zezera ospitalʼeda edesida, mama medikoraba jarasida maʉ̃ kayara be ẽ baibasita maʉ̃ba beibasita, mamina iya soiduba ĩjãsi yi zeze akʉita (1 Tim. 5:4). Maʉ̃ra iyitara zarebasi, iya jarabʉ: «Krĩchabasi wua obe ẽãta». Nããra iya kʼareba widi ẽ basi, iya jarabʉ: «Mʉ̃a nããra kʼareba widi ẽ basi mebẽrã krĩchabasi baera Jeowaba kʼarebaita mʉ̃a nesidabʉde, mʉ̃a tẽã juneane kʼawuasi mebẽrã kʼareba widi ẽ bʉrʉ mʉ̃yidoba zʉbʉriaibasita maʉ̃ bedʼea zromaba» (Prov. 18:1). Dasuriba krĩchasi iyi neũdukʼawuara jaraita iyi sãwũã berabarinʉmʉta. Iya jarabʉ: «Mʉ̃ara kʼawua ẽ sãwũã jaraisida, mʉ̃ mebẽrãba mejãchade so zarea diasida baera, yikota wesida baera ospitalʼidu akʉza Daizeze Bedʼeasida jara ũrĩbisida, biga daya kʼawuaita dayi abapaibʉ ẽãta, awuarabʉrʉ edapanʉta Jeowa mebẽrãne, ãyara wãrĩnu kʼarebakĩrãpanʉ akʉza dayiʉ̃me ãba jẽgapanʉ».

14. ¿Kʼãrẽa ũrĩnaibara zõrãrãba ũrãgʼa diabʉra?

¹⁴ Jeowaba dayirã zarea diabʉ maʉ̃ra zõrãrãneba diabʉ, ãyira Jeowaba nebia diada, ãyara dayirã so zarea diabʉ akʉza kʼarebapanʉ dayirã aduʼa panamarẽã (Is. 32:​1, 2). Krĩcha zroma obʉde zõrãrã jarada, ãya ũrãgʼa diabʉrʉta ĩjãra, ãyideba bʉra Jeowaba zarea babiseabʉ.

15. ¿Kʼãrẽ nebiata jʉ̃ãpanʉ kristianora jõmaʉ̃ba?

¹⁵ Dayirãba nebia jʉ̃ãbʉba zarea diabʉ audre Jeowa kʼawa bʼaita (Rom. 4:​3, 18-20). Dayirã Jeowa odepanʉrabara jõmaʉ̃ba nebiata jʉ̃ãpanʉ, ʉ̃kʉrʉba ʉ̃ta wãita akʉza ʉ̃kʉrʉba nama egorode ewari jõmaʉ̃nẽ bʼaita. Dayirãba nebia jʉ̃ãbʉba kʼarebabʉ bedʼea zroma awuantaita, Daizeze Bedʼea jaradiaita akʉza kongregasione nekʼãrẽ omarẽã jarabʉta oita (1 Tes. 1:3). Maʉ̃ nebia jʉ̃ãbʉba so zarea diasi apostol Pabloʼabida.

16. ¿Kʼãrẽa apostol Pablobara zarea erbaita nesidabasi?

 ¹⁶ Pablobara so zareata nesidabasi, iya Corintios karta bʉsidera jarasi iyira kʉgʉrʉ kĩrãkʼabʉta. Pablora mejãcha sopʉabasi, krĩcha zroma obasi akʉza iya krĩchabasi iyira pẽwãpanʉta, adewara iyira bebʉdebʉta (2 Cor. 4:​8-10). Pabloba naʉ̃ karta bʉsidera iya kongregasionʼra akʉ jʉ̃ẽnata ũbeabasi, iya bedʼea zromara mamapai ũdu ẽ baibasi audre ũduibasi: iyira mejãcha podaibasi akʉza jidada kʼãrãpe karselde eda bʉedaibasi.

17. 2 Corintios 4:​16-18 bayeda jarabʉdebara, ¿kʼãrẽba so zarea diasi Pabloʼara bedʼea zroma awuantaita?

¹⁷ Pablobara bedʼea zromara awuantasi iya kʼãrẽ nebia jʉ̃ãbʉ ʉ̃rʉ krĩchabasi baera (akʉra 2 Corintios 4:​16-18). Iya mebẽrã Corintodebemara jarasi iyi kakuara zõna ba wãmina idubʉ ẽ baita Jeowade odebʉta. Pablobara krĩchabasi iya kʼãrẽ nebia jʉ̃ãbʉ ʉ̃rʉ, iya ʉ̃ta wãita jʉ̃ãbʉra audre yibiabasi iya nekʼãrẽ bedʼea zroma nama egorode ũdubʉira. Pabloba iya nebia jʉ̃ãbʉ ʉ̃rʉ krĩchabʉba kʼarebasi zarea erbaita akʉza ewariza okĩrã wãita Jeowaba zokʼabʉta.

18. ¿Sãwũã nebia jʉ̃ãbʉba so zarea diasi Tihomirʼa akʉza iyi mebẽrã?

¹⁸ Tihomir mebẽã Bulgariadebemaba zarea ũdubʉ nebia jʉ̃ãbʉ ʉ̃rʉ krĩchabʉ baera. Poaga ara bioba iyi mebẽã Zdravkota beidata, iyitara maʉ̃ra jipade pʉbasi, iya maʉ̃ pʉa awuantaira yi mebẽrãbawaraʉba krĩchabʉ ẽbẽrarã jẽda piradrʉbʉrʉde sãwũã panaita. Iya jarabʉ: «Bari jaraita, daiba krĩchapanʉ iyiʉ̃me sama yi ũduita, kʼãrẽ yikota diaita akʉza iyibawara piesta obʉrʉde kʼaira mebẽrãta trʉ̃ita, adewara kʼãrẽ ʉ̃rʉ bedʼeaita iyiʉ̃me». Tihomirba jarabʉ iya nebia jʉ̃ãbʉ ʉ̃rʉ krĩchabʉba kʼarebabʉta iyi mebẽrã zarea bʼaita akʉza iyisida,  mawũã jʉ̃ãita Jeowaba ẽbẽrarã jẽda piradrʉbiyeda.

19. ¿Bʉa nebia jʉ̃ãbʉ ʉ̃rʉ ĩjãbʉra sãwũã zarea erbaseabʉ? (Akʉra potota).

¹⁹ Bʉa nebia jʉ̃ãbʉ ʉ̃rʉ ĩjãbʉra, ¿sãwũã zarea erbaseabʉ? Bʉa jʉ̃ãbʉbʉrʉ nama egorode ewari jõmaʉ̃nẽ bʼaita, lera Daizeze Bedʼeade maʉ̃ ʉ̃rʉ akʉza krĩchara maʉ̃ ʉ̃rʉ (Is. 25:8; 32:​16-18). Krĩchara bʉ mamabʉta, ¿kʼãrẽta ũrĩbʉ bʉa? ¿Sãwũã sentibʉ bʉra? ¿Kʼãrẽta ũdubʉ? Maʉ̃ sãwũãbʉ ʉ̃rʉ biʼia kʼawuaita akʉra dayirã kartarane potora ẽjũã bia ʉ̃rʉ ũdubibʉta, mawũã ẽ bʉrʉ akʉra bideo trãbira maʉ̃ ʉ̃rʉ bedʼeabʉta. Bari jaraita, Ẽjũã bia ũduyi, Mʉ̃a krĩchabʉ nebia zei ʉ̃rʉ akʉza Muy cerca. Dayirãba naʉ̃ nebia ʉ̃rʉ krĩchapanʉbʉrʉ dayirãba bedʼea zroma erbʉdera, krĩchadayi maʉ̃ra bari atiaeda mawũãbʉta akʉza aukʼara krĩcha zroma oẽ bayi (2 Cor. 4:17). Jeowaba bʉaʼa maʉ̃ra nebiara jʉ̃ãbibʉba zarea babiyi.

20. Bʉta zarea neẽã sentibʉbʉrʉ, ¿kʼãrẽta oibara zarea erbaita?

²⁰ Dayirã zarea neẽ sentibʉrʉdera Jeowadeba zarea erbayi (Sal. 108:13). Jeowaba dayirã nekʼãrẽ diabʉ maʉ̃neba zarea erpanamarẽã, bʉa kʼareba nesidabʉbʉrʉ bedʼea zroma awuantaita, sobia bʼaita akʉza bʉa nekʼãrẽ omarẽã jarabʉda aripe oita, Jeowaʼa yiwidʼira, Daizeze Bedʼeata akʉra, mebẽrã kʼarebata jʉrʉda akʉza bʉa ĩjãbʉta zarea erbara. Bʉa mawũã obʉbʉrʉ zarea erbayi awuantaita akʉza sobia bʼaita (Col. 1:11).