Mʉ̃ra tosida pʉwʉrʉ Galiciade mʉ̃ yibarirabara mama drʉata erbasi, maʉ̃ra Españanebasi, dai 8 panʉnebemara mʉ̃ra yi kimarenebemabasi, daira jõmaʉ̃ta sobiapanasi maʉ̃ ewaridera yibiabasi warrara eda wãmarẽã kolegio katolikodebema saserdote bʼaita mawũã ẽ bʉrʉ monja bʼaita. Mʉ̃ mebẽrãnebemata daita ũbea wãsi.

Mʉ̃ 13 poaga babʉrʉde wãsi eskuelaeda monja bʼaita, mʉ̃ mebẽãidu Madridʼidu. Mamara ẽbẽrarã mejãchabasimina mia abaʉ̃me neũdukʼawua babe ẽ basi mia bedʼeabe ẽ basi mia abaʉ̃me, maʉ̃ba mamara jõma oibarabasi ãya jarabʉtrʉ akʉza ewari jõmaʉ̃nẽ yiwidʼibaibarabasi. Diapeda daira ãba yi jʉrebasi nekʼãrẽ ʉ̃rʉ krĩchaita, mamina mʉ̃ra aña krĩchabasi, dai trãna tẽã wãbasi misabade mamara jõma obasi latin bedʼeade, maʉ̃ba jipa ũrĩ ẽ basi akʉza krĩchabasi jipa jĩgabʉta Daizezedeba. Mʉ̃ audura jõma chupeabasi maʉ̃ba mʉ̃ mebẽãʉ̃me yi ũdubʉrʉdera bari berabari wãbʉrʉde jarabasi: «Ave María purísima», bari maʉ̃ awabʉrʉ jaraseabasi, nekoda tẽã ewari wika diabasi bari bedʼeaita, mʉ̃mara jipa awuarabasi mʉ̃ deda nãã badaira, maʉ̃ba mʉ̃ra doba sentibasi akʉza badua jẽgabasi.

Mʉ̃ Daizeze kʼawabʉta senti ẽ basimina jidasi mʉ̃ monja bʼaita, maʉ̃nera 17 poagabasi. Mʉ̃a maʉ̃ra osi wuabemaraba jʉ̃ãbasi baera maʉ̃ta mʉ̃a omarẽã, maʉ̃ audre ẽãne mʉ̃a krĩchasi, ¿mʉ̃a maʉ̃ra soiduba obʉka? Monjarabara jarasi yi soiduba ĩjã ẽãra eda tʉbʉ pʉreade bawaita, mawũãsidu mʉ̃ara soiduba ĩjã ẽ basi. Mʉ̃a wãrĩnu kʼawuabasi Jesura wuabemaraneba jĩga bakĩrã ẽ basita doba, awuarabʉrʉ iyira ewari jʉrʉbasita wuabemara ẽbẽrarã jaradiaita akʉza kʼarebaita (Mat. 4:23-25). Mʉ̃ 20 poaga babʉrʉde krĩchasi kʼãrẽa monja bʼaira neẽãta. Monja dai zokʼabʉba mʉ̃a jarasi wãibʉrʉ wãmarẽã mejãcha soiduba oẽbʉrʉ, mʉ̃a iya mawũã jaraira krĩchakabasi, mʉ̃a krĩchasi iyara mawũã jarasita wuabemarata mawũã krĩchabi ẽ bamarẽã.

Maʉ̃ba mʉ̃ra deda wãsi mamina mawũã mʉ̃ yibarirabara mʉ̃a kʼãrẽ jarada ẽ basi. Maʉ̃ne mama trajo neẽ baera mʉ̃ra wãsi Alemaniaʼena mʉ̃ mebẽã badaidu, maʉ̃ne mʉ̃ mebẽãra komunistabasi wuabemara ẽbẽrarã pʉwʉrʉdebema Españadebemabawara, mʉ̃ra ãyibawara basidera bia sentibasi ãya obadara yibiabasi baera akʉza wuabemarata kʼarebakĩrãbasi, adewara wẽrãrasida bia edapanasida. Mʉ̃ra ãyidebemabasi ewari berabari wãne maʉ̃radebema abaʉ̃me juwa jidasi.

Mʉ̃ara dedekabasi karta zakera maʉ̃ komunismo ʉ̃rʉ bedʼeabʉta akʉza eda mĩgade wãbasi, maʉ̃ba sentisi kʼãrẽ oseabʉta maʉ̃neʼeda. Mamina ewari berabari wãne krĩcha zroma owãsi mʉ̃ra, ãya oẽbasi baera ãya jarabadata. Ãya kãga ẽ basi nokʼo Españanebemaba sãwũã zokʼabadara, maʉ̃ kʼarea babʉesida iya opisina Alemaniane erbadara, maʉ̃ra berabarisi 1971ne. Ãya mawũã odara mʉ̃itara biga ẽ basi.

Mʉ̃ wũãwũã barada tẽã mʉ̃a jarasi mʉ̃ kima, wua ãyibawara ãba ba ẽ baita, mʉ̃ra dobabʉta sentisi miõba daira akʉ zeda ẽ basi baera, maʉ̃ kʼarea mʉ̃yikʉza widisi, ¿kʼãrẽa naʉ̃ drʉade bʉ mʉ̃ra? ¿Yibiaka ẽbẽrarã kʼarebaita mawũã sobia panamarẽã ãba?

1976de Jeowa ʉ̃rʉ Kʼawuabipanʉrãta zesi mʉ̃ deda, mama ãya mʉ̃aʼa dia amaesi kartarata, ãyira Españanebemabasi, ãyi jẽda zeside mʉ̃a widita mejãcha osi ãyaʼa ẽbẽrarã zʉbʉriabʉ ʉ̃rʉ, mamina mʉ̃a jʉ̃ã ẽ badata osi ãya, Daizeze Bedʼeadeba jõma panʉsi, maʉ̃ kʼarea mʉ̃ara Daizeze Bedʼeara akʉ jʉ̃drʉsi.

Nããrãra mʉ̃ara kʼawuakĩrãbasi, mamina tẽã awuara besi dai ãba yi jʉrebarima wãside mʉ̃ kimaʉ̃me, maʉ̃ ewari basidera daibara wũãwũãra ũme erbasi akʉza Jeowa ʉ̃rʉ Kʼawuabipanʉrãbara daira edebasi, mõbe ãya dai wũãwũãra mama kʼareba akʉbasi, maʉ̃ba jipa ãyibawara bakĩrãbasi.

Mawũãsidu mʉ̃ara soiduba ĩjã ẽ basi, ewari aba mʉ̃ra wãsi Españaena mʉ̃ mebẽrã akʉde, mamina mama mʉ̃ yãbabara jarasi Daizeze Bedʼeata wua ãyibawara akʉ ẽ bamarẽã, iyira saserdotebasi, maʉ̃ne Jeowa ʉ̃rʉ Kʼawuabipanʉrã mamabemaraba mejãcha kʼarebasi mʉ̃ra. Ãya mʉ̃a bedʼea widibadara jõma ũdubibasi Daizeze Bedʼeadeba, maʉ̃ kʼarea jẽda wãbʉrʉde mʉ̃ pʉwʉrʉeda akʉza jẽda Daizeze Bedʼea akʉ jʉ̃drʉsi. Mʉ̃ kimabara wuara Daizeze Bedʼeara akʉ ẽ basi, mamina mʉ̃ara iduaribi ẽ basi Daizeze Bedʼea akʉ bʼaira, maʉ̃ kʼarea 1978de buru kʼoesi mʉ̃ra Jeowa ʉ̃rʉ Kʼawuabipanʉrãne eda.

Kʼãwũã Daizeze Bedʼea kʼawua zebʉrʉba mʉ̃ra kʼarebabʉrʉ sobia bʼaita. Bari jaradaita, 1 Pedro 3:1-4 bayeda maʉ̃ba jarabʉ yuwẽrãbara dayi kimara wawia ũdubibarata akʉza ũrĩbarata, maʉ̃ra «Daizeze dabʉ nããra yibia baera». Maʉ̃ ũrãgʼaba akʉza wuabemaraba kʼarebabʉrʉ mʉ̃ kima bia bʼaita akʉza papa bia bʼaita.

35 poaga berabaribʉrʉ mʉ̃ Jeowa ʉ̃rʉ Kʼawuabipanʉrã badata, mʉ̃ra mejãcha sobiabʉ Daizeze ʉ̃rʉ kʼãwũã kʼawuasi baera akʉza kʼãwũã Daizeze pʉwʉrʉde edabʉ baera, adewara mʉ̃a wũãwũã juesoma erbʉdebemara kimare Jeowa ʉ̃rʉ Kʼawuabipanʉrã.