Mʉ̃ra tosida Roma ãĩ. Mamara ẽbẽrarã nekʼãrẽ mejãcha neẽbasi, mʉ̃ wũãwũã basidera zareabasi mʉ dapʉenaira. Mʉ̃ara mʉ̃ papara ũdukabasi akʉza mʉ̃ zezeʉ̃mera bia wã ẽ basi. Mʉ̃ra ewarade warisi.

Mʉ̃ 10 poaga baside nezrʉga jʉ̃drʉsi, mʉ̃ 12 poaga baside dedauba wãbasi. Edaʉde mʉ̃ zezebara mʉ̃ra eda jʉ̃ẽbasi karseldeba ãĩ bueibaera. Mʉ̃ra odera ẽbẽrarãbawara kĩrʉpe akʉza yõbasi. Mʉ̃ 14 poaga baside dedauba jipa wãsi. Chirua kayirua buratʉmata dobasi, maʉ̃ba diamasira badu karruta ewabasi mama kʼãĩta adewara jʉrʉibara basi sama kuita.

Jipa bia nezrʉga kʼawuasi, nekʼãrẽ baduta zrʉga kʼawuabasi. Ẽbẽrarã bolsota jãrĩbasi akʉza ẽbẽrarã deda wã kʼawuabasi zrʉgaita. Nezrʉgamia nokʼoba ũrĩ kʼawuasi mʉ̃ sãwũã bia nezrʉga kʼawuabʉta, maʉ̃ kʼarea trʉ̃si iyiũme trajaita. Maʉ̃ba bia okʼawuasi nezrʉgaita, bari jaraita zrʉga jʉ̃drʉsi bankota, mʉ̃ põga neẽãra aña wãkabasi. Mʉ̃ kʼãĩbʉrʉde burukau edre bʉebasi mʉ̃ põgata. Chirua kayirua buratʉma dobasi, wẽrãrã mejãcha erkʼãĩbasi, yõbasi akʉza nezrʉgaita nrʉemaza obasi. Jenenerabara mʉ̃ra jʉrʉbasi jidaita akʉza ãya mʉ̃ra edaʉde jidapanasi. Mʉ̃ra eda iwape ãĩ wã basi.

Ewari aba mʉ̃ karseldeba ẽdrʉda tẽã mʉ̃ yãba yõdra akʉde jʉ̃ẽsi, mʉ̃a kʼawua ẽ basi iyita akʉza mʉ̃ primorata Jeowa ʉ̃rʉ Kʼawuabipanʉrã badata. Mʉ̃ra ãya trʉ̃si ãba yi jʉrebarimae wãita, mʉ̃ara kʼawua kĩrãbʉ baera wãsi. Mʉ̃ mama jʉ̃ẽside ãyaʼa jarasi puerta ya jewedaita, mawũã akʉibaera kʼaita eda zebʉta akʉza ãĩ wabʉta, adewara mʉ̃ põgara mʉ̃ kʼaidu a basi.

Mʉ̃ ãba yi jʉrebarima jʉ̃ẽnaba jipa mʉ̃ bebʉra awuara babisi. Mʉ̃a krĩchasi, ¿sama chu mʉ̃ra?, ¿naʉ̃ drʉade bʉka mʉ̃ra? Ẽbẽrarã mama badara aduʼabasi akʉza ibiade panasi. Mʉ̃a idibasidu kĩrãbebʉ ãyira kʼãrẽaba ẽbẽra bia badara. Mʉ̃a mama ũdudara jipade jãpera kʼãwũã ũdukʼabasi.

Mʉ̃ara Jeowa ʉ̃rʉ Kʼawuabipanʉrãbawarauba Daizeze Bedʼeata akʉ jʉ̃drʉside, mʉ̃a kʼawuasi jipade mʉ̃ bebʉra awuara baibara basita. Bari jaraita mʉ̃a mejãcha kãgasi Proverbios 13:20ba jarabʉta ojʉ̃drʉita: «Yi buru biabawara ãbabʉra buru biabayi, mamina yi kʼẽrẽpa bʉ ẽ bawara ãbabʉra bia wã ẽ bayi». Mõbemata mʉ̃a kʼawuasi mʉ̃ra ãba ba ẽ baibara basita neũdukʼawua nezrʉgamiarabawarara. Maʉ̃ oira mʉ̃itara jipa zarebasi, mamina Jeowa kʼarebadeba osi.

Adewara mejãcha zarea osi itua do ẽ baita akʉza chirua kayirua buratʉma do ẽ baita. Mʉ̃ara budasida tʉsi, aretesida wẽãsi akʉza imitia bedʼeabadasida idubʉsi. Idibʉrʉ mʉ̃ nekayirua yi edebi ẽ basi.

Nããrara mʉ̃ara jipade lekĩrã ẽ basi akʉza ũrĩkĩrã ẽ basi, mamina zarea osi ũrĩta Daizeze Bedʼeata. Maʉ̃ne wiña wiñane audre kãga wãsi Daizezera. Maʉ̃ tẽã, ewari aba mejãcha sopʉa besi, mʉ̃a nãã nemitia obada kʼarea. Adewara krĩchasi Jeowabara kĩrãdua ẽãta mʉ̃ nãã memitia obadara. Aramaʉ̃ta mʉ̃a Daizeze Bedʼeade eda lebʉrʉza sãwũã Jeowaba kĩrãduasita rey Davidʼba nekayirua odara, maʉ̃ba mʉ̃ sopʉa badara taʉbasi (2 Samuel 11:1–12:13).

Mʉ̃ra perabasi jaradia wãita, ũduideba ẽbẽrarã mʉ̃a nãã nekayirua obadarata (Mateo 28:19, 20). Mawũãsidu jaradiabasi, adewara wiña wiñane pera wã ẽ basi akʉza audre jaradia kĩrãbasi sãwũã Jeowaba kĩrãduakĩrãbʉta daya nekayiruata obʉbʉrʉ.

Kʼãwũã Jeowa ũdukʼawuabadadeba mʉ̃ra sobiabʉ. Ʉ̃kʉrʉ mʉ̃ neũdukʼawuarabadara beikʉasi, ʉ̃kʉrʉra karseldebʉ. Mamina atiara mʉ̃ra aduʼabʉ akʉza neneẽãbʉ, ʉ̃ra zeidebida sobiabayi. Mʉ̃ara kʼawuasi sãwũã eda krĩchabaibarata akʉza sãwũã mesera kĩrʉ ẽ baibarata, maʉ̃ kʼarea wuabema ẽbẽrarãbara mʉ̃ra kãgabʉ akʉza ãyara bia akʉbʉ. Mʉ̃ra atiara juwa jidasi ẽbẽra wẽrã bia kiruʉ̃me, iyi trʉ̃ra Carmen. Atiara daibara jaradiapanʉ Daizeze Nokʼo ʉ̃rʉ ẽbẽrarã dai de kʼawa panʉraʼa.

Idibʉrʉ mʉ̃ trajora yibia. Mʉ̃ra atiara wãibara banko eda mamina nezrʉgaita wã ẽ, awuarabʉrʉ de jareita.