Mʉ̃ra tosida Acul pʉwʉrʉde, maʉ̃ra Guatemaladebʉ, jĩgara oi zromane. Daira indígena ixil, mayaraneba zedatapanʉ. Mʉ̃ara españolta bedʼea kʼawuasi akʉza mʉ̃ bedʼeasida. Mʉ̃ pʉwʉrʉde ẽbẽrarãra 36 poagabayeda yõsida, mʉ̃ra mawũãnʉmʉne warisi. Ixilerãra maʉ̃ yõne mejãcha majõsi.

Mʉ̃ poaga kimarebaside mʉ̃ mebẽã siete poagabʉme jemenepanasi, mawũẽ iya juwade erbasi bombata, maʉ̃ra jẽzatotosi. Mʉ̃ dabʉbara ũdu ẽ totosi, dauberrebesi, mamina mʉ̃ mebẽãra beisi. Maʉ̃neba ʉ̃ta mʉ̃ra edesida dauberrepanʉrabawara ãba bʼaita, Ciudad de Guatemala pʉwʉrʉde. Maʉ̃ne kʼawuasi braille bedʼeata. Mamina mamara wuabema wũãwũãrabawara ãba babida ẽ basi. Mʉ̃a kʼawua ẽ basi kʼãrẽa. Mʉ̃ara jʉ̃ãibarabasi jedeko ũme mʉ̃ papaʉ̃me ãba bʼaita, mʉ̃ra iyiʉ̃mebʉrʉ mejãcha sobiabasi baera. Mamina iyira, mʉ̃ 10 poagabaside beisi. Maʉ̃neba ʉ̃ta mʉ̃ra mejãcha zʉbʉriasi, mʉ̃ra iyabʉrʉ mejãcha kãgabasi baera.

Mʉ̃ 11 poagabaside,mʉ̃ mebẽã deda bʼaita wãsi. Maʉ̃ dedara ãya mʉ̃ra bia edasida, diasida ãya mʉ̃a nesidabʉra, mamina mʉ̃ sopʉabasidera kʼarebada ẽ basi. Mʉ̃ mejãcha jẽgabaside Daizezea widibasi: «¿Kʼãrẽa beisi mʉ̃ papara? ¿Kʼãrẽa dauberrebesi mʉ̃ra?». Mawũẽ wuabemarabara jarapanasi kaʉ̃ra kʼãwũã berabarisita Daizezeba kʼãwũã kãgabasi baera. Maʉ̃ kʼarea mʉ̃a krĩchabasi Daizezera ẽbẽra kayiruata wãrĩnu baera. Akʉza mʉ̃a oseabasibʉrʉ mʉ̃ra mʉ̃yikʉza beitotokĩrãbasi.

Mʉ̃ dauberrebesidera, maʉ̃neba ʉ̃ta mʉ̃ra neida oseapanasi akʉza krĩcha obiseapanasi. Mʉ̃ warrarabasidera edaʉde wawa osida, mʉ̃a maʉ̃ra nokʼorãra jarakabasi, krĩchabasi baera mʉ̃ra ãyitara kʼãrẽ ẽ baita. Mawũẽ mʉ̃a akʉda ẽ basi mia kʼãrẽsida, maʉ̃ kʼarea mʉ̃ra ãyibawarara ba ẽ basi akʉza bedʼea ba ẽ basi mia kʼairabawara, zareabasi baera ãyi ʉ̃rʉ ĩjãita.

Mʉ̃ trece poaga baside, kolegiode enaʉbarabasi, maʉ̃ne zesida Jeowa ʉ̃rʉ Kʼawuabipanʉrã juwa jidapanʉta, mawũẽ mʉ̃ propesora mʉ̃ zʉbʉria akʉbʉba jarasi mʉ̃aʼa Daizeze Bedʼea jaradiaseabʉta. Mawũẽ ãyara Daizeze Bedʼeadeba ũrĩbisida dauberrepanʉrabara aranʉbai jẽda ũdudaita akʉza beidarasida jẽda piradrʉdaita (Isaías 35:5; Juan 5:28, 29). Ãya mʉ̃a jaradiabʉde mʉ̃ra mejãcha bedʼea be ẽ basi wuabida perabasi baera. Mamina ãyara jʉ̃ã kʼawuapanʉ baera Daizeze Bedʼea jaradiapanasi badua, paeda ẽ basi, ãya mʉ̃ra ibiade edapanasi. Adewara ãyira 10 kilometro wãibarabasi katumane ʉ̃ta mʉ̃ pʉwʉrʉ eda jʉ̃ẽnaita.

Mʉ̃ mebẽãbara mʉ̃aʼa jara ũrĩbisi maʉ̃ra ẽbẽrarãra mejãcha nekʼãrẽ neẽãpanʉta, mamina bia wua jʉ̃panasita. Ãya mʉ̃aʼa nekʼãrẽ zake diapananaba ũdubibasi ãya mʉ̃ra kãgapanʉta, mʉ̃ra sobia sentibibasi. Mʉ̃a kʼawuabʉ ẽbẽrarã religion wãrĩnuarepanʉrabʉrʉ mejãcha zarea opanʉta wuabemara kʼarebaita.

Mʉ̃a Daizeze Bedʼeara kʼawuabasi kartara brailledebʉba. Mʉ̃ara bia ũrĩbasi ãyara mʉ̃aʼa jaradiapanʉra, mamina mʉ̃itara zarebasi ʉ̃kʉrʉ bedʼea ĩjãita, bari jaraita Daizezera mʉ̃ ʉ̃rʉ krĩchabʉta akʉza wuabemarabida abarika akʉdaita mʉ̃ra Daizezede kĩrãkʼa. Mʉ̃a kʼawuasi kʼãrẽa Daizezebara kʼãwũã idʉaribibʉta zʉbʉriara naʉ̃ drʉadera mamina jipa zarebasi akʉita iyira Daizeze bia kĩrãkʼa. *

Mʉ̃a Daizeze Bedʼea wĩka wĩkade audre ũrĩ wãside, kʼawuasi Daizezera dayi zʉbʉriabʉ akʉbʉrʉdera sopʉabʉta. Bari jaraita, iyi odepanʉra zʉbʉriabʉdera jarasi: «Mʉ̃a ũdubʉrʉ mʉ̃ pʉwʉrʉra zʉbʉrianʉmʉta» «mʉ̃a ãyi kʼãwũã zʉbʉriabʉra biʼia kʼawuabʉ» (Éxodo 3:7). Mʉ̃a biʼia kʼawuaside Daizezera ẽbẽra biata, mʉ̃a jidasi mʉ̃ bebʉra iyaʼa diaita. 1998de buru kʼoesi.

Poaga aba berabarida tẽã mʉ̃ta dauberrebʉ baera, mʉ̃a osi kurso maʉ̃ ʉ̃rʉ bʉta, pʉwʉrʉ Escuintlade. Mebẽã maʉ̃ pʉwʉrʉdebemaba kʼawuasi mʉ̃itara jipa zareata Acul pʉwʉrudera ãba yi jʉre eda wãita. Mebẽrã juwajidapanʉra mʉ̃aʼa Daizeze Bedʼea jaradiabada kĩrãkʼa, wãibarabasi wawara. Maʉ̃ mebẽãba mʉ̃ kʼarebaita iya jʉrusi mebẽrã mʉ̃ kʼareba edeseabʉta ãba yi jʉrebarieda akʉza maʉ̃ra deda bʼaita. Idira ãyara mʉ̃ra ãyi mebẽãra kĩrãkʼa akʉbʉ.

Mʉ̃a wuabida nebʉraseabʉ mebẽrãba sãwũã kʼarebasebʉrʉta. Jeowa ʉ̃rʉ Kʼawuabipanʉrabawara ãbabʉde mʉ̃a akʉbʉ mʉ̃ra religion wãrĩnuaradebʉta (Juan 13:​34, 35).

Mʉ̃ra idira kʼãrẽ ẽ kĩrãkʼa sentibʉ ẽ akʉza jʉ̃ãbʉ ʉ̃ra zeidera nebiata zeita. Idibʉrʉ mʉ̃ra bakĩrãbʉ. Mʉ̃ dauberrebʉ ʉ̃rʉ badua krĩcha baikaʉde ewari jõma Daizeze Bedʼea jaradiabʉ ẽbẽrarã. Mʉ̃ara kongregasione diskurso diabʉ akʉza wuabemara kongreagasione. Adewara diskurso diabʉ Daizeze Bedʼea ʉ̃rʉ ẽbẽrarã kabana zebʉmae.

2010de mʉ̃ra graduasi Escuela de Entrenamiento Ministerialde (idi jarapanʉta Nejaradiabaride Daizeze Bedʼea jaradiabariraita) Salvador pʉwʉrʉde. Naʉ̃ Eskueladeba mʉ̃ara mejãcha kʼarebabʉrʉ mebẽrãrãra adewara sentibibʉ Jeowabara mʉ̃ra biʼia akʉbʉta akʉza kãgata. Jeowabara badu ẽbẽra obiseabʉ iya kãgabʉta.

Jesuba jarasi: «Audre sobiabʉ daya diabʉde dayaʼa diapanʉira» (Hechos 20:35). Idira mʉ̃ra wãrĩnu sobiabʉ. Nainʉ kʼãwũã zeira mʉ̃a krĩchakabasi, nããrãra zʉbʉriabasi baera. Idira sentibʉ wuabemarãra kʼarebaseabʉta.