Mʉ̃ra tosida Paddington, Inglaterrade. Mʉ̃ra mʉ̃ papa deda basi mʉ̃ mebẽrã ũbeabawara. Mʉ̃ zezera edaʉde basi deda mamina edaʉde deda neẽbasi, iyira mejãcha itua domiabasi baera.

Mʉ̃ warraraena mʉ̃ papaba jaradiabasi sãwũã yiwidʼibarata diamasiza. Mʉ̃a erbasi Daizeze Bedʼea Salmo awa bʉta, mʉ̃a maʉ̃ra trãbasi. Mʉ̃a libro lebʉde naʉ̃ta eda jarabʉta ũdusi: «Dayi wua pidradrʉ ẽ ewarisida ũnadrʉbʉeyi». Naʉ̃ba mʉ̃ra mejãcha kʼãĩkara amaesi diamasira, maʉ̃ba mʉ̃a krĩchasi: «Bʉ bʼaibara dayi ʉ̃ra zeide kʼãrẽ berabarisida. ¿Kʼãrẽa zesi mʉ̃ra namara?, mʉ̃ra beikĩrã ẽ».

Maʉ̃neba ʉ̃ta mʉ̃ara jai ʉ̃rʉ audre kʼawuakĩrã besi, bari jaraita bedʼeakĩrã besi beidarabawara akʉza mʉ̃ neũdukʼawuarabawara wãbasi bewãrã deda diamasi, adewara pelikula terrorta akʉpanasi. Maʉ̃ akʉpanʉne perabasimina jipa okĩrãbasi.

Maʉ̃ ewari berabarida tẽã mʉ̃ poaga 10 baside tabakota do jʉ̃drʉsi chirua kayiriaʉ̃me (marihuana) akʉza mʉ̃ 11 poagabaside do jʉ̃drʉsi ituata. Mʉ̃a maʉ̃ sãwũã warrachu kãga ẽ basimina, mʉ̃a kãgabasi mʉ̃ kʼawua ẽã ertakĩrãmarẽã. Mʉ̃ra jipa wãkĩrãbasi piestaeda akʉza jipa mʉ̃ra mejãcha berakĩrãbasi. Mʉ̃ra diamasi dedaʉba chupea mirʉ wãbasi mawũã piestade bʼaitaeda. Maʉ̃ba mʉ̃ra nrʉemara mejãcha aukʼarabasi adewara kolegiodebida ituata dobasi.

Mʉ̃ra kolegiodera jipa bia wã ẽ basi baera mʉ̃ papabara maʉ̃ba krĩchasi mʉ̃ra jipa zeri ẽata, maʉ̃ kʼarea iyiʉ̃me bedʼeakasi. Maʉ̃ba dedaʉbara wãsi. Mʉ̃ra wãsi yumakẽrã mʉ̃a bedʼea erbadama, iyira rastafaribasi, yõmiabasi, chirua kayirua bʉratʉmata nedobasi akʉza nezrʉgamiabasi. Maʉ̃ audre ẽãne mʉ̃ra biogosi, maʉ̃nera 16 poagaba, maʉ̃ra mʉ̃ wũãwũã nabemabasi.

Mʉ̃ra wãsi mʉ̃ wũãwũãʉ̃me hogar de pasoeda, mama nokʼoraba kʼarebamarẽã. Dai panʉinʉ jʉ̃ẽpanasi ẽbẽra wẽrãra Jeowa ʉ̃rʉ Kʼawuabipanʉrãta wuabemara ẽbẽra wẽrãbawara bedʼeaita. Maʉ̃ta ewari aba ãyidu jʉ̃ẽbʉrʉde mʉ̃a ãya ũdubikĩrãbasi ãya jaradiabadara aña jaradiabʉta, mamina ãyara mʉ̃a bedʼea jõma jaradara jõma panʉsi Daizeze Bedʼeadeba. Mʉ̃itara yibiabasi ãya ibiade jaradiasida baera akʉza kãgade, maʉ̃ba Daizeze Bedʼeara ãyibawaraʉba akʉ jʉ̃drʉsi.

Mʉ̃ warraraena perabasi beita, mamina kʼawuabʉrʉ baera Daizezebara jẽda piradrʉbiseabʉta maʉ̃ba mʉ̃ krĩchara jipa awuarababisi (Juan 5:28, 29). Adewara kʼawuaside Jeowaba mʉ̃ kãgabʉta sobiasi (1 Pedro 5:7). Akʉza Jeremías 29:11ba mʉ̃ sora tõbarisi, mama jarabʉ: «Mʉ̃yikʉza bia ũdu kʼawuabʉ maraita krĩchabʉra, mawũã jarabʉ Jeowabara. Krĩcha zʉbʉria ẽ neneẽã babita. Adewara jʉ̃ãbibʉ nebia ʉ̃rabʉrʉ zeita». Maʉ̃neba ʉ̃ta mʉ̃ara soiduba ĩjãsi dayirãra naʉ̃ drʉade ewari jõmaʉ̃nẽ baseabʉta (Salmo 37:29).

Jeowa ʉ̃rʉ Kʼawuabipanʉrãbara mʉ̃ ãba yi jʉrebarima wãsidera kʼarebasida. Mʉ̃a ũdusi ãyira yi kãga ũdubipanʉta, wawiapanʉta akʉza wuabemara bia edabʉta (Juan 13:34, 35). Mʉ̃ iglesiaeda nãã wãbada kĩrãkʼa ũdu ẽ basi naʉ̃rãra, awuarabʉrʉ naʉ̃raba ũdubisi kãgata akʉza mʉ̃a nãã obada kʼarea kʼãrẽ jarada ẽ basi. Maʉ̃ba mʉ̃ara ũdusieda mʉ̃ mebẽrãnebʉ kĩrãkʼa.

Mʉ̃a Daizeze Bedʼea akʉ jʉ̃drʉside mʉ̃a kʼawuasi mʉ̃ bebʉdera mʉ̃a nãã obadara idubʉibarabasita, mawũã Daizezeba kãgabʉta ojʉ̃drʉita, maʉ̃ kʼarea idubʉibarabasi sigarrillo doita, itua doita, marihuana doita. Musika kayiruarata ũrĩbaside maʉ̃rata jẽda dokĩrã zebasi, maʉ̃ba musikasida ũrĩ ẽã aduasi. Akʉza idubʉibarabasi piesta kayiruaeda wãita, maʉ̃ kʼarea jʉrʉsi neũdukʼawuara biata mʉ̃ sãwũã awuara babiseabʉta (Proverbios 13:20).

Maʉ̃ ewaribaside Tonysida Daizeze Bedʼea akʉbasi. Iya widibadara jõma Daizeze Bedʼeadeba panʉbʉba, iyabida obadara idubʉita krĩchasi, itua doita, nezrʉgaita, marihuana wua do ẽ baita akʉza neũdukʼawua kayiruara idubʉita. Mamina daiba kʼawuapanasi Jeowaba kãgabʉ oũdubira nokʼora nãã juwua jidaibarabasita akʉza mawũã dai wũãwũã bia dapʉeita, maʉ̃ kʼarea daira juwua jidasi poaga 1982de.

Mʉ̃a kĩrãbebʉ mʉ̃a jʉrʉbasita Jarakabʉ akʉza ¡Despertad! * ẽbẽrarã mʉ̃ berabarida kĩrãkʼa berabaridata. Maʉ̃raba mʉ̃ra mejãcha kʼarebasi mʉ̃ mawũã awuarababita akʉza mʉ̃a jarabasi mʉ̃ Jeowa yiwidʼibʉde jʉ̃ãbamarẽã mʉ̃a obʉra awuara oita. Tonyta mʉ̃me buru kʼoesi Jeowa ʉ̃rʉ Kʼawuabipanʉrãne julio 1982de.

Mʉ̃ bebʉra kʼawua ẽ sãwũã bakasita kʼãwũã Jeowa neũdukʼawua ba ẽ basibʉrʉ. Tonyta mʉ̃me edaʉde bedʼea zroma ũdupanʉmina dajada ũdupanʉ Jeowa kʼarebata, maʉ̃ba jaraseapanʉ sãwũã soiduba ĩjãpanʉta iyira (Salmo 55:22).

Daira sobiabʉ kʼãwũã dai wũãwũãrata Daizeze ode bʼaita jaradiasi baera akʉza dai wũãwũãraba ãyi wũãwũãrata kʼãwũã Jeowa neũdukʼawuababibʉ baera.

Mʉ̃ra diamasira aduaʼa kʼãĩseabʉ krĩcha ẽ mʉ̃ ʉ̃ra zeide kʼãrẽ berabarita akʉza bei ʉ̃rʉ. Idira Tonyta mʉ̃mera bari ẽ, nekʼãrẽ mejãcha opanʉ kongregasion awuara awuaraka akʉ wãita semanaza adewara mebẽrã bawaraʉba jaradia wãita mawũã ẽbẽrarãba Jesuta ĩjãpanʉbʉrʉ ãyisida ewari jõmaʉ̃nẽ baseabʉta.