Mʉ̃ra warisi pʉwʉrʉ Sajoniane, maʉ̃ drʉara República Democrática Alemanabasi (RDA). Mʉ̃ dedara ũrãgʼa biata jaradiabasi nemitiata oda ẽ marẽã akʉza jõmaʉ̃ta ibiadepanasi. República Democrática Alemananera jõmaʉ̃ta plata erpanasi baera akʉza mia kʼaita zʉbʉria ẽ basi baera ẽbẽra pʉwʉrʉ Sajonianebemabara ĩjãna ẽ basi religionʼra. Mʉ̃ara ĩjã ẽ basi Daizezera. Mamina mʉ̃ 18 poaga chubidade naʉ̃ krĩcha ũmeta mʉ̃ita yibiabasi: Daizezebʉta ĩjã ẽ baita akʉza ẽbẽra jõmaʉ̃ta abarika baibarata.

Kãgabasi mʉ̃a ẽbẽra jõmaʉ̃ta abarika daucha akʉdamarẽã akʉza abarika edadamarẽã. Mʉ̃a krĩchabasi yi plata barabʉta akʉza yi plata neẽãta ãba zeda kʼãrãpe nebiata abarika dradaita mawũã jõmaʉ̃ta daucha panamarẽã. Maʉ̃ kʼarea mʉ̃a jʉrʉsi warrara mʉ̃ kĩrãkʼa krĩchabʉme wãita. Mʉ̃ 14 poaga baside mʉ̃a ode karta balbʉepanʉta jʉrepe jʉ̃drʉsi, maʉ̃ kʼarea pʉwʉrʉdebema nokʼoba Auedebemaba biga diaita nebiata diasida mʉ̃a. Mawũã ũdukʼawuasi politikorata, aramaʉ̃ta mʉ̃a krĩchasi mʉ̃ra bia wãita.

Mamina atiaʉde awuara jʉdrʉsi. 1989de Berlín murora kora wãsi akʉza República Democrática Alemana zokʼabadara jõsi, maʉ̃ kʼarea ẽbẽrarãbara jõmaʉ̃ta daucha akʉda ẽ basi. Aramaʉ̃ta mʉ̃a akʉ jʉ̃drʉsi ẽbẽra jõmaʉ̃ta abarika edada ẽãta akʉza daucha akʉda ẽãta. ¿Kʼãrẽa mawũã berabarisi? ¿Ẽbẽra jõmaʉ̃ta abarikabʉ ẽ ka? ¿Ẽbẽra jõma abarika akʉira yibiabasi ẽ ka? Naʉ̃ kʼãwũã berabaridaba mʉ̃ta mejãcha krĩcha zroma obibasi.

Aramaʉ̃ta mʉ̃a awuara krĩcha jʉ̃drʉsi nãã krĩchabadaira, krĩchasi kʼawuaita musikata akʉza dibujo okʉaita. Mʉ̃ra wãsi kolegio musika zapanʉma mamaʉ̃ba unibersidaeda wãita adewara mʉ̃ yibariraba nemitia oẽmarẽã jaradiadara jipa kĩrãduasi. Mʉ̃itara yibiabasi mʉ̃ya kãgabʉ oita maʉ̃ kʼarea mʉ̃a erbesi wẽrãra bio. Mamina musika zaiba, dibujo oiba akʉza mʉ̃ya kãgabʉ okʉaiba taʉbi ẽ basi mʉ̃ krĩcha zroma obʉra. Maʉ̃ kʼarea mʉ̃a widibasi, ¿kʼãrẽta sãwũã berabariba? ¿Kʼãrẽa mʉ̃ra nama chu?

Mʉ̃a krĩcha ẽ basi mʉ̃a widibʉta panʉnaira. Ewari aba kolegiode mʉ̃ jewedasi estudiantera nekʼãrẽ ʉ̃ra zei ʉ̃rʉ bedʼeapanʉme. Mamabasi Mandyta * iyira Jeowa ʉ̃rʉ Kʼawuabipanʉrãbasi ũrãgʼa biata diasi iya mʉ̃a. Iya jarasi: «Andreas, bʉa kʼawuakĩrãbʉbʉrʉ kʼãrẽta ʉ̃ra zeita akʉza bʉ bebʉ sãwũã berabarita akʉra Daizeze Bedʼeaba kaseabʉta».

Mʉ̃a ĩjã ẽ basi iya jarada ʉ̃rʉ, mamina sodeba kʼawuakĩrãbasi. Mandyba mʉ̃a ũdubisi Daniel kapitulo 2de, nama bedʼeabasi propesia nokʼo zromara naʉ̃ drʉade zebʉrʉ ʉ̃rʉ. Maʉ̃ tẽã Mandyba akʉza ũdubisi propesia ẽbẽrarã sãwũã berabari ʉ̃rʉ. Idibʉrʉ panʉsida mʉ̃a widibʉra. Mamina, ¿kʼaiba bʉsi naʉ̃ propesiara? ¿Kʼaiba aripe jaraseabʉ ʉ̃ra kʼãrẽ berabarira? ¿Naʉ̃ba ũdubibʉka Daizezerabʉta?

Mandyba ũdukʼawuabisi Horst akʉza Angelikata, ãyira juwa jidapanasi. Ãya kʼarebasi Daizeze Bedʼea audre bia ũrĩta. Mama mʉ̃a kʼawuasi Jeowa ʉ̃rʉ Kʼawuabipanʉrãbʉrʉ zokʼabʉta Daizeze trʉ̃ta akʉza wuabemaraʼa jaradiapanʉta (Salmo 83:18; Mateo 6:9). Adewara kʼawuasi Jeowabara kãgabʉta ẽbẽra jõmaʉ̃ta ẽjũã biade bamarẽã. Salmo 37:9 jarabʉ: «Jeowa jʉ̃apanʉrãra naʉ̃ drʉade panañi». Mʉ̃ra mejãcha sobiasi naʉ̃ra ẽbẽra jõmaʉ̃ba ũduseabʉ baera opanʉbʉrʉ Jeowaba zokʼabʉta.

Mʉ̃itara zarebasi Daizeze Bedʼeaba jarabʉde oita. Mʉ̃ra bia wãbasi baera musika zaide akʉza dibujo oide naʉ̃ba yãrã ʉ̃tabʉta krĩchabisi, maʉ̃ kʼarea kʼawuaibarabasi edabʉta krĩchaita. Adewara mʉ̃itara zarebasi yuwẽrã bio erbada idubʉita. Jeowaʼa biga diabʉ iya jõmaʉ̃ta ũrĩbʉ baera, jʉ̃ãbʉ baera akʉza kãgata ũdubibʉ baera yi ẽbẽra zarea obʉta Daizeze Bedʼeaba zokʼabʉde bʼaita.

Mʉ̃a nãã ẽbẽra jõmaʉ̃ta daucha baibarata akʉza Daizeze ĩjã ẽ baita krĩchabadara, Daizeze Bedʼeaba mʉ̃ krĩchara awuara osi. Mʉ̃a kʼawuadadeba nekʼãrẽ ʉ̃ra zei kʼarea mejãcha krĩcha zroma obadara maʉ̃ ʉ̃rʉ wua krĩcha ẽ basi. Mʉ̃ra buru kʼoesi 1993de mawũã Jeowa ʉ̃rʉ Kʼawuabipanʉrãbaita maʉ̃ tẽã poaga 2000de juwa jidasi Tabithaʉ̃me iyabida ĩjãbʉ Daizezeta. Dai ũmeba ewari bio Daizeze Bedʼea ʉ̃rʉ jaradiapanʉ awuru ẽbẽrarã. Ẽbẽra mejãchaʉta krĩchapanʉ mʉ̃ krĩchabada kĩrãkʼa, krĩchapanʉ jõmaʉ̃ta daucha akʉdamarẽã akʉza ĩjã ẽ Daizezeta mamina mʉ̃ra mejãcha sobiabʉ kʼarebabʉ baera ãyabida Jeowa ʉ̃rʉ kʼawuamarẽã.

Mʉ̃ yibarirabara kãga ẽ basi mʉ̃a Jeowa ʉ̃rʉ Kʼawuabipanʉrãbawara Daizeze Bedʼea kʼawua jʉ̃drʉsidera. Mamina ãya ũdusi sãwũã mʉ̃ bebʉra Daizeze Bedʼeaba awuarababisita. Atiara mʉ̃ra mejãcha sobiabʉ ãyabida Daizeze Bedʼeata kʼawuanʉmʉ baera akʉza ãba yi jʉrebarima wãbʉ Jeowa ʉ̃rʉ Kʼawuabipanʉrãbawara.

Tabitha mʉ̃meba zarea opanʉ Daizeze Bedʼea juwa jidai ʉ̃rʉ ũrãgʼa bia diabʉde odaita. Bari jaraita zarea opanʉ yi wawia ũdubidaita naʉ̃ba kʼarebabʉ dai bia panaita akʉza dai juwa jidabʉ zarea bʼaita (Hebreos 13:4).

Mʉ̃ra krĩcha zroma obʉ ẽ nekʼãrẽ ʉ̃ra zei kʼareara. Jeowa ʉ̃rʉ Kʼawuabipanʉrã naʉ̃ drʉadebʉra mʉ̃ mebẽã kĩrãkʼapanʉ ãyira akʉza aduʼapanʉ. Mʉ̃ warraraenaʉ̃ba krĩchasi ẽbẽra jõmaʉ̃ta abarika bʼaibarata maʉ̃ta mʉ̃a nama ũdusi.