Naʉ̃ kartade kʼawuabʉrʉ kĩrãkʼa, Daizeze Bedʼeabara erbʉ, wãrĩnu Daizeze bed’earadebemata, maʉ̃ba kʼarebayi bʉta akʉza bʉ mebẽrãta. Jeowabara kãgabʉ sobiapanamarẽã. Adewara jarabʉ iya jarabʉta naara odara «izhara maʉ̃ jõma diaya» (Mateo 6:33, DB). Daizezera bʉ neũdukʼawua bakĩrãbʉ. Maʉ̃ba iyi neũdukʼawuabaita nekʼãrẽ jõma oibara, maʉ̃ trʉ audre yi biabaera dayirã ẽbẽraba erbaira (Mateo 22:37, 38).

DAIZEZE BEDʼEABA JARABɄTA. «Mʉra mara zezebaya, akʉza marãra mʉ warrabaya akʉza mʉ kaʉbaya, mawũã jarabʉ Jeowaba» (2 Corintios 6:18). Daizezera bʉ neũdukʼawua bia bakĩrãbʉ, yiwidʼibʉdeba iyi kʼaitabaseabʉ, adewara Jeowabara jarabʉ «badua yiwid’ipanaidua» (1 Tesalonicenses 5:17). Iyara kãga iya jaradamarẽã mara bedʼea zromara akʉza bʉa krĩchabʉra jõma (Filipenses 4:6). Bʉ mebẽrãʉ̃me ãba yiwidʼibʉbʉrʉ, ãya kʼawuayi bʉitara Daizezera wãrĩnu bʉta.

Adewara Daizezeʉ̃me bedʼeabʉ awuara, ũrĩbara iya jarabʉta ¿sãwũã oi maʉ̃ra? Iyi bedʼea kʼawuabʉdeba akʉza kartara iyi bedʼeadeba odaba (Salmo 1:1, 2). Biʼia krĩchara bʉa kʼawuabʉ ʉ̃rʉ (Salmo 77:11, 12). Daizezeba jarabʉ ũrĩra, wãibara kristianora ãba yi jʉrebarima (Salmo 122:1-4).

Akʉza audre Daizeze neũdukʼuawuabaira jaradiaibara iyi ʉ̃rʉ ẽbẽrarã. Bʉa audre obʉbʉrʉ mawũãra audre iyi kʼaita bʉta sentiyi (Mateo 28:19, 20).

BɄA KʼÃRẼ OSEABɄTA

• Nrʉemaza akʉra Daizeze bedʼeara akʉza yiwidʼira

• Kʼarebara bʉ mebẽrãra naara Jeowade oita kʼãrẽ oinaẽna

DAIZEZE BEDʼEABA JARABɄTA. «Daizeze kʼaita baidua, mawũãra iyira mara kʼaitabaya» (Santiago 4:8). Mebẽrãbawaraʉba k’awuaibara Jeowaba jarabʉ oita, maʉ̃ oira ewari jʉrʉibara (Génesis 18:19). Mamina maʉ̃awaẽ, Daizezera nrʉemaza krĩchabaibara, akʉza bʉ mebẽrãra audre Jeowa ne ũdukʼawuababira, Daizeze Bedʼeaba jarabʉ «jaradiada ʉ̃rʉ jaradiaibara bʉ wũãwũã bʉ deda jewedabʉrʉde akʉza ode wãne, k’ãĩbʉrʉde, akʉza piradrʉbʉrʉde» (Deuteronomio 6:6, 7). Akʉza Josueba krĩchada kĩrãkʼa krĩchamarẽã «mamina mʉta akʉza mʉ deda panʉbawarãra wãnañi Jeoware» (Josué 24:15).

BɄA KʼÃRẼ OSEABɄTA

• Ewari erbara bʉ mebẽrã jaradiaita ãya nesidabʉta