YI 04
¿Kʼaiba Daizezera?
Dããraba ẽbẽrarã daizeze zeri ẽã yiwidʼi zebʉrʉta. Mamina Daizeze Bedʼeabara jarabʉ Daizezera abapaibʉta akʉza yi zromata wuabema daizeze zeri ẽãira (2 Crónicas 2:5). ¿Kʼaipe iyira? ¿Kʼãrẽba yi zroma babibʉ wuabema daizeze zeri ẽãira? Naʉ̃ne kʼawuara Daizezeba iyi ʉ̃rʉ bʉa kʼawuamarẽã kãgabʉta.
1. ¿Kʼai Daizeze trʉ̃ra? ¿Sãwũã kʼawuapanʉ iyita ũdukʼawuamarẽã kãgabʉta?
Daizeze Bedʼeadeba, Daizezera iyi ʉ̃rʉ bedʼeabʉ. Iya jarabʉ: «Mʉ̃ra Jeowa. Kaʉ̃ mʉ̃ trʉ̃ra» (akʉra Isaías 42:5, 8). Jeowa trʉ̃ra ebreo bedʼeadebema, ẽbẽra naʉ̃ ʉ̃rʉ estudiapanʉrabara jarabʉ naʉ̃ trʉ̃bara jarakĩrãbʉta «mʉ̃a jidabʉ mʉ̃a okĩrãbʉta». Jeowabara kãgabʉ iyi trʉ̃ta ũdukʼawuadamarẽã (Éxodo 3:15). Maʉ̃ kʼarea Jeowabara iyi trʉ̃ra bʉbisi Daizeze Bedʼeade 7.000 audre. a Ʉ̃kʉrʉbara zokʼabʉ bedʼea dios mawũã ẽ bʉrʉ señor, yi nekʼãrẽ badua ãya yiwidʼiseabʉa bedʼeaita. «Daizezeara, ʉ̃tʉ bajãne akʉza nama egorode» iyi trʉ̃ra Jeowa (Deuteronomio 4:39).
2. ¿Kʼãrẽta jaradiabʉ Daizeze Bedʼeabara Jeowa ʉ̃rʉ?
Daizeze Bedʼeabara jarabʉ naʉ̃ drʉadera mejãchabʉta daizezerãra ẽbẽra mejãchaʉta maʉ̃ra yiwidʼibʉta, mamina abapaibʉ Daizezearata, Jeowa. ¿Sãwũã kʼawuapanʉ maʉ̃ra? Jeowatrʉ «abapai yi zroma naʉ̃ ẽjũã jõma ʉ̃rʉ» (akʉra Salmo 83:18). «Jõma oseabʉ», naʉ̃ba jarakĩrãbʉ Daizezera mejãcha zarea barabʉta iya kãga oita. Adewara iya nekʼãrẽ jõma obʉ, naʉ̃ba jarakĩrãbʉ jõma naʉ̃ drʉadebʉta akʉza ʉ̃tʉbʉta iya parãsita (Apocalipsis 4:8, 11). Adewara Jeowatrʉ abapai bakikibarisi akʉza bakikibariyi (Salmo 90:2).
AUDRE BIʼIA KʼAWUADADRɄ
Kʼawuadayi kʼãrẽne awuarabʉta Daizeze trʉ̃araʉ̃me ẽbẽraba Daizeze trʉ̃ awuara trʉ̃gabʉme. Adewara kʼawuadayi iyi trʉ̃ sãwũã jaradiabʉta akʉza kʼãrẽa kãgabʉta bʉa iyi trʉ̃ ʉ̃rʉ kʼawuamarẽã.
3. Daizezera trʉ̃ abapaibʉ
Kʼawuaita kʼãrẽne awuarabʉta ẽbẽra trʉ̃arata akʉza iya nekʼãrẽ obʉ kʼarea trʉ̃ diabʉdaʉ̃me, akʉra BIDEOTA, mõbe naʉ̃ta panʉidua:
-
¿Kʼãrẽne awuarachu jaraita señor ẽbẽra trʉ̃arade trʉ̃ira?
Daizeze Bedʼeabara jarabʉ ẽbẽra mejãchaʉta yiwidʼipanʉta señorʼa akʉza daizezeraʼa. Akʉra Salmo 136:1-3, mõbe naʉ̃ta panʉidua:
-
¿Saʉ̃ Daizezeta ʉ̃tachu wuabema daizezeraira?
4. Jeowaba kãgabʉ iyi trʉ̃ta ũdukʼawuamarẽã akʉza maʉ̃ta jaramarẽã
¿Sãwũã kʼawuapanʉ Jeowaba bʉa iyi trʉ̃ ũdukʼawuamarẽã kãgabʉra? Akʉra BIDEOTA, mõbe naʉ̃ta panʉidua:
-
¿Kʼãrẽa Jeowabara bʉa iyi trʉ̃ta ũdukʼawuamarẽã kãgabʉ?
Jeowabara kãgabʉ ẽbẽraba iyi trʉ̃ta jaradamarẽã. Akʉra Romanos 10:13, mõbe naʉ̃ta panʉidua:
-
¿Kʼãrẽa yibia Jeowa trʉ̃ jaraira?
-
¿Bʉra sãwũã sentibʉ ẽbẽraba bʉ trʉ̃arade trʉ̃bʉrʉdera?
-
Bʉmara, ¿Jeowara sãwũã sentibʉ bʉa iyi trʉ̃ta jarabʉrʉdera?
5. Jeowaba kãgabʉ bʉra iyi neũdukʼawuara bamarẽã
Wẽrã Camboyadebemaba, yi trʉ̃ Sotenba, jarasi Daizeze trʉ̃ ũdukʼawuaira arigʉ yibiata dayirãita. Akʉra BIDEOTA, mõbe naʉ̃ta panʉidua:
-
Naʉ̃ bideodera, ¿Sotenbara kʼãrẽta osi Daizeze trʉ̃ ũdukʼawuada tẽãra?
Ẽbẽra aba dayi neũdukʼawua babʉrʉdera maʉ̃ trʉ̃ta nããra kʼawuabʉ. Akʉra Santiago 4:8a, mõbe naʉ̃ta panʉidua:
-
¿Bʉa kʼãrẽta omarẽã kãgabʉ Jeowabara?
-
¿Bʉa Daizeze trʉ̃ta kʼawuabʉbʉrʉ akʉza maʉ̃ta jarabʉbʉrʉ kʼarebaika iyi kʼawa bʼaita? ¿Kʼãrẽa mawũã ĩjãbʉ?
Ʉ̃KɄRɄBA KRĨCHAPANɄTA: «Daizezera abapaibʉ baera bedʼea neẽãta trʉ̃ bio jarapanʉbʉsida».
-
Bʉmara, ¿Jeowara Daizeze trʉ̃araka?
-
¿Sãwũã jaradiai awuru ẽbẽraʼa Daizezeba kãgabʉta iyi trʉ̃ jaradamarẽã?
KĨRÃBEITA
Jeowara Daizeze trʉ̃ara. Iya kãgabʉ iyi trʉ̃ ʉ̃rʉ ũdukʼawuadamarẽã mawũã iyi neũdukʼawuara bʼaita.
Panʉnadrʉ
-
¿Kʼãrẽa awuarachu Jeowara ẽbẽraba daizezera yiwidʼipanʉraira?
-
¿Kʼãrẽa dayirãbara jaraibara Daizeze trʉ̃ra?
-
¿Sãwũã ũdubibʉ Jeowaba bʉta iyi neũdukʼawuara bamarẽã kãgabʉta?
JɄRɄDA AUDRE KʼAWUAITA
Akʉdaya bedʼea juesoma ũdubibʉta Daizezera wãrĩnubʉta.
Kʼawuara kʼãrẽa dayirãbara krĩchaseabʉta Daizezera ewari jõmaʉ̃nẽ kikibarita.
Kʼawuadayi kʼãrẽa jaraibarata Daizeze trʉ̃ra, kʼawua ẽ basimina naweda sãwũã jarapanasita.
¿Daizezera sãwũã trʉ̃ jaraibara? Akʉdaya kʼãrẽa jarapanʉta Daizezera trʉ̃ara barabʉta.
a Bʉa audre kʼawuakĩrãbʉbʉrʉ Daizeze trʉ̃ ʉ̃rʉ akʉza kʼãrẽa ʉ̃kʉrʉ Daizeze Bedʼeaba Daizeze trʉ̃ ãĩbʉepanʉta, jʉrʉda Apéndice A4 de La Biblia. Traducción del Nuevo Mundo (Español).
