YI 17

¿Sãwũãchu Jesura?

Bed’eabira

¿Sãwũãchu Jesura?

Dayirãba kʼawuabʉrʉde Jesuba nama egorode odata akʉza iya jaradata, kʼawuaseapanʉ iyi sode nebia erbʉta, maʉ̃ba yi Zeze Jeowata akʉza iyita orrabibʉ. ¿Saʉ̃ maʉ̃ nebia Jesuba iyi sode erbʉra? ¿Kʼãrẽta odaibara Jesu kĩrãkʼa bʼaita?

1. ¿Kʼãrẽne abarikabʉ Jesura yi Zezeʉ̃me?

Jesura poaga mejãcha ba yi Zezeba nekʼãrẽ obʉ akʉbʉta akʉza maʉ̃ta kʼawuabʉta. Maʉ̃ kʼarea yi Zeze kĩrãkʼa krĩchabʉ akʉza obʉ iyide kĩrãkʼa (akʉra Juan 5:19). Jesuba yi Zezede kĩrãkʼa obʉ baera ewari aba jarasi: «Mʉta ũdu bʼʉbara mʉ Zezeta ũdu bʼʉa» (Juan 14:9). Mawũẽra, bʉa Jesuta bia ũdukʼawuara Jeowasida bia ũdukʼawuayi. Bari jaradaita, Jesubara so borekea akʉsi ẽbẽrarãra, naʉ̃ba ũdubibʉ Jeowabida bʉra so borekea akʉbʉta.

2. ¿Jesubara sãwũã ũdubisi yi Zeze kãgabʉta?

Jesubara jarasi: «mʉãrã mʉ Zezera kʉãgʼata ẽjũãne bʼeba kʼawuadʼamarẽã, mʉãrã mʉ Zezeba jaradʼa kĩrãkʼa onʉmʉã» (Juan 14:31). Jesu nama egorode baside yi Zeze kãgabʉta ũdubisi iya jõma zokʼabʉ ũrĩside, edaʉde iyita zareabasimina. Jesura yi Zeze ʉ̃rʉ bedʼea kĩrãbasi akʉza kʼarebasi wuabema ẽbẽrata yi Zeze neũdukʼawua bamarẽã (Juan 14:23).

3. ¿Sãwũã ũdubizebʉrʉ Jesubara ẽbẽrarã kãgabʉta?

Daizeze Bedʼeabara jarabʉ Jesubara «mejãcha kãgabasi ẽbẽrarãta» (Proverbios 8:31). Jesubara ẽbẽrarã kãgaba mejãcha kʼarebasi akʉza jʉ̃ã ẽ basi iyaʼa nekʼãrẽ diadamarẽã. Jesuba ẽbẽrarãta so borekea akʉsi baera, iyi zareadeba miõba okata oũdubisi (Marcos 1:40-42). Ibiade erbasi ẽbẽrarãta, ẽbẽra jõmaʉ̃ta daucha akʉbasi, adewara so zareata diabasi ẽbẽrarã sobia iyi bedʼea ũrĩpanʉra akʉza nebia zeita jaradiabasi. Ẽbẽrarã jõmaʉ̃ta mejãcha kãgabʉ baera, iyira zʉbʉriasi akʉza beisi. Mamina ẽbẽrarã iya jaradiabʉ ũrĩpanʉra audre kãgabʉ (akʉra Juan 15:13, 14).

AUDRE BIʼIA KʼAWUADADRɄ

Jesuta biʼia ũdukʼawuara, adewara iyide kĩrãkʼa kãgata ũdubira akʉza ẽbẽra biabara.

4. Jesubara kãga yi Zezera

Jesubara yizadeba ũdubisi sãwũã kãga ũdubiseabʉta Daizezeʼa. Akʉra Lucas 6:12 adewara Juan 15:10 akʉza 17:26. Testo aba abaka leda tẽã, mõbe naʉ̃ta panʉidua:

Jesuba oda kĩrãkʼa obʉdeba, ¿sãwũã ũdubipanʉ Jeowaʼa kãgapanʉta?

Jesubara ũdubisi yi Zeze mejãcha kãgabʉta akʉza audre ẽãne yiwidʼibʉ.

5. Jesubara krĩchabasi wuabemarãra

Jesubara wuabemarata audre krĩchabasi iyikʉzaira. Maʉ̃ kʼarea iyi mejãcha aukarabasimina, ewari jʉrʉsi wuabemara kʼarebaita. Akʉra Marcos 6:30-44, mõbe naʉ̃ta panʉidua:

Naʉ̃ testodera, ¿Jesubara sãwũã wuabemara krĩchabʉta ũdubisi? (Akʉra nejʉacha zake 31, 34, 41 akʉza 42).
¿Jesubara kʼãrẽa kʼarebasi naʉ̃ra ẽbẽrarãra? (Akʉra nejʉacha zake 34).
Jesuba yi Zezede kĩrãkʼa obʉ baera, ¿naʉ̃ba kʼãrẽta jaradiabʉ Jeowa ʉ̃rʉ?
¿Sãwũã dayirãbida Jesude kĩrãkʼa wuabemarata krĩchaseabʉ?

6. Jesubara diabasi iya erbʉta

Jesu nekʼãrẽ mejãcha neẽbasimina iya erbʉta diabasi akʉza kãgabʉ dayirãbida abarika odamarẽã. Akʉra Hechos 20:35, mõbe naʉ̃ta panʉidua:

Jesuba jaradadera, ¿kʼãrẽba sobiabibʉ dayirãra?

Akʉra BIDEOTA, mõbe naʉ̃ta panʉidua:

BIDEO: «Audre sobiabʉ daya diabʉde dayaʼa diapanʉira» (wiña ũdubibʉ) (4:00)

Dayirãra nekʼãrẽ mejãcha neẽmina, ¿kʼãrẽta diaseapanʉ?

¿Kʼawuabasika?

Daizeze Bedʼeabara dayirãʼa jaradiabʉ Jeowaʼa yiwidʼibʉrʉdera Jesu trʉ̃ne odamarẽã (akʉra Juan 16:23, 24). Mawũã ũdubidayi Jesuʼa biga diapanʉta iya kʼarebasi baera dayirã Jeowa neũdukʼawuabaita.

Ʉ̃KɄRɄBA KRĨCHAPANɄTA: «Daizezebara krĩcha ẽ ẽbẽrarãra».

Jesubara ẽbẽrarã kãgabasi akʉza yi Zezede kĩrãkʼa obasi. Mawũẽra, ¿kʼãrẽta jaradiabʉ iya odaba Jeowa ʉ̃rʉ?

KĨRÃBEITA

Jesubara kãga Jeowara akʉza ẽbẽrarãsida, maʉ̃ kʼarea bʉa Jesuta audre ũdukʼawuara bia ũdukʼawuayi Jeowasida.

Panʉnadrʉ

Jesuba oda kĩrãkʼa, ¿dayirãbida sãwũã Jeowa kãgabʉta ũdubiseabʉ?
Jesuba oda kĩrãkʼa, ¿dayirãbida sãwũã ẽbẽrarã kãgabʉta ũdubiseabʉ?
Naʉ̃ne kʼawuasida Jesubara wuabemara krĩchabʉta, so borekea akʉbʉta akʉza iya erbʉta diakĩrãta. Naʉ̃nebemara, ¿bʉara saʉ̃ta audre kãga?

Kʼãrẽ ewaride jõdogo yi 17:

Mʉ̃a oita

Zarea ora naʉ̃ semanane Jesude kĩrãkʼa oita.

Adewara oita:

Your other goal