YI 28
Bʉa biga diabʉta ũdubira Jeowa Jesumeba bʉ kʼarea odata
¿Bʉra sãwũãbʉ bʉ neũdukʼawuaba bʉʼa nebia diabʉrʉdera? Mʉ̃a kʼawuaita bʉra mejãcha sobiabʉ baibara akʉza iya maʉ̃ nebia diada kʼarea biga diabʉta ũdubikĩrãbʉ baibara. Jeowaba Jesumeba diabʉrʉ nekʼãrẽ nebia miõba dia be ẽãta. ¿Saʉ̃ maʉ̃ra? akʉza ¿Sãwũã biga diabʉta ũdubiseabʉ maʉ̃ nebia zroma kʼarea?
1. ¿Sãwũã biga diabʉta ũdubiseabʉ Jeowaʼa akʉza Jesuʼa ãya nebia diada kʼarea?
Daizeze Bedʼeaba jarabʉ: «iyidebema [Jesu] ĩjãbʉra», ewari jõmaʉ̃nẽ bayi (Juan 3:16). ¿Kʼãrẽta jarakĩrãbʉ wãrĩnu ĩjã erbaibara? Jarakĩrãbʉ ẽ bari Jesu ʉ̃rʉ ĩjãibarata, awuarabʉrʉ wãrĩnu ĩjã erbaira jarakĩrãbʉ, daya krĩcha bia jidabʉdeba akʉza daya obʉdeba oũdubibʉta (Santiago 2:17). Dayirãba obʉdeba akʉza bedʼeabʉdeba wãrĩnu ĩjãta ũdubibʉbʉrʉ audre Jesu akʉza yi Zeze Jeowa neũdukʼawua baseabʉ (akʉra Juan 14:21).
2. Kʼãrẽ nebia opanʉneba biga diabʉta ũdubiseabʉ Jeowaʼa akʉza Jesuʼa ãya diada kʼarea?
Jesuba diamasi iyi beina, jarasi iyi kʼaidupanʉra sãwũã biga diaibarabasita iyi beida kʼarea. Jesuba iyi kʼaidupanʉrabawaraʉba odaba, Daizeze Bedʼeabara maʉ̃ra jarabʉ «Jesuba iyi beina yiko oda koita», maʉ̃ra idi kʼawuapanʉ Jesu beida jẽda kĩrãbedaita (1 Corintios 11:20). Jesuba naʉ̃ra omarẽã zokʼasi iyi kʼaidu panʉra akʉza kristiano wãrĩnuaraba kĩrãbedamarẽã iyi beidata. Jesuba jarasi: «Naʉ̃ta kʼãwũã oidua mʉ̃ krĩchabʉdata» (Lucas 22:19). Bʉ Jesu beida jẽda kĩrãbepanʉma wãbʉrʉde ũdubibʉ biga diabʉta Jeowaʼa akʉza Jesuʼa.
AUDRE BIʼIA KʼAWUADADRɄ
Kʼawuara audre sãwũã Jeowaʼa akʉza Jesuʼa biga diaita ãya kʼãwũã oda kʼarea. Adewara kʼawuara kʼãrẽa yibiata Jesu beida jẽda kĩrãbedaira.
3. Oũdubibʉ wãrĩnu biga diabʉba
Krĩchara bʉ doeda joganʉmaside ẽbẽra abaʉba kʼarebasita. Bʉara, ¿maʉ̃ba kʼarebadara kĩrãduaika? Mawũã ẽ bʉrʉ, ¿jʉrʉika iya sãwũã biga diaita?
Jeowaba dayirãta ẽdrʉbisi baera maʉ̃ kʼarea biga diadaibara. Akʉra 1 Juan 4:8-10, mõbe naʉ̃ta panʉidua:
-
¿Kʼãrẽa Jesu beidara nebia kĩrãkʼabʉ?
-
¿Bʉra sãwũãbʉ Jeowaba Jesumeba kʼãwũã oda kʼarea?
¿Sãwũã biga diabʉta ũdubiseabʉ Jeowa Jesumeba oda kʼarea? Akʉra 2 Corintios 5:15 akʉza 1 Juan 4:11; 5:3. Naʉ̃ra testora akʉda tẽã, panʉidua naʉ̃ta:
-
Naʉ̃ra testoba jarabʉdera, ¿kʼãrẽta oibara biga diaita?
4. Jesuba oda kĩrãkʼa opanʉ
Akʉza daya biga diabʉ ũdubira, obʉ Jesuba obada kĩrãkʼa obʉde. Akʉra 1 Pedro 2:21, mõbe naʉta panʉidua:
-
¿Bʉara sãwũã oseabʉ Jesuba oda kĩrãkʼa?
Jesubara mejãcha kãgabasi Daizeze Bedʼeara, jaradiabasi Daizeze Bedʼea bia ʉ̃rʉ akʉza kʼarebabasi wuabema ẽbẽrarãra.
5. Jesu beida jẽda kĩrãbedaita opanʉ
Kʼawuadaita Jesuba iyi bei nãã yiko oda berabarida ʉ̃rʉ, akʉra Lucas 22:14, 19, 20, mõbe naʉ̃ta panʉidua:
-
¿Kʼãrẽta berabarisi Jesuba iyi bei nãã yiko odadera?
-
¿Kʼãrẽta jarakĩrãbʉ panta binoʉ̃mera? (Akʉidua nejʉacha zakerata 19 akʉza 20).
Jesubara kãgabasi iyi kʼaidubemaraba jẽda kĩrãbedamarẽã iyi beidata poagaza, iyi beida ewaride. Maʉ̃ kʼarea dai Jeowa ʉ̃rʉ Kʼawuabipanʉrãra poagaza ãba yi jʉrepanʉ, Jesu beida jẽda kĩrãbedaita iya jarada kĩrãkʼa. Kʼawuadaita maʉ̃ yi jʉrepanʉ kʼãrẽa audre yibiata, akʉra BIDEOTA, mõbe naʉ̃ta panʉidua:
-
¿Kʼãrẽta opanʉ Jesu beida jẽda kĩrãbepanʉ ewaridera?
Panta binoʉ̃mera zokʼapanʉ nekʼãrẽ jaraita. Panba jarakĩrãbʉ Jesu kakua nemitia okata akʉza dayirã jõmaʉ̃bari beidata. Binobara jarakĩrãbʉ Jesu wata.
Ʉ̃KɄRɄBA KRĨCHAPANɄTA: «Dayirã ẽdrʉira bari Jesuta ĩjãibara».
-
¿Bʉara sãwũã zokʼaseabʉ Juan 3:16 akʉza Santiago 2:17 eda jarabʉra, jara ũrĩbita dayi bebʉ ẽdrʉira nekʼãrẽ audre oibarata?
KĨRÃBEITA
Dayirãba Jesu ʉ̃rʉ wãrĩnu ĩjãita erpanʉbʉrʉ akʉza iyi beidata jẽda kĩrãbepanʉbʉrʉ ũdubibʉ biga diabʉta iya dayirãita oda kʼarea.
Panʉnadrʉ
-
¿Ẽbẽra abaʉbara sãwũã ũdubibʉ Jesu ʉ̃rʉ ĩjãbʉta?
-
¿Bʉara ũdubikĩrãbʉka Jeowaʼa akʉza Jesuʼa biga diabʉta ãya kʼãwũã oda kʼarea? ¿Sãwũã ũdubikĩrãbʉ?
-
¿Kʼãrẽa wãnaibara Jesu beida jẽda kĩrãbedaimara?
JɄRɄDA AUDRE KʼAWUAITA
Akʉra Jesu beidaba dayirã kʼãrẽta obibʉta.
Jesubara iyi sãwũãbʉdeba ũdubisi Jeowaʉ̃me kʼẽrẽpabʉta (9:28)
Audre kʼawuara ĩjã erbai ʉ̃rʉ akʉza sãwũã ũdubiseabʉta.
«Ĩjãta erbaibara Jeowaba nebia diaita jarada ʉ̃rʉ» (Jarakabʉ, octubre 2016de)
Yuwẽrã bebʉra awuara besi audre kʼawuaside kʼãrẽta jarakĩrãbasita Jesu beidaba. Akʉra kʼãrẽta berabarisita iyi nebʉrade «Mʉ̃ra krĩcha zroma oẽ, mʉ̃ nãã badaira biabʉ akʉza aduʼabʉ».
«Daizeze Bedʼeabara mʉ̃ bebʉra awuara babibʉ» (Jarakabʉ, 1ne agostode 2011de)
Kʼãrẽa wĩkaʉba kobʉ panta binoʉ̃me Jesu beida jẽda kĩrãbepanʉ opanʉne.
