Dayi mebẽrã beibʉrʉdera mejãcha zʉbʉriabibʉ adewara sopʉabʉ maʉ̃ kʼarea. Daizeze Bedʼeabara jarabʉ beira dayirã nejʉrata (1 Corintios 15:26). Yi 27de kʼawuasida Jeowabara jõbita maʉ̃ nejʉrara mamina, ¿kʼãrẽta berabari ẽbẽrarã beidarãra? Naʉ̃ne kʼawuayi Daizezeba kʼãrẽ nebia zroma wei ʉ̃rʉ. Iyara jẽda piradrʉbiyi ẽbẽrarã mejãcha beidarãra, maʉ̃rãra ewari jõmaʉ̃nẽ bayi, jẽda piradrʉbiyi. ¿Maʉ̃ra wãrĩnu berabarika? ¿Ẽbẽra jẽda piradrʉbʉrʉdera ʉ̃ta wãika mawũã ẽ bʉrʉ naʉ̃ drʉade piradrʉika?

1. ¿Kʼãrẽta oi Jeowabara dayirã mebẽrã beida kʼareara?

Jeowabara jẽda piradrʉbikĩrãbʉ ẽbẽra beidarãra. Basi yumakẽrã aba Daizeze ʉ̃rʉ ĩjãbʉta, iyi trʉ̃ra Job basi. Iyara ĩjãbasi Daizezeba kĩrãdua ẽãta iyi beida tẽãra. Iya jarasi Daizezeʼa: «Bʉa trʉña, aramaʉ̃ta mʉ̃a panʉña [egoro zobeadeba]» (akʉra Job 14:13-15).

2. ¿Sãwũã kʼawuapanʉ beidarãra jẽda piradrʉita?

Jesu nama naʉ̃ drʉade basidera Daizezebara diasi zareata ẽbẽrarã piradrʉbimarẽã. Jesubara piradrʉbisi wuẽrã zake 12 poagababʉta akʉza pẽdra wauta (Marcos 5:41, 42; Lucas 7:12-15). Maʉ̃are Jesu neũdukʼawua Lázarota beisi, Lázaro joudapeada ewari kĩmare basimina, Jesubara jẽda piradrʉbisi, Daizezeʼa yiwidʼi kʼãrãpe nemi jĩgʉa jarasi: «Lázaro, ãĩ zera». «Aramaʉ̃ta Lázarora ãĩ zesi iyi joudapeadadeba» (Juan 11:43, 44). Krĩchaidua sãwũã Lázaro neũdukʼawuarata akʉza yi mebẽrãta kʼãbãẽã sobiasidata.

3. ¿Bʉ mebẽrã beidarabara kʼãrẽ nebiata jʉ̃ãbʉ ʉ̃ra zeidera?

Daizeze Bedʼeaba jarabʉ: «Beudapeadara jẽda piradrʉbiyi» (Hechos 24:15). Ẽbẽra nãã Jesuba piradrʉbidara ʉ̃ta wã ẽ basi (Juan 3:13). Awuarabʉrʉ sobiapanasi naʉ̃ drʉade jẽda piradrʉsida baera. Maʉ̃ra odakĩrãkʼa, Jesubara ẽbẽrarã mejãchaʉta jẽda piradrʉbiyi ewari jõmaʉ̃nẽ panamarẽã, naʉ̃ drʉa ẽjũã kĩrãwãreã nʉminane. Iya jarasi jõma beidapeada jounʉmera jẽda piradrʉyi, jari ẽbẽrarã beidara darabadarasida Jeowaba jẽda piradrʉbiyi wuabemaraba kĩrãduasidamina (Juan 5:28, 29).

 AUDRE BIʼIA KʼAWUADADRɄ

4. Jesubara ũdubisi wãrĩnu ẽbẽrarãra jẽda piradrʉbiseabʉta

Audre kʼawuadadrʉ Jesuba kʼãrẽta osita iyi neũdukʼawua Lázaro kʼarea. Akʉra Juan 11:14, 38-44, mõbe naʉ̃ta panʉidua:

• ¿Sãwũã kʼawuapanʉ Lázarora wãrĩnu beisita? (Akʉra nejʉacha zake 39).

• Wãrĩnu Lázarota ʉ̃ta wãsibʉrʉ, ¿Jesubara nama naʉ̃ drʉade bʼaita jẽda piradrʉbikasika?

Akʉra BIDEOTA.

5. Ẽbẽrarã mejãchaʉta jẽda piradrʉbiyi

Akʉra Salmo 37:29, mõbe naʉ̃ta panʉidua:

• ¿Sama panai ẽbẽrarã jõma jẽda piradrʉbʉrʉra?

Jesubara piradrʉbiyi ẽbẽrarã Daizeze ode panʉrata akʉza ẽbẽra mejãchaʉta piradrʉbiyi. Akʉra Hechos 24:15, mõbe naʉ̃ta panʉidua:

• Bʉara, ¿kʼaita jẽda ũdukĩrãbʉ?

• ¿Sãwũã beidara jẽda piradrʉi jʉ̃ãiba zareata diasi Felicity yibarirata?

 KĨRÃBEITA

Daizeze Bedʼeaba jarabʉ wãrĩnu ẽbẽrarã mejãcha beikʉadara jẽda piradrʉita. Jeowabara kãgabʉ ẽbẽrarãra jẽda piradrʉdamarẽã, maʉ̃ba diasi Jesuʼa zareata maʉ̃ oita.

Panʉnadrʉ

• ¿Bʉra sãwũã krĩchabʉ kʼawuabʉrʉ baera Jeowaba Jesumeba beidara jẽda piradrʉbi kʼarea?

• Ẽbẽrarã mejãcha piradrʉbʉrʉdera, ¿sama panai ãyira, ʉ̃tʉ mawũã ẽ bʉrʉ naʉ̃ drʉade? Bʉara, ¿kʼãrẽa mawũã jarabʉ?

• Bʉara, ¿kʼãrẽa ĩjãbʉ beidarãra jẽda piradrʉita?