YI 41
¿Daizeze Bedʼeabara kʼãrẽta jarabʉ mia erkʼãĩ ʉ̃rʉra?
Ẽbẽra mejãchaʉta mia erkʼãĩ ʉ̃rʉ bedʼeakĩrã ẽ adewara maʉ̃ ʉ̃rʉ bedʼeabʉrʉdera perabʉ, mamina Daizeze Bedʼea maʉ̃ ʉ̃rʉ bedʼeabʉdera biʼia jara ũrĩbibʉ akʉza wawiata ũdubibʉ. Naʉ̃ ʉ̃rʉ jarabʉra yibia Jeowaba kʼawuabʉ baera kʼãrẽa odata akʉza iya maʉ̃ra parãna. Iya kʼawuabʉ kʼãrẽta audre yibiata dayirãitara maʉ̃ kʼarea jarabʉ dayirãba kʼãrẽta odaibarata iyi sobiabita akʉza ewari jõmaʉ̃nẽ bʼaita.
1. ¿Jeowabara kʼãrẽta krĩchabʉ mia erkʼãĩ ʉ̃rʉra?
Jeowaba diasi mia erkʼãĩra, iyara kãgabasi baera juwua jidapanʉrata ãba kʼãĩmarẽã akʉza sobiapanamarẽã, maʉ̃ba yi juwua jidapanʉrabara wũãwũã erbaseabʉ akʉza yiya kãga ũdubiseapanʉ, maʉ̃ kʼarea Daizeze Bedʼeaba jarabʉ: «Sobiabara bʉ kima warraraena mia kʼãĩnaʉ̃me» (Proverbios 5:18, 19). Jeowabara kãgabʉ juwua jidapanʉrãra ãĩba ẽ bamarẽã (akʉra Hebreos 13:4).
2. ¿Kʼãrẽta jarakĩrãbʉ dayi kakua bia zokʼa ẽ baita nekayirua oita?
Daizeze Bedʼeaba jarabʉ ẽbẽraba ãyi kakuata bia zokʼa ẽ bʉrʉ kayirua oita «Daizeze ẽjũã kĩrãwãreãnẽra eda wã ẽ» (1 Corintios 6:9, 10). Daizeze Bedʼea bʉdaraba maʉ̃ ʉ̃rʉ bedʼeaita jarasi bedʼea por·neiʹa, maʉ̃ bedʼeabara jarakĩrãbʉ: 1) juwua jidapanʉra ẽãta ãba yi erkʼãĩta, a 2) yuwẽrãta abari yuwẽrãʉ̃me mawũã ẽ bʉrʉ yumakẽrãta abari yumakẽrãʉ̃me mia erkʼãĩta, 3) nedʉwʉrʉ oita. Maʉ̃ra nemitiata oẽ bʉrʉ Jeowata sobiabiyi akʉza mejãcha nebiata ũduyi (1 Tesalonicenses 4:3).
AUDRE BIʼIA KʼAWUADADRɄ
Akʉdaya kʼãrẽta oseabʉta bʉ kakuade nekayirua oẽ baita akʉza kʼãrẽ nebiata ũduseabʉ bʉa maʉ̃ nekayiruata oẽ bʉrʉ.
3. Jĩgara bʼaidua dayi kakua bia zokʼa ẽ kayirua oideba
Joséra zarea osi nekayiruadeba jĩgara bʼaita. Akʉra Génesis 39:1-12, mõbe naʉ̃ta panʉidua:
-
¿Joséra kʼãrẽa wẽba wãsi? (Akʉra nejʉacha zake 9).
-
Bʉmara, ¿Josébara iyi wẽba wãna kʼarea bia osika? ¿Kʼãrẽa?
Warrarabara, ¿sãwũã Joséba oda kĩrãkʼa oseabʉ ãyi kakua bia zokʼabʉde kayirua oideba jĩgara bʼaita? Akʉra BIDEOTA.
Jeowabara kãgabʉ jĩgara bamarẽã nekayirua oideba. Akʉra 1 Corintios 6:18, mõbe naʉ̃ta panʉidua:
-
¿Kʼãrẽba ozeseabʉ ẽbẽra aba iyi kakua bia zokʼa ẽ bʉrʉ kayirua oita?
-
¿Bʉara kʼãrẽta oseabʉ bʉ kakua bia zokʼa ẽ kayirua oideba jĩgara bʼaita?
4. Bʉra nemitiadeba jĩgara baibara
¿Kʼãrẽba kʼarebaseabʉ dayi kakua bia zokʼa ẽ bʉrʉ kayirua oideba jĩgara bʼaita? Akʉra BIDEOTA, mõbe naʉ̃ta panʉidua:
-
Mebẽãbara kʼawuaside nemitia oseabʉta, ¿kʼãrẽta osi maʉ̃neba jĩgara bʼaita?
Mebẽrã kʼẽrẽpa panʉrasida zarea opanʉ ãyi krĩchade nekayirua krĩcha ẽ baita. ¿Kʼãrẽta oseabʉ maʉ̃ ʉ̃rʉ krĩchanʉma ẽ baita? Akʉra Filipenses 4:8, mõbe naʉ̃ta panʉidua:
-
¿Kʼãrẽ ʉ̃rʉ krĩchadaibara?
-
Dayirãba Daizezedebemata obʉbʉrʉ akʉza Daizeze Bedʼeata ewariza akʉbʉbʉrʉ, ¿nemitiadeba jĩgara baseabʉka? ¿Kʼãrẽa?
5. Daizezeba zokʼabʉ ũrĩbʉde bia wãñi
Jeowabara kʼawuabʉ kʼãrẽta yibiata dayirãita, maʉ̃ba jaradiabʉ kʼãrẽta oibarata akʉza sãwũã bʼaibarata. Akʉra Proverbios 7:7-27, mawũã ẽ bʉrʉ akʉra BIDEOTA, mõbe naʉ̃ta panʉidua.
-
¿Kʼãrẽba naʉ̃ kʉ̃rarã nekayirua obisi? (Akʉra Proverbios 7:8, 9).
-
Proverbios 7:23, 26ba jarabʉ kĩrãkʼa, dayi kakua bia zokʼabʉbʉrʉ kayirua oẽ baita bia wãñi, ¿kʼãrẽ bedʼea zromata ũduda ẽ bai kayiruata oẽ bʉrʉ?
-
¿Sãwũã kayirua oẽ baiba kʼarebaseabʉ ewari jõmaʉ̃nẽ sobia bʼaita?
Ʉ̃kʉrʉ ẽbẽrabara jarapanʉ Daizeze Bedʼeabara kãga ũdubi ẽãta, jarabʉ baera yumakẽrãta abari yumakẽrãʉ̃me yi erkʼãĩta akʉza kãga ẽ baera yuwẽrãta abari yuwẽrãʉ̃me yi erkʼãĩta. Mamina Daizeze Jeowara kãgabarabʉ. Iya kãgabʉ ẽbẽrarãta ewari jõmaʉ̃nẽ sobia panamarẽã, maʉ̃ nebia ũduita iya zokʼabʉta odaibara. Akʉra 1 Corintios 6:9-11, mõbe naʉ̃ta panʉidua:
-
¿Daizeze Bedʼeabara jarabʉka yuwẽrã abari yuwẽrãʉ̃me akʉza yumakẽrã abari yumakẽrãʉ̃me ãba erkʼãĩbʉrʉdera maʉ̃ awabʉrʉ nekayiruaka?
Daizezeba dayirã bia akʉmarẽãra nekʼãrẽ awuara oita zarea odaibara, ¿maʉ̃ oira yibia baika? Akʉra Salmo 19:8, 11, mõbe naʉ̃ta panʉidua:
-
Bʉmara, ¿Jeowaba dayirã zokʼabʉra yibiaka? ¿Kʼãrẽa mawũã krĩchabʉ?
Jeowabara ẽbẽrarã mejãchaʉta kʼarebabʉrʉ iya jarabʉta omarẽã, bʉsida abarika mawũã kʼarebaseabʉ.
Ʉ̃KɄRɄBA KRĨCHAPANɄTA: «Kayirua ẽ ẽbẽrata yi kãgapanʉbʉrʉ mia kʼãĩta».
-
¿Kʼãrẽta panʉi?
KĨRÃBEITA
Ãba yi erkʼãĩta Jeowaba oda, maʉ̃ kʼarea iya kãgabʉ yuwẽrãta yumakẽrãʉ̃me yi juwua jidapanʉratrʉ ãba kʼãĩmarẽã.
Panʉnadrʉ
-
¿Kʼãrẽta oita jarakĩrãbʉ dayi kakua bia zokʼa ẽ kayirua oibara?
-
¿Kʼãrẽba kʼarebai dayi kakua bia zokʼaita nekayirua oẽ baita?
-
¿Sãwũã kʼarebabʉ Jeowaba zokʼabʉ ũrĩta?
JɄRɄDA AUDRE KʼAWUAITA
Kʼawuara kʼãrẽa Daizezebara kãgabʉta yuwẽrãta yumakẽrãʉ̃me ãbabʉbʉrʉ juwua jidamarẽã.
«¿Kʼãrẽta jarabʉ Daizeze Bedʼeabara juwua jidai nãã ãba bakĩrãbʉbʉrʉ?» (Artikulo jw.org)
Akʉra kʼãrẽa Daizeze Bedʼeabara yumakẽrã abari yumakẽrãʉ̃me akʉza yuwẽrã abari yuwẽrãʉ̃mebʉbʉrʉ ũdubi ẽãta ãyita jʉrabʉta.
«¿Kayiruaka abari yuwẽrã kãgaira akʉza abari yumakẽrãta?» (Artikulo jw.org)
Kʼawuara sãwũã Daizeze Bedʼeaba kʼarebaseabʉta ẽbẽrarãba idi ewade nekayirua obʉ kĩrãkʼa oẽ baita.
«¿Iba sõita yumakẽrã kakuata akʉza yuwẽrã kakuata, ãba kʼãĩʉ̃mera abarikabʉka?» (Artikulo jw.org)
¿Kʼãrẽba kʼarebasi yumakẽrã abari yumakẽrã kãgachuadara iyi bebʉ awuara bʼaita akʉza Daizezeba kãgabʉ oita? Akʉra nebʉrata «Mʉ̃ra bia edasida».
«Daizeze Bedʼeabara mʉ̃ bebʉra awuarababibʉ» (Jarakabʉ, 1ne abrilde 2011de)
a Maʉ̃bara jarakĩrãbʉ mia erkʼãĩta, iba sõita yumakẽrã kakuata akʉza yuwẽrã kakuata, ãkidare mia oita akʉza wuabemara kakua tãita.
