YI 42
¿Daizeze Bedʼeabara kʼãrẽta jaradiabʉ doba bʼai ʉ̃rʉ akʉza juwa jidai ʉ̃rʉ?
Ʉ̃kʉrʉ drʉadera, krĩchapanʉ dayi sobia bʼaira juwa jida baibarata, mamina yi juwa jidapanʉra ʉ̃kʉrʉra jõmaʉ̃ta sobiapanʉ ẽ akʉza yi dobapanʉra ʉ̃kʉrʉra sobiapanʉ ẽ. Daizeze Bedʼeaba jarabʉ yi mia kʼãĩkĩrãbʉra bia obʉta mamina yi dobabʉrabara audre bia obʉta.
1. ¿Kʼãrẽa yi dobapanʉrabara audre bia obʉ?
Daizeze Bedʼeaba jarabʉ: Yi mia kʼãĩbʉbara bia obʉta, mamina yi dobabʉbara audre bia obʉta (akʉra 1 Corintios 7:32, 33, 38). Yi dobabʉra kʼai ʉ̃rʉ krĩchaita neẽ baera maʉ̃ba ãyira audre ewari erbʉ, ãyara ewari erbʉ Daizeze Bedʼea ʉ̃rʉ drʉa jãpe jaradia wãita, adewara audre ewari erbʉ Jeowa kʼawa bʼaita.
2. ¿Kʼãrẽ nebiata ũduseabʉ nokʼo nãã juwa jidabʉbʉrʉ?
Dobabʉta akʉza juwa jidabʉta nebia ũduseabʉ, Daizeze Bedʼeaba jarabʉ: «Audre biga ũme panaita aba bʉira» (Eclesiastés 4:9). Maʉ̃ra ũdupanʉ jari juwa jidapanʉraba Daizeze Bedʼearadebemara opanʉne. Jari ẽbẽra nokʼo nãã juwa jidabʉ ẽãra perabʉ badu ewaride yi idubʉdaita, mamina jari ẽbẽrarã nokʼo nãã yi juwa jidabʉrʉdera jarabʉ yi kãga ũdubita, wawia ũdubita akʉza kãgade akʉita, maʉ̃ba zarea opanʉ ãba bʼaita, maʉ̃ kʼarea yi wũãwũãrasida perada ẽ yibarira idubʉ zeita.
3. ¿Kʼãrẽta krĩchabʉ Jeowabara juwa jidai ʉ̃rʉra?
Jeowaba nããbema ẽbẽra juwa jidabisidera, jarasi: «Maʉ̃ba yumakẽrãbara idubʉya yi zezera akʉza yi papara, mawũã yi kimaʉ̃me baibaera» (Génesis 2:24). Jeowabara kãgabʉ yi juwa jidapanʉrãra yi kãga panamarẽã akʉza ãba panamarẽã, mamina yi juwa jidapanʉranebema abaʉta ãĩbara yi idubʉseabʉ, maʉ̃ kʼarea Daizezeba iduaribibʉ yi nekayirua oẽ badaba krĩchamarẽã idubʉita mawũã ẽ bʉrʉ idubʉ ẽãta (Mateo 19:9). a Jeowabara kãga kristianoraba kima abapai erbamarẽã, iyara kãga ẽ kima bio erbaira (1 Timoteo 3:2).
AUDRE BIʼIA KʼAWUADADRɄ
Kʼawuara sãwũã Jeowa sobiabiseabʉta akʉza bʉsida sãwũã sobia baseabʉta dobabʉde mawũã ẽ bʉrʉ juwa jidabʉde.
4. Bʉta dobabʉbʉrʉ bia zokʼa kʼawuara bʉ ewarira
Jesubara doba baira akʉbasi nebia zromata (Mateo 19:11, 12). Akʉra Mateo 4:23, mõbe naʉ̃ta panʉidua:
-
¿Jesubara iyi dobabʉra sãwũã bia zokʼasi Jeowa audre diaita akʉza wuabemara kʼarebaita?
Kristianoraba Jesuba oda kĩrãkʼa obʉbʉrʉ sobiapanaseabʉ. Akʉra BIDEOTA, mõbe naʉ̃ta panʉidua:
-
¿Kristianora dobapanʉrabara kʼãrẽta oseabʉ audre bia oita?
¿Kʼawuabasika?
Daizeze Bedʼeabara jarabʉ ẽ kʼare poagaba babʉrʉde juwa jidaseabʉta, mamina jarabʉ dayi warrara kĩrãkʼa krĩchabʉta nãã berabaribibarata, maʉ̃ta oda ẽ bʉrʉ bia jida kʼawua ẽ bayi (1 Corintios 7:36).
5. Bia jida kʼawuara kʼaita bʉ kima bʼaita
Juwa jidai krĩchabʉrʉde bia kʼawuaibara kʼaiʉ̃me juwa jidaita. Akʉra Mateo 19:4-6, 9, mõbe naʉ̃ta panʉidua:
-
¿Kʼãrẽa kristianorabara juwa jidai nãã biʼia krĩchaibara?
Daizeze Bedʼeaba jaradiabʉ kʼãrẽ nebiata erbaibarata yumakẽrãba akʉza yuwẽrãba kima bia bʼaita. Nekʼãrẽ baduira, jʉrʉda wãrĩnu Jeowa kãgabʉta. b Akʉra 1 Corintios 7:39 akʉza 2 Corintios 6:14, mõbe naʉ̃ta panʉidua:
-
Kristiano aba wãrĩnu juwa jidakĩrãbʉbʉrʉ, ¿kʼãrẽa abarika Jeowa odebʉta jʉrʉibara?
-
Bʉta juwa jidara Jeowa odebʉ ẽã ʉ̃me, ¿bʉmara iyira sãwũã bʼaiba?
Nedʉwʉrʉra ũmebʉta abarikabʉ ẽãta ãba bʉedara ãyi ũmena zʉbʉriadayi. Abarikabʉ kristiano ababʉta Daizeze ode bʉ ẽã ʉ̃me juwa jidara, mejãcha zʉbʉriabayi.
6. Juwa jidaira akʉra Jeowaba akʉbʉ kĩrãkʼa
Israel ewaribasidera yumakẽrãrabara yuwẽrãra idubʉpanasi ãyikʉza krĩchapanasi baera. Akʉra Malaquías 2:13, 14, 16, mõbe naʉ̃ta panʉidua:
-
¿Kʼãrẽa Jeowabara jipa kãga ẽ juwa jidapanʉra yi idubʉita badu bedʼea zroma kʼarea?
Ãĩbabʉrʉde akʉza yi idubʉbʉrʉde zʉbʉriabibʉ yi nekayirua oẽ badata akʉza yi wũãwũãrata.
Akʉra BIDEOTA, mõbe naʉ̃ta panʉidua:
-
Bʉta juwa jidabʉbʉrʉ ẽbẽra Jeowa kãgabʉ ẽ ʉ̃me, ¿bʉara kʼãrẽta oseabʉ bʉ juwa jidabʉde sobia bʼaita?
7. Jeowaba juwa jidabʉ ʉ̃rʉ jarabʉta ũrĩbara
Ʉ̃kʉrʉitara zare Jeowaba jarabʉ oudubira mia kʼãĩ ʉ̃rʉ. c Mamina jari ẽbẽrarã zarea opanʉrabara nebiata ũduseabʉ. Akʉra BIDEOTA.
Akʉra Hebreos 13:4, mõbe naʉ̃ta panʉidua:
-
¿Bʉitara Jeowaba jarabʉra juwa jidai ʉ̃rʉ yibiaka? ¿Kʼãrẽa mawũã krĩchabʉ?
Jeowabara kãgabʉ kristianora juwa jidabʉrʉde akʉza yi idubʉbʉrʉde nokʼo nãã (notaria mawũã ẽ bʉrʉ juez nãã) kartata odamarẽã, maʉ̃ta naʉ̃ drʉa jõmaʉ̃nẽ opanʉ baera. Akʉra Tito 3:1, mõbe naʉ̃ta panʉidua:
-
Bʉ juwa jidasidera, ¿wãrĩnu ũdubibʉka nokʼo nãã juwa jidadata?
Ʉ̃KɄRɄBA WIDIPANɄTA: «¿Kʼãrẽa nokʼo nãã juwa jidaibara?».
-
¿Bʉara kʼãrẽta panʉi?
KĨRÃBEITA
Juwa jidaita akʉza doba bʼaita Jeowaba diada, adewara Jeowaba zokʼabʉta obʉbʉrʉ sobia baseabʉ.
Panʉnadrʉ
-
¿Dobapanʉrabara sãwũã bia zokʼaseabʉ ãyi ewarira?
-
¿Kʼãrẽa Daizeze Bedʼeabara jarabʉ kristianorãra juwa jidaibarata Daizeze ode bʉmebʉrʉ?
-
Daizeze Bedʼeaba jarabʉdera, ¿kʼãrẽ berabaribʉrʉde yi idubʉseabʉ?
JɄRɄDA AUDRE KʼAWUAITA
¿Kʼãrẽta jarakĩrãkʉ Daizeze ode bʉmebʉrʉ juwa jidaibara?
Nebʉra ũmebʉ ʉ̃rʉ kʼawuara biʼia jida kʼawuaita juwa jidai ʉ̃rʉ.
Kʼawuara sãwũã mebẽã abaʉba wãrĩnu ĩjãbasita iya nekʼãrẽ amaena kʼarea, Jeowaba nebia zroma diaita iyaʼa.
Kristiano aba ãyi juwa jidadata yi idubʉi nãã, ¿kʼãrẽta krĩchaibara?
«Daizezeba ãba bʼʉdʼara» miõba yi idubʉbi ẽ (Jarakabʉ, diciembre 2018de)
b Ʉ̃kʉrʉ drʉadera yibariraba jʉrʉdiabʉ ãyi wũãwũã kura mawũã ẽ bʉrʉ ãyi wũãwũã awuera kʼaiʉ̃me mia kʼãĩta. Mamina yibarira biarabara akʉbʉ wãrĩnu maʉ̃ ẽbẽraba Jeowa kãgabʉ kʼawuaita. Ãyitara audre yibia Jeowata kãga bʼaita plataira akʉza nekʼãrẽ baduira.
c Bia kʼawuaseabʉ Jeowaba kʼãrẽta kãgabʉta juwa jidai ʉ̃rʉ, bʉta mia kʼãĩbʉde juwa jida ẽã bʉbʉrʉ bʉyikʉzaʉba jidaibara juwa jidaita mawũã ẽ bʉrʉ idubʉita.
