YI 44
¿Ẽbẽrarãba jõma piestara obʉra Daizezebara bia akʉbʉka?
Jeowabara kãgabʉ sobiapanamarẽã, maʉ̃ kʼarea kãgabʉ edaʉde piesta omarẽã. Mamina, ¿Jeowabara ẽbẽrarãba jõma piesta obʉra bia akʉbʉka? ¿Dayirãbara sãwũã ũdubiseabʉ iyi kãgabʉta akʉza iyi sobiabikĩrãbʉta?
1. ¿Kʼãrẽa Jeowabara bia akʉ ẽ ʉ̃kʉrʉ piestarãra?
Ʉ̃kʉrʉ ẽbẽraba nããra piesta opananaba opanasi Jeowaba kãga ẽãta akʉza Daizeze Bedʼeaba jarabʉta opana ẽ basi. Ʉ̃kʉrʉ piestarãra religion zeri ẽãneba zebʉ, eda baseabʉ jaibananeta mawũã ẽ bʉrʉ jaradiapanʉ bʼaibara dayirã beida tẽãra wabida zokʼaibʉta (Isaías 65:11). Maʉ̃ kʼarea Jeowaba jarabʉ iyi kʼaidu panʉra: «Ãĩ wãidua ãyideba akʉza jãpe bʼaidua» (2 Corintios 6:17). a
2. ¿Jeowabara sãwũã akʉbʉ piesta obʉrʉde ẽbẽra ʉ̃rʉ aukʼara ibia bedʼeaita?
Jeowabara jarabʉ naʉ̃ drʉaba obʉ kĩrãkʼa oda ẽ bamarẽã maʉ̃ ẽbẽra yi ẽbẽra awuarabʉrʉ ĩjãpanʉta, maʉ̃ba aña krĩchabibʉ baera (akʉra Jeremías 17:5). Ʉ̃kʉrʉ piestara opanʉ nokʼoita, gorogororaita akʉza dayi drʉa ʉ̃rʉ ibia bedʼeabita (1 Juan 5:21). Nokʼoraba naʉ̃ drʉade ara oyaʼa bʉ ʉ̃rʉ, dayirãba ẽbẽrarãba aña obʉ kʼarea ibia bedʼeapanʉbʉrʉ, ¿bʉmara Jeowara sãwũã krĩchaipe?
3. ¿Jeowabara kʼãrẽ piestata kãga ẽ?
Daizeze Bedʼeabara jarabʉ biga ẽãta «mejãcha itua doita, bʉzridanʉmaita itua doi kʼarea» (1 Pedro 4:3). Ʉ̃kʉrʉ piestadera ẽbẽrarãra ãyi mejãcha itua dobʉba kʼawua ẽ nʉmina kʼãrẽ obʉta, maʉ̃ kʼarea dayirãta Jeowa neũdukʼawua bakĩrãbʉbʉrʉ jĩgara bʼaibara jõma nekʼãrẽ kayiruadeba.
AUDRE BIʼIA KʼAWUADADRɄ
Akʉdaya sãwũã bia jida kʼawuaseabʉta piestaeda wãinaena, mawũã Jeowa sobiabita.
4. Piesta Jeowa ʉ̃rʉ ibia bedʼeabi ẽãne eda wãraidua
Akʉra Efesios 5:10, mõbe naʉ̃ta panʉidua:
-
¿Kʼãrẽ ʉ̃rʉ biʼia kʼawua bʼaibara piestaeda wãinaena?
-
¿Kʼãrẽ piestata opanʉ bʉ bʉmaera?
-
¿Bʉmara Jeowabara maʉ̃ra biʼia akʉbʉka?
Bari jaradaita, ¿bʉara krĩchabarika Daizezebara kʼãrẽta krĩchabʉta dayi toda ewari piesta ʉ̃rʉ oita? Daizeze Bedʼeabara jara ẽ Daizeze ode panʉraba iyi toda ewari piesta ʉ̃rʉ opanʉta, mamina jarabʉ ẽbẽra ũmeba osidata iyi toda ewarita, maʉ̃rãra Daizeze ode pana ẽ basi. Akʉra Génesis 40:20-22 akʉza Mateo 14:6-10, mõbe naʉ̃ta panʉidua:
-
¿Naʉ̃ra ẽbẽrarãba ãyi toda ewari piesta odadera kʼãrẽta berabarisi?
-
Naʉ̃ra testora akʉda tẽã, ¿bʉmara Jeowabara kʼãrẽta krĩchabʉ toda ewari piesta oi ʉ̃rʉra?
Bʉyikʉza widiseabʉ: «¿Wãrĩnu Jeowabara kãgabʉka mʉ̃a toda ewari piesta omarẽã, mawũã ẽ bʉrʉ kãgabʉka wãita piesta Daizeze Bedʼeade jarabʉ ẽ ma?». Akʉra Éxodo 32:1-8. Maʉ̃are akʉra BIDEOTA, mõbe naʉ̃ta panʉidua:
-
¿Kʼãrẽa bia kʼawuaibara Daizezeba kʼãrẽ kãgabʉta?
-
¿Maʉ̃ra sãwũã oseapanʉ?
¿Sãwũã kʼawuaseapanʉ Daizezeba kãgabʉ kʼawuaita piesta opanʉra?
-
¿Maʉ̃ piestara Daizeze Bedʼeaba jarabʉ kĩrãkʼabʉka? Maʉ̃ widibʉ panʉita audre jʉrʉda maʉ̃ piesta ʉ̃rʉ bedʼeabʉta.
-
¿Maʉ̃ piestara ũdubibʉka ẽbẽrarã, banderara akʉza naʉ̃ drʉade trãpanʉraneta (himno nacional) yibiata nekʼãrẽ wuabemaraira? Mamina daibara audre kãgabʉ Jeowata nekʼãrẽ wuabemaraira akʉza audre ĩjãpanʉ Jeowabʉrʉ ara oita naʉ̃ drʉade bedʼea zromabʉra.
-
¿Maʉ̃ piesta opanʉra Daizeze Bedʼeaba jarabʉka jipa oẽ bʼaibarata? Dayirãbara Daizezeba kãgabʉta oibara.
5. Bʉa ĩjãbʉare kʼẽrẽpabʉta ũdubira wuabemaraba wawia ũdubidamarẽã
Edaʉde ẽbẽrarãba jarada ʉ̃rʉ jarabʉ wãmarẽã piesta Jeowaba kãga ẽ ma, mamina dayirãitara zarea baseabʉ wã ẽ jaraita. Bʉa jidada ʉ̃rʉ ibiade jara ũrĩbira akʉza wawiade. Kʼawuaita sãwũã oita, akʉra BIDEOTA.
Akʉra Mateo 7:12, mõbe naʉ̃ta panʉidua:
-
Naʉ̃ testoba jarabʉdera, ¿bʉara jaraibaraka bʉ mebẽrã ʉ̃kʉrʉ piestata oda ẽ bamarẽã?
-
¿Sãwũã kãgabʉta ũdubiseabʉ bʉ mebẽrã ãyibawara ãyi piestadebʉ ẽ mina?
6. Jeowabara kãgabʉ dayirãra sobiapanamarẽã
Jeowabara kãgabʉ dayirãra ewari jʉrʉmarẽã dayirã mebẽrãbawara akʉza neũdukʼawuarabawara ãba sobiapanaita. Akʉra Eclesiastés 8:15, mõbe naʉ̃ta panʉidua:
-
¿Naʉ̃ testoba sãwũã ũdubibʉ Jeowabara kãgabʉta dayirãra sobiapanamarẽã?
Jeowabara kãgabʉ iyi ode panʉrãra ãba sobiapanamarẽã. Akʉra BIDEOTA kʼawuadamarẽã asamblea pʉwʉrʉ biodebemane maʉ̃ra wãrĩnu ũdupanʉta.
Akʉra Gálatas 6:10, mõbe naʉ̃ta panʉidua:
-
¿Oibaraka piesta zromata wuabemara ẽbẽrarã sobiabita?
-
¿Bʉara kʼãrẽa nebiata diakĩrãbʉ: piesta opanʉne nebia diaibara baera, mawũã ẽ bʉrʉ badu ewaride soiduba diakĩrã diaita?
-
Edaʉde Jeowa ʉ̃rʉ Kʼawuabipanʉrãbara piestata opanʉ akʉza nebiata diabʉ ãyi wũãwũãra. Bʉta wũãwũãbarabʉbʉrʉ, ¿kʼãrẽ nebiata okasi?
Ʉ̃KɄRɄBA KRĨCHA PANɄTA: «Kʼaiba sãwũãi piesta samaʉ̃ba zebʉta. Audrera yibia dayirã mebẽrãbawara bia berabarita akʉza neũdukʼawuarabawara».
-
¿Bʉara sãwũã panʉi?
KĨRÃBEITA
Jeowabara kãgabʉ mebẽrãbawara sobia berabaridamarẽã, mamina kãga ẽ piesta iya kãga ẽãne baita.
Panʉnadrʉ
-
¿Dayikʉza kʼãrẽta widiseabʉ Jeowaba kʼãrẽ piesta kãgabʉ kʼawuaita?
-
¿Dayirãbara sãwũã dayirã mebẽrã akʉza neũdukʼawuara jara ũrĩbiseabʉ kʼãrẽa piestabade wã ẽã ʉ̃rʉ?
-
¿Sãwũã kʼawuapanʉ Jeowabara kãgabʉta dayirãra sobia bamarẽã?
JɄRɄDA AUDRE KʼAWUAITA
Akʉra kristianorabara ʉ̃kʉrʉ piestata oda ẽãta.
«¿Kʼãrẽa Jeowa ʉ̃rʉ Kʼawuabipanʉrãbara ʉ̃kʉrʉ piestara oda ẽ?» (Artikulo jw.org)
Nekʼãrẽ kimare akʉdayi Daizezebara kʼãrẽa kãga ẽãta dayirã toda piesta ewari oita.
«¿Kʼãrẽa Jeowa ʉ̃rʉ Kʼawuabipanʉrãbara dayi toda piesta ewarira oda ẽ?» (Artikulo jw.org)
Akʉra sãwũã warraraba Jeowata sobiabiseabʉta piesta ewaride.
Kristianora mejãchaʉba oda ẽ nabida piestara. ¿Ãyira mejãcha sobiabʉka maʉ̃ta oda ẽ baera?
«Nebia audre yibiata ũdusida» (Jarakabʉ, 1ne diciembrede 2012de)
