YI 46
¿Kʼãrẽa Daizezeʼa diaibara dayi bebʉra akʉza buru kʼoeibara?
Ẽbẽra abaʉba iyi bebʉ Jeowa diai nãã, yiwidʼibʉde jarabʉ iyaʼabʉrʉ yiwidʼi bʼaita akʉza iyi bebʉdera audre yibia bʼaita Daizezeba jarabʉrʉta (Salmo 40:8). Buru kʼoebʉrʉde jõmaʉ̃ra ũdubibʉ iyi bebʉra Daizezeʼa diabʉrʉta. Audre yibia bʼaibara dayirãita Daizezeʼa dayirã bebʉ diabʉrʉde, maʉ̃ba dayirã bebʉra bia wãñi. ¿Kʼãrẽba mawũã obi bʉara?
1. ¿Kʼãrẽba kʼarebai dayi bebʉ Daizezeʼa diaita?
Dayirã bebʉta diabʉ Jeowaʼa iyita kãgabʉ baera (1 Juan 4:10, 19). Daizeze Bedʼeaba jarabʉ: «Kãgaibara bʉ Zeze Jeowara bʉ soiduba, bʉ krĩchaiduba bʉ kakua jõmainʉba akʉza bʉ zarea jõmainʉba» (Marcos 12:30). Maʉ̃ kãgara ũdubipanʉ dayirãba jarabʉdeba akʉza obʉdeba. Yumakẽrãta yuwẽrãʉ̃me yi juwa jidapanʉ wãrĩnu yiya kãgapanʉ baera, abarika dayirãba dayi bebʉta Jeowaʼa diabʉ akʉza buru kʼoe zebʉ wãrĩnu iyita kãgapanʉ baera.
2. ¿Jeowabara kʼãrẽ nebiata diabʉ yi buru kʼoemarãra?
Bʉ buru kʼoebʉrʉdera Jeowa pʉwʉrʉde edabida, mama bʉa ũduyi Daizeze kãgata akʉza audre iyi neũdukʼawua bayi (akʉra Malaquías 3:16-18). Adewara Jeowa bʉ Zeze kĩrãkʼa bidade, maʉ̃ awuara erbayi mebẽrã naʉ̃ drʉa jõmanebemata, maʉ̃rabara Daizezera kãgabʉ akʉza bʉsida (akʉra Marcos 10:29, 30). Bʉ buru kʼoei nãã nekʼãrẽ bio oibara. Nãã ũdukʼawuaibara Jeowata, kãgaibara, wãrĩnu ĩjãibara iyi warra ʉ̃rʉ akʉza jaraibara bʉ bebʉ Jeowa diaita. Maʉ̃ta jõma ora buru kʼoeseabʉ, maʉ̃ba ewari jõmaʉ̃nẽ sobia baseabʉ bʉra. Daizeze Bedʼeabara jarabʉ: «Buru kʼoeibara atiara marasida ẽdrʉbibʉ» (1 Pedro 3:21).
AUDRE BIʼIA KʼAWUADADRɄ
Akʉdaya kʼãrẽa yibiata bʉ bebʉ Jeowaʼa diaita akʉza buru kʼoeita.
3. Jõmaʉ̃ba jidaseabʉ kʼaiare bʼaita
Israel ewari baside, ʉ̃kʉrʉ ẽbẽrarãba krĩchapanasi Jeowaʼa yiwidʼibʉba akʉza daizeze zeri ẽã Baal yiwidʼibʉba iyabaʉra yiwidʼibasita. Mamina Jeowabara zokʼasi propeta Elíasta wuabemara ũdubita ãya krĩchabadara aña basita. Akʉra 1 Reyes 18:21, mõbe naʉ̃ta panʉidua:
-
¿Israelitarabara kʼãrẽta osi?
Israelitaraba jidada kĩrãkʼa dayirãbida jidaseabʉ kʼaiare bʼaita. Akʉra Lucas 16:13, mõbe naʉ̃ta panʉidua:
-
¿Kʼãrẽa Jeowaʼa yiwidʼibʉde nekʼãrẽ wuabemara yiwidʼibeda ẽ?
-
¿Kʼãrẽta oseabʉ dayirãbara Jeowa ũdubita iya abaʉʼabʉrʉ yiwidʼipanʉta?
4. Krĩchara Jeowaba kʼãrẽaba kãgabʉta bʉra
Jeowabara nekʼãrẽ biata mejãcha dia zebʉrʉ dayirã. Mamina, ¿dayirãbara kʼãrẽta diaseabʉ iyaʼa? Akʉra BIDEOTA.
¿Jeowaba bʉ kãgabʉ ũdubita kʼãrẽ nebiata diabʉ? Akʉra Salmo 104:14, 15 akʉza 1 Juan 4:9, 10, mõbe naʉ̃ta panʉidua:
-
Jeowaba nebia diabʉdebemara, ¿bʉara saʉ̃ta audre kãgabʉ?
-
Jeowaba nebia diabʉ kʼareara, ¿bʉra sãwũã krĩchabʉ?
Daya nekʼãrẽ bia kãgabʉ diabʉdadera, maʉ̃ʼa ũdubikĩrãbʉ maʉ̃ nebia diada kʼarea biga diakĩrãbʉta. Akʉra Deuteronomio 16:17, mõbe naʉ̃ta panʉidua:
-
Bʉa krĩchabʉrʉde Jeowaba bʉaʼa nekʼãrẽ mejãcha dia zebʉrʉta, ¿bʉara iya nekʼãrẽ dia kĩrãbarika? ¿Bʉara kʼãrẽta diaseabʉ?
5. Bʉ bebʉ Jeowaʼa diabʉrʉde nebiata mejãcha ũduyi
Ẽbẽrarã mejãchaʉba krĩchapanʉ wuabemaraba bia akʉbʉde, trabajo bia ũdubʉrʉde, plata mejãcha erbidade maʉ̃raba sobia bʼaita. Mamina, ¿maʉ̃ra wãrĩnuka? Akʉra BIDEOTA, mõbe naʉ̃ta panʉidua:
-
Yumakẽrã bideode ũdubidara, ¿kʼãrẽa balon jemeneita iduaribisi iya mejãcha kãgabasimina?
-
Iya balon jemene kaude jidasi iyi bebʉ Jeowa diaita, ¿bʉmara iya maʉ̃ jidadara yibia basika? ¿Kʼãrẽa?
Apostol Pablo kristiano bai naena kʼawuasi ẽbẽra ley ʉ̃rʉ bia kʼawuabʉ̃me maʉ̃ba iyira bia wãibasi, mamina iya maʉ̃ nebiara jõma amaesi kristiano bʼaita. ¿Iyara tẽãra ãĩbe oseasika maʉ̃ kʼarea? Akʉra Filipenses 3:8, mõbe naʉ̃ta panʉidua:
-
¿Kʼãrẽa Pablobara jarasi iyi kristiano bʼai naena odara zeri ẽ basita?
-
¿Kʼãrẽ nebiata ũdusi iya amaenaneba?
-
Bʉmara, ¿audre yibia baika bʉ bebʉ Jeowaʼa diaita nekʼãrẽ wuabemara diai kʼaude? ¿Kʼãrẽa mawũã krĩchabʉ?
Pablo kristiano basidera, audre nebiata ũdusi iya aduadaira.
Ʉ̃KɄRɄBA KRĨCHAPANɄTA: «Zeri ẽ dayi Daizeze ode wãira».
-
¿Bʉara krĩchabʉka bʉ bebʉta Jeowa diara audre bia bʼaita? ¿Kʼãrẽa?
KĨRÃBEITA
Dayirãba Jeowa mejãcha kãgabʉba iyaʼa diabʉ dayirã bebʉra akʉza buru kʼoebʉ.
Panʉnadrʉ
-
¿Kʼãrẽa Jeowara soiduba kãgaibara akʉza iyi ode bʼaibara?
-
¿Kʼãrẽ nebiata diabʉ Jeowabara yi buru kʼoedarãra?
-
¿Bʉara kãgaika bʉ bebʉ Jeowaʼa diakĩrãita?
JɄRɄDA AUDRE KʼAWUAITA
Akʉra kʼãrẽa yuwẽrã trãbadaba akʉza yumakẽrã balon juwadebema jemenebadaba ãyi bebʉ Jeowaʼa diasidata.
Warraraba widipanʉta: ¿Kʼãrẽta oi mʉ̃ara mʉ̃ bebʉdera? Nãã obadata krĩchabʉrʉde (6:54)
Audre kʼawuara kʼãrẽa bʉ bebʉra Jeowaʼa diaseabʉta.
«¿Kʼãrẽa jaraibara Jeowaʼa dayi bebʉ diaita?» (Jarakabʉ, 15de enerode 2010de)
Akʉra bideo trãbiba sãwũã sobia biseabʉta ãyi bebʉ Jeowaʼa diabʉrʉde.
Kʼawuara wẽrã aba kʼãrẽba kʼarebasita krĩchaita kʼãrẽta iyitara audre yibiabasita, maʉ̃ bia kʼawuaita akʉra iyi nebʉrata yi trʉ̃ra, «Poaga dããrabayeda widibasi dayirãra kʼãrẽa nama panʉta».
«Daizeze Bedʼeabara mʉ̃ bebʉra awuarababibʉ» (Jarakabʉ, 1ne noviembrede 2012de)
