Bʉa naʉ̃ librodeba mejãcha kʼawua zebʉrʉ Jeowa ʉ̃rʉ. Naʉ̃ librodeba bʉara Daizezera mejãcha kãga wãbaibara, maʉ̃neba bʉ bebʉta diasikĩrã akʉza buru kʼoesikĩrã, wabida maʉ̃ta oẽ bʉbʉrʉ maʉ̃ oita krĩchabʉbaibara, mamina bʉ mawũã buru kʼoeda tẽã Jeowa ʉ̃rʉ audre kʼawua wãbaibara mawũã iyi neũdukʼawua bʼaita atia akʉza ewari jõmaʉ̃nẽ. Akʉra sãwũã oseabʉta

1. ¿Kʼãrẽa zarea odaibara audre Jeowa neũdukʼawua ba wãita?

Soiduba zarea odaibara Jeowa neũdukʼawua bʼaita, ¿kʼãrẽ kʼarea? «Mawũã Daizeze odeba jĩgara wã ẽ baita» (Hebreos 2:1). ¿Kʼãrẽba kʼarebai Jeowaʉ̃me kʼẽrẽpa bʼaita? Jaradia wãbʉde akʉza Daizezeba kãgabʉ audre obʉde (akʉra Filipenses 3:16). Jeowa ode bʼai kĩrãkʼara wuara neẽ (Salmo 84:10).

2. ¿Kʼãrẽta audre owãseabʉ?

Bʉa naʉ̃ libro kʼawua wãta jõdogomina bʉa Daizeze ode bʼaita akʉza iyi ʉ̃rʉ kʼawuaira ʉ̃rabʉrʉ jʉ̃drʉbʉrʉ. Daizeze Bedʼeaba jarabʉ, kristianora aba aba kʼaʉba «krĩcha yiwidʼita erbaibara» (Efesios 4:23, 24). Bʉta Daizeze Bedʼea kʼawuabʉbʉrʉ akʉza ãba yi jʉrebarima wãbʉbʉrʉ audre kʼawuayi Jeowa ʉ̃rʉ akʉza iyi sãwũãbʉ ʉ̃rʉ. Kʼawuara bʉa kʼãrẽta oseabʉta Jeowade kĩrãkʼa oita. Bʉa nãã obadata idʉbʉ wãra Jeowata sobiabiyi.

3. ¿Sãwũã kʼarebai Jeowabara bʉa iyita audre kãga wãmarẽãra?

Daizeze Bedʼeaba jarabʉ kĩrãkʼa, Daizezebara dayirã «biʼia jaradiayi. Iya zarea babiyi akʉza teitea babiyi» (1 Pedro 5:10). Jõmaʉ̃ba erpanʉ krĩcha baebibarita mamina Jeowaba jarabʉ iya kʼarebaita dayirã bae ẽ baita (Salmo 139:23, 24). Jeowaba jarabʉ dayirã diaita zareata akʉza okĩrã omarẽã mawũã iyi ode kʼẽrẽpa bʼaita (akʉra Filipenses 2:13).

 AUDRE BIʼIA KʼAWUADADRɄ

4. Bedʼeabara Jeowaʉ̃me, iyira bʉ neũdukʼawua baera.

Yiwidʼiba akʉza Daizeze Bedʼea kʼawuaiba kʼarebabʉ audre Jeowa neũdukʼawua bʼaita. Maʉ̃ra obʉba, ¿sãwũã kʼarebabʉ bʉra audre Jeowa kʼawa bʼaita?

Akʉra Salmo 62:8, mõbe naʉ̃ta panʉidua:

• Bʉ yiwidʼi audre bia owãba kʼarebayi Jeowa audre kʼawa bʼaita. ¿Sãwũã audre bia oseabʉ maʉ̃ra?

Akʉra Salmo 1:2, mõbe naʉ̃ ʉ̃rʉ bedʼeaidua:

• Bʉa Daizeze Bedʼeata ewariza lebʉbʉrʉ kʼarebayi audre Jeowa kʼawa bʼaita, ¿sãwũã audre bia oseabʉ maʉ̃ra?

Bʉa Daizeze Bedʼea bʉyidobaʉba akʉbʉdera, ¿sãwũã audre bia oseabʉ? Akʉra BIDEOTA, mõbe naʉ̃ta panʉidua.

• Naʉ̃ bideode ũdudabara, ¿kʼãrẽta okĩrãbʉ bʉara?

• ¿Bʉara kʼãrẽta audre kʼawuakĩrãbʉ Daizeze ʉ̃rʉra?

 KĨRÃBEITA

Audre Jeowa neũdukʼawua ba wãra akʉza krĩchara sãwũã Jeowadebema audre owãita. Maʉ̃ta obʉbʉrʉ bʉra ewari jõmaʉ̃nẽ sobiabaseabʉ.

Panʉnadrʉ

• ¿Kʼãrẽa wãrĩnu ĩjãseabʉ Jeowaba kʼarebaita iyi ode kʼẽrẽpa bʼaita?

• ¿Kʼãrẽta oseabʉ audre Jeowa neũdukʼawua ba wãita?

• ¿Sãwũã kʼarebabʉ Jeowadebema okĩrã owaita, audre Jeowa kʼawa bʼaita?