1, 2. ¿Jeowabara sãwũã bamarẽã kãgabʉ mebẽrãra?

JEOWABA oda juwa jidaira. Daizeze Bedʼeabara jarabʉ nããra wẽrã parãnara yumakẽrãma edesi. Maʉ̃ kʼarea Adanra mejãcha sobiasi, iya jarasi: «Naʉ̃ra mʉ bʉwʉrʉ oma akʉza mʉ yara oma» (Génesis 2:22, 23). Maʉ̃ kʼarea Jeowabara kãgabʉ yi juwa jidabʉrãra mejãcha sobia bamarẽã.

² Mamina krĩcha zroma opanʉ, idi ewade juwa jidapanʉrãra sobiadepanʉ ẽ baera. Mamina Daizeze Bedʼeabara ũrãgʼa biata diabʉ kʼarebaita mebẽrã biapanamarẽã akʉza sobiadepanamarẽã (Lucas 11:28).

3, 4. (1) ¿Yumakẽrãbara sãwũã erbaibara yi kimara? (2) ¿Kʼãrẽa yibia yi juwa jidapanʉrata bedʼea abarika zedaira?

³ Daizeze Bedʼeabara jarabʉ yumakẽrãbara kãga erbaibarata akʉza wawia ũdubibarata yi kimara (akʉra Efesios 5:25-29). Adewara yumakẽrãbara yi kimara ewari jõmaʉ̃nẽ ibiade erbaibara, kʼarebaibara, akʉibara, adewara zʉbʉriabi ẽ baibara.

⁴ ¿Kʼãrẽta oibara yumakẽrãbara yi kimaba nemitiata ora? Daizeze Bedʼeaba jarabʉ: «Yumakẽrã kima barabebara kãgabaibara yi kimara akʉza iyiʉ̃me kĩrʉrãra» (Colosenses 3:19). Kĩrãbera mara yumakẽrãsida kayirua obarita. Maʉ̃ba, maraba kayirua odata Daizezeba kĩrãduamarẽãbʉbʉrʉ, kĩrãduaibara mara kimaba kayirua odara (Mateo 6:12, 14, 15).  Yi juwa jidapanʉrata bedʼea abarika zedara ãyi nemitia oda kĩrãduadaita, mawũãra biode sobiapanañi.

5. ¿Kʼãrẽa yumakẽrãbara wawia ũdubibara yi kimaʼa?

⁵ Jeowabara kãgabʉ yumakẽrãba wawia ũdubimarẽã yi kimaʼa. Yumakẽrãbara kʼawuabaibara yi kimaba kʼãrẽta nesidabʉra. Maʉ̃ra mawũã ijaramia ẽ. Iya bia eda ẽ bʉrʉ yi kimata Jeowabara ũri ẽ bayi iyi yiwidʼibʉrʉdera (1 Pedro 3:7). Jeowabara krĩcha ẽ yumakẽrãta audre yi zromata yuwẽrãira. Awuarabʉrʉ Jeowabara jõma daʉcha kãga ẽbẽrarã.

6. ¿Kʼãrẽta jarakĩrãbʉ yumakẽrãta akʉza yuwẽrãta kakua abapai bʉbara?

⁶ Jesuba jarasi, yi juwa jidapanʉra «ya ũme ẽã, awuarabʉrʉ kʼakua abʼabaia» (Mateo 19:6). Maʉ̃ba yi juwa jidapanʉrãra ãĩ babe ẽ mawũã kʼẽrẽpa panʉta ũdubidayi akʉza yi sewada ẽ bayi (Proverbios 5:15-21; Hebreos 13:4). Aba abakaʉba diaibara ãyi ũmeba nesidabʉra, kʼãrẽ wãga ẽã (1 Corintios 7:3-5). Yumakẽrãbara kĩrãbeibara «Mia abaʉba jʉra ẽ iyi kakuara», awuarabʉrʉ «ne diabʉ akʉza kãga erbʉ». Maʉ̃ kʼarea yumakẽrãbara kãgaibara yi kimara akʉza ibiade erbaibara. Yuwẽrãbara kãgabʉ iyi bia edamarẽã akʉza ibiade erbamarẽã (Efesios 5:29).

7. ¿Kʼãrẽa nesidapanʉ yi nãã kʼareba edebarita?

⁷ Mebẽrã jõmaʉ̃ba nesidapanʉ yi nãã kʼareba edebarita, yi buruta, mawũã jõmaʉ̃ba bia odaita. Daizeze Bedʼeabara jarabʉ 1 Corintios 11:3de: «Mʉ̃a kãgabʉ maraba kʼawuadamarẽã Kristora yumakẽrã buruta akʉza yumakẽrãra yuwẽrã buruta, adewara Kristo burura Daizezeta».

8. ¿Sãwũã ũdubiseabʉ yuwẽrãbara wawiabʉta yi kimara?

 ⁸ Jõma yi juwa jidapanʉrasida nemitia obari. Yi kimaba ũrĩra yumakẽrãba jarabʉta akʉza ora, mawũãra bia panañi (1 Pedro 3:1-6). Daizeze Bedʼeaba jarabʉ: «Yuwẽrãbida wawia ũdubibara yi kimara» (Efesios 5:33). Mamina, ¿yumakẽrãta Daizeze odebʉ ẽ bʉrʉ? Mawũãsidu wawia ũdubibara. Daizeze Bedʼeabara jarabʉ: «Yuwẽrã kima barabebara ũrĩbara mara kima bedʼeara, ʉ̃kʉrʉba Daizeze Bedʼea ĩjã ẽ bʉrʉ, marabara ĩjãbiseabʉ mia kʼãrẽ bedʼea jara ẽã, mayi sãwũã bʉdeba ãya bʉta ũdusi baera kʼẽrẽpabʉta akʉza wawia ũdubibʉta» (1 Pedro 3:1, 2). Yuwẽrãba yi kima wawia ũdubibʉba akʉza kʼẽrẽpabʉba kʼarebaseabʉ iyisida Daizeze ode wãita krĩchamarẽã.

9. (1) ¿Kʼãrẽta oibara yuwẽrãbara yi kimaba jarara iyima bʉ ẽãta? (2) ¿Kʼãrẽ ũrãgʼa biata ũdupanʉ Tito 2:4, 5dera?

⁹ ¿Kʼãrẽta oibara yuwẽrãbara yi kimaba jarara iyimabʉ ẽãta? Jaraseabʉ iya krĩchabʉta ibiade. Krĩchara naʉ̃ta, Saraba jarasi bedʼea Abraanmabʉ ẽãta. Maʉ̃  kʼarea Jeowaba jarasi Abraanʼa, ũrĩdua iya jarabʉta (Génesis 21:9-12). Yuwẽrãbara ũrĩbara yi kimaba jarabʉra, Daizeze Bedʼeaba aña omarẽã jara ẽ nara (Hechos 5:29; Efesios 5:24). Adewara yuwẽrã biabara akʉbʉ yi mebẽrãra (akʉra Tito 2:4, 5). Mawũãra bʉ kimaba bʉ wũãwũãba wawia ũdubidayi bʉa mawũã obʉ kʼarea (Proverbios 31:10, 28).

10. ¿Kʼaseabʉ Daizeze Bedʼeabara jĩga yi erpanaita akʉza jipa yi idubʉi ʉ̃rʉra?

¹⁰ Ʉ̃kʉrʉ yi juwa jidadara meserabai yi idubʉpanʉ. Mamina Daizeze Bedʼeaba jarabʉ: «Yuwẽrãbara yi kimara idubʉbe ẽ» akʉza «yumakẽrãbida idubʉbe ẽ yi kimara» (1 Corintios 7:10, 11). Edaʉde yi juwa jidapanʉra ãyi bedʼea zroma kʼarea jĩga yi erpanʉ. * ¿Kõbe kʼãrẽ sãwũãbʉrʉde yi idubʉseapanʉ? Daizeze Bedʼeabara jarabʉ, yi idubʉibarata ãyi ũmenebemata ãĩ babʉrʉde (Mateo 19:9).

11. ¿Kʼãrẽ ʉ̃rʉ audre jaradiaibara wũãwũãrãra?

¹¹ Zezera ewari jʉrʉidua mara wũãwũãrabawara ãba bʼaita, ãya nesidabʉ marabawara bʼaita. Nekʼãrẽ wuabemaira audre yibia maraba jaradiaita Jeowa ʉ̃rʉ mara wũãwũãraʼa (Deuteronomio 6:4-9).

12. ¿Kʼãrẽta oibara yibarirabara yi wũãwũãra kʼarebaita?

¹² Naʉ̃ drʉara Diaru (Ãtomĩa) juwa edrebʉ baera audre ũdu wãna nemitiata. Maʉ̃ba bʉ ẽbẽra dayirã wũãwũã kayirua okĩrãbʉta akʉza wawa okĩrãbʉta. Ʉ̃kʉrʉ yibarirãra maʉ̃ ʉ̃rʉ bedʼeaira perabʉ. Mamina  yibarirabara jaradiaibara yi wũãwũã sãwũã jʉra kʼawua baibarata neida oda ẽ marẽã, maʉ̃ba mara wũãwũãrãra kʼarebaibara (1 Pedro 5:8). *

13. ¿Sãwũã jaradiaibara yibarirabara yi wũãwũãra?

¹³ Yibarirabara yi wũãwũãra jaradiaibara kʼẽrẽpa panamarẽã. Mamina maʉ̃ra, ¿sãwũã jaradiaibara? Wũãwũã daya kẽãibaramina iyi ara oita, mamina mejãcha beai kĩrãkʼa u ẽ baibara (Jeremías 30:11). Maʉ̃ba bʉ kĩrʉnʉmʉne wũãwũã kẽãita krĩcharãra. Mʉ̃a kʼawuaita  bʉara i kayirua jarakĩrãbʉ ẽ kĩrã bʉ wũãwũãra, kuchoba mãrĩbʉ kĩrãkʼa (Proverbios 12:18). Jaradiara bʉ wũãwũãra bʉ bedʼeara ũrĩbarata (Efesios 6:4; Hebreos 12:9-11; akʉra nota 30de).

14, 15. ¿Kʼãrẽa wũãwũãrabara yibarira bedʼeara ũrĩbara?

¹⁴ Jesubara ũrĩbasi yi Zeze bedʼeara edaʉde zarea basimina ũrĩta (Lucas 22:42; Juan 8:28, 29). Jeowabara kãgabʉ wũãwũãrabida ũrĩnamarẽã ãyi zeze bedʼeara (Efesios 6:1-3).

¹⁵ Wũãwũã baera bʉitara zareakĩrãbʉ bʉ yibarira bedʼea ũrĩta. Mamina kĩrãbera, bʉa bʉ yibarira bedʼeata ũribʉbʉrʉ, mejãcha sobiabiyi Jeowata akʉza bʉ yibarirata (Proverbios 1:8; 6:20; 23:22-25). *

16. (1) ¿Kʼãrẽta obʉ Diarubara warraraba nemitia omarẽã? (2) ¿Kʼãrẽa bʉ neũdukʼawuarabara kãgabaibara Jeowara?

¹⁶ Diarubara (Ãtomĩa) sewaseabʉ dayi neũdukʼawuadeba akʉza wuabema warraraneba nemitia omarẽã. Diarubara kʼawuabʉ baera mawũã ora meserabai nemitia oseabʉta. Bari jaraita, krĩchara Dina Jacob kaʉta. Dinabara neũdukʼawua Jeowa kãgabʉ ẽãta erbasi, maʉ̃ba bedʼea zromane baebisi iyita akʉza yi mebẽrãta (Génesis 34:1, 2). Bʉ neũdukʼawuaraba Jeowata kãga ẽ bʉrʉ obiseabʉ naʉ̃ drʉaba obʉta. Mawũã ora bʉra bia wã ẽ bayi, adewara bʉ mebẽrãta akʉza Jeowata sopʉabiyi (Proverbios 17:21, 25). Maʉ̃ kʼarea bʉ neũdukʼawuarabara Jeowata kãgabaibara (1 Corintios 15:33).

17. ¿Kʼãrẽta oibara yibarirabara?

¹⁷ Mebẽrã jõmaʉ̃ba ũrĩpanʉbʉrʉ Daizezeba ũrãgʼa bia diabʉta, bedʼea zroma mejãcha ũdu ẽ bayi. Maʉ̃ba bʉta juwa jidabʉbʉrʉ, kãgara bʉ kimara akʉza ibiade erbara. Wẽrã, bʉta juwa jidabʉbʉrʉ, wawiara bʉ kimara akʉza ora iya jarabʉta, adewara Proverbios 31:10-31 bayeda jarabʉ kĩrãkʼa ora. Bʉta wũãwũã barabʉbʉrʉ Jeowa sãwũã kãgaita jaradiara (Proverbios 22:6). Bʉta zezebʉrʉ biʼia erbara bʉ mebẽrãra bʉta ãyi buru baera (1 Timoteo 3:4, 5; 5:8). Akʉza warrara, ũrĩdua mara yibarira bedʼeara (Colosenses 3:20). Kĩrãbedaibara dayirã mebẽrãra edaʉde nemitia oseabʉta, maʉ̃ba krĩchanʉma ẽ baibara maʉ̃ nemitia odara awuarabʉrʉ kĩrãduaibara. Dayirãba kʼawuasida Daizeze Bedʼeabara kʼarebaseabʉta jõma dayirã mebẽrãra.