1, 2. ¿Kʼãrẽa yibia Daizeze Bedʼeara?

BɄA bʉ neũdukʼawuaba nebia diabʉrʉdera, ¿sãwũã krĩchabʉ? Bʉmabida akʉkĩrãkʉ maʉ̃ nebia diadara. Mejãcha sobiabʉ bʉta kĩrãbesi baera, maʉ̃ kʼarea iyaʼa biga diabʉ.

² Daizezebara dayirã iyi Bedʼeata diasi. Mama eda jarabʉra badumae ũduda ẽ. Mama eda jarabʉ, Daizezebara parãsita bajãta, drʉata, yumakẽrãta akʉza yuwẽrãta. Adewara Daizeze Bedʼeabara ũrãgʼa biata erbʉ, maʉ̃ba kʼarebaseabʉ dayirã bedʼea zroma erpanʉne. Akʉza jarabʉ Daizezebara kãgabʉta naʉ̃ drʉa kĩrãwãreã bamarẽã adewara jarabʉ sãwũã ara oita.

3. ¿Kʼãrẽ ʉ̃rʉ kʼawuai Daizeze Bedʼea akʉbʉrʉdera?

³ Bʉa Daizeze Bedʼea akʉbʉdera, kʼawuayi Daizezeba kãgabʉta iyi neũdukʼawuara bamarẽã. Adewara bʉa audre ũdukʼawua wãne iyi kʼawabayi.

4. ¿Kʼãrẽa Daizeze Bedʼea kĩrãkʼara neẽ?

⁴ Daizeze Bedʼeara tradusibʉda 3.200 bedʼea awuara awuaraka akʉza mejãcha ʉ̃tʉzebipanʉ iyabaʉrata. Ẽbẽra bioʉba erpanʉ Daizeze Bedʼeara ãyi bedʼeade. Semanaza Daizeze Bedʼeara dedekapanʉ millón audre. Maʉ̃ba ũdubibʉ Daizeze Bedʼea kĩrãkʼara neẽãta.

5. Daizeze Bedʼeade bʉchura, ¿kʼai krĩcha?

 ⁵ «Daizezeba jõma bʉbisi iyi bedʼeara» (akʉra 2 Timoteo 3:16). Mamina ʉ̃kʉrʉba krĩchaseapanʉ: «¿Sãwũã Daizeze Bedʼeara iyideta jarai, ẽbẽrarãba bʉsidabʉrʉ?». Daizeze Bedʼeaba panʉbʉ: «Jõma ãya jaradara ẽbẽra krĩchadeba ze ẽ basi. Awuarabʉrʉ Daizeze jauredeba bedʼeasida» (2 Pedro 1:21). ¿Sãwũã bʉbisi? Krĩchara naʉ̃ta: kabildo abaʉba jarayi iyi nezokʼaʼa kartata bʉmarẽã, aramaʉ̃ta iyi nezokʼabara bʉyi maʉ̃ kartara. Mamina, ¿kʼaide maʉ̃ kartara? Kabildode, mawũã yi nezokʼade ẽ. Maʉ̃ kĩrãkʼa Daizeze Bedʼeara iyide, mawũã ẽbẽra krĩcha ẽ. Daizezeba  kʼarebasi iyi krĩcha jõma bʉdamarẽã. Maʉ̃ba dayirãbara ĩjãseapanʉ Daizeze Bedʼeara iyideta (1 Tesalonicenses 2:13; akʉra nota 2ta).

6, 7. ¿Kʼãrẽa Daizeze Bedʼeabara aripe panʉbʉ?

⁶ Daizeze Bedʼea bʉ jʉ̃drʉdadeba akʉza jõma mabʉyeda berabarisi poaga 1.600 audre. Adewara Daizeze Bedʼea bʉdarãra iyabaʉ poagadebema ẽ basi. Ʉ̃kʉrʉrãra estudiapanasi, ʉ̃kʉrʉra estudiakʼabasi. Maʉ̃rãnebemata aba medikobasi. Wuabemara ne umiabasi, beda wuamiabasi, obeja akʉbaribasi, propetabasi, juezbasi, ʉ̃kʉrʉta nokʼobasi. Ãyi jõmaʉ̃ta awuara trajapanasimina, Daizeze Bedʼeara awuara bʉda ẽ basi, jĩrʉneba jõñiena aripe jarabʉ. *

⁷ Nããrabema kapitulobara jarabʉ, naʉ̃ drʉade sãwũã bedʼea zromabara jʉ̃drʉdata. Mamina kapitulo jõbodoare jara ũrĩbibʉ, Daizezeba sãwũã ara oita maʉ̃ bedʼea zromara akʉza naʉ̃ drʉa kĩrãwãreã bʼaita. Daizeze Bedʼeabara jara ũrĩbibʉ dayirã ʉ̃rʉ akʉza aripe berabaribibʉ Daizezeba jaradara.

8. ¿Sãwũã kʼawuapanʉ Daizeze Bedʼeabara wãrĩnu jarabʉta?

⁸ Daizeze Bedʼeara bari bʉda ẽ basi naʉ̃ drʉa ʉ̃rʉ jaradiaita akʉza kolegiode nedʉwʉrʉra ʉ̃rʉ jaradiaita. Mamina aripe bedʼeabʉ maʉ̃ ʉ̃rʉ bedʼeabʉrʉdera. Bari jaraita, libro Levíticobara jara ũrĩbibʉ Daizezeba kʼãrẽ jaradata Israelitara ãyi mejãcha kayada ẽ marẽã.  Mamina maʉ̃ra bʉsida ẽbẽra kayai naweda. Adewara Daizeze Bedʼeabara aripe jarasi, naʉ̃ drʉa ewarade jirabʉ aside (Job 26:7). Ẽbẽra mejãchaʉba aña krĩchapanasi naʉ̃ drʉa ʉ̃rʉ, mamina Daizeze Bedʼeabara yi jaramabasi naʉ̃ drʉara borokoabʉta (Isaías 40:22).

9. ¿Sãwũã kʼawuapanʉ Daizeze Bedʼea bʉdarabara wãrĩnuta jarasidata?

⁹ Daizeze Bedʼea nebʉra ʉ̃rʉ bedʼeabʉrʉdera aripe bedʼeabʉ. Mamina bʉ ẽbẽra libro bʉbarirata, maʉ̃rabara jõma aripe nebʉrada ẽ. Bari jaraita, jõma bʉda ẽ basi ãyi pʉwʉrʉ yõnʉmʉne aduadara. Mamina Daizeze Bedʼea bʉdarabara jõma aripe bʉsida, Israelde berabaridara akʉza ãyi nemitia odasida. Libro Números, mama eda jarabʉ Moiseba bʉsita iyi nemitia zroma odara, maʉ̃ kʼarea Daizezeba kʼẽãsi (Números 20:2-12). Naʉ̃ba ũdubibʉ Daizeze Bedʼeara iyideta akʉza dayirãba wãrĩnu ĩjãseabʉta, yi bʉdarabara aripe bʉsida baera.

10. ¿Kʼãrẽa idibasidu yibia Daizeze ũrãgʼara?

¹⁰ «Daizezeba jõma bʉbisi iyi bedʼeara. Jõma maʉ̃ra biga jaradiaita, kayirua obʉ kʼẽãita akʉza aña obeta jipa oita, kʼẽrẽpa jipa bamarẽã» (2 Timoteo 3:16). Jõma Daizeze Bedʼeade ũrãgʼa ũdupanʉra idibasidu yibia Jeowadeba zebʉ baera. Iya dayirãta parãna baera, maʉ̃ba biʼia kʼawuabʉ dayirã sãwũã krĩchabʉta, adewara sãwũãbʉta. Dayirã audre biʼia kʼawuabʉ, maʉ̃ba sobia bamarẽã kãgabʉ. Jeowabara kʼawuabʉ saʉ̃ta yibiata dayirãita akʉza saʉ̃ta yibia ẽãta.

11, 12. (1) ¿Kʼãrẽ ũrãgʼa biata ũdupanʉ Mateo 5-7dera? (2) ¿Kʼãrẽne kʼarebabʉ Wãrĩnu Daizeze Bedʼearadebemabara?

 ¹¹ Mateo kapitulo 5-7 bayeda ũrãgʼa biata ũdupanʉ. Mama edara jarabʉ dayirã sãwũã sobia bʼaita, sãwũã biapanaita wuabemarabawara, sãwũã yiwidʼibarata akʉza plata sãwũã zokʼa kʼawuaibarata. Jesuba maʉ̃ ũrãgʼa jarada 2.000 poaga bamina, idibasidu maʉ̃ ũrãgʼara yibia dayirãita.

¹² Adewara Wãrĩnu Daizeze Bedʼearadebemabara kʼarebaseabʉ dayirã mebẽrãbawara biapanaita, bia trajaita akʉza wuabemarabawara ibiadepanaita. Wãrĩnu Daizeze Bedʼearadebemabara kʼarebaseabʉ, badu ẽbẽrata, kʼãrẽ bedʼea zroma erbʉ krĩcha ẽã, dayirã samabema krĩcha ẽã (akʉra Isaías 48:17; akʉra nota 3ta).

13. ¿Isaíasbara kʼãrẽta berabarita jarasi Babiloniara?

¹³ Daizeze Bedʼeade ʉ̃rabʉrʉ zei jarabʉra aripe berabarisi. Bari jaraita, propeta Isaíasbara jarasi, pʉwʉrʉ Babiloniara makenanaita, adewara jara ũrĩbisi sãwũã eda wãnaita (Isaías 13:19). Babilonia audura doba pʉrra oʉ̃basi akʉza ãyi eda wãbari puertara yi zromabasi. Adewara Isaíasbara jarasi Babilonia dora errʉita, puerta zromara ewa jirabaita. Adewara jarasi gorogorora zedara yõna ẽã eda wãita. Akʉza Isaíasbara jarasi yi mawũã oi ẽbẽrarã Sirobaita (akʉra Isaías 44:27-45:2; akʉra nota 4ta).

14, 15. ¿Sãwũã aripe berabarisi Isaíasba jaradara?

¹⁴ Isaíasba naʉ̃ bedʼea jarada 200 poaga berabarida tẽã. Gorogorora Babilonia makenaira ibarisi.  ¿Kʼaiba zokʼabasiba maʉ̃ gorogorora Persiadebemara? Siroba. Isaíasba ʉ̃rabʉrʉ zei jaradara jõma aripe berabarinʉmasi.

¹⁵ Babilonia makenai diamasira, ãyira mejãcha bʉzridabarabasi. Krĩchapanasi baera doba audu pʉrra oʉ̃bʉba, semento arare bʉba, mia kʼaiba neida  oda ẽãta. Mamina Siro iyi gorogororabawaraʉba do erraʉbisida, do eda erraʉbʉrʉde gorogororãra do kĩrãʉbarisida. Mamina, ¿sãwũã berabarisi Babilonia sementoba audu pʉrrabadara? Isaíasba jarada kĩrãkʼa puerta zromara ewa jirabasi. Mawũã gorogororãra yõ ẽã eda wãsida.

16. (1) ¿Kʼãrẽta berabarita jarasi Isaíasba Babiloniara? (2) ¿Sãwũã kʼawuapanʉ Isaíasba jaradara aripe berabarisita?

¹⁶ Isaíasbara bʉsi, Babilonianera mia kʼaita ba ẽ baita (Isaías 13:20). ¿Maʉ̃ra aripe berabarisika? Mawũã. Babilonia pʉwʉrʉ Bagdadeba arakʼaitabʉ. Mamina idira maʉ̃ pʉwʉrʉdera mia kʼãrẽsida neẽ. Daizeze Bedʼeaba jarada kĩrãkʼa, Jeowabara Babiloniara jõma imabʉesi (Isaías 14:22, 23). *

17. ¿Kʼãrẽa dayirãbara wãrĩnu ĩjãnaibara Daizezeba jarabʉta?

¹⁷ Daizeze Bedʼeade ʉ̃rabʉrʉ zei jarabʉra jõma  aripe berabari wã. Maʉ̃ kʼarea dayirãbara wãrĩnu ĩjãseabʉ Daizeze Bedʼeaba jarabʉra. Maʉ̃ba Jeowaba naʉ̃ drʉa ẽjũã kĩrãwãreã babiya abʉra wãrĩnu oyi (akʉra Números 23:19). Daizezera sewa nebʉrʉ oka (Tito 1:2). * Maʉ̃ba dayirã ewari jõmaʉ̃nẽ babiyi.

18. ¿Kʼãrẽta jarasi Pablobara Daizeze Bedʼea ʉ̃rʉ?

¹⁸ Bʉa kʼawuabʉrʉ, Daizeze Bedʼea kĩrãkʼara neẽãta. Daizeze Bedʼeara kĩrã awuara bʉchu ẽ akʉza aripe jarabʉ nebʉrabʉrʉdera. Adewara dayirãʼa ũrãgʼa bia diabʉ akʉza ʉ̃ra zei jaradara aripe berabari wã. Apostol Pabloba bʉsi: «Daizeze Bedʼeara zokʼaibʉ akʉza zareabarabʉ» (akʉra Hebreos 4:12).

19, 20. (1) ¿Daizeze Bedʼeabara sãwũã kʼarebaseabʉ bʉra? (2) ¿Sãwũã ũdubiseabʉ kãgabʉta Daizezeba diadara?

¹⁹ Daizeze Bedʼeabara bʉra awuara babiseabʉ. ¿Sãwũã? Daizeze Bedʼeabara kʼarebaseabʉ dayikʉza ũdukʼawuaita, dayi sãwũã krĩchabʉta. Bari jaraita, daya jarabʉ Daizeze kãgabʉta, mamina maʉ̃ wãrĩnu ũdubira, oibara Daizeze Bedʼeaba zokʼabʉta.

²⁰ Daizeze Bedʼeara wãrĩnu iyideba zebʉrʉ. Maʉ̃ba Daizezebara kãgabʉ akʉmarẽã, kʼawuamarẽã, akʉza kãgamarẽã. Maʉ̃ kʼarea iyaʼa biga diaibara. Maʉ̃ba, ¿kʼãrẽta oibara? Daizeze Bedʼeade jarabʉta kʼawua wãibara. Mawũã kʼawuayi kʼãrẽta kãgabʉta Daizezeba dayirãita. Yi 3de kʼawuadayi kʼãrẽ nebiata erbʉta Daizezeba dayirãita.