1. ¿Kʼaiba diasi dayirã bebʉra?

JEOWARA zokʼaibʉa (Jeremías 10:10). Iya parãsi dayirãra akʉza dayirãʼa bebʉ diasi. Daizeze Bedʼeaba jarabʉ Jeowa ʉ̃rʉ: «Bʉabʉrʉ jõma osi baera, bʉdeba zesi baera naʉ̃ drʉade nẽjõmabʉra» (Apocalipsis 4:11). Dayirãra idi zokʼaibʉ Jeowaba parãsi baera, maʉ̃ kʼarea dayirã bebʉra bia erbaibara Daizezeba diada baera (akʉra Salmo 36:9).

2. ¿Kʼãrẽta oibara dayirã biabaira?

² Jeowabara dayirãʼa nekʼãrẽ jõma diabʉ dayirã zokʼaipanamarẽã. Diabʉ yikota akʉza baniata (Hechos 17:28). Jeowabara kãgabʉ dayirã sobiapanamarẽã (Hechos 14:15-17). Maʉ̃ba dayirã bia bakĩrãpanʉbʉrʉ ũrĩbara Daizezeba jarabʉta (Isaías 48:17, 18).

3. ¿Kʼãrẽta osi Jeowabara Kainba Abel beasidera?

³ Daizeze Bedʼeabara jarabʉ Jeowabara ẽbẽrarãra mejãcha kãgabʉta. Yizata akʉdaya, Adan Eba wũãwũãra berabaridata, Kain akʉza Abel ʉ̃rʉ. Kainra mejãcha kĩrʉsi yi mebẽã Abel ʉ̃rʉ, maʉ̃ kʼarea Jeowaba jarasi bʉra mejãcha kĩrʉrãra. Mamina Kainbara ũrĩ ẽ basi iyi bedʼeara. Mejãcha kĩrʉnʉmʉ baera: «Kainbara yi mebẽã orra edape beasi» (Génesis 4:3-8). Kainba Abelta beasi baera Jeowabara wawara jʉretasi  akʉza iya ne udara bia pawãra wã ẽ basi (Génesis 4:9-13). Naʉ̃ba dayirãʼa jaradiabʉ, mejãcha kĩrʉ ẽ baibarata akʉza yãrã jʉra ẽ baibarata, maʉ̃ta mawũã oe bʉrʉ ẽbẽra kayirua baseabʉ, mawũãbʉ ẽbẽrarã ewari jõmaʉ̃nẽ ba ẽ bayi (akʉra 1 Juan 3:15). Dayirãba Jeowa sobiabira jõmaʉ̃ ẽbẽrata abarika kãgaibara (1 Juan 3:11, 12).

4. ¿Kʼãrẽta jaradiabʉ Jeowabara bedʼea diez zokʼadadebara?

⁴ Maʉ̃ tẽã, Jeowaba bedʼea diez zokʼadata Moiseʼa diasi. Maʉ̃nebemaba naʉ̃ta jarabʉ: «Mia beabe ẽ» (Deuteronomio 5:17). Ẽbẽraba awuru ẽbẽrata krĩña beasibʉrʉ maʉ̃sida abarika beibarabasi. Naʉ̃ba jaradiabʉ dayirãʼa Jeowabara mejãcha kãgabʉta ẽbẽrarãra.

5. ¿Sãwũã krĩchabʉ Jeowabara wũãwũã urabʉei ʉ̃rʉra?

⁵ ¿Sãwũã krĩchabʉ Jeowabara wũãwũã urabʉei ʉ̃rʉra? Jeowabara wũãwũã bitedabʉidu mejãcha kãga. Maʉ̃ kʼarea Jeowabara leyta diasi israelitara. Ẽbẽra abaʉba posibʉrʉ yuwẽrã biogobʉta akʉza maʉ̃ wũãwũãta beisibʉrʉ, yi ẽbẽra mawũã odara abarika beibarabasi (akʉra Éxodo 21:22, 23; Salmo 127:3). Naʉ̃ba dayirãʼa jaradiabʉ Jeowabara kãga ẽãta wũãwũã urabʉeira (akʉra nota 28ta).

6, 7. ¿Dayirãbara sãwũã bebʉ kãgabʉta ũdubibʉ Jeowaʼa?

⁶ ¿Dayirãbara sãwũã bebʉ kãgabʉta ũdubibʉ Jeowaʼa? Maʉ̃ba nekʼãrẽ obe ẽ dayi beibiseabʉta akʉza wuabemaranesida. Maʉ̃ba sigarriyo do ẽ baibara, chirua kayirua bʉratʉmabʉta do ẽ baibara akʉza maʉ̃neba zebʉta, maʉ̃ta mawũã dora dayirã beiseabʉ.

⁷ Jeowaba dayirãʼa bebʉ diasi baera, maʉ̃ba iya  kãgabʉde baibara akʉza jʉra kʼawua erbaibara dayirã bebʉra. Maʉ̃ta mawũã oẽ bʉrʉ Jeowabara bia akʉ ẽ bayi (Romanos 6:19; 12:1; 2 Corintios 7:1). Dayirãba wawiada ẽ bʉrʉ dayirã bebʉta kãga aʉda ẽ bayi Jeowara. Dayirãba obada amaei zaremina, bia bakĩrãpanʉbʉrʉ idubʉibara maʉ̃ mitiara, mawũã ora Jeowaba kʼarebayi.

8. ¿Kʼãrẽta oibara dayi bebʉ biʼia akʉita akʉza wuabemaranesida?

⁸ Nãã kʼawuasida dayi bebʉra arigʉ yibiata. Maʉ̃ kʼarea Jeowabara kãgabʉ dayi bebʉ biʼia akʉmarẽã akʉza wuabemaranesida. Maʉ̃ kʼarea karruta, motota edebʉrʉdera jʉra kʼawua edeibara. Akʉza jemene dayi beibiseabʉta jemene ẽ baibara (Salmo 11:5). Adewara dayi desida ara oibara tega wã ẽ marẽã. Jeowabara israelitaraʼa jarasi ãyi de audu biʼia pʉrra omarẽã. ¿Kʼãrẽa mawũã omarẽã jarasi? Jeowaba jarasi: «De obʉrʉdera, de audu biʼia pʉrrara, mawũã bʉta jarada ẽ marẽã dedaʉba uwãkʼãrãpe beibʉrʉdera» (Deuteronomio 22:8).

9. ¿Sãwũã akʉseabʉ nedʉwʉrʉrãra?

⁹ Jeowabara nedʉwʉrʉrasida kãga baera biʼia akʉdamarẽãbʉ, mamina iduaribibʉ beamarẽã kʼoita, maʉ̃ tẽã jʉ̃marẽã akʉza dayi beakĩrãbʉta (Génesis 3:21; 9:3; Éxodo 21:28). Mamina bari beabeda ẽ akʉza ãyirai yõbibeda ẽ sãwũã yõbʉ akʉita (Proverbios 12:10).

10. ¿Sãwũã kʼawuapanʉ wara dayi bebʉta?

¹⁰ Jeowaitara dayi wara jipa yibia maʉ̃ba dayita zokʼai erbʉ baera. Maʉ̃ kʼarea Jeowabara biʼia akʉ ẽ basi  Kainra yi mebẽã Abelta beasi baera (Génesis 4:10). Kue zroma baeda tẽã akʉza Jeowabara kĩrãbebisi wara dayi bebʉta. Jeowabara iduaribisi Noeʼa akʉza yi mebẽrãʼa nedʉwʉrʉ komarẽã, iya jarasi: «Jõma nedʉwʉrʉbʉra koseabʉ. Abarika ne u daya kobaribʉ kĩrãkʼa, mʉ̃a mara jõma diaya» mamina Jeowabara jarasi wara kobe ẽãta (Génesis 1:29; 9:3, 4, nota).

11. ¿Kʼãrẽ bedʼeata jarasi Jeowaba wa ʉ̃rʉra?

¹¹ 800 poaga berabarida tẽã Jeowaba Noeʼa wa ko ẽ marẽã jaradata, maʉ̃ tẽã Jeowaba jarasi iyi pʉwʉrʉʼa: «Israelitaba akʉza drʉa jãpe zedaba ãyi miwã kʼãrãpe beara nedʉwʉrʉta akʉza ibana daya koseabʉta maʉ̃ra jõma wa zarrabibara mõbe maʉ̃ wara anaibara egoroba. Koraidua nedʉwʉrʉ wara» (Levítico 17:13, 14). Jeowabara kãgabasi iyi pʉwʉrʉba wawiadamarẽã wa koira, dayi bebʉ baera. Nedʉwʉrʉ yarara koseabasi mamina yi wara kobe ẽ basi. Nedʉwʉrʉ beabʉrʉdera idu wa zarra bibarabasi.

12. ¿Kristianorabara sãwũã akʉbʉ wara?

¹² Jesu beida tẽã, apostolerata akʉza zõrãrã kongregasion Jerusalenebemata ãba yi jʉresida bedʼeadaita israelitara ley diadapeadata ãyabida mama jarabʉta oseapanʉ kʼawuaita (akʉra Hechos 15:28, 29; 21:25). Jeowaba kʼarebasi ãya biʼia kʼawuadamarẽã wara jipa yibiata iyitara akʉza kristianorabida mawũã akʉdamarẽã. Kristianora nabema siglodebemabara wara koda ẽ baibarabasi akʉza do e baibarabasi. Adewara kobe ẽ basi nedʉwʉrʉ wa jõma zarra ẽ badara. Maʉ̃ koira jipa kayiruabasi nekʼãrẽ parãnaʼa yiwidi kĩrãkʼa akʉza dayi kakua kayirua oita zokʼai kĩrãkʼa.  Mamaʉ̃ba ʉ̃ta kristianorabara kobe ẽ akʉza dobe ẽ wara. Maʉ̃ba Jeowabara kãgabʉ wara wawiadamarẽã.

13. ¿Kʼãrẽa kristianorabara wara kẽgʉde bʉe ẽ baibara?

¹³ ¿Maʉ̃ba jarakĩrãkʉka kristianorabara wara eda kẽgʉde bʉe be ẽãta? Mawũã. Jeowaba jarabʉ dayirãbara kobe ẽãta akʉza dobe ẽãta wara. Krĩchara naʉ̃ta: ¿mediko abaʉba bʉa jarayi itua do ẽ marẽã, bʉara kẽgʉde zʉika maʉ̃ ituara? Mawũã oẽ. Maʉ̃ kĩrãkʼabʉ Daizezeba wa ko ẽ baita jaradara akʉza do ẽ baita, maʉ̃ba wara kẽgʉde bʉe ẽ baibara (akʉra nota 29de).

14, 15. ¿Kʼãrẽa kristianorabara wawiapanʉ wara akʉza kʼãrẽa ũrĩpanʉ Jeowa bedʼeara?

¹⁴ ¿Mediko abaʉba jarara, bʉra beita wata bʉe ẽ bʉrʉ? Mawũãra dayirã aba abakaʉba krĩchaibara Daizezeba wa ʉ̃rʉ jarabʉra dayirãba ũrĩta mawũã ẽ bʉrʉ ũrĩ ẽãta. Kristianorabara kãgapanʉ ãyi bebʉra Daizezeba diada baera akʉza wawiapanʉ. Maʉ̃ kʼarea jʉrʉpanʉ dayi kayabʉde sãwũã bebita mawũã bei ẽ baita, mamina wara kẽgʉde eda bʉeda ẽ.

¹⁵ Nekʼãrẽ jõma opanʉ dayi bia bʼaita. Wara dayi bebʉ baera, maʉ̃ kʼarea wara kẽgʉde eda bʉeda ẽ. Dayirã kristianoraitara audre yibia Daizezeba jarabʉta ũrĩta, mawũã daya wa eda bʉebʉrʉba ewari biobabi ẽ. Jesuba jarasi: «Mʉ kʼarea beu krĩña ẽãrã aduaya, mawũãmina mʉ kʼarea beubʉrʉra ẽdrʉya» (Mateo 16:25, nota). Jeowaba jarabʉta ũrĩpanʉ iyita kãgapanʉ baera. Jeowabara biʼia kʼawuabʉ dayirãba kʼãrẽta nesidabʉta. Mawũẽra Jeowaba akʉbʉ kĩrãkʼa wawiapanʉ bebʉra (Hebreos 11:6).

16. ¿Kʼãrẽa ũrĩpanʉ kristianorabara Daizeze Bedʼeara?

 ¹⁶ Kristianorabara wãrĩnu ũrĩkĩrãpanʉ Jeowaba wa ʉ̃rʉ jarabʉra. Maʉ̃ kʼarea wa doda ẽ akʉza wa kẽgʉde eda bʉeda ẽ medikoba jarabʉrʉde. * Mamina jʉrʉpanʉ sãwũã dayi bebiseabʉta. Daizezeba dayirã parãsi baera akʉza iya diasi baera wara, maʉ̃ba kʼawuapanʉ iya biʼia kʼawuabʉta dayirãita saʉ̃ta audre yibiata. ¿Bʉara maʉ̃ra ĩjãbʉka?

17. ¿Sãwũã zokʼabisi Jeowabara wara Israelitara?

¹⁷ Ley Moiseʼa diadapeadade, Jeowaba jarasi israelitaraʼa: «Ẽbẽra jõmaʉ̃ta waba zokʼaibʉ, mʉ̃a iduaribibʉ wa altarde bʉmarẽã, mara ẽdrʉmarẽã. Maʉ̃ waba zokʼai erbʉ baera», maʉ̃bara jarakĩrãbʉ dayi kayirua odata kĩrãduabibʉta (Levítico 17:11; akʉra nota 17de). Israelitaraba kayirua osidade ãya edebasi nedʉwʉrʉ zaketa Daizeze demaʼa saserdoteba bea kʼãrãpe wa zarrabimarẽã altarde, maʉ̃ mawũã oita Israelitara iduaribibasi Jeowabara.

18. ¿Dayirãbara kʼãrẽ biata ũdusi Jesu beidadeba?

¹⁸ Jesu nama egoro eda zesidera, iyi wata diasi dayirãbari. Maʉ̃ tẽã wuara beada ẽ basi nedʉwʉrʉ zakera, leyba jarada kĩrãkʼa (Mateo 20:28; Hebreos 10:1). Jesuta dayirãbari wa zarradara biode yibiabasi. Maʉ̃ba, Jeowabara Jesudeba dayirã ewari jõmaʉ̃nẽ bʼaita diasi (Juan 3:16; Hebreos 9:11, 12; 1 Pedro 1:18, 19).

19. ¿Kʼãrẽta oibara ẽbẽrarã kʼarebaita ewari jõmaʉ̃nẽ bamarẽã?

 ¹⁹ Jeowaʼa biga diapanʉ bebʉta diasi baera dayirãʼa. Maʉ̃ kʼarea jarapanʉ ẽbẽrarãʼa, ãya Jesuta wãrĩnu ĩjãnara ewari jõmaʉ̃nẽ baseabʉ. Adewara mejãcha kãgapanʉ baera, nekʼãrẽ jõma opanʉ jaradiaita sãwũã ewari jõmaʉ̃nẽ baseabʉta (Ezequiel 3:17-21). Maʉ̃ba Pabloba jarada kĩrãkʼa jaraseapanʉ: «Iabʼa aduara mʉrã bedʼea ne ẽbaya. Mʉãrã idaribi ẽã jõma jarabʉrʉa ũrãgʼa Daizezedʼera» (Hechos 20:26, 27). Dayirãba bebʉta akʉza wata wawia ũdubipanʉ, Jeowa ʉ̃rʉ bedʼeabʉrʉde awuru ẽbẽrarãʼa akʉza kʼãrẽaba yibiata dayi bebʉra.