1. ¿Sama kʼawuaseapanʉ dayirãbara nekʼãrẽ ʉ̃rabʉrʉ zei ʉ̃rʉra?

MARABA naʉ̃ bedʼea akʉbʉrʉde krĩchabadabaibara: «¿Kʼai sõbeda kʼãwũãbida?». Nekayirua ũdupanʉba ẽbẽrarãbara krĩchapanʉ naʉ̃ drʉa jõĩra arakʼaitabata ¿maʉ̃ra wãrĩnuka? Mawũã. ¿Mamina dayirãbara kʼawuaseabʉka kʼãrẽ berabarita ʉ̃ra zeidera? Ẽbẽrarãba jaraʉda ẽ mina, Jeowabara jarabʉ iyi Bedʼeadeba, dayirã kʼãrẽ berabarita akʉza naʉ̃ drʉata (Isaías 46:10; Santiago 4:14).

2, 3. (1) ¿Kʼãrẽta kʼawuakĩrãpanasi Jesu kʼaidubemarabara? (2) ¿Kʼãrẽta jarasi Jesubara?

² Daizeze Bedʼeaba naʉ̃ drʉa jõĩ ʉ̃rʉ jarakĩrãbʉbara, jarakĩrãkʉ ẽ naʉ̃ drʉa jõĩta, awuarabʉrʉ nekʼãrẽ kayirua jõma jõbita. ¿Sãwũã mawũã berabari maʉ̃ra? Jesuba jara ũrĩbisi Daizeze Nokʼoba zokʼaita naʉ̃ drʉara (Lucas 4:43). Jesu kʼaidubemabara kʼawuakĩrãpanasi maʉ̃ Nokʼora sõbede zeita, maʉ̃ kʼarea widisida: «¿Daia jaradua, sõmbedʼepe Daizeze deta mawũã ãrĩnaĩrã, sãwũãĩpe bʉ zeira, sãwũãĩpe ewari nʉmʉta jõĩrã?» (Mateo 24:3). Jesubara jara ẽ basi kʼãrẽ ewaride zeita, mamina jarasi kʼãrẽta berabarita ẽbẽra kayirua naʉ̃ drʉadebʉ jõma jõĩ naweda. Jesuba jaradara idi ewade aripe berabarinʉmʉ (akʉra nota 24de).

³ Naʉ̃ kapitulode kʼawuadaya dayirãra wãrĩnu naʉ̃ drʉa jõbodoarepanʉta. Dayirãba kʼawuakĩrãpanʉbʉrʉ  kʼãrẽa naʉ̃ drʉara jõĩtabidata, nããra biʼia kʼawuadaibara, kʼãrẽ yõ berabaridata ʉ̃tʉ bajãne.

4, 5. (1) ¿Kʼãrẽta berebarisi Jesuba zokʼa jʉ̃drʉda tẽãra? (2) Apocalipsis 12:12de jarabʉdera, ¿kʼãrẽta berabasi nama egorode Diaru ʉ̃tʉba eda jʉretasidera?

⁴ Yi 8de kʼawuasida Jesubara ʉ̃tʉ zokʼa jʉ̃drʉsita poaga 1914de (Daniel 7:13, 14). Apocalipsis librobara jarabʉ, kʼãrẽta sãwũã berabarisita maʉ̃ tẽã: «Yõ jʉ̃drʉsi ʉ̃tʉ bajãne: Miguelta iyi angelerabawara yõsida dama zromaʉ̃me akʉza maʉ̃ damata iyi angelbawara yõsida». Miguelra Jesu akʉza damara Diaru (Ãtõmĩa). * Mawũã Diaruta akʉza iyi kʼaidubema angelerata yõbarabʉde aduasida, mawũã naʉ̃ drʉa eda jʉretasi. Angelera biara mejãcha sobiasida maʉ̃ kʼarea. Mamina, ¿kʼãrẽta sãwũã berabarisiba ẽbẽra nama egorodebʉra? Daizeze Bedʼeabara jarabʉ, ẽbẽrarã mejãcha zʉbʉriaita, Diarura mejãcha kĩrʉnʉmʉ baera. Iya kʼawuabʉ «iyi bei ewarira arakʼaitabata» (Apocalipsis 12:7, 9, 12).

⁵ Diarura mejãcha kĩrʉnʉmʉba maʉ̃ba nemitia onʉmʉ naʉ̃ drʉadera. Akʉza idi ewade audre kĩrʉbʉ Jeowaba aranʉ iyi beai baera. Atia kʼawuadaya Jesuba jaradata naʉ̃ ewari jõbodoare kʼãrẽta berabarinʉmaita.

6, 7. ¿Kʼãrẽaba bei wã yõba akʉza jarrababa?

⁶ Bayi yõta. Jesuba jarasi: «Drua tabʼeta drua awʉrʉta tabʼe bawara zhõnaña, nokʼorãta nokʼorã awʉrʉ bawara zhõnaña» (Mateo 24:7). Poaga 1900 akʉza  2000 bayeda audre beisi ẽbẽrarã yõba, poaga 1.900 bai naweda. Maʉ̃kʉara beidakabasi nawedara. Organizasion naʉ̃ drʉade nekʼãrẽ berabaribʉ akʉbarira, maʉ̃ trʉ̃ra Worldwatch Institute, maʉ̃ba jarabʉ 100 millones audre beisita poaga 1914de yõ jʉ̃drʉdadeba ʉ̃ta. Krĩchara kʼãrẽaba zʉbʉria zebʉrʉta ẽbẽrarã.

⁷ Bayi jarrabata. Jesuba jarasi: «Nʉmeña» «jarrabata» (Mateo 24:7). Jarrabadepanʉ yiko mejãcha ũdupanʉmina. ¿Kʼãrẽa mawũãpanʉ? Neẽ baera platata yiko edaita akʉza sama ne uita. 1.000 millón audrebʉ ẽbẽrarã plata wĩkaʉbabʉta. Organización mundial de la salud yibariba, jarabʉ wũãwũã zakerãra poagaza mejãcha bei wãta jarrababa.

8, 9. (1) ¿Sãwũã aripe berabarinʉmʉ Jesuba jaradara drʉa ure ʉ̃rʉ? (2) ¿Kʼãrẽ kayata ũdupanʉ naʉ̃ drʉdera?

⁸ Bayi drʉa ureta. Jesuba jarasi: «Menajacha nʉmeña ẽjũã ureta» (Lucas 21:11). Poagaza drʉa ure mejãcha berabaribʉ. Poaga 1900deba ʉ̃ta 2 millones ẽbẽrarã drʉa ureba bei zebʉrʉ. Idi ewade  drʉa urera mejãcha berabaribʉ, maʉ̃ba ẽbẽrarã beipanʉ.

⁹ Bayi kayata. Jesuba jarasi, mejãcha bʼaita kayara, naʉ̃ drʉa jõmaʉ̃nẽ ũdudaita kayara maʉ̃ba ẽbẽrarã mejãcha beaita (Lucas 21:11). Idi ewadera bʉ mediko dayi kaya bebibʉta, mamina kaya jõma bebi auda ẽ. Jarapanʉ poagaza mejãchade ẽbẽrarã beibʉta kayaba, tuberculosiba, cóleraba, kʉwamiaba. Adewara medikorabara 30 kaya kayiruata ũdusida, maʉ̃ra nebemara kʼaiba bebi auda ẽ.

10. ¿Sãwũã aripe berabaribʉ 2 Timoteo 3:1-5 bayeda jarabʉra?

¹⁰ Daizeze Bedʼeade jarabʉ 2 Timoteo 3:1-5de: «Kʼawuaidua naʉ̃ta, ewari jõbodoarera ũdu wãnañi bedʼea zroma daya obe ẽãta». Pablobara jarasi naʉ̃ drʉa jõbodoarera ẽbẽrarã kʼãwũã bʼaita:

• Ẽbẽrarãbara ãyikʉza audre krĩchadayi.

• Plata audre jʉrʉita kãgadayi.

• Adewara yibarira bedʼea ũrĩna ẽ bayi.

•   Kʼẽrẽpa bada ẽ bayi.

• Kãga ũdubida ẽ bayi yi mebẽrãra.

• Dayikʉza yi ara obi ẽ bayi.

• Ẽbẽra kayiruabayi akʉza yõmiabayi.

• Bayi ãya okĩrã obʼaita, Daizeze kãgaikaʉde.

• Daizeze ĩjãbʉ abʉde aripe oda ẽ bayi.

11. Salmo 92:7dera, ¿kʼãrẽta berabarita jarabʉ ẽbẽra kayiruara?

¹¹ ¿Bʉmaera, mawũãbʉ ẽbẽrarã bʉka? Ẽbẽra kayiruara naʉ̃ drʉa jõmaʉ̃nẽbʉ, mamina aranʉ Daizezeba jõma makenañi. Iya jarabʉ: «Ẽbẽra kayiruara mejãcha pãwãrabʉ chirua kĩrãkʼa akʉza ẽbẽra kayiruara pononʉmʉ, maʉ̃ra jõma makiniñi wuara neẽbayi». Naʉ̃bara jarabʉ ẽbẽra kayiruara wuara neẽbaita naʉ̃ drʉadera (Salmo 92:7).

12, 13. ¿Kʼãrẽta jaradiabʉ Jeowabara naʉ̃ ewari jõbodoarera?

¹² Daizeze Bedʼeabara jarasi ewari jõbodoarera zʉbʉria  mejãcha bʼaita akʉza pʉata naʉ̃ drʉa jõmaʉ̃nẽ. Mamina jarasi nekʼãrẽ bia ũduita.

¹³ Audre biʼia ũrĩnañi Daizeze Bedʼeara. Propeta Danielba jarasi naʉ̃ ewari jõbodoarera: «Ẽbẽra mejãchaʉba jaradayi wãrĩnuta akʉza maʉ̃ra mejãcha eaba wãñi» (Daniel 12:4). Naʉ̃bara jarabʉ Jeowaba kʼarebaita iyi pʉwʉrʉra Daizeze Bedʼeaba jarabʉra audre biʼia ũrĩnamarẽã. Maʉ̃ra aripe berabarisi poaga 1914de. Daizezebara jaradiabʉ iyi trʉ̃ra kʼãrẽa yibiata akʉza kʼãrẽta kãgabʉta naʉ̃ drʉaita. Adewara jaradiasi dayirã sãwũã ẽdrʉbita akʉza dayi beida ʉ̃rʉ, adewara beidara jẽda babita. Akʉza kʼawuasida Daizeze Nokʼobʉrʉ jõma ara oita bedʼea zroma naʉ̃ drʉadebʉra. Adewara kʼawuasida dayirã sãwũã sobia baseabʉta akʉza bʼaita Daizezeba kãgabʉde. ¿Kʼãrẽta opanʉ Daizeze odepanʉrabara ãya kʼawuabʉ ʉ̃rʉra? Bʉa audre kʼawuakĩrãbʉbʉrʉ kʼãrẽ ʉ̃rabʉrʉ berabarita (akʉra nota 21ne akʉza 25de).

14. ¿Kʼãrẽaba jaradiapanʉ Daizeze Bedʼeara naʉ̃ drʉadera akʉza kʼairaba jaradiapanʉ?

¹⁴ Naʉ̃ drʉa jõmaʉ̃nẽ jaradiadayi. Jesuba jarasi naʉ̃ ewari jõbodoarera: «Bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ» (Mateo 24:3, 14). Daizeze Bedʼeara 230 pʉwʉrʉmae jaradiapanʉ akʉza bedʼea awuara awuaraka 700 audre. Jeowa ʉ̃rʉ Kʼawuabipanʉrãba jaradiapanʉ naʉ̃ drʉa jõmaʉ̃nẽbema, ẽbẽraʼa ãya kʼarebapanʉ Daizeze Nokʼo ʉ̃rʉ biʼia ũrĩnamarẽã akʉza maʉ̃ba kʼãrẽ nebia weita (Apocalipsis 7:9). Jeowa ʉ̃rʉ Kʼawuabipanʉrãbara bari jaradiapanʉ Daizeze bedʼeara, mia platasida widida ẽ maʉ̃ jaradiaita. Mamina Jesuba jarada kĩrãkʼa, ẽbẽra  mejãchaʉba kãga ẽ akʉza maʉ̃ daʉcha jʉrade. Mamina mia kʼaiba taʉbi ẽ bayi Daizeze bedʼea jaradia wãira (Lucas 21:17).

15. (1) ¿Bʉa krĩchabʉka naʉ̃ ewari jõbodoarepanʉta? (2) ¿Kʼãrẽba sãwũã berabari ẽbẽra Daizeze bedʼea ũrĩbʉta akʉza ũrĩ ẽãta?

¹⁵ ¿Bʉa krĩchabʉka naʉ̃ ewari jõbodoarepanʉta? Aripe berabarimʉnʉ Daizeze Bedʼeaba naʉ̃ ewari jõbodoare nekʼãrẽ berabariya adara. Aranʉbai Jeowabara wuara jaradiabi ẽ bayi iyi bedʼeara, «mobebʉrʉ naʉ̃ ewari jõĩta zeya» (Mateo 24:14). ¿Maʉ̃ra sãwũã mawũã berabari? Daizeze yõ ewaride, jõma jõbiyi ẽbẽrarã kayiruara. Maʉ̃ra jõma makenañi Jesudeba akʉza iyi angelerabawaraʉba, ẽbẽra Jeowa bedʼea ũrĩ ẽãta akʉza yi Warra bedʼea ũrĩ ẽãta (2 Tesalonicenses 1:6-9). Daizeze yõ ewari berabaribʉrʉdera, Diaruta akʉza angelera kayiruabawaraʉba wuara ẽbẽrarã sewada ẽ bayi. Mamina ẽbẽra Daizezeba jarabʉ ũrĩpanʉrãra akʉza iyiʉ̃me kʼẽrẽpa panʉrabara ũdudayi sãwũã Daizezeba jaradata aripe berabaribʉta (Apocalipsis 20:1-3; 21:3-5).

16. ¿Bʉara kʼãrẽta oibara naʉ̃ ewari jõĩta arakʼaitabata kʼawuabʉrʉdera?

¹⁶ Diaruba naʉ̃ drʉa zokʼabʉ jõĩra arakʼaitaba. Maʉ̃ kʼarea biga maʉ̃ ʉ̃rʉ biʼia krĩchaita. Jeowabara kãgabʉ Daizeze Bedʼeade jõma jarabʉta kʼawuamarẽã akʉza maʉ̃ba kʼẽrẽpa akʉra Daizeze Bedʼeara (Juan 17:3). Adewara Jeowa ʉ̃rʉ Kʼawuabipanʉrãra semanaza ãba yi jʉrepanʉ. Mama kʼarebapanʉ ẽbẽrarã Daizeze Bedʼeaba jarabʉta audre ũrĩta. Zarea obara ãba yi jʉrebarima wãita (akʉra Hebreos 10:24, 25). Bʉa kʼawuara  bʉ kʼãrẽne waebʉta krĩchara ara oita. Bʉa mawũã ora Daizeze neũdukʼawuarabayi (Santiago 4:8).

17. ¿Sãwũã zei Daizeze ewarira?

¹⁷ Pablobara jarasi ẽbẽra kayirua makenai ewarira zeita «nezrʉgamia diamasi zebari kĩrãkʼa», mia kʼaiba kʼawua ẽãne (1 Tesalonicenses 5:2). Jesubara jarasi naʉ̃ ewari jõbodoarera ẽbẽra mejãchaʉba ĩjãna ẽ baita naʉ̃ drʉade kʼãwũã berabarinʉmʉra, Jesuba jarasi: «Noé ewade berabʼaridʼa kĩrãkʼa berabʼariya mʉ Beubari Bape bʼadʼata zebʉrʉdʼera. Jari ewadera do birui nawedʼara nekʼokua, kʼãrẽ dokua, miã kʼãĩkua bʼeasia Noé jãba zromane edʼa jʉ̃drʉdʼa ewariedʼabai. Adu-a bʼedʼe do birupe jõma jogʼakuasia. Mawũã bʼeaya mʉ Beubari Bape bʼadʼata zebʉrʉdʼebidʼa» (Mateo 24:37-39).

18. ¿Kʼãrẽta jarasi Jesubara?

¹⁸ Jesuba naʉ̃ta jarasi, mejãcha nekoraidua akʉza itua mejãcha doraidua akʉza naʉ̃ drʉadebemata krĩcharaidua. Maʉ̃ta odara aña oseabʉa. Adewara Jesubara jarasi, naʉ̃ drʉa jõĩ ewarira zeita daya kʼawua ẽãne, maʉ̃ra zeita ẽbẽrarã jõmaita. Akʉza jarasi: «Mawũã kĩrãkita panaidua, badu ʉ̃madaʉde yiwidʼi beaidua, mawũã ẽdrʉdaita panaidua nebio mejãcha bʉsadewadera. Mawũãra kʼãrẽã peradai neẽãbaya mʉ̃ Yumakẽrã Warra kĩrãbitara» (Lucas 21:34-36). ¿Kʼãrẽa dayirãbara biʼia krĩchaibara Jesuba jarada ʉ̃rʉ? Aranʉ Diaruta akʉza iya jõma zokʼabʉta jõĩ baera. Mamina ẽbẽra Jeowa bedʼea ũrĩbʉra akʉza iyi warra Jesu bedʼea ũrĩbʉra, ewari jõmaʉ̃nẽbayi drʉa bia zebʉrʉdera (Juan 3:16; 2 Pedro 3:13).