1, 2. ¿Idi ewadera sama ũdudai dayirã kʼarebara?

KRĨCHARA bʉ ode teide ewari kayiruadogota, maʉ̃ daʉcha bajʉrʉrʉanʉmaedata, maʉ̃ audre ẽãne mejãcha kue zroma deguewa. Maʉ̃ba bʉra wũẽbayi sama mĩrũita jʉrʉi baera. Sama mĩrũita ũdusi baera bʉra mejãcha sobiayi.

² Idi ewade maʉ̃ kĩrãkʼapanʉ dayirãta. Naʉ̃ drʉara ewariza wuabʉrʉ mitia wã. Maʉ̃ kʼarea bʉa krĩchabaribaibara: «¿Sama ũdudai dayirã kʼarebara?». Salmistaba bʉsi: «Mʉ̃a Jeowaʼa jarayi: Bʉtrʉ mʉ̃ kʼareba akʉza mʉ̃ʼa zarea diabari, bʉtrʉ mʉ̃ Zeze, mʉ̃ara bʉtrʉ wãrĩnu ĩjãbʉ» (Salmo 91:2). Jeowabara kʼarebaseabʉ idibasidu dayirãra, adewara dayirãʼa nebiata diakĩrãbʉ ʉ̃ra zeidebʉrʉ.

3. ¿Kʼãrẽta oibara Jeowaba kʼarebamarẽãra?

³ ¿Jeowabara sãwũã kʼarebabʉ dayirãra? Jeowabara kʼarebayi dayirã bedʼea zroma erbʉde zareapanamarẽã. Akʉza iyira mejãcha zareabarabʉ, maʉ̃ba kʼarebayi ẽbẽra kayiruaba neida oita krĩchabʉrʉdera. Atia dayi zʉbʉria berabaribʉrʉbʉsida Jeowaba dayirã jẽda babiseabʉ. Daizeze Bedʼeaba jarabʉ: «Daizeze kãgade panaidua» (Judas 21). Jeowaba dayirã kʼarebamarẽãra, dayirãra iyi neũdukʼawuarabaibara. Mamina maʉ̃ ũduira, ¿kʼãrẽta oibara?

4, 5. ¿Sãwũã ũdubibʉ Jeowaba dayirã kãgabʉta?

⁴ Jeowa neũdukʼawua bawãira kʼawuadaibara, iyara dayirãra mejãcha kãgabʉta. Krĩchara nekʼãrẽ mejãcha obʉrʉta dayirã kʼarea. Iya dayirã diasi baera naʉ̃ drʉata, mama edabʉ ne uta, nedʉwʉrʉ zakerata, maʉ̃ awuara diabʉ yikota akʉza baniata. Adewara Jeowabara jaradiabʉ iyi Bedʼeadeba kʼaita iyi trʉ̃ra akʉza iya kʼãrẽ kãga erbʉta. Mamina iya mejãcha kãgata ũdubisi yi warra Jesu zokʼaside dayirãbari beita (Juan 3:16). Maʉ̃neba dayirãbara nebia ũduyi nekʼãrẽ ʉ̃rabʉrʉ zeide.

⁵ Jeowabara Jesuta Nokʼo babisi ʉ̃tʉra. Naʉ̃ Nokʼobara jõbiyi zʉbʉriara akʉza nʉmʉñi naʉ̃ drʉadera ẽjũã kĩrãwãreãta, mamarapanañi sobiade akʉza bedʼea zroma neẽã (Salmo 37:29). Jeowabara ũdubibʉrʉ dayirãra wãrĩnu kãgabʉta, iya jaradiabʉde dayirã sãwũã bʼaibarata. Adewara kãgabʉ iyaʼa yiwidʼimarẽã, iya ũrĩbʉ baera dayirã yiwidʼibʉra. Maʉ̃ba ũdubibʉ Jeowabara dayirãra wãrĩnu kãgabʉta.

6. ¿Bʉara sãwũã ũdubibʉ Jeowa biga diabʉta iya kãga ũbʉbibʉ kʼarea?

⁶ ¿Bʉara sãwũã ũdubibʉ Jeowa biga diabʉta iya kãga ũdubibʉ kʼarea? Biga diaibara iyaʼa nekʼãrẽ bia obʉ kʼarea. Mamina naʉ̃ drʉara ẽbẽra kayiruaba birasi baera biga diada ẽ, idi ewadera nekʼãrẽ bia obʉda kʼarea akʉza abarika mawũã berabaribasi Jesu ewaridebida, iya ẽbẽrarã diez yagaba idabʉta bebisi mamina maʉ̃ra nebemaba abaʉbʉrʉ biga diasi (Lucas 17:12-17). Dayirãbida yumakẽrã abaʉba biga diada kĩrãkʼa biga diadaibara Jeowaba nebia obʉ kʼarea.

7. ¿Sãwũã kãga daibara Jeowara?

 ⁷ Wãrĩnu Jeowa kãgabʉta ũdubidaibara. Jesuba jarasi iyi kʼaidubemara Jeowara kãgaibarata soiduba, dayi kakuaiduba akʉza dayi krĩchaiduba (akʉra Mateo 22:37). ¿Maʉ̃bara kʼãrẽta jarakĩrãbʉ?

8, 9. ¿Sãwũã ũdubipanʉ iyi kãgabʉta?

⁸ ¿Bigabaika bari Jeowa kãgabʉa jaraira? Mawũã ẽ. Jeowata kãgapanʉbʉrʉ soiduba, kakuaiduba akʉza krĩchaiduba, maʉ̃ra ũdubidayi daya obʉdeba (Mateo 7:16-20). Daizeze Bedʼeaba jarabʉ Daizezeta wãrĩnu kãgapanʉbʉrʉ iya zokʼabʉta ũrĩnañi. ¿Maʉ̃ oira zareaka? Mawũã ẽ, Jeowaba jarabʉra zare ẽ baera, daya ũrĩta (akʉra 1 Juan 5:3).

⁹ Dayirãba Jeowa bedʼeata ũrĩpanʉbʉrʉ arigʉ sobia panañi akʉza bia panañi (Isaías 48:17, 18). Mamina, ¿kʼãrẽba kʼarebai iyi neũdukʼawuabaira? Atia kʼawuadaya.

10. ¿Kʼãrẽa bʉara audre kʼawua wãibara Jeowa ʉ̃rʉ?

¹⁰ ¿Sãwũã Jeowa neũdukʼawuabasi bʉra? Daizeze Bedʼea akʉ wãne audre ũdukʼawuasi Jeowa ʉ̃rʉ akʉza mawũã iyi neũdukʼawuabasi. Daya neũdukʼawua erbaira tʉbʉ kĩrãkʼa pʉrea erbaibara kibi ẽã, maʉ̃bara jarakĩrãbʉ bʉara audre kʼawua wãibarata Jeowa ʉ̃rʉ, iyiʉ̃me audre neũdukʼawuabaita (Proverbios 2:1-5).

11. ¿Kʼãrẽne kʼarebabʉ bʉra Daizeze Bedʼeabara?

¹¹ Daizeze Bedʼea kʼawua wãne, bʉa kʼawuayi nekʼãrẽ bʉ soidu jũẽbibʉta. Krĩchara Jesu kʼaidubema ũme sãwũã krĩchasidata, Jesuba jara ũrĩbiside propesiade jarabʉta. Ãya jarasida: «¿Kʼãwũẽ dazhira sobiasidʼa  ẽka odʼe jarakʼa tebasidʼera Daizeze bedʼea zhi bʼʉmata?» (Lucas 24:32).

12, 13. (1) ¿Kʼãrẽta jõ ẽ marẽã kãgabʉ bʉara? (2) ¿Kʼãrẽta oibara Jeowa audre kãgabaita?

¹² Jesuba iyi kʼaidubemara jaradiadara ãyi soidu jũẽsi. Bʉsida mejãcha sobiasibaibara, bʉa Daizeze Bedʼeade eda jarabʉta biʼia ũrĩsidera, maʉ̃ba kʼarebasi Jeowa ũdukʼawuabaita akʉza kãgaita. Mʉ̃a kʼawuaita bʉara maʉ̃ kãgara jõ ẽ marẽã kãgabʉ (Mateo 24:12).

¹³ Bʉra atiara Jeowa neũdukʼawua baera, zarea oibara maʉ̃ aduabi ẽ baita. Maʉ̃ kʼarea bʉa ewariza kʼawuaibara Jeowa ʉ̃rʉ akʉza Jesu ʉ̃rʉ. Adewara biʼia krĩchaibara bʉa kʼawua wã ʉ̃rʉ akʉza mama jarabʉta oita (Juan 17:3). Daizeze Bedʼea akʉbʉrʉde, krĩchara naʉ̃ta: «¿Naʉ̃ba mʉ̃a kʼãrẽta jaradiabʉ Jeowa ʉ̃rʉ? ¿Kʼãrẽa  kãgaibara Daizezera soiduba akʉza bʉ kakua jõmainʉba?» (1 Timoteo 4:15).

14. ¿Kʼãrẽne kʼarebabʉ Jeowa yiwidʼibʉbara?

¹⁴ Bʉa neũdukʼawua biata erbʉbʉrʉ, bʉra iyiʉ̃me audre ẽãne bedʼeabʉbaibara. Maʉ̃ba marara audre yi ũdukʼawuadayi. Maʉ̃ kĩrãkʼabʉ Jeowaʉ̃me yi neũdukʼawuabaita, iyaʼa audre ẽãne yiwidʼibaibara (akʉra 1 Tesalonicenses 5:17). Daizezebara iduaribibʉ kʼãrẽ iya yiwidʼidamarẽã. Maʉ̃ kʼarea audre ẽãne iyaʼa yiwidʼibaibara soiduba (Salmo 62:8). Dayirã yiwidʼibʉrʉdera iyabaʉ bedʼeata jaranʉmabe ẽ akʉza dayi krĩchade kʼawuadata, awuarabʉrʉ dayi soiduba widibara daya nesidabʉta. Dayirãba Daizeze Bedʼeade jarabʉta kʼawuapanʉbʉrʉ akʉza soiduba yiwidʼipanʉbʉrʉ, Jeowa kãgabʉta idubʉda ẽ bayi.

15, 16. ¿Sãwũã krĩchabʉ bʉara Daizeze bedʼea jaradiai ʉ̃rʉra?

¹⁵ Dayirã Jeowa neũdukʼawuabaira, jaradiaibara awuru ẽbẽrarã daya ĩjãbʉ ʉ̃rʉ. Dayirãba mawũã jaradiabʉbʉrʉ jipade yibiabayi (Lucas 1:74). Adewara Jesubara zokʼasi kristiano wãrĩnuaraba mawũã jaradia wãmarẽã. Mawũẽra dayirã jõmaʉ̃ba jaradiaseabʉ Daizeze Nokʼo ʉ̃rʉra. ¿Bʉara jaradiabʉka? (Mateo 24:14; 28:19, 20).

¹⁶ Apostol Pablobara mejãcha kãgabasi Daizeze bedʼea jaradia wãira, maʉ̃ kʼarea jarasi «bedʼea bia» (2 Corintios 4:7). Bʉa Jeowaba krĩchabʉta awurua jaradiaira mejãchade biga akʉza Daizeze bedʼea jaradia wãisida, bʉa mawũã obʉra, Jeowabara kĩrãdua ẽ (Hebreos 6:10). Daizeze bedʼea jaradiabʉba kʼarebabʉ wuabema ẽbẽrata Daizeze neũdukʼawua bamarẽã akʉza bʉsida kʼarebabʉ iyi audre ũdukʼawua wãita. Daizeze bedʼea jaradiabʉba,  kʼarebabʉ bʉ ewari jõmaʉ̃nẽ bʼaita adewara yi ũrĩpanʉrasida (akʉra 1 Corintios 15:58). ¿Bʉka Daizeze bedʼea jaradiabʉ awuara dayi sobia bʼaita?

17. ¿Kʼãrẽa meserabai jaradia wãibara Daizeze bedʼeara?

¹⁷ Meserabai jaradiadaibara Daizeze bedʼeara. Daizeze Bedʼeaba jarabʉ: «Daizeze Bedʼea jaradiabara, maʉ̃ta meserabai jaradiara» (2 Timoteo 4:2). Ẽbẽrarã ũrĩbigadaibara Daizeze Nokʼoba bedʼea bia erbʉta. Akʉza Daizeze Bedʼeaba jarabʉ, «Jeowa ewari zromara arakʼaitaba» maʉ̃ra «meserabai urua». Aranʉ zeyi (Sofonías 1:14; Habacuc 2:3). Aranʉ Jeowabara jõma jõbiyi Diaruba zokʼabʉra (Ãtomĩa). Maʉ̃ ewari zei nãã, ẽbẽrarã jaraibara Jeowa ode bʼaita mawũã ẽ bʉrʉ ba ẽãta.

18. ¿Kʼãrẽa ãba yi jʉredaibara kristianora wãrĩnuarãra?

¹⁸ Jeowabara kãgabʉ Jesu bedʼea wãrĩnu opanʉra ãba yi jʉredamarẽã, iya kãgabʉ oita. Daizeze Bedʼeaba jarabʉ: «Krĩchaidua mayirai kʼarebaita akʉza kãgaita, adewara nebia oita. Idubʉraidua ãba yi jʉrepanʉta ʉ̃kʉrʉba obʉ kĩrãkʼa. Awuarabʉrʉ mayirai zarea diaidua audre ĩjãita, kʼawuapanʉ baera Daizeze ewarira zeita arakʼaitaba baera» (Hebreos 10:24, 25). Zarea odaibara ãba yi jʉrebarima wãnaita. Mama dayirãinʉ yiya kʼarebadayi akʉza zareadiadayi.

19. ¿Kʼãrẽba kʼarebai mebẽrã kãgaita?

¹⁹ Ãba yi jʉrebarimaera bʉara ũduyi neũdukʼawuara biarata. Maʉ̃rabara kʼarebadayi bʉra Jeowaba zokʼabʉde bʼaita. Mama ũdukʼawuayi mebẽrã kĩrã awuara awuarakabʉta, maʉ̃rasida bʉ kĩrãkʼa zarea opanʉ Jeowaba zokʼabʉde baita. Mamina bʉ kĩrãkʼa maʉ̃rasida nemitia obari, maʉ̃ mawũã berabaribʉrʉdera kĩrãduara maʉ̃ nemitiara (akʉra Colosenses 3:13). Akʉra  mebẽrãba kʼãrẽ nebia obʉta. Mawũã obʉba kʼarebayi ãyi kãgaita akʉza Jeowa audre kãga bʼaita.

20, 21. ¿Kʼãrẽta ũdudai dayirã ewari jõmaʉ̃nẽ bidadera?

²⁰ Jeowabara kãgabʉ jõma iyi neũdukʼawuarãra bia panamarẽã. Daizeze Bedʼeaba jarabʉ ʉ̃ra zeidebʉrʉ biode biapanaita mawũã idibʉ kĩrãkʼa ba ẽ baita.

²¹ Ẽjũã kĩrãwãreãnẽra dayirãra ewari jõmaʉ̃nẽpanañi, mawũã 70 akʉza 80 poaga ba ẽ bayi dayirãra. Maʉ̃ ẽjũã kĩrãwãreãnẽra, ewari jõmaʉ̃nẽpanañi akʉza kayakabayi, neneẽã panañi, sobiade panañi. Maʉ̃ra Daizeze Bedʼeaba jarabʉ «ewari jõmaʉ̃nẽbaya». Jeowabara dayirã maʉ̃ta diakĩrãbʉ, mamina nekʼãrẽ jõma oibara maʉ̃ ũduita (1 Timoteo 6:12, 19).

22. (1) ¿Sãwũã ũdui ewari jõmaʉ̃nẽ bʼaira? (2) ¿Kʼãrẽneba dayirãra ewari jõmaʉ̃nẽ baseabʉ?

²² ¿Sãwũã ũdui ewari jõmaʉ̃nẽ bʼaira? Dayirãra zarea obaibara nebia oita akʉza maʉ̃ra mejãcha oibara (1 Timoteo 6:18). Naʉ̃bara jarabʉ dayirãbara oibara Daizeze Bedʼeaba zokʼabʉta. Mamina dayirã ewari jõmaʉ̃nẽ bʼaira ũdu ẽ dayirãkʉzaʉba zarea obʉba. Maʉ̃ ũduya mejãcha zarea obʉbʉsida ũdu ẽ bayi maʉ̃ra. Dayi ewari jõmaʉ̃nẽ bʼaira Jeowaba «iyi biaba so zʉbʉria akʉbʉpe» kristianora diayi (Romanos 5:15). Jeowabara dayirã wãrĩnu diakĩrãbʉ naʉ̃ nebiara.

23. ¿Kʼãrẽa kʼãwũãena krĩcha bia jidaibara?

²³ Krĩchara naʉ̃ta: «Mʉ̃ara, ¿obʉka Daizezeba zokʼabʉra?». Bʉa kʼawuara wabida waebʉta nebia oita, maʉ̃ra mesera ara ora. Dayirãba soiduba ĩjãnara Jeowata akʉza zarea ora iya zokʼabʉta ũrĩña, mawũãra Jeowara dayirã mirʉbari bayi. Jeowabara kʼarebayi iyi  kʼaidubema kʼẽrẽpa panʉrãra, naʉ̃ drʉa jõbodo ewaridera. Maʉ̃ tẽãra ẽjũã kĩrãwãreãnẽbayi bʉra, iya jarada kĩrãkʼa. Bʉa kʼãwũãena krĩchara Daizeze ode bʼaita bia krĩchayi, mawũã ũduyi bʉ ewari jõmaʉ̃nẽ bʼaita.