1, 2. ¿Kʼãrẽ ʉ̃rʉ kʼawuakĩrãbʉ ʉ̃kʉrʉ ẽbẽrarãbara?

DRɄA ureba pʉwʉrʉ jõma zʉbʉria obʉrʉde. Akʉza yumakẽrã abaʉba batayi iglesiade ẽbẽrarã bionʉmʉma akʉza ẽbẽra bio makenañi. Adewara ẽbẽra wẽrã wũãwũã juesoma erbʉta kanserba beiyi, mawũã jẽrãmarata amaeñi.

² Maʉ̃ mawũã zʉbʉria berabaribʉrʉdera, ẽbẽrabara kʼawuakĩrãbʉ kʼãrẽa mawũã zʉbʉriabʉta akʉza kʼãrẽa mawũã yi jʉradepanʉta naʉ̃ drʉadera. ¿Bʉara maʉ̃ ʉ̃rʉra krĩchabarika?

3, 4. (1) ¿Kʼãrẽta widisi Habacucbara Jeowaʼa? (2) ¿Kʼãrẽta oita jarasi Jeowabara Habacucʼara?

³ Daizeze Bedʼeabara jarabʉ, ʉ̃kʉrʉ ẽbẽrarã Daizeze ode panʉrabida kʼawuakĩrã panasita kʼãrẽa kʼãwũã zʉbʉriabʉta. Propeta Habacucba widisi Jeowaʼa: «¿Kʼãrẽa mʉ̃a ũdubibʉpe nemitiara? ¿Kʼãrẽa bʉa iduaribibʉ maʉ̃ nemitiara? ¿Kʼãrẽa ũdubibʉpe nezrʉra akʉza kayirua opanʉra? ¿Kʼãrẽa yõpanʉpe akʉza kʼãrẽa ãyirai bedʼeakapanʉpe?» (Habacuc 1:3).

⁴ Daizeze Bedʼeaba jarabʉ Jeowaba jarasita Habacucʼa maʉ̃ bedʼea zromara ara oita (Habacuc 2:2, 3). Jeowabara mejãcha kãgabʉ ẽbẽrarãra. Daizeze Bedʼeaba jarabʉ, iyara marata krĩchabʉta (1 Pedro 5:7). Daizezeitara audre pʉ dayi pʉabʉira (Isaías 55:8, 9). Mamina, ¿kʼãrẽa mejãchabʉ zʉbʉriara? Maʉ̃ ʉ̃rʉ kʼawuadaya atia.

5. (1) ¿Kʼãrẽta jaradiabʉ ʉ̃kʉrʉ religionrabara? (2) ¿Kʼãrẽta jaradiabʉ Daizeze Bedʼebara?

⁵ Saserdoterãba, pastorerãba akʉza ʉ̃kʉrʉ nokʼo religionraba jarapanʉ Daizezeba kʼãwũã zʉbʉriabibʉta. Akʉza jarapanʉ Daizezebʉrʉ kʼãwũã zʉbʉriabibʉta dayirãra akʉza nei berabaribibʉta. Adewara jarapanʉ dayirãbara kʼawua ẽ baita kʼãrẽa zʉbʉriapanʉta. Akʉza jaradiapanʉ dayirã beibʉrʉdera Daizezeʉ̃me ʉ̃tʉ bʼaita akʉza wũãwũãta beisibʉrʉ abarika berabarita. Mamina maʉ̃ra wãrĩnu ẽ, Jeowabara dayirãra zʉbʉria berabaribi ẽ. Daizeze Bedʼeaba jarabʉ: «Krĩcharaidua Daizeze wãrĩnuarabara nekayirua obʉta adewara Daizeze jõma oseabʉbara aripe oẽãta» (Job 34:10).

6. ¿Kʼãrẽa jarapanʉ Daizezeba zʉbʉria obʉta?

⁶ Ẽbẽra mejãchaʉba jarapanʉ dayirã zʉbʉria berabaribʉrʉdera Daizezeba mawũã obʉrʉta, krĩchapanʉ baera Daizezeba zokʼabʉta naʉ̃ drʉara. Mamina daya kʼawuasida yi 3de Diarubʉrʉ zokʼabʉta naʉ̃ drʉara, maʉ̃ kʼarea bedʼea ũbea kʼawuadayi.

7, 8. ¿Kʼãrẽa mejãchabʉ zʉbʉriara?

⁷ Nããra, Daizeze Bedʼeaba jarabʉ: «Naʉ̃ drʉara jõma yi kayirua juwa edrebʉ» (1 Juan 5:19). Mawũã Diaruba zokʼabʉ naʉ̃ drʉara, iyira ẽbẽra kayirua akʉza iyira nemitia omia. Diarubara «naʉ̃ drʉa jõmãʉ̃nẽbemata sewa erbʉ» (Apocalipsis 12:9). Maʉ̃ba ʉ̃kʉrʉ ẽbẽrarãbara maʉ̃ne kĩrãkʼa opanʉ. Maʉ̃ kʼarea naʉ̃ drʉadera bʉ yi jʉrata, sewa nebʉrʉ omiata akʉza nemitia omiata.

⁸ Yi ũmeta, kʼawuadaya kʼãrẽa mejãcha zʉbʉriabʉta. Adanba akʉza Ebaʉ̃meba ũrĩna ẽ basi baera Daizeze  Bedʼeata, mawũã amaesida yi kayiruata yi wũãwũãraita. Mawũã dayirã jõmaʉ̃ta kayirua omia, maʉ̃ba zʉbʉriabibʉ wuabemarata, maʉ̃ba ʉ̃kʉrʉra ʉ̃tabʉta krĩchabʉ, maʉ̃ kʼarea bia edada ẽ wuabemarata (Eclesiastés 4:1; 8:9). Yi ũbeata, dayirã zʉbʉriabʉ daya kʼawua ẽ ewaride neida berabaribʉ baera (Eclesiastés 9:11). Maʉ̃ba jarabʉ dayirã badu maebʉde neida berabariseabʉta, daya kʼawua ẽ baera kʼãrẽ berabarita.

9. ¿Kʼãrẽa kʼawuapanʉ dayirãbara Daizezeba zʉbʉriara iduaribibʉta?

⁹ Jeowabara zʉbʉriabi ẽ. Iyara yõbibʉ ẽ, nemitia obibʉ ẽ, bedʼea zroma zebibʉ ẽ akʉza drʉa ureta, nãgʉ zromata zebi ẽ adewara neida berabaribi ẽ. Mamina bʉa krĩchaseabʉ: «Jeowata jõmaʉ̃ra ʉ̃ta yi zromabʉrʉ, ¿kʼãrẽa jõbiau ẽ dayirã zʉbʉriara?». Dayirãba kʼawuapanʉ Daizezebara dayirãra mejãcha kãgabʉta, mamina Daizezebara kʼãrẽa zʉbʉriabibʉ (1 Juan 4:8).

10. ¿Kʼãrẽ sewa nebʉrata jarasi Diarubara Jeowa ʉ̃rʉ?

¹⁰ Ẽjũã kĩrãwãreãnẽra Diarubara sewasi Adan Ebaʉ̃mera Daizeze bedʼea ũrĩna ẽ marẽã. Akʉza jarasi Jeowabara biʼia zokʼabe ẽãta. Adewara jarasi Daizezebara merabʉta nekʼãrẽ biata akʉza maʉ̃ta kʼawuada ẽ marẽã kãgabʉta. Diarubara kãgabasi ĩjãnamarẽã iyabʉrʉ bia zokʼa jʉ̃drʉita Jeowadeira akʉza Daizeze dayirãbara nesida ẽãta (Génesis 3:2-5; akʉra nota 27de).

11. ¿Kʼãrẽ bedʼea widibʉ ʉ̃rʉ panʉi atiara?

¹¹ Adan Ebaʉ̃mebara ũrĩna ẽ basi Jeowa bedʼeara. Ãya krĩchapanasi baera jidaseabʉta nebia oita mawũã ẽ bʉrʉ nemitia oita. ¿Kʼãrẽta oibarabasi Jeowabara  Adan Ebaʉ̃mera ãya aña krĩchapanʉ ũdubira? Akʉza ¿Jeowabʉrʉ kʼawuabʉka kʼãrẽta biata dayirãitara?

12, 13. (1) ¿Kʼãrẽa Jeowabara waña bea ẽ basi Adan Ebaʉ̃mera? (2) ¿Kʼãrẽa Jeowabara iduaribibʉ Diaruba zokʼamarẽã?

¹² Jeowabara kãgabasi naʉ̃ drʉa ewari jõmaʉ̃nẽ ẽjũã kĩrãwãreã bamarẽã akʉza Adan Ebaʉ̃meba wũãwũãra mejãcha erpanamarẽã. Mamina Jeowabara maʉ̃ra aripe berabaribiyi, Diaruba iduaribikĩrã ẽ mina (Génesis 1:28; Isaías 55:10, 11). Maʉ̃ kʼarea Jeowabara Adan Ebaʉ̃mera waña bea ẽ basi, idu wũãwũã eaba wãbisi akʉza Adan Eba wũãwũãrabara jidaseabasi kʼaiba zokʼamarẽãbʉta.

¹³ Diarubara Jeowa ʉ̃rʉ sewa nebʉra osi, angel mejãchabʉra daidu (Job 38:7; Daniel 7:10). Maʉ̃ kʼarea Jeowabara waña bea ẽ basi, awuarabʉrʉ ewari bio diasi kʼawuadamarẽã kʼaiba bia zokʼa jʉ̃drʉita. Adewara ẽbẽrarã ãyirai yi zokʼadamarẽã iduaribisi naʉ̃ drʉa Diaruba zokʼabʉ edre. Mawũã ẽbẽrabara kʼawuadayi ãyi dobaʉba zokʼabeda ẽãta Daizeze kʼareba neẽãra.

14. ¿Diaruba zokʼa jʉ̃drʉdadeba ʉ̃ta kʼãrẽta ũdubʉ?

¹⁴ Poaga mejãchaba, ẽbẽrarã ãyikʉza zokʼabʉta, mamina bia zokʼaʉda ẽ. Maʉ̃ba ũdubibʉ Diarura sewa nebʉrʉ omiata akʉza ẽbẽrarãbara nesidabʉta Daizeze kʼarebara. Maʉ̃ kʼarea Jeremiabara jarasi: «Mʉ̃a bia kaʉbʉ Jeowa, bebʉra mʉ̃re ẽãta yumakẽrãbara mia kʼãrẽsida zokʼabe ẽ nekʼãrẽ berabari ʉ̃rʉ» (Jeremías 10:23).

15, 16. (1) ¿Jeowabara kʼãrẽa idibasidu iduaribibʉ bedʼea zroma Diaruba obʉra? (2) ¿Kʼãrẽa ara oẽ Jeowabara naʉ̃ bedʼea zromara?

¹⁵ ¿Kʼãrẽa iduaribibʉ Jeowabara zʉbʉriara? ¿Kʼãrẽa kʼareba ẽ Jeowabara ẽbẽra zʉbʉria berabaribʉrʉdera?  Kʼawuadamarẽã angeleraba akʉza ẽbẽrarãba, Diarubara bia zokʼa bʉe ẽãta. Ẽbẽrabara mejãcha jʉrʉ zebʉrʉ nokʼora nama egorodebemata, mamina bia zokʼaʉda ẽ. Idi ewadera ẽbẽrarãbara nekʼãrẽ kĩrãtana owãmina, oda ẽ nebiara, awuarabʉrʉ wuabʉrʉ wã zʉbʉriata, nemitia omiarata, yõta, nããbadaira. Ẽbẽrabara bia zokʼaʉda ẽ Daizeze kʼareba neẽãra.

¹⁶ Dayirãba kʼawuapanʉ Jeowabara wabida ara oẽãta Diaruba bedʼea zroma obʉra. Mamina Jeowaba ara ora Diaruba bedʼea zroma obʉta, Diaruarebʉta ũdubiyi, maʉ̃ba Daizezebara kʼãrẽ oẽ kʼãwũãẽnara. Akʉza maʉ̃ta mawũã osibʉrʉ ẽbẽrarãbara krĩchapanakasi ãyikʉza bia zokʼaseabʉta. Maʉ̃ba Daizezebara kʼãrẽ oẽ kʼãwũẽnara, maʉ̃ra sewida baera akʉza iyira sewa nebʉrʉ oka (Hebreos 6:18).

17, 18. ¿Kʼãrẽta oi Jeowabara Diaruba ãrĩna ara oita?

¹⁷ Jeowabara ara oseabʉ Diaruba ãrĩnara akʉza ẽbẽrarãba. Jeowabara maʉ̃ra jõma oseabʉ. Jeowabara kʼawuabʉ sõbede jõma panʉita Diaruba sewa jaradara mawũã berabarida tẽã, Jeowabara naʉ̃ drʉa ẽjũã kĩrãwãreã babiyi, iya kãgabada kĩrãkʼa. Mama jõma jẽda piradrʉbiyi ẽbẽrarã iyi krĩchadebʉra (Juan 5:28, 29). Adewara ẽbẽrarã kaya ẽ bayi akʉza bei ẽ bayi. Jeowabara jõma jõbiyi Jesudeba Diaruba obʉra, maʉ̃bara jara kĩrãbʉ jõma jõbita Diaruba zʉbʉria onʉmʉra (1 Juan 3:8). Maʉ̃ kʼarea Jeowaʼa biga diaibara iya dayirã jʉ̃ãbʉ baera. Naʉ̃ba dayirã ewari diabʉ dayirãba krĩchadamarẽã kʼaiba zokʼamarẽãbʉta (akʉra 2 Pedro 3:9, 10). Dayirã zʉbʉria bʉdebida Jeowabara kʼarebabʉ (Juan 4:23; akʉra 1 Corintios 10:13).

 ¹⁸ Jeowabara dayirã diabʉ kʼãrẽ dayi krichaba kʼawua jidamarẽã, kʼaita dayirã nokʼobaira. Akudaya kʼãrẽa mawũã jarabʉta.

19. (1) ¿Kʼãrẽ nebiata diaisi Jeowabara dayirãʼa? (2) ¿Kʼãrẽa biga diaibara maʉ̃ nebia diada kʼarea?

¹⁹ Jeowabara dayirã diabʉ kʼãrẽ dayi krĩchamabʉta jidamarẽã. Maʉ̃ kʼarea dayirãbara jidaseabʉ dayi bebʉma biabʉta akʉza Jeowaʼa yi zokʼabiseabʉ mawũã ẽ bʉrʉ yi zokʼabi ẽ baita. Dayi ẽbẽrarã nedʉwʉrʉ kĩrãkʼa krĩcha neẽãbʉ ẽ (Proverbios 30:24-28). Adewara Daizezebara dayirãra parã ẽ basi makina kĩrãkʼa nekʼãrẽ jʉ̃zaba oita. Awuarabʉrʉ dayirãbara krĩchaseabʉ, kʼairata dayirã neũdukʼawuabaita akʉza dayi sãwũãbaita. Jeowabara kãgabʉ dayirã mejãcha sobiabamarẽã.

20, 21. ¿Kʼãrẽta oibara bʉ bebʉ bia erbaira?

²⁰ Jeowabara kãgabʉ dayirãba soiduba kãgadamarẽã (Mateo 22:37, 38). Jeowara sobiabʉ, wũãwũãba yi zezeʼa mejãcha kãgabʉa abari kĩrãkʼa, maʉ̃ra jarabʉ baera soiduba. Jeowabara dayirã iduaribibʉ, dayirãba kʼawua jidamarẽã iyi ode bʼaita mawũã ẽ bʉrʉ ba ẽãta. Diaruba akʉza Adan Ebaʉ̃mebara ũrĩna ẽ basi Jeowa bedʼeara. Bʉara, ¿sãwũã dayi krĩchama bʉta jidaseabʉ?

²¹ Bʉa aripe jidaseabʉ Jeowaba jarabʉta ojʉ̃drʉbʉrʉde. Ẽbẽra mejãchaʉba jʉrʉpanʉ Daizezeba kãgabʉ oita akʉza amaepanʉ Diaruba obʉra (Proverbios 27:11). Daya kʼawuada kĩrãkʼa Daizezebara jõma jõbiyi zʉbʉriara adewara naʉ̃ drʉa ẽjũã kĩrãwãreã babiyi. Bʉara, ¿kʼãrẽta oi, mama bʼaira? Yi 12de kʼawuadaya maʉ̃ ʉ̃rʉ.