1. ¿Naʉ̃ librode eda jarabʉ kʼawuada tẽãra kʼãrẽta krĩchabʉ?

BɄARA naʉ̃ librodera mejãcha kʼawuabʉrʉ Daizeze ʉ̃rʉ akʉza kʼawuasi Daizezeba dayirã ewari jõmaʉ̃nẽ bamarẽã kãgabʉta, dayirã beibʉrʉde samadogota, adewara ẽbẽrarã beida jẽda piradrʉita (Eclesiastés 9:5; Lucas 23:43; Juan 5:28, 29; Apocalipsis 21:3, 4). Bʉra, Jeowa ʉ̃rʉ Kʼawuabipanʉrã ãba yi jʉrepanʉma wãbʉbaibara, adewara ĩjãbʉbaibara ãyira religion wãrĩnuarata (Juan 13:35). Adewara bʉra  Jeowa neũdukʼawuaraba wã maʉ̃ kʼarea krĩchabʉ iya zokʼabʉ oita. Mamina bʉa widibʉbaibara naʉ̃ta: «¿Kʼãrẽta oibara iyi ode bʼaita?».

2. ¿Kʼãrẽa buru kʼoekĩrãsi Etiopiadebemarara?

² Yumakẽrã Etiopiaba nabema siglodebemaba bʉa krĩchabʉ kĩrãkʼa krĩchasi. Jesu beida akʉza jẽda piradrʉda tẽã, Pelipeba jaradiasi Etiopiadebema Jesura Dayirã ẽdrʉbibarita. Mawũẽra iya ũrĩne jara ũrĩsi baera kĩrãmiga akʉpe jarasi: «Baniã za bʼʉa, ¿kʼãrẽba bʼe ẽbaipe mʉ buru kʼoeira?» (Hechos 8:26-36).

3. (1) ¿Kʼãrẽta omarẽã jarasi Jesubara iyi kʼaidubemara? (2) ¿Sãwũã buru kʼoeibara?

³ Daizeze Bedʼeaba jarabʉ, dayita Jeowa ode bakĩrãbʉbʉrʉ, buru kʼoeibarata. Jesuba jarasi iyi kʼaidubemara: «Mobe ĩjãnamarẽã mʉnebemata jaraudua druaza zhãrã jõmaʉ̃ã, buru kʼoekuaudua» (Mateo 28:19). Jesuba yizata amaesi iyi buru kʼoeside. Jesu buru kʼoesidera iyira bari baniaba buru zʉrrʉa osida ẽ, awuarabʉrʉ jõma iyi kakuara doeda ta edasida (Mateo 3:16). Idi ewadebida kristianora buru kʼoebʉrʉdera, jõma iyi kakua doeda ta edapanʉ.

4. ¿Kʼãrẽta ũdubibʉ dayi buru kʼoebʉrʉba?

⁴ Buru kʼoebʉrʉba ũdubibʉ wuabemara, wãrĩnu Daizeze neũdukʼawua bakĩrãbʉta akʉza iya zokʼabʉta okĩrãbʉta (Salmo 40:7, 8). Maʉ̃ kʼarea bʉa krĩchabʉbaibara naʉ̃ta: «¿Kʼãrẽta oibara mʉ̃ buru kʼoeira?».

5. (1) ¿Kʼãrẽta oibara bʉ buru kʼoei nããra? (2) ¿Kʼãrẽa yibia kristianora ãba yi jʉrebʉma wãita?

⁵ Buru kʼoei nãã bʉara biʼia ũdukʼawuaibara Jeowata akʉza Jesuta. Bʉa Daizeze Bedʼea kʼawua jʉ̃drʉside,  ũdukʼawua wãsi, mamina maʉ̃ awa ẽ (akʉra Juan 17:3). Daizeze Bedʼeaba jarabʉ «Iya okĩrãbʉra jõma mara kʼawuabimarẽã» iya kʼãrẽta okĩrãbʉta (Colosenses 1:9). Jeowa ʉ̃rʉ Kʼawuabipanʉrã ãba yi jʉrebʉma wãbʉba kʼarebabʉ audre Jeowa kãga wãita. Maʉ̃ba audre yibia bʉ mama wãbʉ adua ẽ baita (Hebreos 10:24, 25).

6. ¿Kʼãrẽaba kʼawuabaibara Daizeze Bedʼea ʉ̃rʉ bʉ buru kʼoeira?

⁶ Jeowabara jʉ̃ã ẽ bʉa jõma kʼawuamarẽã iyi Bedʼeade jarabʉra, bʉ buru kʼoeita. Yumakẽrã etiopiadebema buru kʼoesidera, Jeowabara jʉ̃ã ẽ basi iya jõma kʼawua bʼaita, iyi buru kʼoei nãã (Hechos 8:30, 31). Dayirãbara ewariza kʼawuabaibara Jeowa ʉ̃rʉ (Eclesiastés 3:11). Bʉ buru kʼoeira, bʉara nãã kʼawuabaibara Jeowaba iyi Bedʼeade jarabʉta akʉza ĩjãibara (Hebreos 5:12).

7. ¿Bʉra sãwũã kʼarebabʉ Daizeze Bedʼeade eda jarabʉbara?

⁷ Daizeze Bedʼeaba jarabʉ, «Daizezeta ĩjãna ẽ bʉrʉ biata ũdubida ẽ bayi» (Hebreos 11:6). Maʉ̃ba bʉara soiduba ĩjãibara Daizezeta bʉ buru kʼoeira. Daizeze Bedʼeabara jarabʉ, Korintodebemarãbara ũrĩsidata Jesu kʼaidupanʉra bedʼeara, maʉ̃ba ãya wãrĩnu ĩjãsida akʉza buru kʼoesida (Hechos 18:8). Maʉ̃ kĩrãkʼa, bʉa Daizeze Bedʼea akʉbʉba kʼarebayi audre ĩjãita Daizezeba jarabʉta adewara Jesuba iyi bebʉ diadata dayirã kayiruadeba ẽdrʉbita akʉza beideba (Josué 23:14; Hechos 4:12; 2 Timoteo 3:16, 17).

8. ¿Kʼãrẽba kʼarebai bʉa kʼawuabʉta awurua jaradiaita?

⁸ Bʉa ĩjãbʉra audre zarea wãñi, Daizeze Bedʼeaba  jarabʉta kʼawua wãne akʉza maʉ̃ba bʉ sãwũã kʼareba wãne. Maʉ̃ kʼarea bʉara awurua jaradiakĩrãñi bʉa kʼawua wãta (Jeremías 20:9; 2 Corintios 4:13). ¿Kʼaia jaradiaseapanʉ?

9, 10. (1) ¿Kʼaira jaradiaseabʉ bʉa kʼawuadara? (2) ¿Kʼãrẽta oibara bʉara Daizeze bedʼeata jaradia wãkĩrãbʉbʉrʉ?

⁹ Bʉara jaradiaseabʉ, bʉ mebẽrã, neũdukʼawuara, bʉ de kʼawapanʉra, neũdukʼawua kolegiodepanʉra akʉza trajodepanʉra. Mawũã jaradiaira biode biga. Bʉa jaradiabʉrʉdera ibiade jaradiara akʉza wawia ũdubira. Mawũã ora bʉara jaradia wãseabʉ mebẽrã kongregasionbawara. Maʉ̃ba bʉa Daizeze bedʼea jaradia wãkĩrãbʉde, bedʼeaseabʉ Jeowa ʉ̃rʉ Kʼawuabipanʉrãʉ̃me, ẽbẽra bʉa Daizeze bedʼea jaradiabʉʉ̃meba, bʉa jaraseabʉ wãkĩrãbʉta Daizeze bedʼea jaradiade kongregasionbawara. Jeowa ʉ̃rʉ Kʼawuabipanʉrãba krĩchadara bʉa jaradia wãseabʉta akʉza Daizeze Bedʼeaba jarabʉdebʉbʉrʉ, zõrãrã ũme kongregasionebemaba bedʼea edadayi bʉra akʉza bʉa ne jaradia baribida wididayi.

¹⁰ Zõrãrã kongregasionebemata bʉme bedʼeabʉdadera, ãya bʉa widiyi Daizeze Bedʼeaba jarabʉta ũrĩbʉ kʼawuaita akʉza soiduba ĩjãbʉ kʼawuaita mama jarabʉra, adewara Daizeze Bedʼeaba zokʼabʉde bʉ kʼawuaita. Akʉza bʉ wãrĩnu Jeowa ʉ̃rʉ Kʼawuabipanʉrã bakĩrãbʉ kʼawuaita. Kĩrãbera zõrãrãbara akʉbʉta mebẽrãra kongregasionebemata akʉza bʉsida akʉita. Maʉ̃ba perarãra ãyiʉ̃me bedʼeaita (Hechos 20:28; 1 Pedro 5:2, 3). Bʉme bedʼeada tẽã, zõrãrãba kʼawua jaradayi, bʉa Daizeze bedʼea jaradia wãseabʉ kʼawuaita.

11. ¿Kʼãrẽa idubʉibara daya nãã obadara Daizeze bedʼea jaradia wãi nãã?

 ¹¹ Zõrãrãba bʉa jaraseabʉ Daizeze bedʼea jaradia wãi naweda, idubʉibarata bʉa nãã obadara. ¿Kʼãrẽa idubʉibara daya nãã obadara? Daizeze Bedʼea jaradia wãbʉrʉdera, wãpanʉ Daizezebari jaradiade. Maʉ̃ba dayi sãwũãbʉdeba iyi ʉ̃rʉ ibia bedʼeabibʉ (1 Corintios 6:9, 10; Gálatas 5:19-21).

12. ¿Kʼãrẽa idubʉibara kayirua obʉra?

¹² Bʉ buru kʼoei naweda naʉ̃ta oibara. Apostol Pedroba jarasi: «Kayirua idubʉra akʉza jẽda zeibara, maraba kayirua obada kĩrãduamarẽã» (Hechos 3:19). ¿Kʼãrẽta jarakĩrãkʉ kayirua idubʉibara? Krĩcha zroma oita daya nemitia oda kʼarea. Maʉ̃ba dayi kakuata neida obʉbʉrʉ, krĩchaibara maʉ̃ kayirua obada jipa idubʉita. Bʉa nebia oya zarea ozebʉrʉ, maʉ̃ra biga, mamina kayirua obʉra idubʉibara soiduba, dayirã jõmaʉ̃ta kayirua omia baera nesidabʉ Daizezeba kĩrãduamarẽã dayirãba kayirua obʉra (Romanos 3:23; 5:12).

13. ¿Kʼãrẽta jarakĩrãbʉ jẽda zeibara?

¹³ ¿Bari jẽda krĩchaibaraka dayi nemitia odara? Mawũã ẽ. Pedroba jarasi: «Jẽda zera». Naʉ̃ bedʼeabara jarabʉ, bʉa nãã nemitia obadara jipa idubʉibarata, mawũãtrʉ nebia ojʉ̃drʉyi. Krĩchara komunida bʉa ũdukama wãta, maʉ̃ ode wãne bʉa kʼawua ẽãne o jãpe wãñi. Mamina maʉ̃ dããrane bʉa kʼaʉbawayi o jãpe wãta. Aramaʉ̃ta bʉa, ¿kʼãrẽta oi? Bʉmabi jẽda zeyi o aripe wãita. Maʉ̃ kĩrãkʼabʉ daya Daizeze  Bedʼea kʼawua jʉ̃drʉbʉrʉde, maʉ̃neba kʼawuaseabʉ daya nekʼãrẽ obʉra ara oibarata. Maʉ̃ kʼarea jẽda zeita krĩchaibara, daya nemitia obʉta wua oẽ baita, nebia oya.

14. ¿Kʼãrẽta oibara dayi bebʉ diaita Daizezeʼa?

¹⁴ Bʉ buru kʼoei nããra jaraibara dayi bebʉ diaita Daizezeʼa, maʉ̃ra jarabʉ dayi yiwidʼibʉrʉde akʉza maʉ̃ne jarabʉ iyitrʉ abapai kãgaita akʉza ewari jõmaʉ̃nẽ iya zokʼabʉrʉde bʼaita, maʉ̃ mawũã oira yibia dayi buru kʼoei nãã oita (Deuteronomio 6:15).

15, 16. ¿Kʼãrẽa Daizeze ode wãbʉ ẽbẽrarã?

¹⁵ Daya Jeowa jarabʉrʉde, iyi ode ewari jõmaʉ̃nẽ bʼaita, maʉ̃ra bʉa ẽbẽra kãgabʉa iyiʉ̃me ewari jõmaʉ̃nẽ baya ai kĩrãkʼabʉ. Krĩchara ẽbẽra yi juwa jidaipanʉta. Yumakẽrãba yuwẽrãta ũdukʼawua wãne audre kãga wãñi, maʉ̃ba juwa jidakĩrãñi maʉ̃me. Maʉ̃ mawũã krĩchaira ijaramia ẽ baera, juwa jidakĩrãbʉ, krĩcha ẽ kʼãrẽ bedʼea zroma berabarita, iyara mejãcha kãgabʉ baera.

¹⁶ Bʉa Jeowa ũdukʼawua wãne, mejãcha kãga wãñi akʉza iya zokʼabʉta obayi. Maʉ̃ba bʉa Jeowa jaradara aripe oyi. Jesuba jarasi iyi kʼaidubemara: «Iabʼaʉba mʉta pẽwã krĩña bʼʉbʉrʉ bʉzha krĩñata aribʼaerãrũã» (Marcos 8:34). ¿Kʼãrẽta jarakĩrãbʉ bʉa krĩñata aribae ẽ baibara? Ewari jõmaʉ̃nẽ Jeowaba jarabʉta oibara kʼãrẽ krĩcha ẽã. Bʉitara audre yibiabaibara Jeowaba kãgabʉta oita, bʉa kãgabʉira akʉza krĩchabʉira (akʉra 1 Pedro 4:2).

17. ¿Kʼãrẽa ʉ̃kʉrʉ ẽbẽrabara krĩchada ẽ Jeowa ode wãita?

¹⁷ Ʉ̃kʉrʉ ẽbẽrarã Jeowa ode wãita perabʉ ãya krĩchapanʉ baera aripe oẽãta ãya jaradara. Jeowata krĩcha zroma obiamapanʉ baera. Adewara krĩchapanʉ ãyita Jeowa odepanʉ ẽ bʉrʉ, Jeowabara kʼãrẽ oẽ baita ãya nemitia obʉ kʼareara.

18. ¿Kʼãrẽba kʼarebai Jeowaba jarabʉ aripe oita?

¹⁸ Bʉa Jeowa mejãcha kãgabʉba kʼarebayi iya zokʼabʉ aripe oita. Adewara bʉa Jeowa jaradara aripe oita krĩchayi (Eclesiastés 5:4; Colosenses 1:10). Mawũã bʉitara zare ẽ bayi Jeowaba kãgabʉ oita. Apostol Juanba jarasi: «Daizeze kãgabara naʉ̃ta jarakĩrãʉ: iya jarabʉra jõma ĩjãnañi, iya jarabʉra zare ẽ baera» (1 Juan 5:3).

19. ¿Kʼãrẽa pera ẽ baibara dayi bebʉ diaita Jeowaʼa?

¹⁹ ¿Nemitia okabaibaraka dayi bebʉ diaita Jeowaʼa? Jeowabara zokʼabʉ ẽ dayirãba obeda ẽãra (Salmo 103:14). Adewara Jeowabara kʼarebayi bʉa nebia omarẽã (Isaías 41:10). Daizeze Bedʼeaba jarabʉ kĩrãkʼa: «Iya bʉra, jipa wãbiyi». Maʉ̃ kʼarea bʉara soiduba ĩjãra Jeowaba jarabʉra (Proverbios 3:5, 6).

20. ¿Kʼãrẽta oibara dayi bebʉ Jeowaʼa diaya ada tẽãra?

²⁰ ¿Bʉa krĩchabʉka jaraita dayi bebʉ diaita Jeowaʼa? Bʉa Jeowa jarasibʉrʉ, iyitrʉ abapai kãgaita akʉza ewari jõmaʉ̃nẽ iya zokʼabʉrʉde bʼaita, bʉra mawũãtrʉ buru kʼoeseabʉ.

21, 22. ¿Bʉa sãwũã ũdubi wãrĩnu ĩjãbʉta wuabemara?

 ²¹ Jarada kogregasione zõrãrã ãba yi jʉredabaria, bʉara Jeowa jaradara oita akʉza buru kʼoekĩrãbʉta. Maʉ̃bara jarayi zõrãrã kongregasionebema jaradiamarẽã Daizeze Bedʼeaba jaradiabʉta. Bʉta buru kʼoeseabʉbʉrʉ, ãya jaradayi Jeowa ʉ̃rʉ Kʼawuabipanʉrã asambleade buru kʼoeita. Maʉ̃ asambleadera diskursode jara  ũrĩbidayi, kʼãrẽta jarakĩrãbʉta buru kʼoeita. Mebẽã maʉ̃ diskurso jaradiabʉbara yi buru kʼoeira bedʼea ũme widiyi. Bʉa maʉ̃ bedʼea panʉbʉrʉba, ũdubiyi, wuabemara bʉa wãrĩnu ĩjãbʉta (Romanos 10:10).

²² Maʉ̃ tẽã, bʉra buru kʼoeyi. Jõma bʉ kakuara doeda ta edadayi. Buru kʼoebʉrʉba ũdubiyi jõmaʉ̃  ẽbẽrarã, bʉra Jeowa odebidata akʉza maʉ̃neba yẽta Jeowa ʉ̃rʉ Kʼawuabipanʉrã babidata.

23. ¿Kʼãrẽta jarakĩrãbʉ buru kʼoeita «Daizeze trʉ̃neba, zhi Warra trʉ̃neba, Jawurebia trʉ̃neba»?

²³ Jesubara jarasi iyi kʼaidubemara, «Daizeze trʉ̃neba, zhi Warra trʉ̃neba, Jawurebia trʉ̃neba» buru kʼoeita (akʉra Mateo 28:19). ¿Maʉ̃ bedʼeabara kʼãrẽta jarakĩrãbʉ? Kʼawuapanʉ Jeowabʉrʉ zokʼabʉta akʉza kʼãrẽta obʉta Jesuba Daizezeba kʼãrẽ bia weita krĩchabʉ eda, adewara Jeowaba sãwũã zokʼabʉta iyi jaure zareaba iya jarada aripe berabaribita (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. (1) ¿Kʼãrẽta jaradiabʉ buru kʼoeibara? (2) ¿Kʼãrẽ ʉ̃rʉ kʼawuadai yi 19dera?

²⁴ Dayi buru kʼoeira biode yibia. Jõma bʉ kakuara doeda ta edabʉdade, mama jõma taʉdogo bʉa nemitia obadara. Mamina bʉ doedaʉba ãĩ jiraeda bʉdade, maʉ̃bara jarabʉ, bʉa ewari jõmaʉ̃nẽ Jeowaba zokʼabʉta oita. Maʉ̃ ewarideba yẽta bʉa ũdubiyi bʉra Daizeze odebidata. Kĩrãbera bʉra mawũã ẽbẽraba jarabʉrʉde bida ẽãta, awuarabʉrʉ Jeowaba jarabʉrʉde bidata.

²⁵ Bʉ yiwidʼibʉrʉde dayi bebʉ Jeowaʼa diaya adara oibara, maʉ̃ba audre Jeowa neũdukʼawuabayi (Salmo 25:14). Dayi buru kʼoebʉrʉba jara ẽ ẽdrʉita dayi beideba. Maʉ̃ kʼarea apostol Pabloba jarasi: «Bia ũrĩne kʼawũãpanaidua Daizezeba ẽdrʉbita» (Filipenses 2:12). Mamina dayi buru kʼoebʉrʉba jõma otae ẽ. Mawũẽra bʉra, ¿sãwũã Jeowa neũdukʼawuarabai? Yi 19de panʉñi naʉ̃ bedʼeara.