1. ¿Kʼaibʉrʉ jaradiaseabʉ Daizeze sãwũã kãgaita?

Ʉ̃KɄRɄ religionrabara aripe jaradiabʉ kĩrãkʼapanʉ Daizeze ʉ̃rʉ. Mamina maʉ̃ra wãrĩnubaira mawũã ẽ, religionbara awuara jaradiapanʉ Daizeze ʉ̃rʉ akʉza iyi sãwũã kãgai ʉ̃rʉ. Mawũẽra, ¿dayirãbara sãwũã kʼawuaseabʉ saʉ̃ta religion wãrĩnuarata? Jeowabʉrʉ jaradiaseabʉ sãwũã iyi kãgamarẽã.

2. ¿Bʉara kʼãrẽta oibara Daizeze kãgaira?

² Jeowaba dayirã diasi iyi Bedʼeata, kʼawuadamarẽã iyi sãwũã kãgaita, maʉ̃ kʼarea dayirãbara akʉibara iyi Bedʼeara. Daizezebara bʉra kʼarebayi audre maʉ̃ biʼia ũrĩta, iya wãrĩnu bʉta kãgabʉ baera (Isaías 48:17).

3. ¿Kʼãrẽta omarẽã kãgabʉ Daizezebara?

³ Ʉ̃kʉrʉ ẽbẽrabara jarabʉ Daizezebara jõma religionrãra abarika akʉbʉta, mamina Jesubara mawũã jaradia ẽ basi. Iya jarasi: «Mʉta Nokʼó abʼera jõmarã edʼa wãna ẽã ʉ̃tre Daizezeta Nokʼo maẽrã, awuarabʉrʉ edʼa wãnaña mʉ Zeze ʉ̃tre bʼʉba krĩñata obʼeta». Daizezebara kãgabʉ dayirãba kʼawuadamarẽã iya kʼãrẽta kãgabʉta akʉza maʉ̃ta odamarẽã. Maʉ̃ra wãrĩnu krĩcha daibara, Jesuba jarasi Daizeze bedʼea ũrĩ ẽãra, «marã bia ẽã omiãta bʼea» maʉ̃bara jarakĩrãbʉ nemitia omiarata (Mateo 7:21-23).

4. ¿Kʼãrẽta berabarita jarasi Jesubara Daizezeba kãgabʉta ora?

⁴ Jesubara jarasi Dayirãba Daizezeba kãgabʉta kʼawuakĩrãbʉbʉrʉ, bedʼea zroma ũduita. Iya jarasi: «Edʼa wãũdua puerta pẽũsuadʼe, puerta jedʼeadʼe edʼa wãĩta  ota kũrũgusabara aduadʼe ede bʼʉa, bio maʉ̃ne edʼa wã nʉmʉã. Mawũãmina puerta pẽũsuadʼe edʼa wãĩta ota pẽũsuabara bʼai jõ ẽãma ede bʼʉa, maʉ̃ta bio ẽãba ũdu bʼea» (Mateo 7:13, 14). O pẽsũabara jarabʉ religion wãrĩnuarata, maʉ̃bara ewari jõmaʉ̃nẽ bʼaita jarabʉ. Kõbe o zromabara jarabʉ religion zeri ẽãta, maʉ̃bara dayirã ewari jõmaʉ̃nẽ babi ẽ. Jeowabara kãga ẽ dayirã beira, maʉ̃ kʼarea jõmaʉ̃ba iyi ʉ̃rʉ kʼawuadamarẽãbʉ (2 Pedro 3:9).

5. ¿Sãwũã kʼawuadai saʉ̃ta religion wãrĩnuarata?

⁵ Jesubara jara ũrĩbisi sãwũã ũdukʼawua daita religion wãrĩnuarata. Atia kʼawuadaya ãya ĩjãbʉ ʉ̃rʉ akʉza ãya obʉ ʉ̃rʉ. Jesuba jarasi: «Marãbara ãzha kʼãrẽ obʼedʼeba ũdukʼawadʼaya» maʉ̃ tẽã jarasi «bakuru biabara zau bʼʉa zhi tara biata» (Mateo 7:16, 17). Naʉ̃bara jarakĩrãbʉ ẽ jõma iyi ode panʉra ẽbẽrarã nemitia okata. Mamina Daizeze ode panʉrãra zarea opanʉ kʼẽrẽpa bʼaita iyiʉ̃me. Kõbebʉrʉ atia kʼawuadaya sãwũã ũdukʼawuadaita, saʉ̃ta religion wãrĩnuarata.

6, 7. (1) ¿Kʼãrẽa religion wãrĩnuarabara Daizeze Bedʼeadeba jaradiabʉ? (2) ¿Kʼãrẽta kʼawuapanʉ Jesudeba?

⁶ Religion wãrĩnuarabara Daizeze Bedʼeadeba jaradiabʉ. Daizeze Bedʼeaba jarabʉ: «Daizezeba jõma bʉbisi iyi bedʼeara. Jõma maʉ̃ra biga jaradiaita, kayirua obʉ kẽãĩta akʉza aña obe jipa oita, kʼẽrẽpa jipa bamarẽã. Ẽbẽra Daizeze odebʉba, mawũã bia kʼawuamarẽã kʼãrẽ nebia oita» (2 Timoteo 3:16, 17). Apostol Pabloba jarasi kristianoraʼa: «Maraba Daizeze Bedʼea daideba ũrĩsidade, ẽbẽra krĩcha kĩrãkʼa ĩjã  na ẽ basi, awuarabʉrʉ ĩjãsida, wãrĩnu Daizeze Bedʼearata» (1 Tesalonicenses 2:13). Religion wãrĩnuarabara Daizeze Bedʼeadeba jaradiabʉ, Daizezeba diada baera. Mawũã ãya krĩchapanʉta jaradiapanʉ ẽ.

⁷ Jesuba jaradiabadara jõma Daizeze Bedʼeadeba jaradiabasi (akʉra Juan 17:17). Akʉza ewari jõmaʉ̃nẽ (Mateo 4:4, 7, 10). Yi wãrĩnu kristianoarabara Jesuba obada kĩrãkʼa opanʉ.

8. ¿Jesubara sãwũã jaradiasi Jeowa kãgamarẽãra?

⁸ Jeowatrʉ abapai kãgapanʉ. Salmo 83:18de jarabʉ: «Ẽbẽrarãba kʼawuadamarẽã bʉ trʉ̃arãra Jeowata, akʉza bʉtrʉ abapai yi zroma naʉ̃ ẽjũa jõma ʉ̃rʉ». Jesubara kãgabasi ẽbẽra jõmaʉ̃ba kʼawuadamarẽã kʼaita Daizezearara. Maʉ̃ba ẽbẽrarã jaradiasi saʉ̃ta Daizeze trʉ̃ra (akʉra Juan 17:6). Jesuba jarasi: «Ãtõmiã wãrũã, maʉ̃ẽnabemata zhi bʼʉmata mawũã bʼʉa: Bʉ Nokʼo Daizezetrʉ ibia jaradua, izhi bedʼeatrʉ aribʼaedua» (Mateo 4:10). Maʉ̃ kʼarea kristianoarabara Jesude kĩrãkʼa opanʉ. Jeowatrʉ abapai kãgapanʉ, adewara ẽbẽrarã jaradiapanʉ iyi trʉ̃ra, akʉza nekʼãrẽ bia weita naʉ̃ drʉaita.

9, 10. ¿Sãwũã dayirãi kãgabʉta ũdubibʉ?

⁹ Wãrĩnu kãga ũdubipanʉ wuabema ẽbẽraʼa. Jesuba jaradiasi iyi kʼaidubemaraʼa sãwũã ãyirai yi kãga ũdubibarata (akʉra Juan 13:35). Dayirãba wãrĩnu kãgabʉta ũdubipanʉbʉrʉ ãbapanañi mebẽrãbawara, krĩcha ẽã kʼãrẽ pʉwʉrʉdeba zebʉrʉta, akʉza kʼãrẽ bedʼeade bedʼeabʉta, dayi plata mejãcha erbʉta akʉza erbʉ ẽãta (Colosenses 3:14). Maʉ̃ kʼarea wãna ẽ yõnera akʉza mia beada ẽ. Daizeze Bedʼeaba jarabʉ: «Daizeze wũãwũãta akʉza Diaru wũãwũãta ũdukʼawuapanʉ  naʉ̃neba, jõma nekʼãrẽ aripe oẽãra Daizeze wũãwũã ẽ, akʉza yi mebẽã kãga ẽãsida» akʉza jarasi «mayirai yi kãgaibarata. Maʉ̃ba Kain kĩrãkʼa babe ẽ, Kainra mejãcha zokʼayiruasi akʉza okõ beasi yi mebẽãta» (1 Juan 3:10-12; 4:20, 21).

¹⁰ Ewari jʉrʉibara akʉza zarea diaibara wuabemarata akʉza yiya kʼarebaibara audre zareapanaita (Hebreos 10:24, 25). Adewara nebia obaibara dayirã mebẽrãita (Gálatas 6:10).

11. ¿Kʼãrẽa ũrĩbara Jesu bedʼeara?

¹¹ Ũrĩpanʉ Jesuba zokʼabʉta, maʉ̃bʉrʉ ẽdrʉbisi baera. Daizeze Bedʼeaba jarabʉ: «Yumakẽrã wũãwũãra ze ẽ basi iyita akʉdamarẽã, awuarabʉrʉ zesi wuabemara akʉita akʉza iyi bebʉ diasi wuabemara ẽdrʉbita» (Hechos 4:12). Naʉ̃ librode yi 5de kʼawuasida Jeowaba yi Warra Jesuta diabʉesita dayirã ẽdrʉbimarẽã (Mateo 20:28). Jeowabara jʉrʉsi Jesuta iyi Nokʼo zokʼamarẽã. Maʉ̃ kʼarea Daizeze Bedʼeabara jarabʉ ũrĩbarata Jesu bedʼeata, dayirãta ewari jõmaʉ̃nẽ bʼaita krĩchabʉbʉrʉ (akʉra Juan 3:36).

12. ¿Kʼãrẽa dayirãra politikade eda wãna ẽ?

¹² Politikade eda wãpanʉ ẽ. Jesura politikade eda wãba ẽ basi. Jesu jidada kʼãrãpe erbarabʉde iya jarasi Pilatoʼa: «Mʉrã naʉ̃ ẽjũãne Reyta bʼaidʼebema ẽã» (akʉra Juan 18:36). Abarika Jesuba oda kĩrãkʼa, dayirãra kʼẽrẽpa panʉ Daizeze Nokʼo are. Maʉ̃ kʼarea politikade eda wãna ẽ. Mamina Daizeze Bedʼeabara jarabʉ «jõma nokʼorã edre bʼeaudua» (Romanos 13:1). Maʉ̃ba ũrĩpanʉ nokʼo drʉadebemaba jarabʉ bedʼeara, mamina ũrĩna ẽ baibara Daizezeba kãgabʉta oẽ  marẽã jaradara, abarika apostoleraba oda kĩrãkʼa. Ãya jarasida: «Daizeze bedʼeata aribʼaei bara zhãrã bedʼeata aribʼaei kʼãñabara» (Hechos 5:29; Marcos 12:17).

13. ¿Kʼãrẽta jaradiapanʉ Daizeze Nokʼo ʉ̃rʉ?

¹³ Jaradiapanʉ Daizeze Nokʼobʉrʉ ara oita naʉ̃ drʉade zʉbʉriabʉra. Jesuba jarasi, «bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ» (akʉra Mateo 24:14). Naʉ̃ drʉadebema nokʼorabara, nekʼãrẽ bia we ẽ Daizeze Nokʼoba diai kĩrãkʼara (Salmo 146:3). Jesuba jaradiasi dayirã yiwidʼibʉrʉde kʼãwũã yiwidʼimarẽã, iya jarasi: «Dai Nokʼota nʉmadua. Bʉa krĩñata odʼaidʼe bʼʉa ʉ̃tre obʼe kĩrãkʼa, mawũã odʼaidʼe bʼʉa druadʼebidʼa» (Mateo 6:10). Daizeze Bedʼeabara jarabʉ, jõma makenaita naʉ̃ drʉadebema nokʼora, akʉza iyi Nokʼobʉrʉ ewari jõmaʉ̃nẽ zokʼaita (Daniel 2:44).

14. Bʉitara, ¿saʉ̃ta religion wãrĩnuara?

¹⁴ Maʉ̃ kʼarea dayirãbara naʉ̃ta krĩchaibara: «¿Kʼairaba jaradiabʉ Daizeze Bedʼeadeba? ¿Kʼairaba jaradiabʉ Daizeze trʉ̃arãra? ¿Kʼairata wãrĩnu ãyirai yi kãgabʉta ũdubipanʉ? ¿Kʼairabʉrʉ ĩjãpanʉ Daizezeba Jesu zokʼa bʉesita dayirãbari beimarẽã? ¿Kʼairatrʉ politikadera eda wãna ẽ akʉza botada ẽ? ¿Kʼairabʉrʉ jaradiapanʉ Daizeze Nokʼobʉrʉ ara oita naʉ̃ drʉade zʉbʉriabʉra?». Maʉ̃ra jõma Jeowa ʉ̃rʉ Kʼawuabipanʉrãbʉrʉ opanʉ (Isaías 43:10-12).

15. ¿Kʼãrẽta oibara Daizezeba kãgabʉta oita?

¹⁵ Bari krĩchabe ẽ Daizezebʉta, angelera kayiruarabida kʼawuapanʉ Daizezebʉra, mamina ãya ũrĩna ẽ Daizezeba jarabʉra (Santiago 2:19). Dayirãba  Daizezeba kãgabʉta okĩrãbʉbʉrʉ, iya zokʼabʉta oibara mawũã bari krĩchabe ẽ Daizezebʉta.

16. ¿Kʼãrẽa idubʉibara religion zerie ẽãra?

¹⁶ Daizezeba kãgabʉta oibara, idubʉibara religion zeri ẽãta. Isaiasba jarasi: «Idubʉidua, akʉza ãĩ wãidua kamaʉ̃ba, jaigʉa ẽã panaidua» (Isaías 52:11; 2 Corintios 6:17). Jõma religion zeri ẽãba opanʉra jõma idubʉibara.

17, 18. (1) ¿Kʼãrẽ Babilonia pʉwʉrʉ zromara? (2) ¿Kʼãrẽa ãĩ wãibara maʉ̃nebara?

¹⁷ ¿Sãwũã kʼawuapanʉ religion zeri ẽãta? Ãyara jarapanʉ Daizeze kãgapanʉta mamina oda ẽ Daizeze Bedʼeaba jarabʉra. Maʉ̃ kʼarea Daizeze Bedʼeabara jarabʉ, «Babilonia pʉwʉrʉ zroma» maʉ̃ra religion yi zeri ẽãra (Apocalipsis 17:5). Kue zroma berabarida tẽã, mejãcha ʉ̃tʉzesida religion zeri ẽãta Babilonianeba, maʉ̃rabara aripe jaradiada ẽ basi Daizeze ʉ̃rʉ. Maʉ̃ta jõmaʉ̃ drʉade wãsi. Bari jaradaita, Babiloniabara ĩjãbasi zeze ũbea, maʉ̃ra idira jarapanʉ Daizezeta, yi Warrata akʉza jaure zareata maʉ̃rãra iyabaʉta, mamina Daizeze Bedʼeabara jara ũrĩbibʉ, Jeowara abapaibʉta akʉza Jesura yi warrata (Juan 17:3). Adewara Babiloniarabara ĩjãbasi dayi beibʉrʉdera jaurera zokʼai bidata akʉza tʉbʉde zʉbʉriabʉta. Mamina maʉ̃ra jõma sewabasi (akʉra nota 14, 17 akʉza 18ta).

¹⁸ Daizezebara jarabʉ aranʉbai religion zeri ẽãra jõma makenaita (Apocalipsis 18:8). ¿Kʼãrẽa mesera bai ãĩ wãibara religion zeri ẽã nebara? Jeowabara kãgabʉ maʉ̃rabawara bei ẽ marẽã (Apocalipsis 18:4).

19. ¿Sãwũã kʼarebai Daizezebara iya kãgabʉta ora?

¹⁹ Bʉta religion zeri ẽã neba ãĩ wãra akʉza Jeowa  odebidara, bʉ mebẽrãba akʉza bʉ neũdukʼawuaraba kãgada ẽ bayi bʉa mawũã obʉrʉ kʼarea, maʉ̃ba ãyara bʉra zʉbʉria oseabʉ. Mamina perarãra Jeowaba kʼarebayi. Jeowaba bʉa ũdukʼawuabiyi naʉ̃ drʉa jõmaʉ̃nẽ, ẽbẽra ãyirai mejãcha yi kãga ũdubipanʉta akʉza ewari jõmaʉ̃nẽ bakĩrãpanʉta ẽjũã kĩrãwãreãnẽ (Marcos 10:28-30). Bʉ mebẽrãba akʉza neũdukʼawuaraba bʉ Jeowa ode bʼaita ãya kãga ẽ mina, idubʉrãra, ãyabida Daizeze Bedʼea kʼawuaseabʉ tẽãne.

20. ¿Kʼãrẽa yibia religion wãrĩnuarare bʼaira?

²⁰ Aranʉ bai Daizezebara jõma makenañi ẽbẽra kayiruarãra akʉza iyi Nokʼoba zokʼayi naʉ̃ drʉara (2 Pedro 3:9, 13). Maʉ̃ra jõma yibiabayi, akʉza maʉ̃ ewaridera jõmaʉ̃ba abapai kãgapanañi Jeowata. Maʉ̃ kʼarea kʼãwũãẽna krĩchara religion wãrĩnuarare eda bʼaita.