Jeowara dayirã yibari akʉza dayirã oda iyira audre buru bia dayirãira. Adewara mejãcha krĩchabʉ dayirãra maʉ̃daʉcha kãga. Iyara oẽbasi ẽbẽrarã ãyikʉza yi zokʼabamarẽã (Jeremías 10:23). Abʼarika wũãwũãraba yibariba kʼarebamarẽã nesidabʉ kĩrãkʼa, ẽbẽrarã naʉ̃ drʉade bʉrabida mawũã nesidabʉ Daizezeba kʼarebamarẽã (Isaías 48:17, 18). Wãrĩnu Daizeze bedʼearadebemaba dayirã kʼarebabʉra Daizezeba bari diada. Akʉra 2 Timoteo 3:16.

Wãrĩnu Daizeze bedʼearadebema akʉza leyba jaradiabʉ dayi sãwũãbaita adewara jaradiabʉ sãwũã ũduita ewari jõmaʉ̃nẽbaita. Iya dayirãta osibaera, sobiade ũrĩbara iya jaradiabʉra. Akʉra Salmo 19:7, 11 akʉza Revelación (Apocalipsis) 4:11.

Wãrĩnu Daizeze bedʼearadebema, maʉ̃ra biga kʼawuaita sãwũã oita bedʼea zroma kĩrãbio zebʉrʉde. Mamina leybara jaradiabʉ nekʼãrẽ berabaridogode kʼãrẽ oita (Deuteronomio 22:8). Bia krĩchadaibara bia ũrĩta sãwũã oibarata wãrĩnu Daizeze Bedʼearadebemaba jaradiabʉta, daya bedʼea zroma erbʉde (Proverbios 2:10-12). Daizeze Bedʼeabara jaradiabʉ dayirã bebʉra Daizezeba diadata. Naʉ̃ wãrĩnu Daizeze bedʼearadebemaba jaradiabʉra yibia jʉra kʼawuabaita dayi trajabʉde dayi deda akʉza dayi ode wãne. Akʉra Hechos 17:28, DB.

Jesuba kĩrã ũme jarasi wãrĩnu Daizeze bedʼearadebemata. Naarabemara jarasi Daizezera soiduba kãgaidua, bʉyi jaureiduba, akʉza bʉyi krĩchaiduba. Dayirãba naʉ̃ta krĩchadaibara nekʼãrẽ oinaẽna (Proverbios 3:6). Yi ẽbẽra naʉ̃ obʉra Daizeze neũdukʼawuabayi, adewara ewari jõmaʉ̃nẽbayi akʉza wãrĩnu sobiapanañi. Akʉra Mateo 22:36-38, DB.

Yi ũmeta, jaradiasi wuabemabawara ibiadepanamarẽã (1 Corintios 13:4-7). Dayirãba mawũã odara Daizezeba ẽbẽrarã akʉbʉ kĩrãkʼa opanañi. Akʉra Mateo 7:12, DB akʉza 22:39, 40, DB.

Wãrĩnu Daizeze bedʼearadebemaba kʼarebabʉ kãgaita akʉza ãbapanaita yi mebẽrãbawara (Colosenses 3:12-14). Naʉ̃ abaʉdebemaba kʼarebabʉ, yi juwa jidabʉrãra akʉza jaradiabʉ ewari jõmaʉ̃nẽbaibarata. Akʉra Génesis 2:24.

Wãrĩnu Daizeze bedʼearadebemata ũrĩpanʉbʉrʉ kʼarebayi nekʼãrẽ bia mejãcha kãgaẽbaita, akʉza krĩcha zroma oẽbaita. Ʉ̃kʉrʉbara jʉrʉpanʉ trajamarẽãra ẽbẽra wãrĩnu Daizeze bedʼearadebemaba jarabʉ obʉtrʉ, kẽrẽpabʉta akʉza nezrugaẽbʉta (Proverbios 10:4, 26; Hebreos 13:18). Adewara jaradiabʉ Daizeze Bedʼeabara dayirã sobiabaibarata daya nesidabʉ erbʉdeba, mawũã jʉrʉẽbaita audre nekʼãrẽ biata Daizeze neũdukʼawua baikaʉde. Akʉra Mateo 6:24, 25, 33, DB akʉza 1 Timoteo 6:8-10.

Wãrĩnu Daizeze bedʼearadebemaba kʼarebabʉ dayirã biabaita, bʉ ley itua dobeẽ ʉ̃rʉ, maʉ̃ba kʼarebabʉ kayaẽbaita, akʉza beuẽbaita (Proverbios 14:30; 22:24, 25; 23:20). Jeowabara iduaribibʉ wiña domarẽã, mamina beunʉmaine dobeẽãta (Salmo 104:15; 1 Corintios 6:10). Wãrĩnu Daizeze bedʼearadebemaba kʼarebabʉ, akʉita dayirã sãwũãbʉta akʉza dayirã krĩchata (Salmo 119:97-100). Mamina kristiano wãrĩnurabara krĩchadaẽ ãyitrʉ jʉ̃zaba biabaita, awuarabʉrʉ Daizeze Jeowatrʉ wawia ũdubipanʉ. Akʉra Mateo 5:14-16, DB.