Mebẽrã:

Dayirãba Jeowata kãgapanʉ baera akʉza ẽbẽrarãta, maʉ̃ba jaradiapanʉ naʉ̃ drʉa jõmaʉ̃nẽ, mawũã bʉrʉ kʼoedamarẽã (Mat. 28:​19, 20; Mar. 12:​28-31). Jʉ̃zaba dayikʉza krĩcha ẽã. Wãrĩnu kãgata ũdubibʉbʉrʉ ẽbẽrarã soidu zeyi jipa, mawũã «ewari jõmaʉ̃nẽ» panamarẽã (Hech. 13:48).

Nawedara dayirãbara burude kʼawuapanasi kʼãrẽ ʉ̃rʉ jaradiaita adewara amaepanasi kartarata. Mamina atiara zarea odaibara ẽbẽrarãbawara bia bedʼeaita, burude kʼawuai kaude kʼãrẽ jaraita. Dayirãbara kãgara ũdubipanʉ bedʼeapanʉne ãyi ẽbẽrarãba kʼawuakĩrãbʉ ʉ̃rʉ, maʉ̃bara jarakĩrãbʉ dayirãbara kĩrãkita krĩchaibarata ẽbẽrarãba kʼãrẽta kʼawuakĩrãbʉta akʉza kʼãrẽta krĩchabʉta. ¿Sãwũã kʼarebai naʉ̃ kartabara maʉ̃ oira?

Naʉ̃ kartabara bedʼea 12 erbʉ dayirãba kʼãrẽ nebia oũdubita, mawũã ẽbẽrarã Jesu kʼaidubema babita dayirãba kãga ũdubibʉdeba. Naʉ̃ kartade nebia aba abakabʉra, Daizeze Bedʼeadeba jidasida Jesuba odata adewara ʉ̃kʉrʉ kristiano siglo nããbemanebemaba odata. Maʉ̃ nebiara aba abaka erpanaibara dayirãbara nrʉemaza jaradiabʉrʉde ẽbẽrarã. Naʉ̃ kartadera kʼawuadayi kʼãrẽa yibiata maʉ̃ nebia ũdubira yi nãã bedʼea jʉ̃drʉita, jẽda akʉ wãbʉrʉde akʉza Daizeze Bedʼea kʼawuabarira jaradiabʉrʉde.

Bʉa naʉ̃ bedʼea 12bʉdebemata akʉbʉde kĩrãkita krĩchara sãwũã ũdubiseabʉta maʉ̃ nebiara bʉa jaradiabʉrʉde bʉ komunidade. Bʉa kãga erbʉra audre waribira Jeowa bari akʉza ẽbẽrarã bari. Ũdubi ẽ baibara i awaʉba kãgabʉta awuarabʉrʉ wãrĩnu soiduba kãgabʉta ũdubibara, mawũã ẽbẽrarãra Jesu kʼaidu panamarẽã.

Mebẽrã, daitara mejãchade yibia jipa marabawara trajaita akʉza Jeowa ode ãba panaita. Jeowabara marara mejãchade kʼarebayi jipa, maraba ede baera ẽbẽrarãra iyi ode.