1 Corintios 13:1-13
-
Jiñi cʼuxbiya jumpʼejlʌch bij ñumen ñuc bʌ (1-13)
13 Mi mic chaʼlen tʼan ti jiñi i tʼan wiñicob yicʼot ángelob pero maʼañic j cʼuxbiya, lajalon bajcheʼ jumpʼejl campana o jumpʼejl tambor muʼ bʌ i wen sub i bʌ.
2 Mi joñon miʼ mejlel c sub jiñi tʼan tac muʼ bʌ i yʌqʼueñon Dios, mic chʼʌmben i sujm pejtelel jiñi chʼujul bʌ tʼan tac mucul bʌ, tsʼʌcʌl c ñaʼtʌbal i muʼto c mejlel c ñijcan wits tac tiʼ caj wen pʼʌtʌl jiñi c ñopoñel pero maʼañic j cʼuxbiya, maʼañic j cʼʌjñibal.
3 Mi mi cʌcʼ pejtelel chuqui an c chaʼan chaʼan mic weʼsan yambʌlob o mi cʌcʼ j cuxtʌlel chaʼan ñuc mi cubin c bʌ pero maʼañic j cʼuxbiya, maʼañic i cʼʌjñibal c chaʼan.
4 Jiñi am bʌ i cʼuxbiya yujil pijt yicʼot an i yutslel. Jiñi am bʌ i cʼuxbiya maʼañic i michʼ pusicʼal chaʼan chuqui an i chaʼan yambʌlob. Maʼañic miʼ pʌs i bʌ ti ñuc, maʼañic miʼ chañʼesan i bʌ tiʼ tojlel yambʌlob,
5 mach lecojic i melbal, maʼañic miʼ bajñel sʌclan i wenlel, mach ti orajic miʼ michʼan. Maʼañic miʼ tsic majlel chuqui miʼ tumbentel.
6 Maʼañic miʼ yubin i tijicñʌyel cheʼ miʼ yujtel mach bʌ tojic, miʼ yubin i tijicñʌyel chaʼan jiñi i sujmlel.
7 Mach yʌlʌyic chuqui miʼ yujtel maʼañic miʼ lujbʼan, miʼ laj ñop, miʼ laj pijtan, miʼ laj cuch.
8 Jiñi cʼuxbiya maʼañic baʼ ora miʼ jilel. Pero jiñi majtañʌl chaʼan miʼ mejlel lac sub muʼ bʌ i yʌl Dios mi caj i jilel, jiñi majtañʌl chaʼan mi lac chaʼlen tʼan ti yambʌ tʼan tac mi caj i jilel, jiñi majtañʌl chaʼan cabʌl chuqui mi laj cʌn mi caj i jilel.
9 Come mach tsʼʌcʌlic chuqui cʌmbil lac chaʼan i mach tsʼʌcʌlic mi lac sub jiñi tʼan tilem bʌ ti Dios,
10 pero cheʼ bʌ miʼ julel jiñi tsʼʌcʌl bʌ, mi caj i jisʌntel jiñi mach bʌ tsʼʌcʌlic.
11 Cheʼ bʌ alʌlonto, tsaʼ c chaʼle tʼan bajcheʼ juntiquil alʌto bʌ, cheʼ tsaʼ c ñaʼta bajcheʼ juntiquil alʌto bʌ i cheʼʌch tsaʼ c tsajibe* i sujmlel chuqui tac an. Pero wʌleʼli cheʼ wiñicoñix, tsaʼix j cʌyʌ tic pat jiñi i chaʼan tac bʌ alʌl.
12 Wʌleʼli lajal bajcheʼ woli laj qʼuel ti jumpʼejl espejo mach bʌ wen tsiquilic, pero ti wiʼil wen tsiquilix mi caj laj qʼuel. Ti ili ora mach tsʼʌcʌlic cʌmbil c chaʼan, pero ti wiʼil mi caj j cʌn ti tsʼʌcʌl, cheʼ bajcheʼ cʌmbilon ti tsʼʌcʌl.
13 Pero mi caj i cʌytʌl ili uxchajp: Jiñi ñopoñel, jiñi pijtaya yicʼot jiñi cʼuxbiya. Pero jiñi ñumen ñuc bʌ tiʼ pejtelel jiñʌch jiñi cʼuxbiya.
Nota tac
^ O «wen qʼuelbe».
