1 Corintios 2:1-16
2 Jin chaʼan, hermanojob, cheʼ bʌ tsajñon yaʼ baqui añetla, maʼañic tsaʼ c chaʼle tʼan bajcheʼ jiñi wen añoʼ bʌ i ñaʼtʌbal chaʼan mic subeñetla jiñi chʼujul bʌ i tʼan Dios mucul bʌ yicʼot mach chaʼañic mic pʌsbeñetla chaʼan cabʌl c ñaʼtʌbal.
2 Come cheʼ bʌ tsaʼ ajñiyon quicʼotetla, tsaʼ cʌlʌ chaʼan yaʼ jach mi caj cʌcʼ c ñaʼtʌbal tiʼ tojlel Jesucristo yicʼot cheʼ bʌ yaʼ jichʼil ti teʼ.
3 Cheʼ bʌ tsajñiyon yaʼ baqui añetla cʼuñon, an c bʌqʼuen yicʼot wen tsiltsilñayon.
4 I cheʼ bʌ tsaʼ c pejcayetla yicʼot tsaʼ c subeyetla jiñi wen tʼan, maʼañic tsaʼ j cʼʌñʌ tʼan tac muʼ bʌ i cʼʌñob jiñi wen añoʼ bʌ i ñaʼtʌbal chaʼan miʼ ñijcʌbeñob i pusicʼal yambʌlob, jiñi c tʼan tsiʼ pʌsʌ i pʼʌtʌlel jiñi chʼujul bʌ espíritu
5 chaʼan maʼañic mi laʼ wʌcʼ laʼ ñopoñel tiʼ ñaʼtʌbal wiñicob, cojach tiʼ pʼʌtʌlel Dios.
6 Mi lac taj ti tʼan ili ñaʼtʌbalʌl joñonla pʼʌtʌloñixbʌla ti lac ñopoñel, pero mach jiñic jiñi i ñaʼtʌbal ili pañimil mi jiñicto jiñi i ñaʼtʌbal yumʌlob ti pañimil, muʼ bʌ caj i jilel.
7 Woli bʌ lac taj ti tʼan jiñʌch jiñi i ñaʼtʌbal Dios tsaʼ bʌ ajli yaʼ ti chʼujul bʌ tʼan mucul bʌ, jiñi ñaʼtʌbalʌl mucul bʌ, tsaʼ bʌ i wʌn ñaʼta Dios chaʼan lac ñuclel cheʼ bʌ maxto añic ili jontol bʌ pañimil.
8 Ili jiñʌch jiñi ñaʼtʌbalʌl maʼañic bʌ tsiʼ cʌñʌ mi juntiquilic yumʌl ti pañimil come cheʼ tsaʼic i cʌñʌyob maʼañic tsiʼ jichʼchocoyob ti teʼ jiñi ñuc bʌ lac Yum.
9 Pero cheʼʌch bajcheʼ tsʼijbubil: «Maʼañic majqui qʼuelbil i chaʼan, maʼañic majqui ubibil i chaʼan i mi jiñicto jiñi i pusicʼal wiñic ñaʼtʌbil i chaʼan chuqui tac an i chajpa Dios tiʼ tojlel jiñi muʼ bʌ i cʼuxbiñob».
10 Come joñonla tsiʼ pʌsbeyonla Dios tiʼ tojlel jiñi espíritu, come jiñi espíritu miʼ tsajin* pejtelel chuqui an, jinto jiñi mucul tac bʌ i ñaʼtʌbal Dios.
11 ¿Am ba majqui miʼ mejlel i cʌmben i ñaʼtʌbal juntiquil wiñic? Maʼañic. Cojach i pusicʼal jiñi wiñic miʼ ñaʼtan iliyi. Cheʼʌch jaʼel tiʼ tojlel Dios, maʼañic majqui miʼ mejlel i cʌmben i ñaʼtʌbal, cojach jiñi i yespíritu Dios.
12 Pero joñonla maʼañic tsaʼ aqʼuentiyonla jiñi i yespíritu pañimil, tsaʼ aqʼuentiyonla jiñi espíritu tilem bʌ ti Dios chaʼan mi laj cʌn chuqui tac tsiʼ yʌqʼueyonla tiʼ yutslel.
13 Joñonla jaʼel mi la cʌleʼ tac iliyi, pero maʼañic mi laj cʼʌn tʼan tac tsaʼ bʌ i pʌsbeyonla jiñi wen añoʼ bʌ i ñaʼtʌbal, mi laj cʼʌn tʼan tac muʼ bʌ i pʌsbeñonla jiñi espíritu. I mi laj cʼʌn tʼan tac tilem bʌ tiʼ pʼʌtʌlel chaʼan mi lac tsictesan jiñi i chaʼan tac bʌ Dios.
14 Jiñi wiñic chumul bʌ cheʼ bajcheʼ yom i bʌcʼtal maʼañic miʼ chʼʌm i chaʼan tac bʌ jiñi i yespíritu Dios come maʼañic i cʼʌjñibal miʼ qʼuel, i maʼañic miʼ mejlel i cʌn come yom miʼ tsajin yicʼot i coltaya jiñi chʼujul bʌ espíritu.
15 Pero jiñi wiñic chumul bʌ cheʼ bajcheʼ yom jiñi chʼujul bʌ espíritu miʼ tsajin pejtelel chuqui an, pero mi juntiquilic wiñic miʼ mejlel ti meloñel tiʼ tojlel.
16 Come «¿majqui cʼotem i cʌmben i ñaʼtʌbal Jehová* chaʼan miʼ mejlel i cʌntesan?». Pero joñonla añʌch lac chaʼan i ñaʼtʌbal Cristo.
