1 Tesalonicenses 1:1-10
1 I chaʼan Pablo, Silvano* yicʼot Timoteo tiʼ tojlel jiñi congregación am bʌ ti Tesalónica i chaʼan bʌ Dios jiñi Tatʌl yicʼot i chaʼan lac Yum Jesucristo:
Tajala jiñi ñuc bʌ i yutslel yicʼot i ñʌchʼtʌlel Dios.
2 Tiʼ pejtelel ora mi cʌqʼuen lon wocolix i yʌlʌ Dios cheʼ bʌ mic tajet lon ti tʼan ti lon coración ti laʼ pejtelel,
3 i tiʼ tojlel Dios jiñi lac Tat mi lon j cʼajtesan tiʼ pejtelel ora jiñi eʼtel tsaʼ bʌ laʼ mele chaʼan laʼ ñopoñel, bajcheʼ mi laʼ chaʼlen wersa chaʼan jiñi laʼ cʼuxbiya, i cabʌl chuqui mi laʼ cuch chaʼan jiñi laʼ pijtaya ti lac Yum Jesucristo.
4 Hermanojob cʼuxbibiletbʌla ti Dios, cujil lojon chaʼan jiñʌch tsiʼ yajcayetla,
5 come jiñi wen tʼan tsaʼ bʌ lon c subu mach ti tʼañic jach tsaʼ cʼoti ti laʼ tojlel, yicʼotʌch i coltaya jiñi chʼujul bʌ espíritu. Cujil lojon chaʼan i sujmʌch jiñi tsaʼ bʌ lon c subeyetla, i jiñi wen tʼan tsaʼʌch i wen coltayetla. I jatetla laʼ wujil bajcheʼ yilal bʌ wiñic tsaʼ sujtiyon lon ti laʼ tojlel chaʼan laʼ wenlel.
6 Cheʼ jaʼel, tsaʼ laʼ lajiyon lon yicʼot tsaʼ laʼ laji lac Yum, anquese woli laʼ ñusan cabʌl wocol tsaʼ laʼ chʼʌmʌ jiñi wen tʼan ti laʼ tijicñʌyel muʼ bʌ i tilel ti jiñi chʼujul bʌ espíritu.
7 Cheʼ bajcheʼ jiñi tsaʼ sujtiyetla ti wem bʌ ejemplo i chaʼan pejtelel jiñi xñoptʼañob ti Macedonia yicʼot ti Acaya.
8 Tiʼ sujm, wocolix i yʌlʌ jiñi laʼ coltaya, mach cojic jach i tʼan Jehová* tsaʼ ubinti ti Macedonia yicʼot ti Acaya, jiñi laʼ ñopoñel ti Dios baqui jach tsaʼ pam pujqui jaʼel, jin chaʼan maʼañic chuqui yom mi lon cʌl.
9 Come muʼto i bej alob cheʼ bʌ cojaxto tsaʼ laj qʼuele lac bʌ yicʼot bajcheʼ tsaʼ laʼ cʌyʌ jiñi melbil tac jach bʌ laʼ dios i tsaʼ sujtiyetla baʼan Dios chaʼan mi laʼ sujtel ti xyaj eʼtel i chaʼan juntiquil cuxul bʌ Dios yicʼot i sujm bʌ.
10 Chaʼan mi laʼ pijtan jiñi i Yalobil tilem bʌ ti panchan, tsaʼ bʌ i chʼojyesa* yaʼ baqui an chʌmeñoʼ bʌ, ili jiñʌch Jesús, muʼ bʌ i coltañonla loqʼuel ti jiñi michʼajel muʼ bʌ caj i tilel.