1 Timoteo 6:1-21
6 Jiñi añoʼ bʌ bajcheʼ xyaj eʼtel yom miʼ chʌn qʼuelob ti ñuc jiñi i yumob, chaʼan maʼañic baʼ ora miʼ yʌjlel mach bʌ weñic tiʼ tojlel jiñi i cʼabaʼ Dios yicʼot i cʌntesa tac.
2 I jiñi xñoptʼañoʼ bʌ i yumob mach yomic maʼañic miʼ qʼuelob ti ñuc tiʼ caj hermanojob. Ñumen wento yom miʼ melbeñob i yeʼtel, come xñoptʼañob yicʼot cʼuxbibilob jiñi muʼ bʌ i tajob i wenlel chaʼan jiñi i yeʼtelob.
Jatet chʌn pʌsʌ tac iliyi yicʼot chʌn acʼʌ ili ticʼojel tac.
3 Mi juntiquil wiñic an chuqui yambʌ miʼ pʌs i mach lajalic yicʼot jiñi wem bʌ cʌntesa* tilem bʌ ti lac Yum Jesucristo mi jiñicto yicʼot jiñi cʌntesa tac chaʼan bʌ lac xucʼtʌlel ti Dios,
4 wen ñuc miʼ yubin i bʌ i maʼañic chuqui miʼ chʼʌmben i sujm. Miʼ cʌlʌx mulan leto* yicʼot i contrajin yambʌlob tiʼ tʼan. Ili jiñʌch muʼ bʌ i techben i tsʌytsʌyñiyel i pusicʼal, leto, jopʼtʼan,* miʼ toʼol tech i ñaʼtan mach bʌ weñic tiʼ tojlel yambʌ
5 i ti bele ora miʼ chaʼlen leto tiʼ caj chuqui tac maʼañic bʌ i cʼʌjñibal muʼ bʌ i techob wiñicob mach bʌ tojobic i ñaʼtʌbal maʼañic bʌ i chaʼañob jiñi i sujmlel, come miʼ ñaʼtañob chaʼan cheʼ bʌ miʼ chʼujutesañob Dios an chuqui miʼ tajob chaʼan bajñel i wenlelob.
6 I sujmʌch, jiñi i chʼujutesʌntel Dios cabʌlʌch chuqui miʼ yʌqʼueñonla mi tijicñayonla chaʼan chuqui tac an lac chaʼan.
7 Come maʼañic chuqui tsaʼ lac chʼʌmʌ tilel ti pañimil i maʼañic chuqui miʼ mejlel lac chʼʌm majlel.
8 Jin chaʼan, mi an i bʌl lac ñʌcʼ yicʼot lac pislel, yom tijicñayonla chaʼan jiñi.
9 Pero jiñi yomoʼ bʌ sujtel ti rico miʼ yajlelob ti mulil, ti yac tac yicʼot tiʼ mulʌntel chuqui bajñel yomob mach bʌ añic i cʼʌjñibal i muʼ bʌ i mejlel i ticʼlañob, iliyi miʼ yʌqʼueñob wocol yicʼot chʌmel.
10 Come jiñi i cʼuxbintel taqʼuin jiñʌch i wiʼ pejtelel chuqui mach weñic, i tiʼ caj miʼ yʌcʼob ti colel jiñi, an tsaʼix bʌ i cʌyʌyob chuqui ñopolob i chaʼan i tsiʼ tajayob cabʌl wocol.
11 Pero jatet, i wiñiquet bʌ Dios, putsʼtan pejtelel iliyi. Sʌclan chuqui toj, jiñi xucʼtʌlel ti Dios, jiñi ñopoñel, jiñi cʼuxbiya, jiñi i cuchol wocol yicʼot jiñi utslel.
12 Chaʼlen wersa ti jiñi wem bʌ guerra chaʼan bʌ jiñi a ñopoñel. Yom tsʌts maʼ chuc a bʌ ti jiñi cuxtʌlel maʼañic bʌ i jilibal, Dios tsiʼ yajcayet chaʼan maʼ taj, yicʼot wen tsaʼ jamʌ acʼʌ ti cʌñol tiʼ tojlel cabʌl lac piʼʌlob.
13 Tiʼ tojlel Dios, muʼ bʌ i yʌqʼuen i cuxtʌlel pejtelel chuqui an, yicʼot tiʼ tojlel Cristo Jesús, tsaʼ bʌ i subu ti wen jiñi i ñopoñel tiʼ tojel i wut Poncio Pilato, mic subeñet
14 chaʼan maʼ jacʼ ti toj jiñi mandar i maʼañic chuqui miʼ yʌjlel tiʼ tojlel cʼʌlʌl cheʼ bʌ miʼ pʌs i bʌ lac Yum Jesucristo,
15 jiñi tijicña bʌ yicʼot cojach bʌ an i pʼʌtʌlel mi caj i pʌs i bʌ cheʼ tiʼ yorajlel waʼchocobil bʌ. Jiñʌch jiñi Rey tiʼ tojlel jiñi muʼ bʌ i chaʼleñob yumʌntel bajcheʼ reyob yicʼot Yumʌl tiʼ tojlelob jiñi yumʌlob,
16 jiñi cojach bʌ mach bʌ yujilic chʌmel, jiñi chumul bʌ yaʼ baqui sʌc jaman baqui maʼañic majqui miʼ mejlel ti cʼotel, mi juntiquilic wiñic qʼuelbil i chaʼan mi muqʼuicto i mejlel i qʼuel. Laʼ aqʼuentic i ñuclel yicʼot i pʼʌtʌlel tiʼ pejtelel ora. Amén.
17 Aqʼueñob ili ticʼojel tac jiñi ricojoʼ bʌ ti ili ora: Mach yomic ñumen ñuc miʼ yubiñob i bʌ i mach i yʌcʼob i pijtaya ti jiñi chubʌʼañʌl tac muʼ bʌ i jilel, laʼ i yʌcʼob i pijtaya ti Dios, muʼ bʌ i wen aqʼueñonla pejtelel chuqui tac yom chaʼan mi lac ñusan lac bʌ.
18 Subeñob chaʼan miʼ melob chuqui wen, laʼ pʼojlic jiñi wem bʌ i melbalob, yom miʼ pʌsob i pʼejwlel* yicʼot yom miʼ tʼoxob chuqui añob i chaʼan,
19 i cheʼ bajcheʼ jiñi mi caj i tajob wen lets bʌ i tojol, mi caj i xucʼchocoñob wem bʌ i pijtaya chaʼan jiñi talto bʌ qʼuin, chaʼan tsʌts miʼ mejlel i chucob i bʌ ti jiñi i sujm bʌ cuxtʌlel.
20 Timoteo, cʌntan jiñi tsaʼ bʌ aqʼuentiyet ti a wenta, mach a ñʌchʼtan jiñi tʼan tac mach bʌ añic i sujmlel muʼ bʌ i contrajin Dios yicʼot jiñi ñaʼtʌbal tac tilem bʌ ti jiñi lac piʼʌlob poj añʌch bʌ chuqui yujilob miʼ ñaʼtañob, pero jiñi yujiloʼ bʌ miʼ jatsʼ i bʌ ti tʼan yicʼot jiñi i sujmlel.
21 Tiʼ caj ñuc miʼ yubiñob i bʌ chaʼan jiñi yujiloʼ bʌ, an tsaʼix bʌ i cʌyʌyob chuqui ñopolob i chaʼan.
Laʼ añic yicʼotetla jiñi ñuc bʌ i yutslel Dios.
Nota tac
^ O «cʌntesa muʼ bʌ i yʌcʼ wenlel».
^ O «quera».
^ O «tʼan tac muʼ bʌ i low yambʌlob».
^ O «mach yomic chʌcob».
