2 Corintios 1:1-24
1 I chaʼan Pablo, apóstol i chaʼan Cristo Jesús come cheʼʌch yom Dios, yicʼot i chaʼan jiñi la quermañu Timoteo tiʼ tojlel jiñi i congregación Dios am bʌ ti Corinto yicʼot tiʼ tojlel pejtelel jiñi chʼujuloʼ bʌ ti Acaya:
2 Tajala jiñi ñuc bʌ i yutslel yicʼot i ñʌchʼtʌlel Dios jiñi lac Tat yicʼot jiñi i chaʼan lac Yum Jesucristo.
3 Laʼ aqʼuentic i ñuclel jiñi i Dios yicʼot i Tat lac Yum Jesucristo, jiñʌch jiñi Tatʌl am bʌ i chaʼan jiñi ñuc bʌ pʼuntaya yicʼot jiñʌch jiñi Dios muʼ bʌ i ñuqʼuesʌben i pusicʼal lac piʼʌlob tiʼ pejtelel chuqui miʼ ñusañob.
4 Jiñʌch muʼ bʌ i ñuqʼuesan lac pusicʼal* tiʼ pejtelel lac wocol chaʼan yicʼot jiñi i ñuqʼuesʌntel lac pusicʼal woli bʌ la cʌqʼuentel ti Dios miʼ mejlel lac ñuqʼuesʌben i pusicʼal jiñi woli bʌ i ñusañob baqui jach bʌ wocol.
5 Come, cheʼ bajcheʼ cabʌl lac wocol tiʼ caj Cristo, mi lac wen ñuqʼuesʌbentel lac pusicʼal tiʼ tojlel Cristo jaʼel.
6 Weno, mi joñon lojon mi lon c ñusan wocol, chaʼañʌch mi lon c ñuqʼuesʌbeñetla laʼ pusicʼal yicʼot mi lon j coltañetla. I mi joñon lon mic ñuqʼuesʌbentel lon c pusicʼal, chaʼañʌch mi lon c ñuqʼuesʌbeñetla laʼ pusicʼal jaʼel. Ili i ñuqʼuesʌntel laʼ pusicʼal miʼ coltañetla laʼ cuch jiñi wocol tac muʼ bʌ lon c ñusan jaʼel.
7 An xucʼul bʌ lon c pijtaya ti laʼ tojlel, come cujil lojon chaʼan, cheʼ bajcheʼ jatetla woli laʼ ñusan wocol bajcheʼ joñon lojon, mi caj laʼ ñuqʼuesʌbentel laʼ pusicʼal jaʼel cheʼ bajcheʼ joñon lojon.
8 Hermanojob, com lojon chaʼan laʼ wujil chuqui ti wocol tac tsaʼ lon c ñusa ti jiñi tejclum tac am bʌ ti Asia. Wen wocol tsaʼ lon cubi jiñi tsaʼ bʌ lon c ñusa, i tsaʼto lon c ñaʼta mi cuxulixto mi caj lon j cʌytʌl o maʼañic.
9 Tiʼ sujm, cheʼ bajcheʼ acʼbiloñix lon chaʼan mi lon c tsʌnsʌntel tsaʼ cubi lojon. Tsaʼ ujti iliyi chaʼan maʼañic mi lon c bajñel ñop ti lon c tojlel, chaʼañʌch mi lon c ñop tiʼ tojlel jiñi Dios muʼ bʌ i chʼojyesan* chʌmeñoʼ bʌ.
10 Jin tsiʼ coltayon lon ti jiñi ñuc bʌ wocol chaʼan bʌ chʌmel, i mi caj i chaʼ coltañon lojon. I mi cʌcʼ lon c pijtaya tiʼ tojlel, chaʼan mi caj i bej coltañon lojon.
11 Jatetla jaʼel mi laʼ mejlel laʼ coltañon lojon cheʼ mi laʼ chaʼlen oración ti wocol tʼan ti lon c tojlel. Come mi cabʌlob muʼ bʌ i cʼajtiñob ti lon c tojlel, Dios mi caj i ñʌchʼtan i mi caj i coltañon lon, jin chaʼan cabʌlob muʼ bʌ caj i yʌqʼueñob wocolix i yʌlʌ.
12 Come mij qʼuel lon c bʌ ti ñuc tiʼ caj iliyi: Jiñi lon j conciencia miʼ yʌcʼ ti cʌñol chaʼan ti pañimil, i ñumento ti laʼ tojlel, sʌc tsaʼ ajñi lon c pusicʼal ti chuqui tsaʼ lon c mele yicʼot i sujmʌch tsaʼ bʌ lon c mele cheʼ bajcheʼ tilem ti Dios, tsaʼ lon c pʌsʌ jiñi ñuc bʌ i yutslel Dios i mach jiñic i ñaʼtʌbal lac piʼʌlob.
13 Come tiʼ sujm maʼañic woli lon c tsʼijbubeñetla mach bʌ añic miʼ mejlel laʼ pejcan* yicʼot maʼañic bʌ mi laʼ chʼʌmben i sujm. I mic ñop chaʼan mucʼʌch caj laʼ laj chʼʌmben i sujm iliyi,
14 cheʼ bajcheʼ tsaʼix laʼ tsʼitaʼ ñaʼta chaʼan jatetla mi laʼ taj laʼ tijicñʌyel ti lon c tojlel, i cheʼʌch jatetla jaʼel mi caj laʼ wʌqʼueñon lon c tijicñʌyel tiʼ qʼuiñilel lac Yum Jesús.
15 Mucʼʌch c ñop iliyi, jin chaʼan ñaxan jatetla com majlel c julaʼtañetla tsaʼ cʌlʌ, chaʼan mi laʼ wubin laʼ tijicñʌyel tiʼ chaʼyajlel.*
16 Tsaʼ c lon ñaʼta chaʼan mic majlel c julaʼtañetla cheʼ bʌ majlel mucʼon ti Macedonia yicʼot cheʼ bʌ mic sujtel, chaʼan ti wiʼil jatetla mi laʼ majlel laʼ cʌyon ti ojlil bij cheʼ bʌ mic majlel ti Judea.
17 Weno, cheʼ bʌ tsaʼ c ñaʼta jiñi, mach ti orajic jach tsaʼ c ñaʼta, ¿o cheʼʌchi? ¿O chaʼan jach ba mic bajñel taj c wenlel cheʼ bʌ an chuqui mic chajpan tac i jin chaʼan mi cʌl «Mucʼʌch, mucʼʌch» i ti wiʼil «Maʼañic, maʼañic»?
18 Come, cheʼ bajcheʼ tiʼ sujm miʼ mejlel lac ñopben i tʼan Dios, jiñi lon c tʼan mucʼʌch i mejlel ti ñojpel jaʼel. Maʼañic mi caj lon cʌl «mucʼʌch» i ti wiʼil mi lon cʌl «maʼañic».
19 Come jiñi i Yalobil Dios, Jesucristo, muʼ bʌ lon cʌqʼueñet laʼ cʌn, joñon, Silvano* yic’ot Timoteo, maʼañic tsiʼ yʌlʌ mucʼʌch i ti wiʼil chaʼan maʼañic. Come cheʼ bʌ tsiʼ yʌlʌ mucʼʌch, tsaʼʌch tsʼʌctiyi.
20 Pejtelel jiñi wʌn albil bʌ i chaʼan Dios, woliʼ tsʼʌctiyel tiʼ tojlel Jesús. Jin chaʼan, tiʼ cʼabaʼ mi lac suben amén jiñi Dios chaʼan mi la cʌqʼuen i ñuclel.
21 Pero Dios jiñʌch muʼ bʌ i yʌcʼ i tʼan chaʼan jatetla yicʼot joñon lon i chaʼañonla Cristo yicʼot chaʼan jiñʌch tsiʼ yajcayonla.
22 Jin tsiʼ yʌqʼueyonla jaʼel jiñi i sellojlel i tsiʼ yʌqʼueyonla jiñi espíritu ti lac pusicʼal chaʼan miʼ pʌs jiñi majtañʌl muʼ bʌ caj i tilel.
23 Wʌle mi cʌcʼ Dios bajcheʼ testigo tij contra chaʼan mi laʼ ñop chaʼan maxto ajñemoñic ti Corinto chaʼan maʼañic mi laʼ ñumen taj laʼ chʼijyemlel.
24 Maʼañic woli cʌl chaʼan i yumon lon jiñi laʼ ñopoñel, come xucʼuletla chaʼan laʼ ñopoñel, lac piʼʌl lac bʌ ti eʼtel chaʼan tijicña mi laʼ wajñel.
Nota tac
^ O «chʼejlʼesañonla».
^ O «tech».
^ O tajol: «maxto bʌ wen cʌmbilic laʼ chaʼan».
^ O tajol: «chaʼan chaʼyajl mi laʼ taj laʼ wenlel».
^ Cʌmbil bʌ jaʼel bajcheʼ Silas.
