2 Corintios 10:1-18
10 Tiʼ sujm, com mi laʼ jacʼ jiñi muʼ bʌ c subeñetla. Cheʼ bʌ mic pejcañetla woli c lajin Cristo, am bʌ i pecʼlel yicʼot i yutslel, maʼañic j cʼʌjñibal yilal cheʼ bʌ yaʼañon quicʼotetla, pero chʼejloñʌch* cheʼ bʌ mach yaʼic añon.
2 Mij cʼajtin ti wocol tʼan chaʼan cheʼ bʌ mij cʼotel mach cʼʌñʌlic mic pʌs c chʼejlel yicʼot mic mel chuqui ñumen tsʌts bʌ tiʼ tojlel chaʼtiqui uxtiquil muʼ bʌ i ñaʼtañob chaʼan woli lon c tsajcan chuqui miʼ ñaʼtañob wiñicob, anquese mic ñaʼtan chaʼan mucʼʌch caj c mel.
3 Come anquese chumulon lojon bajcheʼ wiñicob, mach cheʼic woliyon lojon ti guerra bajcheʼ miʼ chaʼlen wiñicob.
4 Come jiñi lon queʼtijib ti guerra mach jiñic muʼ bʌ i cʼʌn jiñi lac piʼʌlob ti pañimil, jiñʌch muʼ bʌ i yʌqʼueñon lojon Dios, añʌch i pʼʌtʌlel chaʼan miʼ jem jiñi wen tsʌts tac bʌ chucul.
5 Come woli c jem lojon ñaʼtʌbalʌl tac yicʼot pejtelel chuqui miʼ mʌctan lac piʼʌlob chaʼan miʼ cʌñob Dios. Woli c sujtesan lojon bajcheʼ xcʌjchel pejtelel ñaʼtʌbalʌl chaʼan miʼ jacʼben i tʼan Cristo.
6 Chajpʌbiloñix lojon chaʼan mi lon cʌqʼuen i toj i mul pejtelel bej xñusatʼan bʌ, mi caj lon c mel iliyi jinto cheʼ bʌ tsaʼix laʼ pʌsʌ chaʼan junyajl xjacʼtʼañetʌchla.
7 Jatetla mi laʼ chaʼlen meloñel tiʼ tojlel chuqui tac an chaʼan jach bajcheʼ yilal mi laʼ qʼuel. Mi an majqui miʼ wen ñop chaʼan i chaʼañʌch Cristo, laʼ i chaʼ wen ñaʼtan iliyi: Cheʼ bajcheʼ i chaʼañʌch Cristo, joñon lojon i chaʼañoñʌch lon jaʼel.
8 Come, anquese muʼto c tsʼitaʼ ñumen qʼuel c bʌ ti ñuc chaʼan jiñi eʼtel tsaʼ bʌ i yʌqʼueyon lojon lac Yum chaʼan mi lon c pʼʌtʼesañetla, i mach chaʼañic mi lon c jisañetla, maʼañic chucoch yom mij quisñin c bʌ.
9 Pero mach comic cʌcʼ ti ñaʼtʌntel chaʼan woli c ñop c bʌcʼtesañetla ti jiñi j carta tac.
10 An muʼ bʌ i yʌlob: «Yaʼ tiʼ carta tac añʌch i pʼʌtʌlel i tʼan yicʼot chʼejlʌch, pero cheʼ bʌ wʌʼix an maʼañic miʼ yʌcʼ ti toj sajtel lac pusicʼal chaʼan bajcheʼ yilal i cheʼ bʌ miʼ chaʼlen tʼan maʼañic chuqui yom bʌ miʼ ñʌchʼtʌntel».
11 Jiñi muʼ bʌ i yʌl jiñi, laʼ i cʼajtesan chaʼan jiñi muʼ bʌ lon cʌl ti jiñi carta tac cheʼ bʌ mach yaʼic añon lon jiñʌch muʼ bʌ caj lon c mel cheʼ bʌ yaʼix añon lon.
12 Maʼañic miʼ mejlel lon cʌl chaʼan lajal lon lojon bajcheʼ jiñi muʼ bʌ i bajñel qʼuelob i bʌ ti ñuc i maʼañic mic laj lon c bʌ ti bajcheʼ yilalob. Miʼ tsajiñob i bʌ* pero yaʼ miʼ chucob i bʌ ti chuqui wem bʌ miʼ ñaʼtañob, i cheʼ bajcheʼ iliyi miʼ pʌsob chaʼan maʼañic miʼ chʼʌmbeñob i sujm.
13 Pero joñon lojon maʼañic mi caj j qʼuel lon c bʌ ti ñuc chaʼan jiñi mach bʌ ochemic ti jiñi eʼtel tsaʼ bʌ aqʼuentiyon lojon, mi caj j qʼueleʼ lon c bʌ ti ñuc chaʼan jiñi eʼtel tsaʼ bʌ aqʼuentiyon lon ti Dios i yaʼ ochem jaʼel chaʼan mi lon c subeñetla jiñi wen tʼan.
14 Tiʼ sujm, maʼañic woli c ñusan lojon ti pʼis jiñi lon queʼtel cheʼ bʌ tsaʼ cʼotiyon lon yaʼ baqui añetla come joñoñʌch lojon jiñi tsaʼ bʌ ñaxan cʼotiyon lon yaʼ baqui añetla chaʼan mic subeñet lojon jiñi wen tʼan tiʼ tojlel Cristo.
15 Maʼañic, maʼañic woli j qʼueleʼ lon c bʌ ti ñuc chaʼan jiñi mach bʌ ochemic ti jiñi eʼtel tsaʼ bʌ aqʼuentiyon lon, com cʌl, jiñi i yeʼtel yambʌlob. Pero añʌch lon c pijtaya chaʼan cheʼ bajcheʼ miʼ colel majlel laʼ ñopoñel, miʼ colel majlel jaʼel jiñi tsaʼ bʌ lon c mele yaʼ baqui mic tajeʼ lon c mel. Cheʼ jiñi muʼto caj i ñumen mejlel lon c mel.
16 Mi caj i mejlel lon c sub jiñi wen tʼan ti jiñi tejclum tac ñumen ñajtto bʌ an cheʼ bajcheʼ laʼ chaʼan, chaʼan maʼañic mij qʼueleʼ lon c bʌ ti ñuc chaʼan chuqui melbilix yaʼ baqui miʼ taj i mel yambʌ.
17 «Pero jiñi muʼ bʌ i qʼuel i bʌ ti ñuc, laʼ i qʼuel i bʌ ti ñuc tiʼ caj Jehová».*
18 Come jiñi muʼ bʌ i qʼuejlel ti utsʼat mach jiñic jiñi muʼ bʌ i bajñel qʼuel i bʌ ti ñuc, jiñʌch muʼ bʌ i qʼuejlel ti ñuc ti Jehová.*
Nota tac
^ Ti yambʌ variante: «pʼʌtʌloñʌch».
^ O «qʼuelob i bʌ».
^ Qʼuele jiñi Glosario.
^ Qʼuele jiñi Glosario.
