2 Corintios 11:1-33
11 Mic mulan cheʼ muqʼuic laʼ cuch bajcheʼ yilalon anquese lajalon bajcheʼ juntiquil tonto. ¡Pero tiʼ sujm wolix laʼ cuchon!
2 Come joñon c wentajetʌchla cheʼ bajcheʼ i wentajetʌchla Dios, joñon tsaʼ cʌcʼʌyetla chaʼan juntiquil jach laʼ ñoxiʼal mi laʼ taj, jiñi Cristo, i com c pʌsetla tiʼ tojlel cheʼ bajcheʼ juntiquil sʌc bʌ xchʼoc.
3 Pero mic bʌcʼñan chaʼan ame añic bajcheʼ mi laʼ socbentel laʼ ñaʼtʌbal yicʼot miʼ ñajtʼesʌntel ti chuqui tac i sujm yicʼot ti jiñi sʌclel yom bʌ miʼ pʌsbentel Cristo, cheʼ bajcheʼ jiñi lucum wen yujil jax bajcheʼ tsiʼ loti Eva.
4 Come, cheʼ añic majqui miʼ majlel i miʼ yʌqʼueñetla laʼ cʌn yambʌ Jesús pero mach jiñic jiñi tsaʼ bʌ lon cʌqʼueyet laʼ cʌn o mi laʼ wʌqʼuentel yambʌ espíritu qʼuexel bʌ bajcheʼ jiñi tsaʼ bʌ laʼ chʼʌmʌ o wen tʼan tac qʼuexel bʌ bajcheʼ jiñi tsaʼ bʌ laʼ jacʼʌ, jatetla mach lecojic mi laʼ qʼuel.
5 Mi cʌl tsaʼix c pʌsʌ chaʼan mach ñumen ñucobic jiñi «ñuc bʌ apóstolob» laʼ chaʼan.
6 Pero, anquese mach wen cujilic tʼan, añʌch c ñaʼtʌbal, i mach junsujmic jach bajcheʼ tsaʼ lon c pʌsbeyetla.
7 ¿O tsaʼ ba c chaʼle mulil cheʼ bʌ tsaʼ c peqʼuesa c bʌ chaʼan jatetla mi laʼ taj laʼ ñuclel, cheʼ bʌ tsaʼ c subeyetla jiñi wen tʼan yicʼot c tijicñʌyel i maʼañic tsaʼ j cʼajtibe i tojol?
8 Chaʼan mij coltañetla, tsaʼ c chilbe* chuqui an i chaʼan jiñi yambʌ congregación tac cheʼ bʌ tsaʼ c jacʼʌ c chʼʌm jiñi coltaya tsaʼ bʌ i yʌcʼʌyob.
9 Pero, cheʼ bʌ yaʼañon quicʼotetla i anto chuqui yom c chaʼan, maʼañic chuqui tsaʼ j cʼajtibe yambʌlob, come jiñi hermanojob tsaʼ bʌ cʼotiyob tilemoʼ bʌ ti Macedonia tsiʼ yʌqʼueyoñob pejtelel chuqui i cʼʌjñibal c chaʼan. Cheʼʌchi, tsaʼ c chaʼle wersa chaʼan maʼañic chuqui mij cʼajtibeñetla, i cheʼʌch mi caj c bej mel.
10 Cheʼ bajcheʼ tiʼ sujm añʌch tic tojlel jiñi i sujmlel Cristo, maʼañic mi caj j cʌy c sub iliyi yaʼ ti tejclum tac chaʼan Acaya.
11 ¿I chucoch? ¿Tiʼ caj ba maʼañic mij cʼuxbiñetla? Dios yujil chaʼan mucʼʌch j cʼuxbiñetla.
12 Pero mi caj c bej mel jiñi woli bʌ c mel, chaʼan jiñi yomoʼ bʌ i pʌs chaʼan lajalob bajcheʼ joñon lon maʼañic baqui miʼ mejlel i chucob i bʌ chaʼan miʼ qʼuelob i bʌ ti ñuc tiʼ caj chuqui melbil i chaʼañob.
13 Come jiñi wiñicob mach i sujmic bʌ apóstolob, xʼeʼtelob muʼ bʌ i lotiñob yambʌlob i miʼ cuyob i bʌ bajcheʼ apóstolob i chaʼan Cristo.
14 I maʼañic miʼ toj sajtel c pusicʼal, come jinto jiñi Satanás miʼ cuy i bʌ ti ángel chaʼan bʌ sʌcjamañiyel.
15 Jin chaʼan, i tilelʌch cheʼ jiñi i wiñicob miʼ cuyob i bʌ ti xʼeʼtelob muʼ bʌ i melob chuqui toj. Pero cheʼʌch mi caj i yujtelob cheʼ bajcheʼ yom tiʼ caj tsaʼ bʌ i meleyob.
16 Mic chaʼ subeñetla: Maʼañic majqui yom miʼ ñaʼtan chaʼan lajalon bajcheʼ juntiquil tonto. Pero, mi cheʼʌch mi laʼ ñaʼtan, chʼʌmʌyonla bajcheʼ juntiquil tonto, chaʼan muʼto c mejlel c tsʼitaʼ qʼuel c bʌ ti ñuc jaʼel.
17 Wʌle maʼañic woli c lajin lac Yum chaʼan mic pejcañetla, cheʼʌch woli c mel bajcheʼ miʼ mel juntiquil tonto, muʼ bʌ i bajñel ñop tiʼ tojlel i miʼ qʼuel i bʌ ti ñuc.
18 Come cabʌlob muʼ bʌ i qʼuelob i bʌ ti ñuc chaʼan chuqui tac an ti pañimil, cheʼʌch mi caj c mel jaʼel.
19 Come jatetla «machʌchcu tontojeticla», wen jach mi laʼ cuch jiñi tontojoʼ bʌ.
20 Tiʼ sujm, mi laʼ cuch majqui jach miʼ sujtesañetla ti xyaj eʼtel, majqui jach miʼ sʌclan i wenlel ti jiñi laʼ chubʌʼan, majqui jach miʼ chilbeñetla chuqui an laʼ chaʼan, majqui jach ñumen ñuc bʌ miʼ yubin i bʌ ti laʼ tojlel yicʼot majqui jach miʼ jatsʼetla tiʼ ñiʼ laʼ wut.
21 Quisintic ti lon c tojlel cheʼ mi cʌl iliyi, pero mic mel come cʼuñon lon yilal chaʼañetla.
Pero mi an mach bʌ quisintiquic miʼ yubiñob cheʼ bʌ miʼ qʼuelob i bʌ ti ñuc, joñon jaʼel mach quisintiquic mi caj cubin anquese an muʼ bʌ caj i qʼueloñob bajcheʼ juntiquil tonto.
22 ¿Hebreojoʼ ba? Jiñoñʌch jaʼel. ¿Israelitajoʼ ba? Jiñoñʌch jaʼel. ¿I pʼolbaloʼ ba Abrahán? Jiñoñʌch jaʼel.
23 ¿Xyaj eʼteloʼ ba i chaʼan Cristo? Mic jacʼ bajcheʼ juntiquil sojquem bʌ: Ñumen xʼeʼtelonto bajcheʼob. Tsaʼ c ñumen chaʼle eʼtel, ñumen ochemon ti cárcel, wen jatsʼbilon i mach junsujtelic jach colel c chʌmel.
24 Joʼyajl tsiʼ jatsʼʌyoñob jiñi judíojob i 39 c jatsʼol tsaʼ c chʼʌmʌ ti jujunyajl,
25 uxyajl tsaʼ jajtsʼiyon ti teʼ, junyajl tsiʼ juluyoñob ti xajlel,* cheʼ bʌ woliyon ti xʌmbal ti barco uxyajl tsaʼ jili jiñi barco i jumpʼejl acʼʌlel yicʼot jumpʼejl qʼuin tsaʼ ajñiyon baqui wen tam jaʼ.
26 Wen chaʼlebil c chaʼan ñajt bʌ xʌmbal, an c ñusa wocol ti colem jaʼ, tiʼ caj xujchʼob, tiʼ caj jiñi c tejclum yicʼot yambʌ tejclum tac, ñusʌbil c chaʼan wocol ti ñuqui tejclum tac, tiʼ tiquiñal lum, ti mar yicʼot tiʼ tojlel mach bʌ i sujmic hermanojob.
27 Maʼañic j cʼaj o chaʼlebil c chaʼan eʼtel yicʼot tsaʼ c wen chaʼle wersa, an acʼʌlel tac baqui maʼañic tsaʼ mejliyon ti wʌyel, ñusʌbil c chaʼan wiʼñal yicʼot tiquin tiʼ, mach junsujtelic jach maʼañic chuqui tsaʼ j cʼuxu, ñusʌbil c chaʼan tsʌñal yicʼot tsaʼ jili tac c pislel.
28 I mach cojach jiñi, yaʼ ochem jaʼel jiñi muʼ bʌ c ñaʼtan ti jujumpʼejl qʼuin: Mic pensarin pejtelel jiñi congregación tac.
29 Mi an juntiquil cʼun bʌ, ¿mach ba cʼuñic mi cubin c bʌ? I mi an juntiquil muʼ bʌ i yʌjqʼuel ti yajlel, ¿tijicñayon ba?
30 Mi yom mi laj qʼuel lac bʌ ti ñuc, mi caj j qʼuel c bʌ ti ñuc chaʼan chuqui tac miʼ pʌs jiñi j cʼunlel.
31 Jiñi i Dios yicʼot i Tat lac Yum Jesús, jiñi yom bʌ miʼ yʌqʼuentel i ñuclel tiʼ pejtelel ora, yujil chaʼan mach woliyoñic ti lot.
32 Ti Damasco, jiñi gobernador ochem bʌ tiʼ wenta jiñi rey Aretas tsiʼ yʌcʼʌ xcʌntayajob yaʼ tiʼ tiʼ tac jiñi tejclum chaʼan miʼ chucoñob,
33 pero tsiʼ juʼsayoñob ti jumpʼejl chiquib yaʼ ti ventana am bʌ yaʼ ti muro i cheʼ bajcheʼ jiñi tsaʼ putsʼiyon.
