2 Corintios 12:1-21
12 Yom mij qʼuel c bʌ ti ñuc. Mi caj cʌl jiñi tsaʼ tac bʌ i pʌsbeyon lac Yum yicʼot jiñi tʼan tac tsaʼ bʌ i yʌqʼueyon, anquese maʼañic chuqui miʼ tajtʌl yicʼot iliyi.
2 Joñon j cʌñʌ juntiquil wiñic xcʌntʼan bʌ i chaʼan Cristo i añix 14 jab tsaʼ pʌjyi majlel tiʼ yuxlajmlel panchan, mach cujilic mi yicʼot i bʌcʼtal o mach yicʼotic, Dios jach yujil.
3 Cheʼʌchi, j cʌñʌ jiñi wiñic, mach cujilic mi yicʼot i bʌcʼtal o mach yicʼotic, Dios jach yujil jiñi,
4 tsaʼ pʌjyi majlel ti paraíso i tsiʼ yubi tʼan tac mach bʌ añic miʼ mejlel ti ajlel yicʼot maʼañic bʌ miʼ yʌqʼuentel i yʌl mi juntiquilic wiñic.
5 Mi caj j qʼuel c bʌ ti ñuc chaʼan jiñi wiñic, pero joñon jin jach mi caj j qʼuel c bʌ ti ñuc chaʼan jiñi j cʼunlel tac.
6 Pero mi com j qʼuel c bʌ ti ñuc, maʼañic woli c laj c bʌ bajcheʼ juntiquil tonto come i sujmʌch muʼ bʌ caj cʌl. Pero maʼañic mij qʼuel c bʌ ti ñuc chaʼan maʼañic majqui ñumen ti pʼis miʼ yʌqʼueñon c ñuclel chaʼan chuqui miʼ qʼuel tic tojlel o chaʼan chuqui mi cʌl
7 tiʼ cajach mic pʌsbentel chuqui tac wen utsʼatax bʌ.
Chaʼan maʼañic mic chañʼesan c bʌ, an chuqui tsaʼ aqʼuentiyon tic bʌcʼtal lajal bʌ bajcheʼ chʼix, juntiquil i yángel Satanás, woli bʌ i bej locʼjajtsʼiñon* chaʼan maʼañic mic chañʼesan c bʌ.
8 Uxsujtel tsaʼ c sube lac Yum ti wocol tʼan chaʼan miʼ locʼsʌbeñon.
9 Pero tiʼ subeyon: «Jasʌlix jiñi ñuc bʌ cutslel ti a tojlel, come jiñi c pʼʌtʌlel tsʼʌcʌl miʼ tsictiyel ti jiñi a cʼunlel». Jin chaʼan ti jumpʼejl c pusicʼal mi caj j qʼuel c bʌ ti ñuc chaʼan jiñi j cʼunlel tac, chaʼan jiñi i pʼʌtʌlel Cristo miʼ bej ajñel tic tojlel bajcheʼ jumpʼejl pisil bʌ otot.
10 Jin chaʼan, tijicña mi cubin c bʌ cheʼ an j cʼunlel, cheʼ mic pʼajtʌl* yicʼot cheʼ anto chuqui yom c chaʼan, cheʼ mij contrajintel yicʼot cheʼ mic ñusan wocol tiʼ caj Cristo. Come cheʼ bʌ cʼuñon, pʼʌtʌlon.
11 Ti laʼ caj woliyon ti tʼan bajcheʼ juntiquil tonto. Pero cheʼ tsaʼic laʼ wʌlʌ chuqui tac wem bʌ tic tojlel, mach cheʼic woliyon ti tʼan bajcheʼ iliyi. Come tsaʼix c pʌsʌ chaʼan mach ñumen ñucobic jiñi «ñuc bʌ apóstolob» laʼ chaʼan, anquese maʼañic majquiyon.
12 Tiʼ sujm, joñon maʼañic tsaʼ lujbʼayon c pʌsbeñetla jiñi muʼ bʌ i yʌcʼ ti cʌjñel chaʼan apóstoloñʌch, tsaʼ c mele milagro tac yicʼot chuqui ñuc tac bʌ.
13 Joñon maʼañic chuqui tsaʼ j cʼajtibeyetla, jin jach tiʼ caj iliyi mach lajaleticla bajcheʼ jiñi yambʌ congregación tac. ¿Mach ba weñic chuqui tsaʼ c mele? Mi cheʼʌch bajcheʼ jiñi, miʼ mejlel laʼ ñusʌbeñon jiñi c sajtemal.
14 Qʼuelela, ili i yuxyajlelix chajpʌbilon chaʼan mic majlel c julaʼtañetla, i maʼañic chuqui mi caj j cʼajtibeñetla. Maʼañic woli c sʌclan chuqui an laʼ chaʼan, jatetla woli c sʌclañetla. Come mach jiñic jiñi alobob* yom bʌ miʼ tempañob chuqui mi caj i yʌqʼueñob i tat i ñaʼ, jiñobʌch jiñi tatʌlob yom bʌ miʼ tempañob chaʼan miʼ yʌqʼueñob jiñi i yalobilob.
15 Pero joñon, tiʼ pejtelel c pusicʼal mi caj c jisan pejtelel chuqui an c chaʼan i mi caj c junyajl jisan c bʌ ti laʼ tojlel. Mi joñon mic wen cʼuxbiñetla, ¿tsʼitaʼ jach ba yom mi laʼ cʼuxbiñon?
16 I anquese maʼañic chuqui tsaʼ j cʼajtibeyetla, mi laʼ wʌl chaʼan tsaʼ c «lotiyetla» yicʼot chaʼan tsaʼ j cʼʌñʌ yac tac chaʼan mic «chuquetla».
17 Come joñon maʼañic tsaʼ j cʼʌñʌ jiñi tsaʼ bʌ c chocoyob majlel chaʼan mic locʼsan c wenlel ti laʼ tojlel, ¿o tsaʼʌch?
18 Tsaʼ c sube Tito ti wocol tʼan chaʼan miʼ julaʼtañetla i tsaʼ c choco majlel yicʼot jiñi yambʌ hermano. ¿Am ba bajcheʼ tsiʼ locʼsa i wenlel Tito ti laʼ tojlel? Joñon lojon tsaʼ lon c pʌsʌ chaʼan lajal lon c ñaʼtʌbal, ¿o mach cheʼiqui? Lajal lon c melbal tsaʼ lon c pʌsʌ, ¿o mach cheʼiqui?
19 ¿Tsaʼ ba laʼ lon ñaʼta tilel chaʼan woli j coltan lon c bʌ ti laʼ tojlel? Tiʼ tojlelʌch Dios woliyon lojon ti tʼan bajcheʼ xcʌntʼañob i chaʼan Cristo. Anquese cheʼ bajcheʼ jiñi, cʼuxbibiletbʌla, pejtelel muʼ bʌ lon c mel chaʼañʌch mi lon c pʼʌtʼesañetla.
20 Come mic bʌcʼñan chaʼan cheʼ bʌ mij cʼotel mach cheʼic mic tajetla cheʼ bajcheʼ com yicʼot chaʼan joñon mach cheʼic yilalon cheʼ bajcheʼ laʼ wom, ame añic leto,* tsʼaʼleya, michʼ, mi laʼ contrajin laʼ bʌ, mi laʼ chaʼlen jopʼtʼan, mi laʼ wʌl yambʌlob, mi laʼ chañʼesan laʼ bʌ yicʼot ame añic wocol ti laʼ tojlel.
21 Cheʼ bʌ mic chaʼ majlel, tajol jiñi c Dios miʼ peqʼuesañon ti laʼ tojlel. Tajol yom mi cubin c chʼijyemlel come cabʌlob maxto bʌ i chaʼ ñaʼtayob i bʌ* chaʼan jiñi mulil tsaʼ bʌ i meleyob ti ñaxan. Maxto i qʼuextayob i ñaʼtʌbal chaʼan i melol chuqui tac bibiʼ, chaʼan jiñi tsʼiʼlel* yicʼot chaʼan jiñi quisintic jax bʌ i melbalob* ti ñaxan.
Nota tac
^ O «jatsʼon».
^ O «ñiqʼuisubentel».
^ O «alpʼeñelob».
^ O «quera».
^ Qʼuele jiñi Glosario, chaʼ ñaʼtan a bʌ.
^ Ti griego, pornéia. Qʼuele jiñi Glosario, tsʼiʼlel.
^ Qʼuele jiñi Glosario, quisintic jax bʌ melbalʌl.
